Qeveria e Rilindjes: Rritet çmimi i energjisë duke filluar nga 1 janari 2015

[Albo]

Çmimi i ri i energjisë, Rama nuk jep shifër të saktë: Do jetë mesatar



Në një kohë kur ERE nuk ka marrë ende një vendim për çmimin e energjisë elektrike, kryeministri Edi Rama siguroi nga Fieri se ky çmim do të jetë i mesatarizuar por pa thënë se sa do të jetë ai.
“Heqja e fashës do të thotë të shkojmë me një çmim të njëjtë dhe të mesatarizuar që në asnjë mënyrë nuk do të kapë ato tavane që predikon ditë natë kush do anarki, rrëmujë dhe do që Shqipëria të vazhdojë të jetë rrumpallë. Ne jemi shumë të qartë. Do të bëjmë me çdo kusht eliminimin e vjedhjes së energjisë elektrike”
Rama shigjetoi opozitën duke i akuzuar se e duan Shqipërinë një rrumpallë duke gënjyer me shifrat e çmimit.
Disa ditë më parë nga kryesia e kuvendit kreu i Komisionit të Ekonomisë Erjon Braçe duke folur për buxhetin dhe çmimin e energjisë elektrike tha se sipas të gjitha llogaritjeve ky çmim nuk duhet të jetë më i lartë se 10 lekë, vendim që duhet ta marë ERE.
Kryeministri e ka cilësuar vjedhjen e energjisë elektrike si një plagë të thellë që duhet mbyllur.
Duke iu rikthyer debatit për heqjen e fashës mbrojtëse Rama tha se fill pas heqjes së saj do të vendoset në dispozicion fondi për 200.000 familjet që do rimbursohen.
Pranë ERE janë depozituar tre kërkesa nga OSHEE, KESH dhe OST për të rritur çmimin e energjisë elektrike. Enti Regullator i Energjisë pritet të marë një vendim që do të publikohet në fund të muajit dhjetor.

ORA NEWS

[Wordless]

Epo meqë qënka "çmim mesatar" në rregull, kujtuam kush e di se çfarë !!

[Albo]

Energjia, ERE:Në 5 dhjetor vendimi për çmimin pas kërkesave për rritje

TIRANE – Enti Rregullator i Energjisë më 5 Dhjetor pritet të bëjë publik vendimin që ka marrë përballë kërkesave të tre operatorëve të prodhimit, transmetimit dhe shpërndarjes për rritje të çmimit të energjisë elektrike.

Pas seancave dëgjimore me Korporatën Elektroenergjetike Shqiptare, Operatorin e Sistemit të Transmetimit dhe Operatorin e Shpërndarjes së Energjisë Elektrike, ERE në një seancë zyrtare të hapur për mediat mëngjesin e 5 Dhjetorit, do të japë vendimin e saj.

OSHEE ka kërkuar rritjen e çmimit të energjisë elektrike ndaj konsumatorëve familjarë me 5 lek/kwh, pra nga 7 lek/kwh që është sot kërkon që çmimi të jetë në 12 lek/kwh.

KESH ka depozituar kërkesën pranë ERE-s duke kërkuar që çmimi të rritet nga 2.2 lekë/kwh, në 3.4 lekë/kwh për energjinë e shitur tek OSHEE.

Ndërsa OST nga 0,65 lek/kwh që trasmeton sot energjinë në transmetim, kërkon të bëhet 0,71 lek/kwh, dhe kjo tarifë që i faturohet OSHEE-së.

Nga data 1 janar 2015, heqja e fashës 300 kwh/muaj pritet të ndryshojë çmimin e energjisë, që sot është 7.7 lek/kwh, por se sa do të jetë ky ndryshim, i mbetet vendimit që duhet të merret nga Enti Rregullator i Energjisë (ERE). Vetë kryeministri Rama u shpreh dje nga qyteti i Fierit se çmimi do të jetë i mesatarizuar.

Javën e kaluar kryetari i komisionit parlamentar të Ekonomisë Erjon Braçe deklaroi se nuk do të ketë rritje çmimi për qytetarët as mbi 10 lekë. Ai është shprehur edhe më herët kundërkërkesave të tre operatorëve për rritje të çmimit, dhe i ka kërkuar ERE-s të marrë përgjegjësinë që të mos lejojë që keqmenaxhimi në sistem të bëhet argument për tarifat e reja.

