Ish-koloneli amerikan: "Qeveria po largon nga detyra kolonel Dritan Demiraj"

[Albo]

A po e humb Shqipëria luftëtarin e saj më të vyer?

BENJAMIN W.COVINGTON III

Për një periudhë të jashtëzakonshme prej 4 vitesh, nga 2008 e deri më 2012, isha këshilltari ushtarak i ministrit të Mbrojtjes. Detyra ime ishte që gjerësisht të “reformoja” Forcat e Armatosura Shqiptare. Disa gjëra kanë nevojë të qartësohen që në fillim përsa i përket titullit tim dhe zinxhirit tim të komandimit. Unë nuk isha këshilltari ushtarak amerikan te ministri i Mbrojtjes në Shqipëri, por thjesht këshilltari ushtarak te ministri i Mbrojtjes (dhe kam punuar me tre ministra Mbrojtjeje ndërkohë, Mediun, Oketën dhe Imamin). Kjo do të thoshte që në takime me përfaqësuesit e NATO-s apo ata amerikanë, unë gjithnjë qëndroja në anën shqiptare të tavolinës.
Me vetëm shumë pak ditë para se të përfundojë koha në dispozicion, dhe ai mund të hiqet totalisht nga rolet ushtarake, kolonel Dritan Demiraj, ish-komandant i Forcave Speciale Shqiptare dhe komandant garnizoni, gjithashtu edhe për Batalionin Komando, mund të jetë duke u nxjerrë në mënyrë të pavullnetshme në pension.
Kolonel Dritan Demiraj, pa dyshim komandanti dhe stërvitësi/edukuesi/trajnuesi më i mirë në radhët e Forcave të Armatosura, është tashmë pranë sakrifikimit nga një sistem personeli ushtarak, i cili dështon sërish në vlerësimin e profesionalizmit si një prioritet kyç. Ai shumë drejt mund të quhet “babai” i Forcave Speciale Shqiptare, të cilat ai i organizoi, stërviti, pajisi si dhe udhëhoqi në misionin e tyre të parë luftarak në Afganistan, aty ku ai personalisht drejtoi në çdo mision të rrezikshëm, ashtu siç ai bënte gjithmonë gjatë stërvitjeve të rrezikshme e të vështira.
Unë besoj në parimin e “situatës më të vështirë”. Pra të jesh i përgatitur për skenarin më të keq. Periudhat e tranzicionit gjithnjë ngjyrosen me optimizëm. Në të njëjtën kohë ne marrim përsipër përgjegjësi të jashtëzakonshme për rezultatet. Një gjë e tillë kërkon vëmendje të veçantë në të gjitha nivelet te Forcat e Armatosura. Sigurisht që qëllimi duhet të jetë të mos hedhim jashtë gjithçka nga e kaluara, thjesht sepse është e lidhur me të kaluarën, por të studiojmë parametrat dhe realitetet e mbrojtjes dhe sigurisë dhe të aplikojmë këto masa, të cilat janë më të mirëpërshtatura për kushtet e Shqipërisë. Është gjithashtu një lloj e rëndësishme që kuadrot dhe i tërë personeli të jenë të integruar në këtë proces dhe të lejohen që të marrin pjesë në debate që kanë lidhje me sigurinë kombëtare. Ka shumë eksperiencë në radhët e Forcave të Armatosura që do të ishte e gabuar të shmangej apo mënjanohej.
Qeveria shqiptare ka bërë shumë pak për të mbështetur Forcat e Armatosura të Republikës së Shqipërisë (FARSH) ose pjesëtarët në të në vitin 2014. Perspektiva buxhetore për vitin 2015 është edhe më keq seç ishte në fillim të vitit 2014. Buxheti për 2015 u ul nga një tashmë teorik 2% e PBB (GDP) në një 0.87% të deklaruar.
