Banda e Tritolit: Dorëzohet Andon Mëhillaj, policia i merr në mbrojtje familjen

[Albo]

Fotografitë e bashkëpunëtorëve të Sinanit, Policia: 10 mijë euro shpërblim kush jep informacion



Kusherinjte Mehillaj ne kerkim nga policia

TIRANE- Policia ka vendosur te shperbleje me 10 mije euro ate qe do te jape informacione se ku ndodhen bashkepunetoret e Julian Sinanit, te arrestuarit si vrases me pagese.

Mesohet se shperblimi jepet per ate qe do te jape informacione per shtetasit tashme te shpallur ne kerkim Andon e Genis Mehillaj, qe akuzohen si organizatoret te ketij ‘biznesi’.

Bashke me lajmin per shperblimin policia ka publikuar edhe fotot e personave te shpallur ne kerkim.

Panorama

[Albo]

‘Banda e Tritolit’, hetohen 2 policë, ndihmuan kushërinjtë Mëhillaj të iknin jashtë vendit

Nga: AURORA KOROMANI

TIRANE - Organi i akuzës ka nisur hetimet për dy oficerë policie, të cilët dyshohet se kanë ndihmuar dy kushërinjtë Mëhillaj për t’i shpëtuar arrestimit të policisë. Burime nga prokuroria bëjnë me dije se dyshohet se janë dy efektivë policie, të cilët kanë dekonspiruar operacionin e bluve. Bëhet fjalë për një efektiv në Rinas dhe për një tjetër në qytetin e Vlorës, të cilët kanë ndihmuar Andon (Erion) Mëhillaj dhe Genis Mëhillaj që të mos bien në duart e policisë. Dyshohet se ka qenë efektivi i Vlorës, emri i të cilit nuk jepet për arsye të hetimeve, i cili posa është vënë në dijeni për operacionin e policisë për arrestimin e dy kushërinjve ka vënë në dijeni këta të fundit, duke u dhënë mundësi që të fshihen dhe të mos bien në prangat e policisë. Por, sipas organit të akuzës, ka qenë e nevojshme edhe ndihma e efektivit tjetër të Rinasit, i cili ka ndihmuar kushërinjtë Mëhillaj që të largohen jashtë vendit, të paktën kështu dyshohet deri tani. Vetëm pak ditë më parë edhe Shërbimi i Kontrollit të Brendshëm ka bërë me dije se ka nisur hetimet për dekonspirimin e operacionit të policisë.
Burime policore pohojnë se dy kushërinjtë Andon dhe Genis Mëhillaj kanë qenë personat që bënin të mundur njohjen mes porositësit të vrasjeve dhe të dyshuarit si vrasës me pagesë. Burime nga uniformat blu sqarojnë se dy kushërinjtë, të njohur për lidhjet me politikën, kontaktonin të parët me porositësit e krimeve të rënda dhe më pas ishte Andon Mëhillaj ai që kontaktonte të dyshuarin si vrasës me pagesë, Julian Sinanaj, i cili njihej nga të gjithë për saktësinë në ekzekutimet e tij. Ky i fundit për çdo vrasje merrte nga 30 mijë euro deri në 150 mijë euro, varej nga rëndësia e personit që do ekzekutohej, ndërsa dy kushërinjtë Mëhillaj merrnin pjesën më të madhe të parave, pothuajse dyfishin e parave që merrte ekzekutori.
HETIMET
Përveç efektivëve të policisë, objekt i hetimit të Prokurorisë së Përgjithshme është edhe vetë rrjedhja e informacionit për mediat. Në qendër të hetimeve do të jenë të gjithë efektivët, të cilët rrezikuan hetimet, duke nxjerrë informacionin për të dyshuarin si vrasës me pagesë, Julian Sinanaj, duke nisur që nga publikimi i kartës së tij të identitetit, si dhe të dhëna të tjera. Por në hetim do jenë edhe efektivët që nxorën gjeneralitetet për të penduarin tjetër N.Gj, jeta e të cilit tashmë është në rrezik për shkak të informacioneve të vlefshme që ka dhënë për policinë, duke rrëfyer të gjithë emrat e anëtarëve të bandës së bombave C4. Por hetimeve nuk do t’u shpëtojnë as mediat dhe gazetarët, të cilët kanë bërë publike të dhëna, që sipas organit të akuzës nuk duhej të publikoheshin. Prokuroria nuk ka qenë dakord që në fillim për publikimin e të dhënave të këtij operacioni, fakt që u vu re edhe gjatë deklaratës së policisë, ku mungonin përfaqësuesit e prokurorisë. Sipas organit të akuzës, rrjedhja e informacionit dhe dëmtimi i operacionit ka rrezikuar dhe vazhdon të rrezikojë jetën e personave të përfshirë në këtë çështje.

