Qeveria: Buxheti 2015, biznesi dhe qytetarët do të paguajnë 450 mln USD më shumë

[Albo]

Totali i të ardhurave në buxhet këtë vit pritet të jetë 412 miliardë lekë, me një rritje 45 miliardë lekësh në krahasim me vitin e kaluar. Shpenzimet janë vetëm 12 miliardë me shumë, pasi rritja e të ardhurave do të shkojë për uljen e deficitit. Ja ku do vilen paratë dhe si do shpenzohen

Buxheti i vitit 2015 do të jetë 12 milionë dollarë më i madh se buxheti i këtij viti, kjo sipas shifrave që publikoi mbrëmë ministri i Financave në një takim me komunitetin e biznesit. Të ardhurat janë parashikuar të rriten më 45 miliardë lekë, çka do të thotë se qytetarët shqiptarë dhe bizneset do të paguajnë rreth 450 milionë dollarë më shumë se këtë vit. Shpenzimet buxhetore do të jenë 472 miliardë lekë ose 45 miliardë lekë më shumë se një vit më parë. Deficiti buxhetor do të jetë 60 miliardë lekë ose 4 % e PBB nga më shumë se 6 për qind që ishte programuar këtë vit.

Të ardhurat

Totali i të ardhurave në buxhet këtë vit pritet të jetë 412 miliardë lekë, me një rritje në krahasim me vitin e kaluar me rreth 45 miliardë lekë. Rritja e planit të të ardhurave është shumë ambicioze në kushtet në të cilat ka performuar ekonomia këtë vit. Burimet në Ministrinë e Financave pohojnë se 10 miliardë lekë do të jetë efekti i paketës fiskale të këtij viti. Rreth 20 miliardë lekë të tjera pritet të vijnë nga rritja ekonomike, e cila pritet të rritet me 3.3 për qind vitin që vjen. Ndërsa pjesa tjetër prej 15 miliardë lekësh duket se do të jetë miradministrimi ose siç njihet ndryshe, lufta ndaj ekonomisë informale. Pjesa më e madhe të ardhurave pritet të gjenerohet edhe këtë vit nga Tatimi mbi Vlerën e Shtuar, nga Tatimi mbi Fitimin dhe nga akciza.

Shpenzimet

Totali i shpenzimeve buxhetore do të jetë 472 miliardë lekë, me një rritje me 12 miliardë lekë në krahasim me vitin e kaluar. Shpenzimet nuk do të rriten me të njëjtat ritme siç u rritën të ardhurat, për arsye se këtë vit deficiti buxhetor është ngushtuar me të paktën 20 miliardë lekë. Ministri Cani tha dje se në buxhetin e këtij viti synohet të shlyhen në mënyrë përfundimtare detyrimet e prapambetura, duke vënë në dispozicion më shumë se 35 miliardë lekë. Gjithashtu, shpenzimet për investime pritet të jenë rreth 5 për qind e PBB-së ose më shumë se 60 miliardë lekë. Pjesa tjetër e shpenzimeve buxhetore u dedikohet pagave dhe pensioneve, fatura e të cilave është rreth 1.7 miliardë dollarë.

Deficiti

Deficiti buxhetor është programuar 60 miliardë lekë ose 4 për qind e PBB-së më 2015. 43 miliardë nga kjo shumë pritet të financohen nga burime të brendshme dhe vetëm 17 miliardë lekë nga financimi i huaj. Deficiti i vitit që vjen është llogaritur të jetë rreth 60 miliardë lekë ose 20.4 miliardë lekë më i ulët se programi i këtij viti. Ministri i Financave, Shkëlqim Cani pohoi se objektivi kryesor i buxhetit të vitit që vjen është konsolidimi i mëtejshëm fiskal me qëllim uljen e borxhit publik nëpërmjet një deficiti më të ulët. Por ky synim rrezikohet të realizohet për shkak të një programi ambicioz në arritjen e të ardhurave, sidomos nëse ekonomia nuk rritet sipas parashikimeve 3.3%. Buxheti i vitit që vjen do të shmangë shpenzimet për qytetarët, për shkak se nuk parashikohet rritje e rrogave dhe pensioneve dhe gjithashtu zëri i investimeve publike mbetet poshtë mesatares së viteve të fundit. Ministri Cani tha se buxheti i vitit 2015 mbështetet nga reforma në sektorin e pensioneve, ajo në sektorin e energjisë dhe shlyerja e detyrimeve të prapambetura dhe reforma administrativo-territoriale.

