Basha nga Brukseli: Zgjedhjet lokale, referendum kundër ndarjes territoriale

[Albo]

PD pranon hartën e re. Basha nga Brukseli: Zgjedhjet lokale, referendum kundër ndarjes



Duket se Partia Demokratike ka dhënë shenjat e para të tërheqjes nga kundërshtimi i hartës së re territoriale. Pasi humbi betejën në Gjykatën Kushtetuese dhe së fundmi në Kolegjin Zgjedhor, kreu i PD-së, Lulzim Basha ka deklaruar se zgjedhjet lokale të 21 qershorit do të jenë si një formë referendumi nga ana e qytetarëve për ndarjen që u miratua vetëm me votat e mzhorancës.

Këto deklarata, Basha i bëri nga Brukseli, ku ndodhet i ftuar nga Asambleja Politike e Partisë Popullore Evropiane.

“PD ka qenë dhe është e vendosur që sovranit, qytetarëve shqiptarë të mos u mohohet kurrë e drejta për të vendosur për hartën territoriale, – ka thënë lideri demokrat. – Harta aktuale ka qenë, është dhe do të mbetet e papranueshme për PD. Ajo bie ndesh me interesat e qytetarëve shqiptarë. Për këtë arsye, ne i konsiderojmë zgjedhjet lokale të 21 qershorit si një referendum të madh qytetar, për tu shprehur me votë, jo vetëm për kandidatët e opozitës, por edhe kundër kësaj ndarjeje territoriale dhe për t’i hapur rrugë një procesi, i cili nuk do të vonojë, ku së bashku me qytetarët shqiptarë do të vendosim hartën territoriale që është në favorin e interesave të tyre”.

Basha më pas shtoi se ka kërkuar nga ndërkombëtarët që të vëzhgojnë nga pranë zgjedhjet vendore, pasi sipas tij, kjo qeveria i ka dhënë provat për të vjedhur votat si në rastin e Korçës.

“Kërkova monitorim të plotë të këtyre zgjedhjeve, duke pasur parasysh që qeveria Rama-Meta e ka dhënë provën e saj të përgjithshme të shit-blerjes së votës në 23 qershor, – nënvizoi kreu i opozitës – dhe e ka përsëritur para kamerave në zgjedhjet e Korçës, duke amnistuar nga ndjekja penale keqbërësit e këtij krimi penal dhe mora garanci, se jo vetëm PPE-ja, por të gjitha institucionet e BE-së, do të jenë tërësisht të angazhuara për këtë kauzë madhore që është kauza e lirisë dhe demokracisë në Shqipëri”, u shpreh Basha.

Shqip