(er.nu/Gazeta Shqiptare/BalkanWeb)

[Albo]

Banda e tritolit, Berisha: Rama rrahu gjoksin për megaoperacionin që bllokoi 13 ditë dëshminë e N.GJ

TIRANË- Ish -kryeministri Sali Berisha ka reaguar në rrjetin social “facebook” lidhur me operacionin ku u arrestuan anëtarët e bandës së vrasjeve me pagesë dhe shpërthimeve me tritol. Berisha shprehet se kryeministri Rama vrapoi të rrahë gjoksin për megaoperacionin që sipas tij vonoi 13 ditë dëshminë e N.GJ , personit të penduar të bandës që bashkëpunoi me Prokurorinë.

POSTIMI I PLOTË
Si në filmat e mafies! Të dashur miq, 17 ditë më parë, pas një seriali thuaj të përditshëm tritoli në të katër anët e vendit, një bashkëautor në vrasjet me tritol, N Gj, prishet në pazare me bosin e tij në vrasje, J S, dhe ky i fundit e kërcenon me ligjin e mafies. Pas kësaj, N.Gj për të shpëtuar kokën, vendos të denoncoj bosin e vet, një serial killer dhe anëtarët e tjerë të rrjetit vrastar dhe të parandalojë ekzektuimin e radhës me tritol të grupit të tij. Menjëherë pas kërcënimit me jetë nga J S, për të shpëtuar kokën e tij, N Gj vrapon tek Prefekti i Fierit. Në këtë takim N.Gj kërkon mbrojtjen e Prefektit dhe i tregon atij planin e J S për të ekzekutuar me tritol, kundrejt pagesës, biznesmenin durrsak të naftës P B.

Sipas N Gj ekzekutimin e P B e kishte porositur biznesmeni fierak në fushën e gazit I K. Prefekti i tronditur thellë nuk deshi t'iu besonte veshëve por ja preu shkurt: "unë nuk mbroj dot veten time jo të të mbroj ty". N. Gj kishte frikë të denonconte në policinë e Fierit, mbasi ai e dinte mire se biznismeni I.K, që kishte paguar 150 mijë euro për vrasjen për hesap të tij, të bosit të naftës P. B, e kishte nën kontroll të plote policinë e Fierit dhe Vlorës. Kështu që ai vendosi të denoncojë çdo gjë në Policinë e Durrësit. Ai dëshmoi para drejtueseve kryesore të policisë së Qarkut te Durrësit duke mos e ditur se shkoji si cjapi tek kasapi, mbasi të dy oficerët që e dëgjuan, si drejtori i Qarkut ashtu dhe shefi i komisariatit të Durrësit, ishin lidhje të forta të biznesmenit I. K që paguante për vrasjen e P B. Kështu, i ati i drejtorit A. P kishte pikë të shitjes se gazit te I. K, kurse tjetri kishte qenë shofer i I. K për 8 vite dhe ishte vet I. K që nëpërmjet bashkëshortes së tij, goca e tezes së ministrit, që e kishte emëruar në Durrës.

Drejtuesit e Policisë së Durrësit e përcollën dhe ata të tronditur rrëfimin e N. Gj por refuzuan që ta marrin në mbrojtje dhe i shpallen të pavërteta dëshmitë e tij. Pas kësaj N.Gj, ish militant zyrtar i PS në Vlorë, vendos ti drejtohet direkt Ministrisë së Brendshme pa ditur se dëshmitë e tij do të shkonin tek kushuriri i parë i gruas së I K. Në ministri e dëgjoi zv.drejtori i përgjithshëm i Policisë dhe dy të tjerë. Vendimi ishte marrë që të mos pranohej dëshmia e tij. Ata jo vetëm që nuk pranuan dëshminë e tij dhe kërkesën për ta mbrojtur por e nxorën zvarrë nga zyra me një breshëri sharjesh dhe kërcënimesh.Tik taku i orës fatale për N.Gj, vrasës i penduar, nga halli po afronte. Dëshmitë e tij nuk i pranonte njeri. Atë e priste dënimi kapital.
Atij i kishte mbetur si letër e fundit për të shpëtuar jetën denoncimi në media mbasi një dore e zeze i bllokonte dëshminë dhe e ndiqte për ta eleminuar.