Morali në FARSH është i ulët dhe në rënie. Kombinimi i pagave të ulëta, mbështetja e pamjaftueshme për ushtarakët (uniformat dhe pajimet bazë të ushtarakut) dhe mungesa e koherencës në programet e mbështetjes ka çuar gjithnjë e më shumë në humbjen e vazhdueshme të personelit kyç me aftësi të larta dhe një qëllim tashmë të qartë nga ana e oficerëve të gradave të ulëta dhe nënoficerëve, të largohen nga radhët e FARSH sapo t’u paraqitet mundësia e parë. Vetëm Batalioni i Forcave Speciale humbi shumë personel kyç dhe me eksperiencë gjatë vitit 2014 dhe Forca Ajrore humbi shumicën e pilotëve më me eksperiencë dhe personelit të mirëmbajtjes drejt sektorit civil apo ministrive të cilat paguajnë më shumë.
Në përgjithësi FARSH janë duke kryer një progres të ngadaltë dhe të dhimbshëm drejt një force profesioniste moderne, por shumë është akoma për t’u përmbushur që kjo forcë të arrijë një gjendje normale gatishmërie operacionale dhe të ndërmarrë rolin e saj të plotë si një Forcë totalisht e aftë dhe partnere në NATO. Viti 2015 tashmë është destinuar të jetë një vit i vështirë për FARSH, gjatë të cilit shumë pak progres do të bëhet për të modernizuar dhe pajisur njësitë operacionale.
Edhe pse janë hedhur disa hapa përpara, ushtria vazhdon të veprojë në një mjedis shumë të kufizuar, i cili rrit inefikasitetin, mbyt iniciativën, shpërdoron burimet, dekurajon koordinimin profesional dhe bashkëpunimin, si dhe nënvleftëson sjelljen etike.
Rrënjët e këtij mjedisi negativ qëndrojnë si në mentalitetin dhe në ligjet shumë kufizuese. Prapambetjet e sistemeve totalitare janë mbi të gjitha një mbledhje pushteti në majë, dhe kjo mbetet ende në efekt me Qeverinë shqiptare dhe Ministrinë e Mbrojtjes, ku në mënyrë virtuale të gjitha vendimet merren nga ministri dhe në një shkallë më të vogël nga shefi i Shtabit të Përgjithshëm. Miratimet me gojë dhe urdhrat tip misioni (apo udhëzimet) janë gati joekzistente dhe komandantët e shtabet janë gjithnjë të ngurruar në marrjen e veprimeve vetëm nëse këto janë me shkrim dhe të vulosur nga një autoritet më i lartë. Koncepti i delegimit të autoritetit në përgjithësi kuptohet, por shumë rrallë i përqafuar. Më shpesh refuzohet në baza të një besimi të përgjithshëm që çdo ligj e bën individin të përgjegjshëm për atë dhe kështu që ai/ajo duhet të menaxhojë përgjegjësinë në detaje dhe në këtë mënyrë të ndërmarrë çdo vendim që lidhet me të. Ajo çka rrjedh është që nëse agjenti i përgjegjshëm delegon, ai do të ketë përgjegjësinë e gabimeve. Fajësia në të tillë rast sjell ndër mend imazhet e gjobave apo burgimit – një imazh i cili u përforcua pas shpërthimeve në Gërdec.
FARSH nuk kanë një sistem personeli gjithëpërfshirës dhe ndërveprues. Në mungesë të një të tilli, sistemi, në mënyrën si ekziston, përbëhet nga një seri funksionesh shumë lehtë të thyeshme, të cilat nuk janë nën menaxhimin qendror dhe nuk aplikohen në mënyrë uniforme. Kjo është një formë e shprehur pakënaqësie në të tërë forcën. Nën këto rrethana, tri fenomene madhore nënvleftësojnë efikasitetin e forcave operacionale. E para, përzgjedhja në bazë të meritave për detyra, shkollim dhe rritjen në gradë nënvlerësohet. E dyta, rotacioni i arsyeshëm i personelit ndërmjet shkollave dhe personelit në njësitë operacionale as inkurajohet dhe as implementohet në mënyrë rutinë. E Treta, menaxhimi i funksioneve të forcës pengohen nga mangësia e informacionit të duhur dhe në kohë.
