Presidenti Nishani: Kjo mazhorancë po kerkon ta lërë Shqipërinë pa president

[Vinjol]

Presidenti kthen në Kuvend ligjin për Policinë, KLD dhe Gjykatën Administrative/Nishani rrëzon 3 ligje të mazhorancës



Presidenti Bujar Nishani i kthen Kuvendit për rishqyrtim ligjin për Policinë e Shtetit, atë për funksionimin dhe organizimin e KLD-së si dhe ligjit “Për organizimin dhe funksionimin e gjykatave administrative dhe gjykimin e mosmarrëveshjeve administrative””. Të 3 ligjet u miratuan nga Kuvendi në seancën e 31 Korrikut, ndërsa pritet që në ditët në vijim Kreu i Shtetit të rikthejë për shqyrtim në Kuvend edhe ligjin për Reformën Territoriale.

Ligji për Policinë

Në arsyetimin e Presidentit Nishani për kthimin në Kuvend të ligjit për Policinë e Shtetit thuhet se “konstatoj se tek Ligji i ri, në nenin 2 “Misioni i Policisë së Shtetit” kemi një shtesë të misionit të veprimtarisë së Policisë së Shtetit, e konkretisht atë të ruajtjes së personaliteteve të larta shtetërore dhe të objekteve të rëndësisë së veçantë. Ky ndryshim që ka të bëjë në thelb me objektin e këtij ligji dhe veprimtarinë e Policisë së Shtetit mbetet deklarativ pasi vetë neni 22 i tij referon këtë rregullim në një ligj tjetër. Kështu në pikën 3 të këtij neni thuhet shprehimisht se: Statusi, organizimi dhe funksionimi i kësaj strukture përcaktohen me ligj të veçantë. Pra natyrshëm lind pyetja : a është objekti i këtij ligji, i sjellë për shpallje pranë Presidentit të Republikës së Shqipërisë, ruajtja e personaliteteve të larta shtetërore dhe objekteve të rëndësisë së veçantë, dhe çfarë kërkohet të rregullohet apo normohet në veprimtarinë e Policisë së Shtetit?”

Në vijim të argumenteve kundër miratimit të ligjit, Nishani gjithashtu konstaton se ligji i ri kërkon të kalojë në mënyrë të pakuptimtë, në përgjegjësinë e Policisë së Shtetit ruajtjen e personaliteteve të larta shtetërore dhe objekteve të rëndësisë së veçantë, sa kohë që këtë mision e ka Garda e Republikës, një institucion i konsoliduar në këtë fushë, me eksperiencë të gjatë dhe histori mbi 80 vjeçare.

“Në vazhdim të logjikës se çdo ligj duhet të ofrojë zgjidhje të qëndrueshme, të sakta dhe të kuptueshme për cilindo që ai i drejtohet, dhe për sa kohë nuk arrijnë këto qëllime besoj se ndajmë të njëjtin mendim, të nderuar deputetë, se ato dëmtojnë rendin ligjor dhe autoritetin e shtetit”, thekson Kreu i Shtetit.

Sipas tij, një tjetër argument ka të bëjë me enin 4 “Statusi i Policisë së Shtetit” është parashikuar vartësia e Policisë nga Ministri për çështjet e rendit dhe sigurisë publike, në ndryshim nga ligji në fuqi, i cili parashikon Policinë si pjesë të strukturës së Ministrisë së Brendshme. Ky ndryshim është konstatuar jo vetëm nga ana ime por dhe nga organet e tjera kushtetuese dhe ligjzbatuese me të cilat ndaj të njëjtin shqetësim për shkak se kjo bie ndesh me parimin e paanësisë politike në të cilën bazohet e gjithë veprimtaria e Policisë së Shtetit, dhe të sanksionuar po në këtë ligj në nenin 5/dh. Kjo lloj varësie mbetet tërësisht e paqartësuar për qëllimin që kërkohet të arrihet, sa kohe qe funksioni i Ministrit është një funksion politik dhe rrezikon politizimin e Policisë së Shtetit .