Shqiptarja

[Albo]

Guxholli: Çmimi i energjisë do rritet, aritmetikë e thjeshtë që e di edhe një 5 vjeçar



Kordinatorja në departamentin e Energjisë dhe Burimeve Natyrore në Partinë Demokratike, Suzana Guxholli ka deklaruar në Ora News se çmimi i energjisë do rritet, dhe kjo është një aritmetike e thjeshtë që e di edhe një fëmijë i moshës 4-5 vjeç.
Guxholli deklaroi se ajo çka po ndodh është largimi vëmendjes nga varfërimi i shqiptarëve.
“Fasha ishte rritja e çmimit nga 7.4 me sa do ta çojnë. Me shifrat e dertanishme duke iu referuar vlerave të kërkuara dhe të mesatarizuara siç thonë ata, dhe pa e konsideruar TVSH, rritja e çmimit përfaqësohet me 4.6 apo me 22 %. Çmimi i mesatarizuar do të thotë që ai që paguante 7.7 lekë dhe ai që paguante 13 lekë për kë, t’i mbledhësh bashkë dhe t’i pjestosh për dy, që përsëri bëhët 12-13.
7.7 që është çmimi sot për 75% të popullsisë nqs bëhet me të ashtuquajturën çmim mesatar 11-12-13 do të shkojë me gjithë TVSH, quhet rritje çmimi? Kjo është një aritmetike bazike e cila nuk iu hedh dot hi syve as një fëmijë 4-5-vjeçare të cilët din ti bëjnë këto mbledhje dhe zbritje. Është një largim nga vëmendja e asaj cka po ndodh, që shqiptarët po varfërohen edhe më shumë, madje edhe te ato mllra ku qeveria mund të ndikojë sepse tregjet janë të rregulluara”

ORA NEWS

[Albo]

‘Energjia’, Rama: Nëse çmimi rritet me 22%, do dal edhe unë në protestë. Basha: Mos u lodh, vjen protesta tek ty!

TIRANE-A do të rritet çmimi i energjisë? Partia Demokratike shprehet se rritja e çmimit do të bëhet në masën 22%, ndaj bën thirrje për protesta masive. Por menjëherë vjen reagimi i kryeministrit Edi Rama që shprehet se, nëse çmimi shkon 22% do të dalë dhe ai në protestë. Kreu i Qeverisë garanton se deklaratat nga selia e PD janë mashtrime. Por, nuk mendon kështu kreu i PD, Lulzim Basha që këshillon kryeministrin që të mos luajë kukafshehti por t’u shpjegojë shqiptarëve, sesa do të rritet realisht çmimi i energjisë elektrike.

PD: Çmimi rritet me 22%
Duke e konsideruar padrejtësi rritjen e çmimit të energjisë PD ftoi sot në protesta qytetarët.
Enno Bozdo tha sot në një deklaratë për mediat nga selia e PD-së se çmimi I energjisë do të rritet me 22 %, por kësaj deklarate kryeministri Rama iu përgjigj duke deklaruar se nëse kjo ndodh dhe ai vetë do të dalë në protesta.

Deklarata e Enno Bozdo
Më në fund, qeveria e pranoi vetë, se dhurata që ajo ka menduar për qytetarët këtë fundviti, është rritja e çmimit të energjisë.
Pasi në fushate premtoi uljen e çmimit të energjisë, Edi Rama u fsheh për muaj të tërë pas përbetimeve të kota për mosrritjen e cmimit. Por e vërteta doli në dritë të diellit. Duke dërguar sinjale të paqarta, në mungesë totale të transparencës, në errësirë të plotë për disa muaj, Edi Rama në fakt gatoi rritjen e cmimit.
Zyrtarisht, qeveria ka kërkuar të rrisë cmimin e energjisë elektrike me 22 përqind. Nga ana tjetër, kompania OSHEE, 100 përqind në pronësi të qeverisë, pra përsëri qeveria, kërkon një rritje cmimi më shumë se 60%. Një tallje masive për shqiptaret, të cilët tashmë e kanë kuptuar se cmimi përfundimisht do të rritet!
Një rritje që prek drejtpërdrejt ata që nuk kanë, pra më shumë se 76 përqind të qytetarëve.
Fillimisht e dha lajmin e keq për shqiptarët nga Uashingtoni, Ministri i Financave.
Edi Rama nxitoi të bënte ato deklaratat e tij se nuk do të kishte rritje cmimi.
Por zyrtarisht, e firmosur nga qeveria është kërkesa për ta cuar tarifën e cdo fundmuaji për pjesën më të madhe të shqiptarëve, të paktën 22 përqind më shumë.
Edi Rama vazhdon të fshihet. Nuk jep asnjë shpjegim. Sic nuk bëri transparencë për një nga aferat më të mëdha në rajon e më gjërë, faljen e 600 milionë eurove ndaj kompanisë CEZ. Eshtë aferë e pastër ku Rama është përfshirë, pasi këto 600 milionë euro ishin fatura të pranuara nga kompania ceke, e cila duhej t’ia shlyente shtetit shqiptar.
Ia dha Edi Rama me një dorë miqve të tij, por po u merr shpirtin qytetarëve të vendit, me fatura abuzive, me kamatvonesa mbi faturat abuzive e tani së fundmi, si qershia mbi tortë, me rritjen e cmimit të energjisë.
Po rrit cmimin e energjisë, teksa vetë ka dhënë shembullin e keqmenaxhimit dhe abuzimit me pasurinë publike, me caktimin e drejtorëve të OSHEE, hajdutë të paskrupullt e persona me probleme me drejtësinë.
Po e rrit cmimin e energjisë, në një kohë kur shqiptarët po vuajnë papunësinë, varfërinë, koston e larte te jetetës.
Rritja e cmimit të energjisë është një padrejtësi, që qytetarët do të dinë ti bëjnë ballë.
Siç e tregoi protesta masive popullore.
Dhe protesta popullore do ta ndalë të keqen.