Buxheti për vitin 2014 është:

Të ardhurat 367, 9 mld lekë

Shpenzimet 456, 4 mld lekë

Deficiti 88, 4 mld lekë

Buxheti për vitin 2015 është:

Të ardhurat 412 mld lekë

Shpenzimet 472 mld lekë

Deficiti 472 mld lekë



Paketa fiskale, ja 12 masat që lehtësojnë biznesin

Përveç rritjeve të disa tatimeve të njoftuara tashmë, ministri i Financave, Shkëlqim Cani njoftoi dje 12 masa lehtësuese fiskale që do të ndërmerren gjatë vitit që vjen ndaj biznesit. Së pari, hiqet TVSH-ja për sigurimet dhe zëvendësohet nga taksa prej 3 % për primin bruto. Së dyti, rritet renta minerare për pushtetin vendor, e përkthyer në gjuhë shifrash 4-fishi i asaj që ka përfituar deri tani pushteti vendor. Gjithashtu, ulet taksa për rafineritë vendase dhe reduktohet renta minerare me qëllim nxitjen e sektorit minerar. Po ashtu, ulet taksa doganore për gomat e automjeteve nga 15-10 % dhe përjashtohet nga taksa për të ardhurat personale kontributi për pensionet vullnetare. Cani tha se merret parasysh edhe kërkesa e biznesit për të njohur firot dhe amortizimet. “Vendoset kontrolli mbi bazë risku për rimbursimin e TVSH-së. Për agropërpunimin dhe biznesin në bujqësi, rimbursimi i TVSH-së shkon në masën 20 % nga 6 % që është. Bëhet zero tarifa doganore për lëndët e para dhe mallrat masivë në bujqësi si gruri, mielli etj. Dhe së fundmi, sektori i peshkimit përjashtohet nga taksa e qarkullimit dhe karburantit”, tha ai.

Ndryshimet në paketën fiskale

1-Sektori i sigurimeve: Heqje TVSh & zbatim takse 3 % mbi primin bruto.

2-Rritja e rentës minerare për pushtetin vendor dhe heqja e kufizimeve në ligjin e buxhetit.

3-Për rafineritë vendase: ulet taksa doganore e naftës bruto nga 10 % në 0 %.

4-Sektori i përpunimit të mineraleve: Ulja e rentës me 1/3 për kromin e përpunuar.

5-Për gomat e reja: ulja e taksës doganore nga 15% në 10%.

6-Pensionet vullnetare: përjashtohen nga tatimi mbi të ardhurat personale kontributet në fondet vullnetare të pensioneve në momentin e kontributit

7-Firot: rregullimi i përcaktimit të normativave të firove, humbjeve gjatë prodhimit, magazinimit dhe transportimit (VKM brenda 6 muajve).

8-Amortizimi me vlerën e mbetur: vendoset dysheme deri ne 3% (ndërtesat, etj) dhe 10% (kompjutera, makineri, etj). Nën këto vlera, shpenzim i zbritshëm i asaj periudhe tatimore

9-Rimbursimi i TVSH: lehtësim i mëtejshëm duke vendosur riskun si kriter për kontroll (heqja e kontrollit të detyrueshëm).

10-Lehtësimi i agropërpunuesve duke njohur 20% TVSH të zbritshme për furnizimet nga fermerët (nga 6% më parë).

11-Sektori i peshkimit përjashtohet nga taksa e qarkullimit & karbonit për karburantet (përjashtimi arrin në 67 lekë/litër)

12-Për lëndët e para: hiqen tarifat doganore për grurin, materiali biologjik, miellin, ushqimin për kafshët, kafshët për mbarështim.


