Arrestohet me 20 kallëpe C4 Kastriot Prenga

[Albo]

Transportonte 20 kallëpe tritol C4, arrestohet nga Policia e Vlorës 37 -vjeçari Kastriot Prenga, me origjinë nga Mirëdita. Sipas burimeve, Prenga hetohej prej 2 muajsh nga Prokuroria e Krimeve të Rënda Tiranë dhe policia lokale.

Nga të dhënat paraprake, thuhet se 37-vjeçari e blinte lëndën plasëse në Malin e Zi dhe e tregtonte në Shqipëri e Itali. Fillimisht i arrestuari ka ndaluar në qytetin e Durrës, për të kryer disa porosi dhe më pas është nisur drejt Vlorës.

Tritoli C4, që i është sekuestruar nga policia kishte si synim shitjen e tij në Itali. Ndërkaq, Kastriot Prenga njihet nga policia si person me precedent penalë dhe më parë ka qenë i dënuar për vrasje në Mirditë. Prej vitesh ai jetonte në Durrës dhe dyshohet se merrte pjesë në një grup të organizuar kriminal, në shitjen e lëndëve plasëse, me qëllime kriminale.

Përveç lëndës plasëse, policia sekuestroi edhe 2 telefona celularë që Prenga dyshohet se i ka përdorur për të biseduar me bashkëpunëtorët e tij. Kartat e celularëve, u janë dorëzuar ekspertëve dhe Prokuroria pritet të zbardhë tabulatet, për identifikimin e personave të tjerë që janë përfshirë në tregtinë e C4.

Shqip