I drobitur, i dëshpëruar, i pa shpresë, si njeri me fundin e jetës së tij, ai arriti në klandestinitet të plotë të hyje në një gazetë. Aty N. Gj gjeti një trajtim krejt tjetër dhe pasi i ofruan një kafe ai filloi dëshminë e tij për kronikën e një vrasje të paralajmëruar, autoret, rrjetin, kumbarët, ndrikullat zyrtare dhe jozyrtare, të shumë të vrasjeve të tjera. Ndërkohë, tek dëshmonte, në telefonin e tij kishte një seri missed calls. Pas13 ditësh i telefononte drejtori i Policisë së Durrësit, i cili e ftoi ti përsërisë dhe një herë dëshminë mbasi atë të paren e kishte konsideruar të rreme.

Kryekreu Rama dhe ndihmësi i tij për Policinë vrapuan të rrihnin gjoksin për megaoperacionin që ne fakt ishte bllokimi për 13 ditë i dëshmisë së N. Gj dhe largimi nga Shqipëria, pas njoftimit nga zyrtaret e shtetit, të dy ndërmjetësve me kryesore midis porositësve dhe ekzekutorëve të vrasjeve me pagesë nga J. S dhe grupi i tij. Kjo është e vërteta si në filmat e mafies të megaoperacionit të grupit të tritolit!! Sb

(a.n/BalkanWeb)

[Albo]

Dy Mëhillajt jashtë vendit, por nuk figurojnë në sistemin TIMS

TIRANE- Dy kushërinjtë Mëhillaj dyshohet se janë larguar jashtë Shqipërisë. Sipas policisë, dyshimet paraprake janë se Andon (Erion) Mëhillaj dhe Genis Mëhillaj, të dy nga Vlora, janë larguar jashtë kufirit, por jo nëpër pikat doganore. Burime të sigurta nga policia sqarojnë se në sistemin TIMS nuk ka të dhëna për largimin e dy kushërinjve, duke hedhur kështu dyshimet se Mëhillajt janë larguar në mënyrë të fshehtë, duke u ndihmuar nga dikush.

Për këtë arsye kanë nisur hetimet dhe deri tani rezulton se nën hetim janë edhe dy efektivë policie, të cilët kanë ndihmuar kushërinjtë që të largohen jashtë. Policia ka hedhur dyshime se kanë qenë Andon dhe Genis Mëhillaj, ata që luanin rolin e ndërmjetësuesit mes të dyshuarit si vrasës me pagesë, Julian Sinanaj, dhe porositësve të vrasjeve. Burime nga organi i akuzës bëjnë me dije se dy kushërinjtë kanë pasur njohje të shumta me botën e biznesit, si dhe me politikën. Dy kushërinjtë janë personat më të kërkuar për momentin nga policia. Vetëm dy ditë më parë, policia publikoi dy fotografitë e tyre, si dhe ofroi 10 mijë euro shpërblim për këdo që jep informacion të vlefshëm për policinë.

(m.a/Gazeta Shqiptare/BalkanWeb)

[par]

policia paguan 10000 euro per informacione, krimi paguan 100000 per zhdukjen e ketyre te fundit, dhe perfundimi dalin te pafajshem biznesmenet e ndershem te lidhur me politiken.

[Ozzy]

Killeri Sinani ishte stervitur ne gerrrrqi nga grupe mafjoze ruse ( kgb + gerrrrqi) po perpiqen me cdo menyre te destabilizojne sistemin social ne shqiperi !
Kot nuk thone se i mbyturi te mbyt !

[Albo]

“Porositësit e vrasjeve” shfaqen në listën e të kërkuarve të Interpolit- FOTO

TIRANE – Andon dhe Genis Mëhillaj, dy kushërinjtë vlonjatë të dyshuar si porositësit e disa prej krimeve të “killerit” Julian Sinanaj, shpallen në kërkim ndërkombëtar për “terrorizëm”. Faqja zyrtare e Interpolit në internet ka shtuar dje fotografitë e dy kushërinjve Mëhillaj në listën e personave të kërkuar “Wanted”. Në profilet e tyre përkatëse Interpoli ka vendosur fotografitë e dy të kërkuarve dhe gjeneralitetet e tyre. Poshtë emrit dhe mbiemrit shënohet “i kërkuar nga autoritetet shqiptare të drejtësisë”. Për Genis Mëhillajn pasqyrohet ditëlindja e tij, 24 nëntor 1970 dhe vendlindja e tij, Vlora.