Një rezultat i aftësive të centralizuara të menaxhimit ishte që procesi i përcaktimit të personelit tek organizmat e sapokrijuar zgjati për muaj të tërë përtej çdo kufiri dhe u implementua kryesisht nga komandantët, të cilët përzgjidhnin, dhe në disa raste që grindeshin me njëri-tjetrin për individë të caktuar. Shumë oficerë, nënoficerë dhe ushtarë u lanë pa detyra për periudha të gjata kohe dhe një pjese të tyre iu tha që ta kërkonin vetë një punë për të kryer. Ndërsa ky jo-sistem i menaxhimit të personelit mund të kishte eliminuar të dobëtit nga të fortët në disa vende, vetëm ka shërbyer për të rritur tendencën e përkujdesjes ndaj miqve dhe farefisit, që është metoda kryesore e përzgjedhjes në të gjithë Shqipërinë.
Aftësia e përgjithshme e zonave stërvitore për të mbështetur stërvitjen u përmirësua mjaft gjatë vitit 2010 falë përfundimit të një fshati ose MOUT (Military Operations in Urban Terrain), si dhe një poligoni të sponsorizuar nga danezët prej 300 metrash në Zall-Herr. Këto projekte të dhuruara u shtuan gjithashtu edhe nga një seri përmirësimesh inovative të drejtuara nga komandanti i BOS, kolonel Demiraj, që përfshinin një kompleks tunelesh për luftën në shpella dhe pozicione hapje zjarri me plumba prej vërteti (Shoot House), një kullë stërvitore për sulmet vertikale, një avion për stërvitje pengjesh dhe një anije të vendosur në fundin e një pishine olimpike për sulme nga uji etj.
Ky ushtar i ushtarëve, ky kolonel që shumë shpejt mund të nxirret në pension, është një prej luftëtarëve më të zellshëm për përmirësimin e shkaqeve të mësipërme të regresit që vërehen në Forcat e Armatosura Shqiptare dhe për këtë arsye ai po luftohet me mish e me shpirt nga të prapambeturit e sistemit të lidhjeve të vjetra, të cilat janë të gjithë kundër meritokracisë. Batalioni i Forcave Speciale, për arsye të statusit të tij të veçantë si njësia prioritare operacionale, ishte në atë kohë veçantia e rregullit. Njësia kreu stërvitje shumë të vështira nën mbështetjen e një grupi shumë të talentuar nga General Dynamics (GD) i përbërë nga Forca Speciale Amerikane tashmë në lirim të kontraktuar nga Zyra e Bashkëpunimit të Mbrojtjes (Office of Defense Cooperation-ODC), si dhe nga grupe aktive të Forcave Speciale Amerikane – A team dhe të tjerë. Stërvitja për më tepër ishte e fokusuar, dhe njësia ka kryer kurse bazë të Forcave Speciale shumë intensive, të cilat gjeneronin mesatarisht 57 të certifikuar nga mbi 300 kandidatë fillestarë.
Ky është kolonel Dritan Demiraj, një profesionist i pashembullt, i cili është i barabarti i drejtuesve më të mirë në çdo komb. Humbja nga radhët e Forcave të Armatosura e kolonel Demirajt do të ishte një goditje jo vetëm për Forcat e Armatosura, por edhe për kombin që ai kaq mirë i ka shërbyer.