“Së katërti, për sa i përket krijimit të “Byroja Kombëtare e Hetimit” (Nenin 27) e cila paraqitet në ligj dhe relacionin shpjegues si strukturë e veçantë e Policisë së Shtetit, që do të kryejë veprimtari gjurmuese dhe hetimore dhe se organizimi e funksionimi i saj do të bëhet me urdhër të Ministrit përgjegjës për rendin dhe sigurinë publike, gjykoj se kemi të bëjmë me një strukturë e cila krijon paralelizma në kompetenca dhe kontradiksion me objektin e veprimtarisë së organit të Prokurorisë dhe Policisë Gjyqësore për të cilat ka tashmë një kuadër ligjor që mirëpërcakton detyrat, funksionimin dhe mënyrën e organizimit të veprimtarinë së tyre dhe që nuk lejon kurrsesi ndryshe. Konkretisht, ligjvënësi ka rregulluar dhe sanksionuar veprimtarinë, misionin dhe mënyrën e organizimit të Prokurorisë dhe Policisë Gjyqësore me anë të Kushtetutës (Neni 148), Ligjit nr. 7905, datë 21.3.1995 “Kodi i Procedurës Penale”, i ndryshuar (nenet 24, 25, 30, 31, 32, 33) dhe Ligjit nr.8677, dt. 2.11.2000 “Për organizimin dhe funksionimin e Policisë Gjyqësore” (nenet 2, 3 , 4, 5). Në këtë logjikë, mendoj se në hartimin e ligjit dhe krijimin e këtyre strukturave të veçanta si dhe përdorimin e termave ligjorë, duhet mbajtur në konsideratë i gjithë sistemi ligjor bashkëkohor penal. Pa zgjidhur statusin juridik të strukturave të ngarkuara nga Kushtetuta dhe ligji me cilësinë e subjektit procedural penal, nuk mund të krijohen struktura të tjera me të njëjtin objekt veprimtarie.

Së fundmi, konstatoj se ka kundërshti midis dispozitave të ligjit të miratuar me dispozitat e disa ligjeve të tjera ekzistuese, si për shembull pika 1/a e nenit 131 “Masa të veçanta”, bie ndesh me rregullimin ligjor të parashikuar nga nenet 6, 7 dhe 8 të ligjit 9157, datë 04.12.2003 “Për përgjimin e telekomunikimeve” i ndryshuar. Raste të kësaj natyre konstatohen edhe në dispozita të tjera të ligjit për të cilat ndajmë të njëjtin qëndrim, siç e kam përmendur edhe më sipër, me organet kushtetuese dhe strukturat e tjera ligjzbatuese.

Mospërputhjet midis ligjeve brenda të njëjtit sistemi ligjor e bëjnë të padiskutueshëm nevojën e rishqyrtimin të këtij ligji nga ana Juaj.

Për sa më sipër, ndryshimet ligjore që sjell ky ligj shkelin parimin kushtetues të shtetit të së drejtës”, thekson Presidenti Nishani.

Ligji për KLD

Në argumentet për kthimin e ligjit për funksionimin dhe organizimin e Këshillit të Lartë të Drejtësisë, Presidenti Nishani thekson se neni 7 i ligjit nr. 101/2014, duke parashikuar se “Këshilli i Lartë i Drejtësisë, me propozim të Presidentit, zgjedh nga radhët e anëtarëve të zgjedhur nga Kuvendi një Zëvendëskryetar”, bie ndesh me nenin 147 pika 3 të Kushtetutës.

“Ky ndryshim përbën shkelje të parashikimeve kushtetuese në dy plane:

- Kufizon kompetencën e Presidentit të Republikës, në cilësinë e Kryetarit të Këshillit të Lartë të Drejtësisë, për të propozuar si Zëvendëskryetar cilindo nga anëtarët e këtij Këshilli, dhe
- Heq të drejtën që i ka dhënë kushtetuta anëtarëve nga radhët e gjyqësorit për t’u propozuar në postin e Zëvendëskryetarit të KLD-së.

