Tirana 70 vjet çlirim, politika e ndarë, qeveria ceremoni me foton e Enver Hoxhës- FOTO
TIRANE- Në 70-vjetorin e Clirimit të Tiranës, politika është ndarë sërish në dy aktivitete të ndryshme. Krerët e qeverisë, kryeministri Edi Rama, Kreu i Kuvendit Ilir Meta, Zv.kryeministri Niko Peleshi, ministrat e kabinetit e deputetët e majtë kanë marrë pjesë në një ceremoni të organizuar nga prefektura tek 'Ushtari i Panjohur'.
Në ceremoninë për të nderuar të rënët e Luftës Nacional-Çlirimtare nuk munguan as fotot e ish-diktatorit Enver Hoxha, që për ironi qendronin shumë pak larg kryeministrit. Gazetarët tanë raportuan nga vendngjarja që në ceromoni ka pasur edhe thirrje pro ish-diktatorit.
Nën tingujt e himnit kombëtar dhe të këngëve partizane, përfaqësuesit më të lartë të shtetit vendosën kurora me lule pranë monumentit të “Partizanit të Panjohur” në nderim të dëshmorëve që dhanë jetën në betejën e Tiranës 70 vite më pare.
Në fjalën e rastit, Prefekti i Qarkut Tiranë, z. Sadi Vorpsi theksoi se 17 Nëntori bashkoi sot qytetarët e Tiranës dhe jo vetëm, për të kujtuar një nga ditët më historike të kryeqytetit.
“70 vite më parë, në Tiranë agoi një ditë e re, e lirë nga pushtuesi i huaj. Shtëpitë përdhese të këtij qyteti u bënë fole e ëndrrave, shpresave, idealeve të lartësuara, planeve dhe strehimit të gjithë atyre njerëzve që i dolën për zot kombit në ato ditë të errëta të historisë. Bujaria e njohur e tiranasve i hapi dyert për të gjithë ata që kaluan në ilegalitet. Rinia tiranase e dëgjoi thirrjen e atdheut të saj që lëngonte për liri dhe nuk hezitoi për asnjë moment të bashkohej me idealet e larta kombëtare” – theksoi z. Vorpsi.
Nga ana tjetër, Prefekti i Qarkut Tiranë u shpreh se mospajtimi i të rënëve me robërinë ishte forma më e lartë e patriotizmit, shembull që sot duhet të ketë gjithsecili prej nesh për të bërë realitet ëndrrën e një shteti të së drejtës, të integritetit moral dhe të një Shqipërie të denjë si anëtare e Bashkimit Evropian.
Pas përfundimit të ceremonisë, Prefekti Vorpsi vizitoi familjen e Dëshmorit të Atdheut, Sulejman Cenameri ku shprehu mirënjohjen për kontributin e kujtdo që u bë pjesë me koalicionin fitues antifashist.
17 Nëntori shënon një nga aktet politike dhe ushtarake më të rëndësishme të shekullit të XX, ndërkohë që për çlirimin e kryeqytetit dhanë jetën mbi 230 dëshmorë.
Bashkia e Tiranes
Ndërkohë që dy nënkryetarët e Bashkisë, Enno Bozdo dhe Nevila Xhindi ishin të pranishëm në ceremoninë e nderimit të të rënëve tek Varrezat e Dëshmorëve.
Nën tingujt e Bandës së Qytetit, Bozdo dhe Xhindi u përkulën dhe vendosën kurora me lule në memorialin “Nëna Shqipëri”, në nderim të dëshmorëve të Atdheut të rënë për çlirimin e Tiranës. Kryetari i Bashkisë Lulzim Basha nuk mundi të merrte pjesë në aktivitetet përkujtimore, pasi ndodhet në Bruksel, për të marrë pjesë në punimet e Asamblesë politike të PPE-së.
Çlirimi i Tiranës nga trupat nazifashiste më 17 Nëntor 1944, shënon aktin më të rëndësishëm politik dhe ushtarak, pasi kurorëzoi fitoren e Luftës Antifashiste Nacionalçlirimtare, duke i shkaktuar humbje të mëdha trupave gjermane. Beteja për çlirimin e kryeqytetit ishte operacioni më i madh i shkallës operativo-strategjike, i zhvilluar nga Ushtria Çlirimtare për çlirimin e qyteteve.
IDEALI I DËSHMORËVE PËR DEMOKRACI FUNKSIONALE ENDE PREZENT
Pas homazheve, nënkryetari Bozdo ka deklaruar se nderojnë sot idealet e të rinjve që dhanë jetën për çlirim. Ai tha më ej se ideali për një demokraci funksionale është ende prezent.
“Nderojmë ata që dhanë jetën për çlirimin e Tiranës. Tirana ndër të paktët kryeqytete të Europës që u çlirua nga gjaku i bijve dhe bijave të saj. Çlirimi është një fitore ndaj forcave të boshtit nazifashist. Nderojmë idealin e të rinjve për një atdhe më të mirë, demokratik. Sot në 70 vite sfidat janë sa të ndryshme dhe kaq të ngjajshme, ideali ynë për një vend më të mirë më të drejtë, për një demokraci funksionale vazhdon të jetë prezant. Me shembullin e tyre mësojmë se jeta ia vlen të jetohet”.
BASHA: MIRËNJOHJE PËRJETË BIJVE QË LUFTUAN DHE DHANË JETËN PËR LIRI
Nga Brukseli, ku po merr pjesë në Asamblenë politike të PPE-së, kryetari i PD-së njëherësh kryebashkiaku i Tiranës, Lulzim Basha, shpreh mirënjohje për ata që luftuan dhe dhanë jetën për çlirimin e Tiranës 70-vjet më parë. Përmes faqes së tij zyrtare në “Facebook”, Basha thekson se “ky përvjetor i gjen qytetarët e Tiranës dhe mbarë Shqipërisë para sfidave të mëdha”.