MAPO

[Albo]

Jo rritjes së taksave, Konfindustria: Kjo paketë nuk garanton zhvillimin

Konfindustria deklaron se mungesa e arsyetimeve shoqëruese ekonomike në prezantimin e buxhetit e kthen politikën fiskale vetëm si mjet për sigurimin afatshkurtër të të ardhurave për buxhetin e shtetit si qëllim në vetvete dhe krijon shkak për rrezikim afatgjatë të ekonomisë kombëtare.
Konfindustria vlerëson se në kushtet e një evazioni fiskal prej pothuajse 50% të Prodhimit të Brendshëm Bruto, mënyra më e mirë për sigurimin e të ardhurave për buxhetin e shtetit dhe mbi të gjitha për rritjen e qëndrueshme të ekonomisë kombëtare është mirëadministrimi fiskal me politikat fiskale të taksave të ulëta dhe të sheshta.
Rritja e përgjithshme e taksave dhe tatimeve me 50% për të ardhurat personale të qytetarëve parashikuar për vitin 2015, rritja e çmimit të energjisë elektrike, mbajtja e tatimit të fitimit me 15% dhe shtimin e taksave për qarkullimin dhe karburantet, mbajtja e tatim-fitimit prej 15% për biznesin e madh nuk krijon kushte për zhvillim të qëndrueshëm ekonomik, godet rritjen e domosdoshme të fuqisë blerëse, të fuqisë konkuruesë të Shqipërisë me vendet e rajonit për tërheqjen e investimeve të huaja, por dhe vetë rritjen e të ardhurave për buxhetin e shtetit.
Konfindustria thote se është duke përgatitur dhe do të paraqesë së shpejti paketën me vërejtjet dhe propozimet përkatësë për paketën fiskale 2015.

ORA NEWS

[Albo]

Gazetaret e MAPO ne fakt i kane vene titullin gabim. Nuk eshte biznesi dhe qytetaret qe do te paguajne 450 milion dollare me shume ne taksa, por jane qytetaret shqiptare qe do te paguajne 450 milion dollare me shume ne taksa. Biznesi nuk paguan asnje takse pasi te gjitha taksat qe qeveria i vendos biznesit, biznesi ia percjell konsumatorit duke e perfshire taksen ne cmimin e mallit apo sherbimit qe i ofron..

Domethene, nje llogari e thjeshte:

450 milion USD pjesetim per 3 milion shqiptare qe banojne ne Shqiperi, i bie qe cdo shqiptari per koke te paguaje $150 me shume ne vit taksa shtetit se nje vit me pare.
Ose nje familje shqiptare me kater veta, i detyrohet shtetit te paguaje $600 me shume ne vit ne taksa se ne 2014.

Dhe parate qe qeveria do te mbledhi nga xhepat e shqiptareve te varfer e te papune, do ti marri e do ti perdori per te shlyer borxhet kreditoreve te huaj. Pasi shlyerja e borxhit eshte me e rendesishme per Qeverine e Rilindjes se sa stimulimi i ekonomise private te vendit dhe hapja e vendeve te reja pune.

Dhe biznesi privat ne Shqiperi ve duart ne koke: ne 2014 fuqia blerese e konsumatorit ka rene ndjeshem, e kjo reflektohet jo vetem ne rritjen e cmimeve por edhe ne uljen e xhiros se biznesit. Qe do te sjelli mbylljen e falimentimin e shume bizneseve qe nuk kane me pune, e qe do te sjelli detyrimisht humbjen e vendeve te punes te shqiptareve te punesuar ne keto biznese private, qe do te prodhojne me pak se 1 vit me pare.

Po Qeveria e Rilindjes me piktorin kryeminister e di mire se si funksionon ekonomia private!