Kushtetutëbërësit e kanë lënë në vlerësimin e Presidentit të Republikës dhe të Këshillit të Lartë të Drejtësisë zgjedhjen e Zëvendëskryetarit, i cili mund të jetë si nga radhët e gjyqtarëve të zgjedhur nga Konferenca Kombëtare Gjyqësore ashtu edhe nga radhët e anëtarëve të zgjedhur nga Kuvendi. Ndërsa me ndryshimet që sjell neni 7 i ligjit nr. 101/2014, de facto kjo kompetencë i kalon Kuvendit i cili me tre emërimet e tij në KLD e vendos Këshillin e Lartë të Drejtësisë dhe Presidentin e Republikës para faktit të kryer. Në gjykimin tim, këto ndryshime cenojnë parimin kushtetues të ndarjes dhe balancimit të pushteteve dhe rrezikojnë të dëmtojnë balancën duke ndërhyrë haptazi në pavarësisë e gjyqësorit e cila është një nga shtyllat kryesore të shtetit të së drejtës”, theksohet në sqarimin e Kreut të Shtetit drejtuar Kuvendit.

Neni 147, pika 3 e Kushtetutës nuk përmban elementët e një norme referuese, por është një normë që kërkon zbatim të drejtpërdrejtë, pra me anë të kësaj dispozite kushtetutëbërësi e ka marrë vetë përsipër të rregullojë zgjedhjen e Zëvendëskryetarit të KLD-së. Ligjvënësi mund të bëjë shtesa dhe ndryshime në ligje, por pa cenuar rregullimet tepër specifike kushtetuese për natyrën e funksionimit dhe përbërjen e Këshillit të Lartë të Drejtësisë. Nisur nga përmbajtja e nenit 7 të ligjit nr. 101/2014, ndaj bindjen se miratimi i kësaj dispozite duhej të ishte paraprirë minimalisht nga vullneti i ligjvënësit për të ndryshuar pikën 3 të nenit 147 të Kushtetutës.

Anëtarët e Këshillit të Lartë të drejtësisë zgjidhen nga Konferenca Gjyqësore Kombëtare për shkak të cilësisë së tyre si gjyqtarë, duke përfaqësuar të gjithë trupën e gjyqtarëve që i ka zgjedhur.

Edhe në rast se njëri nga gjyqtarët zgjidhet nga KLD si Zëvendëskryetar, ai vazhdon të jetë përfaqësues i pushtetit gjyqësor me ndryshimin e vetëm se ai nuk mund të ushtrojë funksionin e gjyqtarit për kohëzgjatjen e mandatit. Ai e rifillon ushtrimin e dhënies së drejtësisë në gjykatë pasi ka dhënë dorëheqjen ose ka përfunduar mandatin si zëvendëskryetar.

Gjyqtari i zgjedhur si Zëvendëskryetar përveç se e ruan këtë cilësi gjatë gjithë mandatit, është një garanci më shumë për pavarësinë e sistemit gjyqësor si dhe për balancën ndërmjet pushteteve.

Përderisa, gjyqtari nuk e humbet këtë cilësi përveç rasteve të parashikuara shprehimisht nga Kushtetuta, atëherë nuk mund të pretendohet se me zgjedhjen e tij si Zëvendëskryetar nuk përfaqëson trupën gjyqësore nga e cila është zgjedhur.

Për sa më sipër, ndryshimet ligjore tejkalojnë parashikimet kushtetuese duke cenuar parimin e ndarjes dhe balancimit të pushteteve si dhe parimin e hierarkisë së normave. Referuar jurisprudencës së Gjykatës Kushtetuese “atë që nuk ka dashur ta bëjë Kushtetuta nuk mund ta bëjë ligji. Prandaj nuk mund të pranohet se ajo ka ometuar pa përmendur raste të tilla …”.

Ligji për Gjykatën Administrative

Në lidhje me ligjin “Për organizimin dhe funksionimin e gjykatave administrative dhe gjykimin e mosmarrëveshjeve administrative””, Nishani i konsideron ndryshimet e miratuara si plotësisht të nevojshme për të siguruar mbarëvajtjen dhe efikasitetin në punën e gjyqtarëve pranë gjykatave administrative të Shkallës së parë dhe Gjykatës së Apelit Administrativ duke marrë në konsideratë mbingarkesën që kanë këto gjykata.

“Por, në analizë të përputhshmërisë së ndryshimeve ligjore me Kushtetutën dhe jurisprudencën kushtetuese konstatova se procedura e emërimit, lirimit dhe shkarkimit nga detyra të ndihmësve ligjore (neni 6/1 sipas ndryshimeve) është në kundërshtim me parimin kushtetues të ndarjes dhe balancimit të pushteteve dhe më konkretisht të pavarësisë së gjyqësorit e cila është një nga shtyllat kryesore të shtetit të së drejtës.

