Kosovë: Protesta kundër ministrit Jabllanoviç, dhjetëra qytetarë e policë të plagosur

[Albo]

Minatorët e Trepçës në grevë: Cdo bëhet me kompaninë! Drejtori ‘përplaset’ me deputetët e AAK



PRISHTINE-Minatorët e kombinatit “Trepça” kanë hyrë në grevë që nga mëngjesi i sotëm, bëjnë të ditur zyrtarët e këtij kombinati.

Rreth 250 minatorë janë duke qëndruar në horizontin e 10-të në minierën e Stantërgut. Ata po kërkojnë nga Qeveria sqarim për projektligjin që është shtyrë dhe duan të dinë për fatin e ‘Trepçës’.

Sebahate Fetahu, asistente e drejtorit të “Trepçës”, Ahmet Tmava, i bëri te ditur Radios Evropa e Lirë se të gjithë punëtorët e këtij kombinati janë në grevë.

“Minatorët duan sqarim për projektligjin që është shtyrë dhe duan sqarim për fatin e ‘Trepçës’. Për momentin, deri më tani, askush nga qeveria nuk ka shkuar aty dhe as qe ka lajmëruar për një gjë të tillë”, ka theksuar Fetahu.

Ajo ka shtuar se minatorët u kanë thënë drejtuesve të “Trepçës” se “derisa të merret ndonjë vendim prej qeverisë, grevën nuk do ta ndalin”.

Tmava konfirmoi se punëtorët që ndodhen 650 metra nën tokë aktualisht nuk janë duke punuar.
“200 deri 250 punëtorë momentalisht nuk janë duke punuar dhe po kërkojnë garanci shtesë nga liderët institucionalë” tha Tmava.

DREJTORI I TREPÇËS ‘PËRPLASET’ ME DEPUTETËT E AAK-SË
Ahmet Tmava, drejtor i kombinatit “Trepça” është përplasur me deputet të AAK-së, Donika Kada-Bujupi dhe Pal Lekaj, të cilët kishin shkuar për të vizituar minatorët grevistë.
Kjo ka ndodhur pasi Tmava iu ka kërkuar që të largohen nga greva me qëllim që të mos e politizojnë atë.

Por deputetët e AAK-së kanë refuzuar të largohen, duke thënë se ata janë të zgjedhurit e popullit dhe kanë të drejtë të qëndrojnë.

(d.b/ma.ar/BalkanWeb)

[Albo]

Qeveria e Kosovës: S’kemi hequr dorë nga “Trepça”

PRISHTINE - Qeveria e Kosovës thekson se “Trepça” është pasuri e Kosovës, është organizatë në territorin e saj, prandaj “me këtë kombinat do të udhëheqin institucionet e Republikës së Kosovës, të parapara me ligj, në interes të punonjësve të ‘Trepçës’ dhe të ekonomisë së Kosovës”.
Në një deklaratë të shpërndarë për mediat, qeveria e Kosovës bën të ditur se “Kuvendi me kërkesë të Qeverisë, dje ka aprovuar Ligjin për Plotësimin dhe Ndryshimin e Ligjit për Riorganizimin e Ndërmarrjeve të Caktuara dhe Pasurisë së Tyre, me të cilin janë krijuar kushtet për punë normale të ‘Trepçës’, duke evituar fillimin e procedurave për falimentim”.
“Qeveria po ashtu dje e ka proceduar në Kuvend Projektligjin për Plotësimin dhe Ndryshimin e Ligjit për Ndërmarrjet Publike, me të cilin parashihet që për ‘Trepçën’ të hartohet Strategji Zhvillimore dhe të nxirret ligj i veçantë”, thuhet në deklaratë.
“Çdo tentativë për të mbjellë huti se është hequr dorë nga ‘Trepça’ është e pavërtetë dhe qëllimkeqe”, -përfundon deklarata e qeverisë së Kosovës.