Albo

[Albo]

Prof.Rama: Buxheti i ri ka probleme, do hyjmë borxh dhe 1,5 miliardë USD

Tiranë – “Buxheti për vitin 2015, sipas mendimit tim, ka disa probleme të mëdha dhe numrat nuk gënjejnë”.Kështu e fillon analizën e tij, profesori i politikës në Universitetin e Nju Jorkut në SHBA, Shenasi Rama, i cili vë në dukje se në kushtet kur nuk ka opozitë që ta kundërshtojë këtë buxhet, rezulton se para shqiptarëve po luhet një teatër politik, pasi politikanët e të dyja kaheve “janë bashkëfajtorë e bashkëpërfitues”.
Duke analizuar disa nga shifrat dhe përballur ato me realitetin, prof.Rama në një shënim në Fb gjykon se buxheti i ri “mbështetet në pritshmëri tejet optimiste dhe në fakt jorealiste mbi ecurinë e industrisë, bujqësisë e mbi të gjitha, të sektorit të ndërtimit dhe mbi marrjen masive të borxheve që do ta zhysin shtetin dhe do ta lënë në duart e atyre që kontrollojnë bankat e huaja.”
Sipas tij: “Kush mendon se do të ndërtojë vitin tjetër? Të shpresosh se ndërtimi do të rritet me 1.5%, industria me 6.1 % apo bujqësia me 4.5% është e mundshme vetëm me metodën e Sali Berishës, që taksonte si donte dhe pastaj këtë e konsideronte rritje ekonomike, pavarësisht nga realiteti. Megjithatë, problemi kryesor është se të ardhurat e parashikuara nuk e mbulojnë buxhetin. Edhe ashtu shteti duhet të gjejë diku tek 700 milionë dollarët për të realizuar këto objektiva të mbështetura në pritshmëri kaq optimiste.
Do të rritet nafta, akciza, taksa mbi dividentët, mbi pronën e banimit, hipotekimit, duhanin, etj. Po këto taksa me rritje të pritshme e çojnë buxhetin deri në një pikë e jo më deri ku thuhet, sepse ashtu shkon deri tek 3.9 miliardë lekë e buxheti është 4.7.
Si i gjen këto para që duhen e që nuk janë? Këtu thuhet duke ulur borxhet… Po ai 700 milionësh, që duhet për të mbushur gropën e buxhetit, nga do të dalë? Dhe më e bukura është se thuhet që do të ulet borxhi tek 71.7%… Po kur iku Saliu, sikur ishte tek 62%… Me sa përqind është rritur realisht gjatë këtyre 16 muajve?
Nejse, vitin tjetër, sipas mendimit tim, do të hyjmë borxh të paktën edhe nja një miliardë e gjysëm dollarë të tjera, – parashikon profesori. – Përqindja e borxhit ndaj GPD-së do të ulet, natyrisht, sepse do të rriten artificialisht të dhënat që të duket ekonomia jonë si e Kinës dhe e Gjermanisë. Gjithkund tjetër po shtrëngohet rripi, se nuk do të ketë rritje pensionesh e rrogash as për të arritur inflacionin që po bëhet rampant, sidomos në produktet ushqimore, se aty iu dhemb njerezve. Me një fjale, po luajmë teatër politik…dhe nuk kemi as opozitë që të flasë, sepse këta janë bashkëhajna, bashkëfajtorë e bashkëpërfitues,- përfundon ai.

ORA NEWS

[Albo]

Ministria e Brendshme shton 1200 punonjës policie

Policia e Shtetit synon të rrisë numrin e policëve për 1 mijë banorë. Fonde për ndërtimin e dy reparteve speciale

Zamir Alushi

Policia e Shtetit shtohet me 1200 punonjës policie. Sipas të dhënave nga relacioni që shoqëron projektligjin për buxhetin 2015 vitin që vjen, do të rriten kapacitetet e Policisë së Shtetit me qëllim që të arrihen normat europiane të numrit të policëve për 1 mijë banorë.

Objektivat

Objektivat e vendosura nga Ministria e Brendshme për vitin 2015, në argumentimin e kërkesës për buxhetin vjetor 2015, janë: rritja e sigurisë në rrugë, duke ulur në masën 2% numrin e aksidenteve rrugore; uljen e aksidenteve me pasojë vdekjen në 6.2%; uljen e rasteve të përdorimit të mjetit nën efektin e pijeve alkoolike në 2.29%; për tejkalim shpejtësie në 28.4%. Policia ka si objektiv për reduktimin e veprave penale në masën 3% ose 12958 raste, konkretisht: Numri i veprave penale për 100.000 banorë do të reduktohet në 308. Lidhur me zbulueshmërinë e veprave penale policia ka synim të arrijë në 76.5%. Ndërsa për rritjen e sigurisë dhe besimit për policinë është si objektiv shtimi i numrit të telefonatave në 170 000. Një objektiv tjetër është reduktimi i numrit të ankesave në masën 4% për 100,000 banorë ose në 633. Policia ka planifikuar rritjen e operacioneve kundër kultivimit të bimëve narkotike në masën 2%, duke realizuar 165 operacione. Më konkretisht, synohet zvogëlimi i numrit të