*Ekipi i Ekipit të Modernizmit të Mbrojtjes në Shqipëri (2008-2012) në Ministrinë e Mbrojtjes.
Analist i vjetër stërvitjeje.
Kolonel (r) Ushtria Amerikane.

[xhori]

nuk eshte per tu cuditur me kesoj lajmesh, edhe sala kur erdhi ne fuqi keshtu beri

[Ingenuous]

Kur do te heqin dore keta nga ofendimi ndaj ushtarakeve?!

Kolonelin ne fjale e njoh, kemi bere disa here diskutime mbi FA, profesionist i rralle.

Ketu eshte problemi, qe keta nuk i duan profesionistet, kane alergji nga kundershtite me te drejte qe ata ngrejne per te miren e repartit te tyre, ndaj nje buxheti anormal.

Respekte kolonel, eshte koha e maskarejve por atdheu i shqiptareve!

[Albo]

Berisha akuzon Ramën për lirimin: Kolonel, nuk ke kujt t’i shkruash!

Ish-kryeministri Sali Berisha reagoi dje për lirimin nga detyra të kolonel Dritan Demirajt, për të cilin ka dhënë vlerësime maksimale. Përmes rrjetit social “Facebook”, ai ka theksuar: “Edi Rama liroi nga detyra ushtarakun më të përgatitur, më të përkushtuar, më të stërvitur dhe më të dekoruar për akte trimërie, burrërie, aftësie në kohë paqeje, por dhe direkt në front lufte, kolonel Dritan Demiraj. Koloneli komandoi për vite të tëra njësinë më luftarake, më eficiente, më të njohur, më të vlerësuar të Ushtrisë shqiptare në tërë historinë saj. Vetë ai dhe njësia që ai komandonte ka marrë nga komandantët dhe kryekomandantët e trupave të NATO-s në Afganistan vlerësimet më superlative. Mirëpo, kolonelin e bënë naiv pasioni dhe dashuria e tij për ushtrinë. Ai ende nuk e kupton se për atë nuk mund të ketë vend në shtëpinë e Edit, ministrave të tij që vjedhin paratë publike, duke u dhënë tenderat firmave të burrave, vëllezërve, motrave, baballarëve të tyre makutë dhe hajdutë. Kolonel Demiraj është naiv dhe nuk kupton se, për atë dhe sojin e tij njerëzor, nuk ka vend në shtëpinë Edit, ndrikullave, Mimrave dhe gjeneral Trafikut, që vjedhin tenderat dhe përvetësojnë pronat e Ushtrisë, apo të Gysve, Canëve, Lizave, Mozave kuqalashe, Denarve që presin gjoba marramendëse për tendera dhe për mosprishje shtëpish, kërkojnë marrëdhënie seksuale për vend pune, madje dhe me të mitur, apo presin gjoba 3000-6000 euro për të fituar ose dhe mbajtur vendin e punës. Duke ju uruar festat e fund vitit juve i nderuar z. Dritan dhe të gjithë ushtarakëve të ndershëm shqiptarë, me keqardhje më duhet t’ju them se: Kolonel, nuk ke kujt t’i shkruash!”.

Panorama

[Albo]

Dritan Demiraj: Lirimi im nga ushtria u gatua me përqasje staliniste



TIRANE - Koloneli që u lirua nga detyra për shkelje të disiplinës ushtarake thotë në një letër të hapur që botohet sot në “GSH”, se lirimi i tij nga detyra u gatua me qasje staliniste. Dritan Demiraj falenderon Berishën dhe Mediun për mbështetjen publike dhe thotë se është kundër politizimit të çështjes. “Lëvizjet e mia kanë qenë më leje. Shefi i Shtabit të mos shohë armiq imagjinarë”, thotë kolonel Demiraj. Ai ka qenë komandant i Forcave Speciale të Ushtrisë, aq sa njihet si “babai”, udhëheqësi i parë luftarak në terren dhe trajnues i misioneve “Eagle”, pedagog dhe autor i shumë librave.