Fotoja e publikuar për të është e njëjta që është publikuar nga Ministria e Brendshme pas shpalljes së tyre në kërkim. Në profilin e të kërkuarit Andon Mëhillaj shënohet ditëlindja e tij, 9 korrik 1975, dhe bashkangjitur gjenden dy foto të tij. Në kategorinë e akuzave ndaj dy kushërinjve Mëhillaj renditen të parat në radhë ato të “akteve terroriste” dhe të “financimit të terrorizmit”. Me tej akuzat ndaj tyre vijojnë me “fshehje nga organet e drejtësisë”, “fshehje të fondeve dhe pasurisë që financojnë terrorizmin”, “dhënie informacioni nga persona që ushtrojnë funksione publike”, “prodhim dhe mbajtje të armëve dhe municioneve ushtarake” dhe për “trafikim të armëve dhe municionit”. Andon dhe Genis Mëhillaj “humbën gjurmët” pas publikimit të lajmit për arrestimin e Julian Sinanajt.

Ata dyshohet të jenë “sekserët” e Sinanajt, personat që ndërmjetësonin mes porositësve të vrasjeve dhe ekzekutorit Sinanaj. Ky fakt është pranuar nga ana e bashkëpunëtorit të drejtësisë, Sinanaj, sipas të cilit kushërinjtë Mëhillaj kanë ndërmjetësuar tek ai për të kryer krime për llogari të tyre, ose për llogari të personave të tjerë. Sipas Policisë së Shtetit, nga kushërinjtë Mëhillaj është porositur te Julian Sinanaj kryerja e krimeve: vrasja e shtetasit Sokol Veizi më datë 26 gusht 2012 në Orikum të Vlorës; vrasja e shtetasit Agron Çela më datë 20 gusht 2013 në Vlorë, vendosje e lëndës plasëse në banesën e shtetasit Ardian Kollozi më datë 1 qershor 2013 në Vlorë; vendosje e lëndës eksplozive në motoçikletën e shtetasit E. B. në rrugën Transballkanike në Vlorë më datë 24 tetor 2013 dhe vendosje e lëndës eksplozive në automjetin e shtetasin E. B. në Vlorë më datë 31 gusht 2013.


Akuzat: “Akte terroriste” dhe “financim të terrorizmit”, “fshehje nga organet e drejtësisë”, “fshehje të fondeve dhe pasurisë që financojnë terrorizmin”, “dhënie informacioni nga persona që ushtrojnë funksione publike”, “prodhim dhe mbajtje të armëve dhe municioneve ushtarake” dhe “trafikim të armëve dhe municionit”.


Genis Mëhillaj
Akuzat: “Akte terroriste” dhe “financim të terrorizmit”, “fshehje nga organet e drejtësisë”, “fshehje të fondeve dhe pasurisë që financojnë terrorizmin”, “dhënie informacioni nga persona që ushtrojnë funksione publike”, “prodhim dhe mbajtje të armëve dhe municioneve ushtarake” dhe “trafikim të armëve dhe municionit”.

Balkanweb

[Albo]

Killeri Sinanaj: Ja porositë e Mëhillajve për krimet

Julian Sinanaj është i vetmi person që ka zbardhur një histori krimesh të padëgjuar më parë. Sipas tij, kanë qenë dy kushërinjtë vlonjatë, Andon dhe Genis Mëhillaj, që kanë ndërmjetësuar tek ai për të kryer krime për llogari të tyret apo të personave të tjerë. Sinanaj konfirmon se ata janë “sekserët” e dy vrasjeve në Vlorë, të peshkatarit Sokol Veizaj në vitin 2012, si dhe të biznesmenit Agron Çela në verën e vitit 2013. Autori i krimeve me pagesë ka pranuar se kanë qenë Mëhillajt që e kanë paguar për të vendosur eksploziv në banesën e deputetit të PD-së, Ardian Kollozi, si dhe në dy raste të tjera në gusht dhe në tetor po të vitit të kaluar, në një makinë dhe një motor, po në qytetin e Vlorës. Rasti më i fundit, i mbetur në tentativë, ishte ai i vrasjes së biznesmenit të naftës Piro Bare.

Panorama

[Albo]

Zbulimi i vrasjeve. Tritol në shtëpinë e sekserëve të Sinanajt

Vlorë, eksploziv në banesën e Andon Mëhillajt, ndërmjetësit të Julian Sinanajt. Familjarët u larguan nga frika e hakmarrjes.

Vetëm dëme materiale në banesë. Familjarët e Andon Mëhillajt të larguar nga frika e hakmarrjes.