bimëve narkotike të kultivuara në masën 15% ose 71160 bimë. Rritje e dukshme fondesh parashikohet për operacionet proaktive që nisen me iniciativën e policisë, të organizuar bazuar në informacionin e ardhur nga policia, duke përdorur metoda shkencore hetimi si përgjimi, filmime, interceptime të bisedave apo komunikimeve në mënyrë direkte ose në distance. Gjithashtu synohet forcimi i luftës kundër trafikimit të qenieve njerëzore, armëve e municioneve, mjeteve motorike, veprave të artit e kulturës. Në këtë drejtim është objektiv rritja e bashkëpunimit ndërkombëtar e rajonal në drejtim të zbulimit të trafiqeve të paligjshme. Synohet rritja nga 4% në 5% e numrit të hetimeve proaktive për veprat penale të trafikimit të personave.

Shpenzimet e personelit

Nga relacioni i projektbuxhetit të vitit 2015, del se numri i punonjësve të administratës do të jetë 87,200, duke reflektuar shtesën prej 1200 punonjësish në Policinë e Shtetit. Por fondi i shpenzimeve të personelit, në total, do të pësojë një ulje nga 5.2% e PBB-së në 2014-n në 5.1% të PBB në 2015. Përveç shtesës në personelin e policisë, janë caktuar fonde edhe për përfundimin e disa projekteve të rëndësishme të ndërtimit dhe rikonstruksionit të ambienteve për Forcat Speciale dhe ato të Ndërhyrjes së Shpejtë. Rritja e numrit të punonjësve të policisë për çdo 1 mijë banorë, bëhet për arsye se aktualisht, numri i punonjësve të policisë është më i ulët se në gjithë vendet e rajonit. Kjo rritje do të mundësojë krijimin dhe funksionimin e zyrave të pritjes së qytetarëve pranë çdo drejtorie policie qarku. Gjithashtu, synohet përmirësimi i Shërbimit të Gjendjes Civile, nëpërmjet përmirësimit dhe mirëmbajtjes së Rrjetit të Regjistrit Kombëtar të Gjendjes Civile dhe Regjistrit Kombëtar të Adresave. Sipas relacionit, me buxhetin e parashikuar për Ministrinë e Brendshme për vitin 2015, garantohet mbështetja financiare për funksionimin normal të strukturave të Policisë së Shtetit, Gardës së Republikës, Shërbimit të Gjendjes Civile, Shërbimeve të Emergjencës Civile, si dhe strukturave të tjera në varësi. Në mënyrë të veçantë, synohet mbështetja e reformimit të strukturave të Policisë së Shtetit në kuadër dhe në zbatim të detyrimeve që rrjedhin nga ligji i ri i miratuar për këtë strukturë dhe mbështetja e Policisë së Shtetit, me mjete, pajisje dhe teknologji bashkëkohore. Gjatë këtyre ditëve, Policia e Shtetit është atakuar për shtrirjen e rolit të saj në sektorë të tjerë. Ndërtimi e rikonstruksioni i objekteve të Departamentit të Sigurisë (Reparti 712 Tiranë), do të përfundojë brenda vitit 2015 me fondet e parashikuara në këtë buxhet. Ndërkaq, rritja e personelit do të mundësojë përshtatjen e trupave të policisë me detyrat e reja siç janë ndjekja e çështjeve të tilla si vjedhja e energjisë elektrike apo ndërtimet e paligjshme.