(er.nu/BalkanWeb)

[Albo]

Thaçi: Trepça është pasuria jonë dhe nuk do diskutohet askund tjetër

PRISHTINË- Zëvendëskryeministri dhe ministri i Punëve të Jashtme të Kosovës, Hashim Thaçi, theksoi sot se “çështja e Trepçës nuk do të diskutohet askund përveçse në parlamentin e Kosovës, pasi ajo është pasuria e Kosovës”, sipas KosovaPress.

Këto deklarata, Thaçi i bëri gjatë një konference të përbashkët për shtyp, me homologun austriak Sebastian Kurz, i cili ndodhet për vizitë në Kosovë.

“Bashkë me ekspertët ndërkombëtarë do të nxjerrin një legjislacion të përshtatshëm për stabilizimin e kësaj ndërmarrje. Sa i përket Trepçës ne kemi nxjerrë dje një legjislacion të veçantë në Kuvendin e Kosovës. Me këtë legjislacion e kemi shpëtuar nga falimentimi Trepçën , ndërsa kemi fituar edhe në kohë që bashkërisht me ekspertë edhe ndërkombëtarë të nxjerrim legjislacionin e duhur, që do të stabilizojë atë kombinat dhe në të njëjtën kohë do të jetë i përshtatshëm edhe për Kosovën , por nuk do të jetë çështje që do të diskutohet në një vend tjetër, sepse ajo është pasuria e Kosovës”, tha Thaçi.

Zëvendëskryeministri Thaçi e ka njohur homologun e tij me zhvillimet aktuale në vend, për njohjet që shteti ka pranuar deri tani për anëtarësimin e Kosovës në organizatat ndërkombëtare, për dialogun mes Kosovës dhe Serbisë e po ashtu edhe për ekstremizmin dhe radikalizmin.

Thaçi, ka potencuar se Kosova është lider në rajon kundër ekstremizmit dhe radikalizmit. Kosova ka ndërmarrë hapa konkretë, jashtëzakonisht të rëndësishëm ndaj gjithë elementëve që kanë paraqitur rrezik për shoqërinë e Kosovës. Tani jemi duke nxjerrë edhe ligjin që ndalon shkuarjen e qytetarëve apo pjesëmarrjen në luftëra të huaja të qytetarëve. Mendoj se do të na ndihmon shumë sidomos në përmbushjen e asaj zbrazëtire ilegale që ka ekzistuar dhe që kemi pasur edhe ne në Kosove dhe që mund të them lirisht që ne do të jemi të pakompromis dhe do të kemi zero tolerancë ndaj elementeve ekstremistë dhe radikalë kudo dhe kudo që paraqiten”, theksoi Thaçi.
Ministri i Punëve të Jashtme të Austrisë, Sebastian Kurz, theksoi se pjesëmarrja në luftërat e Sirisë dhe Irakut është shumë e madhe dhe ky numër është shqetësues.“Ne po i shohim tendencat radikale gjithkund në Evropë dhe luftën kundër tyre. Edhe në Austri ka persona që kanë kaluar në Irak dhe Siri për të mbështetur terroristët atje dhe me rëndësi është që të jemi unik në luftën kundër këtij lloj radikalizmi dhe e di që edhe në Kosovë, në kohën kur ju ishit kryeministër është punuar shumë në këtë fushë, prandaj e di që keni punuar shumë edhe në dialogun ndërfetar dhe po ec shumë mirë, por që jeni edhe shumë i vendosur kundër radikalizmit që të mund të zhvillohet islami evropian në Kosovë edhe më tutje, ashtu siç ka qenë deri më tani pa lënë vend për radikalizëm”, u shpreh Kurz.
Zevendeskryeministri dhe ministri i Punëve të Jashtme i Kosoves, Hashim Thaçi ne takimin me Ministrin e Puneve te Jashtme te Republikes se Austrise, Sebastian KurzTë dy ministrat kanë diskutuar edhe për investimet e mëtejshme austriake në Kosovë. Thaçi shtoi se Kosova është duke vazhduar përpjekjet për tërheqjen edhe të investitorëve austriakë dhe se institucionet janë duke punuar për krijimin e kushteve në këtë drejtim.
“Ne do të punojmë maksimalisht edhe në raportet bilaterale me Austrinë, Austria është një prej vendeve që ka një prezencë të fuqishme ndërkombëtare edhe në Kosovë, qoftë me KFOR-in, OSBE-në dhe me mekanizmat tjerë ndërkombëtarë, por në të njëjtën kohë duhet të vazhdojmë që të inkurajojmë edhe më tepër investitorët austriakë që janë të dëshmuar të suksesshëm në veçanti në sistemin energjetik ujor, do të vazhdohet që të vijnë edhe të tjerë në mënyrë që edhe Kosova me atë përvojë të investitorëve austriak hapen vende të reja të punës, të rritet mirëqenia sociale e qytetarëve . Unë kam besim të plotë se këto marrëdhënie tona vetëm sa do të rriten, do të forcohen dhe do të afirmohen”, u shpreh Thaçi.