Eksploziv banesës në Vlorë të Andon Mëhillajt, i shpallur në kërkim si ndërmjetës mes vrasësit me pagesë Julian Sinanaj dhe porositësve të krimeve të killerit.
Një sasi e konsiderueshme lënde plasëse është hedhur rreth orës 22:30 të mbrëmjes së djeshme në oborrin e banesës së 38-vjeçarit, në lagjen “28 Nëntori”, pranë Shtëpisë së ish-Oficerëve, i cili bashkë me kushëririn e tij, Andon Mëhillaj, prej datës 29 janar është ndër personat më të kërkuar në vend. Burime të Policisë së Vlorës konfirmojnë se nuk ka të lënduar në njerëz, vetëm dëme materiale. Dyshohet se autori ka lëvizur në afërsi të vendit ku ndodhet shtëpia e Mëhillajt dhe ka hedhur nga muri rrethues lëndën plasëse në oborr. Në banesën njëkatëshe ka pasur dëmtime kryesisht në dyer dhe dritare, ndërsa në objektet ngjitur nuk janë regjistruar dëme nga shpërthimi, sasia e të cilit nuk dihet ende. Ajo që konfirmohet është se nuk ka asnjë person të lënduar, nisur dhe nga fakti që familjarët e dy kushërinjve i kanë lënë banesat. Prej rreth 10 ditësh familja e Andon Mëhillajt, ashtu si dhe ajo e Genis Mëhillajt, mësohet se i kanë lënë banesat, për t’u larguar në një tjetër ambient, ndërkohë që burime të tjera pohojnë se ata kanë ikur fare nga qyteti i Vlorës. Kjo konfirmohet dhe nga vendi i punës së gruas së Genis Mëhillajt, e cila mban postin e nëndrejtoreshës së Institutit të Shëndetit Publik në Vlorë. Pak ditë më parë, Policia e Vlorës konfirmoi se ka marrë në ruajtje në distancë, me efektivë të veshur civilë, banesat e dy kushërinjve, për të shmangur ndonjë hakmarrjeje të mundshme nga ana e personave me të cilët janë përfshirë në çështje eliminimi fizik. Duket se shpërthimi i djeshëm është në shenjë hakmarrjeje për rastet e zbardhura të krimeve, falë dëshmisë së killerit me pagesë, Julian Sinanaj. Sipas Policisë, kjo është pista e parë e hetimit në lidhje me shpërthimin e mbrëmshëm, ndërsa dyshimet e tjera janë dytësore. Në komisariat janë shoqëruar vetëm banorët e shtëpive pranë, ndërsa po tentohet të zbulohet ndonjë gjurmë e autorëve të tritolit. Emrat e Genis dhe Andon Mëhillajt u bënë të njohur vetëm më 29 janar, kur për herë të parë u nxorën nga ekzekutori me pagesë, Julian Sinanaj. I arrestuari më 25 janar tregoi me detaje për krimet e kryera: 2 vrasje, 3 shpërthime tritoli dhe një tjetër ekzekutim të mbetur në tentativë, të gjitha sipas tij të porositura nga ana e dy kushërinjve. Sipas Sinanajt, ata ishin sekserët mes tij dhe organizatorëve të vërtetë, të cilët nuk i kishte njohur. Prej vëllezërve Mëhillaj ai ka marrë dhe pagesat e konsiderueshme për punën e kryer, ndërsa në rastin e vrasjes së peshkatarit të Orikumit, Sokol Veizaj, përfitimi ka qenë një apartament.

Panorama

[Albo]

Policia ruan familjet e Mëhilljave. Gruaja e Genis Mëhillajt, nëndrejtoreshë e ISHP, lë punën

“Panorama” shkruan sot se policia merr në ruajtje banesat e dy kushërinjve të akuzuar si sekserë në ekzekutimet me pagesë nga Julian Sinanaj.

Genis Mëhillaj dhe Andon Mëhillaj, të cilët jetojnë në lagjen “28 Nëntori” në Vlorë, janë arratisur që në momentin kur u arrestua Sinanaj, duke “braktisur” familjet e tyre. Identifikimi i tyre si ndërmjetës mes porositësve të krimeve me pagesë dhe ekzekutorit Sinanaj e ka shtyrë policinë të reagojë në mbrojtjen e familjarëve të dy të superkërkuarve për momentin.

Ky fakt konfirmohet nga burime të Policisë, sipas të cilave efektivë civilë po vëzhgojnë banesat e dy kushërinjve jo vetëm për të shmangur ndonjë incident, por dhe për kontrolluar nëse të kërkuarit mund të bëjnë ndonjë lëvizje duke u kthyer pranë shtëpive.

Ndërkohë që janë marrë këto masa, mësohet se veç të kërkuarve, edhe familjarët kanë vepruar nga ana e tyre duke lënë shtëpitë. Mësohet nga banorë të zonës se familja e Genis Mëhillajt është larguar nga shtëpia që ndodhet pranë Shtëpisë së Oficerëve.

Lajmin e plote e lexoni sot ne “Panorama” print