Investimet

Ndërtimi e rikonstruksioni i objekteve të Departamentit të Sigurisë do të përfundojë brenda vitit 2015

Zyrat e pritjes

Kjo rritje do të mundësojë krijimin dhe funksionimin e zyrave të pritjes së qytetarëve në çdo drejtori qarku


Regjistrat

Synohet përmirësimi i Gjendjes Civile, nëpërmjet mirëmbajtjes së rrjetit dhe Regjistrit Kombëtar të Adresave

Shqip

[Albo]

Bujar Kapexhiu: Bollek!

[Albo]

Ndihma ekonomike, hiqen 20 mijë persona

Projektbuxheti i vitit 2015 do të shënojë një ulje të numrit të personave të skemës së ndihmës ekonomike. “Do të ulet me rreth 20.000 persona numri i përfituesve të ndihmës ekonomike, krahasuar me vitin 2014, si pasojë e rishikimit të skemës dhe e targetimit më të mirë të grupeve dhe individëve që janë realisht në nevojë. Duke planifikuar të njëjtin fond si për vitin 2014 (4.6 miliardë lekë), do të bëhet e mundur rritja e masës së mbështetjes për këtë kategori personash në nevojë”, thuhet në projektligjin e buxhetit të 2015. Gjithashtu pritet që si rezultat i rishikimit të vazhdueshëm të legjislacionit në fuqi dhe e evidentimit dhe eliminimin e rasteve abuzive, synohet të mbahet konstant numri i përfituesve dhe i fondit të parashikuar për personat me aftësi të kufizuara (krahasuar me vitin 2014), pavarësisht rritjes natyrore të numrit të kësaj kategorie dhe indeksimit të pritshëm. Synohet gjithashtu ngritja e një sistemi të përshtatshëm shërbimesh sociale në institucionet e kujdesit social, me standarde bashkëkohore për rehabilitimin dhe ri-integrimin në jetën normale të kategorive që trajtohen në to si: fëmijët jetimë, të moshuar të braktisur, viktima të trafikimit, si dhe fëmijët me aftësi të kufizuara dhe viktima të dhunës në familje.

Panorama

[Wordless]

Po rrogen minimale kur do e rrise ky trularaska ? Me keto taksa e tatime rroga minimale (minimumi jetik) duhet te jete te pakten $ 250 . Ndryshe e coji vendin ne lufte civile

[Albo]

Cani zyrtarizon rritjen e taksave për 2015-ën, rritet 10 lekë taksa e qarkullimit

Tiranë - Pas tymnajës mediatike, Ministri i Financave Shkëlqim Cani ka zyrtarizuar rritjen e taksave për vitin 2015. Gjatë prezantimit të buxhetit dhe paketës fiskale, kreu i Financave pranoi se taksa e qarkullimit do të rritet me 10 lekë si dhe tatimi mbi të ardhurat nga dividentët siç janë interesat apo huatë nga 10 në 15%.
Ndërkohë, përsa i përket buxhetit të vitit të ardhshëm, Ministri i Financave përcaktoi si dy prej objektivave, uljen e borxhit publik dhe energjinë, të cilat i përcaktoi si rreziqe për ekonominë.
Ndërkohë kreu i Komisionit të Ekonomisë, Erjon Braçe, ngriti edhe njëherë shqetësimin e abuzimit me çmimin e cigareve.

ORA NEWS

[Albo]

Bode: Buxheti 2015, gur i rëndë mbi supet e shqiptarëve



Partia Demorkatike, e cilëson buxhetin dhe paketën fiskale për vitin 2015, si një gur të rëndë mbi supet e qytetarëve shqiptarë, duke i varfëruar ata dhe asfiksuese për ekonominë, që rrugë të vetme ka krizën.
Ish-Minsitri i Financave Ridvan Bode, tha se qytetarët, nëpërmjët rritjes së takasave do të paguajnë, 85% të të ardhurave të parashikuara nga qeveria.
Mënyrën se si qeveria po mendon të nxjerr të ardhurat për vitin 2015, Ridvan Bode, e cilëson si shterrim të çdo mundësie zhvillimi për ekonominë e vendit.
Siaps Bodes këto, politika fiskale të ndjekura nga qeveria, po e çojnë ekonominë në kolaps, me 0 investime, 0 vende të reja pune dhe 0 rritje rrogash dhe pensionesh.

ORA NEWS