Kompetenca ekskluzive që i jep ligji 100/2014 kancelarit të gjykatës për të propozuar emërimin, lirimin apo shkarkimin e ndihmësve ligjor, i vendos këta të fundit de facto nën varësinë e tij. Kryetari i gjykatës, i cili de jure emëron, liron apo shkarkon ndihmësit ligjorë nuk bën gjë tjetër veçse formalizon një vendim të marrë nga kancelari i gjykatës, dhe nuk ka diskrecion për mospranimin e kandidaturës apo refuzimin e shkarkimit ashtu siç nuk ka diskrecion apo të drejtë përzgjedhjeje as vetë gjyqtari pranë të cilit do të punojë ndihmësi.

Lidhur me pozicionin e ndihmësit ligjor duhet t’i referohemi nenit 6 pika 2 të ligjit nr. 49/2012, i cili parashikon se: “ndihmësi ligjor ndihmon dhe këshillon gjyqtarin lidhur me përgatitjen e çështjes për gjykim dhe shqyrtimin gjyqësor, si dhe përgatit projekt-akte procedural të nevojshme për gjykimin. Me kërkesë të gjyqtarit, ndihmësi ligjor bën kërkime ligjore dhe përgatit opinione me shkrim për problematika ligjore të karakterit procedural dhe material që lidhen me çështjet në gjykim”. Nga kjo dispozitë del qartë roli i rëndësishëm që luan ndihmësi ligjor gjatë gjykimit dhe shqyrtimit të çështjeve. Për këtë arsye, për vetë natyrën delikate që ka shqyrtimi i çështjeve në gjykata, marrëdhënia e punës gjyqtar-ndihmës ligjor bazohet në mirëbesimin e gjyqtarit”, thuhet në sqarimin e Presidentit.

Bazuar në ndryshimet ligjore, lidhur me emërimin e ndihmësve, kancelari i gjykatës do të përzgjedhë dhe propozojë për emërim ndihmësin ligjor nga lista e kandidatëve fitues të shpallur pas testimit nga një komision ad hoc i cili do të organizohet dhe funksionojë bazuar në urdhrin e Ministrit të Drejtësisë.

Pra, kryetari i gjykatës duhet të emërojë si ndihmës ligjorë patjetër njërën nga kandidaturat e propozuara nga kancelari i gjykatës i cili bazuar në neni 37 pika 2 të ligjit nr. 9877, datë 18.2.2008 “Për organizimin e Pushtetit Gjyqësor në Republikën e Shqipërisë”, ku parashikohet se emërimi dhe shkarkimi i tij bëhen nga Ministri i Drejtësisë, është dukshëm në raport të drejtpërdrejtë varësie dhe kontrolli nga Ministri i Drejtësisë.

Raportet e caktuara që krijohen gjatë ushtrimit të veprimtarive shtetërore midis organeve dhe institucioneve qendrore kushtetuese që përfaqësojnë një nga tre pushtetet duhet që në çdo rast të mos cenojnë pavarësinë kushtetuese të secilit prej tyre. Pavarësia në vetvete ka si elementë të qenësishëm të saj pavarësinë organizative, pavarësinë funksionale dhe pavarësinë financiare (Vendimi i Gjykatës Kushtetuese nr. 19, datë 03.05.2007).

Në gjykimin tim, ndryshimet qe sjell ligji 100/2014, rrezikojnë seriozisht këto pavarësi kushtetuese, si dhe dhënia e kompetencave kaq të zgjeruara për kancelarët e gjykatave lidhur me emërimin e ndihmësve ligjore krijon rrezikun e ndikimit të papërshtatshëm në funksionin ekskluziv të gjyqësorit, dhënien e drejtësisë, si dhe i vendos strukturat brenda gjykatave në kushte të papërshtatshme për krijimin e marrëdhënieve të besimit, të cilat janë të nevojshme për ushtrimin normal të funksionit të gjykatave.