LETRA E PLOTE

Paraprakisht dëshiroj të falënderoj me mirënjohjen më të sinqertë mijëra kolegë, qytetarë të zakonshëm brenda dhe jashtë vendit për vëmendjen mesazhet dhe inkurajimin që më kanë dhënë mua dhe familjes time, me këtë rast.
Për të tejkaluar keq informimet, keq interpretimet dhe spekulimet, e ndjej për detyrë shtetare të bej disa qartësime dhe qëndrime personale, në lidhje me këtë mase ekstreme:
Së pari, e konsideroj veten produkt të një investimi 31 vjeçar në Forcat e Armatosura (FA). I siguroj të gjithë se 24 libra, disa misione, 10-tra konferenca ndërkombëtare, rreth 45 dekorata, nga Presidentë, “Medalja e Artë e Shqiponjës” nga Presidenti Topi, Medalja “Nderi i Kombit” nga Presidenti Nishani, Ministrat e Mbrojtjes, Shefat e Shtabit të Përgjithshëm, Komandantët e Forcave, etj, Sekretari Përgjithshëm i NATO-s, ish komandanti ISAF-it Petreus, Komandantë të ushtrisë Amerikane, nuk janë vetëm vlerësime për përkushtimin, performancen dhe sakrificat e mia dhe të familjes time, por i ndaj me respekt me vartësit, kolegët, eprorët, që më kanë shoqëruar me mbështetje të jashtëzakonshme në ketë CV jo të zakonshme.
Së dyti, falënderoj drejtpërdrejtë, ish-kryeministrin, SHT Zoti Berisha, ish-ministrin Zotin Mediu, dhe disa personalitete të njohura në jetën publike, për vëmendjen dhe investimin në rastin tim. Me këtë rast, Ju garantoj të gjithëve se Kolonel Dritan Demiraj, ashtu si deri tani do të vijoj të mbetem një ushtar i Atdheut dhe profesionist i përgjegjshëm në FA. Si e tillë, lutem mirëkuptimin e gjithsecilit që është i interesuar në këtë rast, se edhe pse është një vendim tërësisht i papërgjegjshëm dhe i kundraligjshëm- nuk dëshiroj të marrë ngjyra politike, pasi besoj fort në devizën perëndimore se FA – janë asete kombëtare, në dobi të sigurisë qytetareve, shoqërisë dhe Kombit.
Së treti, bëj me dije se vendimmarrja e Ministres Kodheli, është ankimuar dhe kam besim të plotë se drejtësia do ta gjeje ketë vendimmarrje në kundërshtim me ligjet dhe rregulloret, në kundërshtim të frikshëm me modelet perëndimore të trajtimit të ushtarakeve, të padrejtë dhe të paprecedente njëherësh. Mjafton të përmend që për këtë masë ekstreme (ose “hakmarrje primitive”), nuk është zhvilluar një procedure zyrtare normale, e cila është marrë në datë 5.12.2014, dhe vetëm me interesimin tim jam njohur në datën 17 dhjetor? Gjithashtu, qartësoj se në të gjithë vlerësimet e mija, nuk kam patur asnjë masë disiplinore, duke përfshirë edhe vlerësimin për vitin 2014, ku jam vlerësuar maksimalisht.
Së katërti, qartësoj ekskluzivisht, se në të gjitha rastet që kam lëvizur jashtë shtetit, kam marre leje sipas rregullave, nga Autoritetet përkatëse që nga momenti që kemi marrë njoftim për këtë me urdhër – përkatësisht Shefi i Shtabit të Përgjithshëm dhe Zv/Mbrojtjes. Praktikat për çdo rast, janë administruar në sekretaritë e MM dhe të SHP.
Së pesti, sqaroj se në të gjitha daljet jashtë shtetit (përsëris me leje) përveç arsyeve familjare – “nuk kam kërcënuar/tradhtuar sigurinë kombëtare”, por kam ndarë në mënyrë të përgjegjshme me kolegë dhe autoritetë të larta të SHBA, etj, partnerë strategjikë, ekspertizën, vlerësimet dhe shqetësimet e mija profesionale për çështje të Sigurisë, Terrorizmit dhe të Mbrojtjes Kombëtare.