Ministri i Puneve te Jashtme te Republikes se Austrise, Sebastian Kurz ne PrishtineKurz duke konfirmuar mbështetjen e shtetit të Austrisë u shpreh se “me të gjitha përpjekjet tona ndërkombëtare sidomos sa i përket Organizatës së Këshillit të Evropës, do të përpiqemi të japim mbështetjen tonë që të merrni të paktën integrimin në Evropë”.

(ma.ar/BalkanWeb)

[Albo]

Studentët e UP-së në protetë: “Isën e japim, Trepçën jo”



PRISHTINE-Studentë të Universitetit të Prishtinës kanë organizuar një protestë në qendër të Prishtinës për të kundërshtuar vendimin e fundit të Kuvendit të Kosovës për mosmarrjen nën kontroll të gjigantit “Trepça” por kanë kërkuar edhe shkarkimin e Ministrit për Kthim dhe Komunitete, Aleksandër Jabllanovic.

Studentë të shumtë i ishin përgjigjur ftesës për protestën me moton “Kryeministër Shkarkoje”, ndërsa thërrisnin parulla “Isën e japim, Trepçën s’e japim”.

(d.b/BalkanWeb)

[Albo]

SHBA parandaloi shtetëzimin e “Trepçës” e jo Serbia



Gjiganti metalurgjik “Trepça” sërish mbetet nën menaxhimin e Agjencisë Kosovare të Privatizimit.

Kuvendi i Kosovës miratoi ndryshimet në projektligjin për riorganizimin e ndërmarrjeve të caktuara dhe pasuritë e tyre, sipas të cilit AKP-së i jepet kohë shtesë për përgatitjen e planit për riorganizimin e “Trepçës”.

Burime zyrtare thanë për Top Channel, në kushte anonimiteti, se ka qenë ambasada amerikane, e cila e ka parandaluar shtetëzimin e “Trepçës” dhe jo qeveria e Serbisë.

Kjo pasi, sipas burimeve, procesi i shtetëzimit nuk përkon me programet qeveritare të dy partive të djathta PDK-së dhe LDK-së që qeverisin Kosovën. Po kështu amerikanët e kanë vlerësuar si të dëmshëm që qeveria t’i marrë përsipër borxhet e pretenduara nga kreditorët që kalojnë shifrën 1 miliard euro. Sidoqoftë, zyrtarisht kjo çështje në kuvend nuk u sqarua.

Kryeministri Isa Mustafa tha se me ligjin për riorganizimin e ndërmarrjeve të caktuara po parandalohet likuidimi i Trepçës.

“Me këtë ligj krijohen kushtet që ne ta mundësojmë fillimin e procesit dhe marrjen e procesit për likuidim të “Trepçës”. Ne japim një afat gati 1 vit e gjysmë për mundësinë e ofrimit të planit për menaxhim të “Trepçës” dhe po ashtu jepet edhe një afat shtesë me të cilin AKP mund të kërkojë nga Dhoma e veçantë e Gjykatës Supreme për zgjatjen e afatit për dorëzimin e planit të riorganizimit”, ka deklaruar Mustafa.