Edi Rama: Nëse çmimi i energjisë shkon aq, do dal edhe unë në protestë

“Nëse çmimi i energjisë rritet me 22%, do dal dhe unë në protestë”. Kjo ishte deklarata e sotme e kryeministrit Edi Rama lidhur me deklaratat e bëra së fundmi se çmimi i energjisë pritet të rritet për xhepin e konsumatorit.

Me një mesazh të shkurtër në Twitter, Rama jep garanci për mosrritje të çmimit të energjisë elektrike. Mandej, ai shprehet se nëse kjo vërtetohet, do të jetë e vështirë të reagohet nga ana e atyre që akuzojnë për një cmim në rritje të energjisë.

“Nëse çmimi i energjisë ju rritet 22% do dal edhe unë në protestë, po nëse jo ku do shkojnë ata që veç shpifin përditë për t’ju helmuar?!…

As duan tia dinë çfarë thonë, jo vetëm pa asnjë ide e program veç shpifjeve po ultësisht kryelartë në recitimin e gënjeshtrave të përditshme”.

Basha: Mos luaj kukafshehti por përgjigju shqiptarëve, sa do të rritet energjia

Por, sipas kryetarit të PD, Lulzim Basha, kryeministri Edi Rama po i bën bisht pyetjes që po mundon shqiptarët; ‘Sa do të rritet çmimi i energjisë elektrike’.
“Kryemashtruesi na bën moral! Ka 2 muaj që luan kukafshehti me ministrin e tij të energjisë dhe nuk i përgjigjet pyetjes së shqiptareve: Sa do rritet çmimi i energjisë?”.
Sipas Bashës, Rama premtoi uljen e çmimit të energjisë elektrike gjatë fushatës elektorale. Kreu i PD tha se përkundër premtimeve të Ramës do të vijë një protestë popullore e përmasave të mëdha.
“Shqiptarët nuk harrojnë se në fushatë premtoi se do ta ulte cmimin e energjisë; Por OSHEE dhe Ministria e Energjitikës, të dyja nën komandën e kryeministrit kanë kërkuar rritje të cmimit. Kryemashtruesi dhe megafonet e tij e quajnë mesatarizim.

Leri lojerat me nervat e sfilitura te njerezve qe po vuajne! Ule cmimin e energjise sic premtove! Mos rrit taksat! Hap vende pune dhe jo plage të reja sociale! Përndryshe mos u lodh te vish ne proteste. Po vjen protesta tek ty! Me e madhe se kurrë më parë!”

(d.b/BalkanWeb)

[Qyfyre]

U dashka pritur 1 janari me sa duket per ta par cmimin tamam

[Wordless]

E ka bërë burgun si kamp pushimi

[A.I]

E ka bërë burgun si kamp pushimi

Do me ja heq iher e mire deshiren per me vjedh energjine! Iher qe provojn burgun ku jane bo kapice robt dhe mendojne se per ca arsye erdhen, nese dalin, sja mba mo kujt me vjedh prap

[Wordless]

E mirë mirë, por fëmijët duan të hanë. Nëse i fut babain në burg, kush do t'i ushqejë ata ? Me baba në punë dhe po ushqehen si mos më keq !! Pastaj, nëse ky i fut në burg jo vetëm që para nuk mer, por duhet t'i mbajë të burgosurit dhe me shpenzime shtesë siç është ushqimi, veshjet, paisjet e jetesës dhe shtimi i burgjeve , gardianeve etj. Pra, kjo puna e burgut një e dy, është pesë me hiç !!

[A.I]

Wordless, me pelqen firma jote!