Së gjashti, nëpërmjet këtij prononcimi bëj me dije se kam venë në dijeni paraprakisht Autoritetet (Presidentin Kryeministrin, Ministren) dhe qartësoj kolegët, dhe këdo të interesuar se vendimmarrja e lirimit tim nga ushtria nuk ka ardhur brenda një dite, por është gatuar me një përqasje staliniste, dhe terminologji të sistemit të keqshpërdoruar, tërësisht i padenjë për një vend anëtar të NATO-s. Mbetem ende me shpresë, se Kryeministri Zoti Rama, ka qënë i pa informuar ose keq-informuar për këtë vendimmarrje, dhe si e tillë vijoj të besoj se Ai do të tregojë vëmendjen e duhur dhe do ta adresojë në mënyrë shtetare këtë rast. Shpresoj gjithashtu, që edhe aleatet strategjik, nga të cilët kam marrë vlerësime maksimale, të kontribuojnë për ta tejkaluar këtë rast.
Së shtati: në vlerësimin tim, shpresoj jo vetëm – definicioni dhe kufizimi për daljet jashtë shtetit të ushtarakeve, është një qasje e trashëguar nga regjimi paranojak komunist, dhe rregulloret e Mehmet Shehut. Konteksti jashtë shtetit, (ishte për vendet armike), është po ashtu terminologji e viteve 74, e sistemit të keq shpërdoruar e Vito Kapos, e dekoruar së fundmi. Me keqardhje gjykoj se MM dhe SHSHP në vend që të përditësojë/përmirësojë definicionin “jashtë shtetit, dhe masat në referencë të kësaj rregullore paranoje”–vijoj në të keq shpërdorojnë dhe trajtojnë si mekanizëm për të gjetur grupe armiqësore dhe dënuar armiqtë e radhës. Për shembull shtrohet një pyetje e thjeshtë, si të kuptohet ky definicion dhe kjo mase ekstreme kur udhëtojmë në hapësirën Euroatlantike ku ne jemi pjese/anëtare?. E parë në këtë kontekst, besoj të jetë e shumë mirë kuptueshme se masa ekstreme në rastin tim, dhe të ndonjë rast tjetër, është vetëm “arsyeja banale dhe qesharake njëherësh”! Gjithashtu gjykoj se spekulimi me termin “Siguria Kombëtare”, nuk është as për të hapur rrugë ilegjetimitetit të prokurimeve, si rasti investimeve me banjot, tapetet, karriket, sistemet IT) me 1 milion $!
Përtej rastit personal, informoj Aktorët dhe opinionin publik se jam thellësisht i shqetësuar për gjendjen alarmante të kohezionit, solidaritetit, dhe trajtimit të ushtarakëve në FA.
Në fundit por jo nga rëndësia,i bëj thirrje publike M. Kodheli, të revokojë këtë masë jo kundrejt individit, por kundrejt ushtarakut, kolonelit, dhe Nderit të Kombit, Kolonel Dritan Demiraj.
I bëj thirrje publike, Shefit të Shtabit të Përgjithsëm në vend që të harxhojë energji për të “zbuluar armiq imagjinarë” dhe të më uroj në mënyre meskine për “jetën private”, te jap dorëheqjen për shkelje në raste te përsëritura të Kushtetutës, për shpërdorimin e parimit kushtetues të pa-asnjanësise politike në ushtrimin e detyrës, dhe përdorimin e dy fishit të dekoratave, aplikimin e sjelljeve dhe standardeve të dyfishta (ndërsa kolegun për të njëjtën arsye e padit me burg), heqjen nga vlera e pikësimit të kontributeve në operacionet jashtë vendit, të cilat jo vetëm e turpërojnë por edhe e komprometojnë rëndë pozitën e tij zyrtare.
Me këtë rast, i siguroj të gjithë të interesuarit se do të vijoj të angazhohem edhe me fuqishëm edhe më përgjegjshëm në çështjet e Sigurisë dhe Mbrojtjes Kombëtare.

Kolonel Dritan Demiraj

(er.nu/Gazeta Shqiptare/BalkanWeb)