“Sot përkujtojmë 70 vjetorin e çlirimit të Tiranës nga pushtuesit nazifashistë. Mirënjohje përjetë bijve dhe bijave të këtij qyteti që luftuan dhe dhanë jetën për liri. Ky përvjetor i gjen qytetarët e Tiranës dhe mbarë Shqipërisë para sfidave të mëdha. Ekonomia në krizë, varfëria dhe papunësia, shpërfillja, dhuna dhe arroganca qeveritare po hapin plagë të thella kudo. Por të frymëzuar nga vepra e atyre që sakrifikuan gjithçka për lirinë dhe zhvillimin e vendit, ne do t'i japim Shqipërisë të ardhmen që meriton.”- shkruan Basha.
PD: Dënojmë ceremoninë qeveritare me foto dhe koret për Enver Hoxhën nga ceremonia e PD
Kryetari i grupit parlamentar të Partisë Demokratike Edi Paloka dënoi sot në emër të PD, ceremoninë përkujtimore të 70-vjetori të Clirimit të Tiranës nga pala qeveritare.
Sipas PD, Edi Rama dhe Ilir Meta, zyrtarisht sot konfirmuan dhe e vunë në jetë projektin e tyre për rehabilitimin e figurës së diktatorit Enver Hoxha.
“Me fotot e Enverit pas shpatullave, me korin e Enverit në sfond, Rama dhe Meta, gjetën mënyrën më të turpshme për të baltosur 70 vjetorin e clirimit të Tiranës.
Duke përkujtuar këtë ditë të shënuar, me dikatorin Hoxha, Rama dhe Meta, kanë fyer kujtimin e dhjetra intelektualëve, heronjtë e vërtetë të luftës, të cilët u vranë dhe u lincuan drejtpërdrejt nga dora e Enverit”.
Më tej, Paloka theksoi se Rama dhe Meta kanë fyer sakricifat e dëshmorëve të luftës.
Vlerat e atyre që dhanë jetën për lirinë e vlerat europiane, vlera të cilat i përdhosi dikatori Hoxha, me instalimin e regjimit më të egër dhe më gjakatar në gjithë lindjen”.
Sipas PD, Rama dhe Meta sot provokuan gjithë shoqërinë shqiptare.
“Me Enver Hoxhën në sfond, Edi Rama dhe Ilir Meta, provokuan sot të gjithë shoqërinë tonë, dhe plagët e saj më të dhimshme të periudhës së shkeljes brutale të dinjitetit njerëzor, të plagëve të urisë që solli dikatori në këtë vend për më shumë se 40 vite.
Kjo duhej të ishte dita për të bashkuar gjithë shqiptarët pavarësisht preferencave politike, në nderim të të rënëvëe, në nderim të luftës së tyre, por Edi Rama zgjodhi kursin e përcarjes, duke provokuar e duke baltosur sakrificat më të larta njerëzore që u bënë në emër të lirisë dhe kombit”.
Berisha shkruan në Facebook, Rama: Me Enver Hoxhen perpara drejt Europes!!
Nuk ka heshtur ish-kryetari i PD, Sali Berisha mbi 70-vjetorin e Clirimit të Tiranës nga pushtuesi nazi-fashist.
“Te dashur miq, Edi Rama po perdor 70 vjetorin e Luftes per rehabilitimin e atit te tij shpirteror dhe trashegimise se tij politike familjare. Sot, ne 70 vjetorin e hyrjes se forcave partizane ne Tirane, Edi Rama dhe kabineti i tij vendosen kurora te monumenti i Partizanit te panjohur, te rrethuar me portrete te Enver Hoxhes, Hitlerit shqiptar te Pasluftes se Dyte Boterore, siç do ta damkosnin ate lideret e qendres se djathte europiane ne deklaraten e Samitit te Parisit te pranveres se vitit 1991.
Festimi i kesaj date me portrete te Enver Hoxhes eshte perdhosje e te gjithe atyre qe luftuan, sakrifikuan dhe dhane jeten kunder pushtuesve te huaj dhe diktatures hoxhiste per lirine kombetare, lirite dhe te drejtat, dinjitetin njerezor. Enver Hoxha me bllokmenet e tjere, baballare te neo-bllokmeneve te sotem, me regjimin e tij barbar beri qe shqitaret te fitojne Luften ne koalicionin antifashist, por per dekada te tera te humbasin lirite dhe dinjitetin njerezor, te kalojne nga nje pushtim barbar i huaj ne nje pushtim mizor te brendshem. Edi Rama eshte nipi i Spiro Kolekes, xhelatit te inteligjences teknike gjate diktatures hoxhiste dhe i biri i Kristaq Rames, konfidentit te Nexhmije Hoxhes dhe Ramiz Alise qe ngarkohej me misione speciale si ne rastin e negociatave me palen italiane per familjen Popa dhe qe firmoste se bashku me Ramiz Aline varjen ne sheshe publike dhe ekzekutimin e disidenteve dhe qytetareve te pafajshem edhe pas renies se murit te Berlinit.
Shpirtrat e te reneve ne te dy pushtimet, lumenjte e gjakut, dhimbjeve, sakrificave, vuajtjeve mbi njerezore te shqiptareve per liri dhe dinjitet njerezor, na ftojne te shnderrojme protesten mbare popullore te 22 nentorit ne nje 20 shkurt te ri! Sb”
Balkanweb
Përgjigju Duke Cituar
Postuar më parë nga SERAFIM DILO
Krijoni Kontakt