Tërheqja e qeverisë së Kosovës nga ndryshimi i pronësisë së “Trepçës” shkaktoi përplasje të forta mes pozitës dhe opozitës gjatë seancës në kuvend. Deputetët e opozitës nuk i përkrahën ndryshimet në ligjin për riorganizimin e ndërmarrjeve të caktuara. Dhe duke qenë se gjithçka ndodhi në procedurë të përshpejtuar, opozita kundërshtoi votimin për shmangie nga rregullorja e punës me argumentin se votimi nuk kaloi dhe si i tillë po kontrabandohet.

“Rëndësinë dhe kompleksitetin e “Trepçës”, mendja na e thotë se ju nuk e dini se çfarë është qeverisja, nuk e dini se çfarë është politika e as ekonomia, nuk e dini ç’ka është e si menaxhohet pasuria kombëtare. Prandaj ose jeni të frikësuar nga dikush apo jeni të shantazhuar nga dikush, cila do të jetë arsyeja vendi në këtë mënyrë nuk mund dhe nuk duhet të qeveriset”, është shprehur Jakup Krasniqi, deputet i NISMA-s.

Kryetari i Kuvendit të Kosovës urdhëroi përsëritjen e procedurës së votimit, por një veprim i tillë ngjalli edhe më shumë pakënaqësi te opozita, e cila e quajti antikushtetuese dhe si i tillë duhet të përfundojë në Gjykatën Kushtetuese.

“Ne kemi insistuar që sot të diskutojmë ashtu siç ishim marrë vesh javën e kaluar, për plotësimin e ligjit për ndërmarrjet publike, përmes të cilit “Trepça” do të shndërrohej në ndërmarrje publike. Kjo ka qenë e vërteta institucionale deri dje, kur pa pritur qeveria e Kosovës mori një kthesë të madhe për t’u tërhequr nga ai ligj, pas kërcënimeve që erdhën nga Serbia. Konsiderojmë që kjo mënyrë e trajtimit të çështjes së “Trepçës” edhe pse formalisht mund të duket në rregull, realisht ka shumë të panjohura dhe rreziqe”, tha Visar Ymeri, deputet i lëvizjes Vetëvendosje.

Kuvendi i Kosovës do ta shqyrtojë të martën projektligjin tjetër, atë për ndryshimin e ndërmarrjeve publike, por e ardhmja e “Trepçës do të përcaktohet me një ligj dhe strategji të veçantë.

(d.b/BalkanWeb)

[Llapi]

Policia: Organizatorët nuk e kanë lajmëruar te ne protestën e sotme


GazetaExpress E shtune, 24 Janar 2015 12:50
Policia e Kosovës ka konfirmuar se ka angazhuar policë të mjaftueshëm për të mbajtur rendin dhe qetësinë publike me rastin e organizimit të protestës së sotme në Prishtinë.

Zëdhënësi i Policisë, Baki Kelani, ka treguar se protesta nuk është lajmëruar ligjërisht sipas procedurave që parashihen me Ligjin për tubimet publike.

“Jo, nuk e kanë lajmëruar protestën sipas procedurave qysh e parasheh Ligji për tubimet publike. Sipas Ligjit ata duhet ta lajmërojnë protestën. Në bazë të procedurave që parashihen me Ligjin për tubimet publike parasheh lajmërimin e protestës ata nuk e kanë lajmëruar”, ka thënë Kelani, për Gazetën Express.

Pavarësisht kësaj, Kelani ka treguar se Policia ka hartuar planin operativ dhe gjithçka po

Ne kemi të angazhuar zyrtarë policorë të mjaftueshëm për të mbajtur rendin dhe qetësinë publike.

[Llapi]

Shoqata e të pagjeturve: Jo, nuk marrim pjesë në protestë


Kajtaz Gecaj • 24 Janar 2015 • 12:36 •

Shoqata e të Pagjeturve në Kosovë e cila drejtohet nga Prenk Gjetaj, nuk do të merr pjesë në protestën e sotme në Prishtinë kundër ministrit për Kthim dhe Komunitete, Aleksandër Jabllanoviç.

Gjatë mbledhjes të Këshillit Koordinues të Shoqatave të të pagjeturve në Mitrovicë është marr vendim që askush prej tyre mos të marrin pjesë në këtë protestë.

Arsyeja kryesore është që protesta është e organizuar nga partitë politike. Kësisoj, ata kanë kërkuar nga këto subjekte politike të mos manipulojnë në emër të të pa gjeturve. /Zëri/

[Llapi]

Protestuesit thyen xhamat e Qeverisë
24.01.2015 | 17:02
Në përfundim të protestës, disa protestues kanë thyer xhamat e objektit të Qeverisë në pjesën përballë sheshit “Skënderbeu”.
Policia e Kosovës në fillim nuk ka ndërhyrë, por më vonë ka ndërhyrë për të larguar protestuesit nga pjesa afër objektit të Qeverisë, ku po gjuanin me gjësende të forta.
Policia ka përdorur edhe gaz lotsjellës për të shpërndarë një grup të vogël protestuesish, të cilët kishin mbetur ende në sheshin“Skënderbeu” .
Ndërsa, Baki Kelani zëdhënës i policisë ka thënë se, fillimisht nuk kanë ndërhyrë, me qëllim që mos ta pengojnë protestën. Por, më vonë, pas disa thirrjeve drejtuar protestuesve që të ndalojnë sulmin ndaj objekteve institucionale, dhe mos largimit të tyre, atëherë është detyruar të ndërmerren masa për largimin e protestuesve. (lajmi.net)

[Llapi]

Jahjaga dënon aktet vandale në protestë
24.01.2015 | 18:50
Presidentja e Kosovës, Atifete Jahjaga, ka dënuar ashpër aktet vandale që ndodhën në protestën e së shtunës në Prishtinë.
Jahjaga ka thënë se të gjithë kanë të drejtë të protestojnë dhe ka kërkuar nga organizatorët e protestës të distancohen nga turmat që kanë dëmtuar pronën publike dhe kanë sulmuar policinë. “E konsideroj protestën e sotme në Prishtinë si një të drejtë demokratike të qytetarëve të Kosovës për të shprehur kërkesat e tyre. Megjithëkëtë dënoj ashpër aktet vandale të një grupi të vogël protestuesish ndaj pronës publike dhe private të qytetarëve të Republikës së Kosovës dhe kërkoj që organizatorët e protestës të distancohen nga turmat që po sulmojnë Policinë e Kosovës dhe po dëmtojnë institucionet e Kosovës e bizneset në qytet. E drejta për të protestuar është e drejtë e pamohueshme që garantohet dhe ushtrohet në çdo demokraci, por atë e përcjellë edhe përgjegjësia për të ruajtur rendin publik dhe pronën e ndërtuar me shumë sakrificë, djersë e mund nga qytetarët e Kosovës. Ftoj të gjitha palët për qetësi dhe demonstrim te pjekurisë politike dhe shoqërore”, ka thënë në reagimin e Jahjagës.

[Llapi]

Qe kush janë huliganët e 'Vetëvendosjes' që thyen xhamat e Qeverisë (Foto)


GazetaExpress E shtune, 24 Janar 2015 17:59
Këta janë disa nga huliganët të cilët thyen xhamat e ndërtesës së qeverisë dhe sulmuan policinë që qëndronin përpara kësaj ndërtese.

Në mesin këtyre huliganëve të 'Lëvizjes Vetëvendosje' që gjuanin me gurë dhe mjete tjera të forta, në drejtim të ndertesës së Qeverisë së Kosovës, ka pasur edhe fëmijë. Po ashtu, shumica prej tyre kanë mbajtur në fytyrë maska të zeza apo shalle.

Express ju sjell fotografi të realizuara nga Kushtrim Rudari ku shihen disa nga sulmuesit që nuk mbanin maska në fytyrë.