Gjykata Kushtetuese me vendimin nr. 20, datë 09.07.2009, duke shfuqizuar si të papajtueshëm me Kushtetutën shprehjen e nenit 38/a të ligjit nr. 9877 datë 18.2.2008 “Për organizimin e Pushtetit Gjyqësor në Republikën e Shqipërisë” ku parashikohej se kancelari i gjykatës: “a) emëron dhe shkarkon personelin e sekretarisë gjyqësore dhe personelin administrativo-teknik të shërbimeve të gjykatës” ka shprehur qartazi se roli dhe funksionimi i administratës gjyqësore nuk mund të ndahet nga funksioni i dhënies së drejtësisë dhe përbën një element të rëndësishëm të pavarësisë organizative të pushtetit gjyqësor. Në zbatim të jurisprudencës së Gjykatës Kushtetuese, vlerësoj se me ndryshimet që sjell ky ligj, kancelarit i jepet një kompetencë edhe më e madhe nga ajo që i është hequr me vendim kushtetues.

Për sa më sipër, ndryshimet ligjore që sjell ky ligj, janë në kundërshtim me nenet 7 dhe 145 të Kushtetutës, me jurisprudencën e Gjykatës Kushtetuese dhe shkelin parimin kushtetues të shtetit të së dre

[Vinjol]

Kryeministri Edi Rama ka reaguar përmes një postimi në Tëitter mbi dekretet e Kreut të Shtetit Bujar Nishani për kthimin e 3 ligjeve për rishqyrtim në Kuvend.

“Presidenti kthen mbrapsht Ligjin për Policinë dhe rreshton pseudo argumentat e PD për një ligj të punuar me partneret ndërkombetarë # Keqardhje”, shkruan Rama në komentin e tij.

Reagimi i Kreut të Qeverisë erdhi pak minuta pasi në faqen zyrtare të Presidencës u publikuan dekretet për kthimin e ligjeve në Kuvend për Policinë e Shtetit, KLD dhe Gjykatën Administrative.

[Albo]

Debati për dekretet, Nishani: Po kërkohet që Presidenti të bëhet i paqenë

“Kërkohet që Presidenti të mos flasë. Kërkohet që zyra e Presidentit të Republikës të bëhet e paqenë. Kompetencat po hiqen nga dita në ditë. Kompetenca të tjera po ngrihen dhe nuk po lënë vend të zbatohen. Atëherë, ta ndalojmë Presidentin të flasë përmes dekretit dhe ta ç’bëjmë fare Zyrën e Institucionit të Presidentit të Republikës”.

Një sërë zhvillimesh ka pasur nga Institucioni juaj këtë verë, ndoshta nisur edhe nga seanca e fundit e Parlamentit, e sesionit të kaluar, ajo e 31 korrikut, ku pati një volum ligjesh të rëndësishme që u kaluan nga ana e mazhorancës. Ligje të cilat ju nuk i keni firmosur, një pjesë të tyre, siç mund të përmendim Magjistraturën, KLD-në apo Policinë e Shtetit, ligje të cilat ju i keni kthyer për t’i dhënë dhe një herë mundësinë Parlamentit për të reflektuar mbi to. Ka pasur reagime në Twitter nga ana e Kryeministrit Rama ‘një shprehje keqardhje’, por mund të themi ende pa i dhënë fjalë Parlamentit për t’u shprehur mbi këto dekrete. Ai ka paralajmëruar një rrëzim të dekreteve tuaja, një rrëzim të tyre duke e parë dhe këtë si sulm të Institucionit të Presidencës, si sulm tuajin ndaj qeverisë, në fakt, duke mos prekur thellësisht ligjet. Si e komentoni? Çfarë përshtypje ju krijon kjo shprehje e Kryeministrit tek reagimi i menjëhershëm lidhur me dekretet tuaja?

Jo, në fakt unë nuk kam reagime për komentet. Komentet le t’i gjykojë opinioni publik. Ju vetë e thatë që Parlamenti seancën e fundit ka pasur një punë shumë të madhe, shumë voluminoze, kështu që për rrjedhojë dhe Presidentit i takon të ketë një punë po aq voluminoze në shqyrtimin e tyre. Mua më vjen keq, në fakt, për mentalitetin që prezantohet ndaj detyrave dhe punës kushtetuese që ka Presidenti i Republikës. Nëse ka një detyrë kryesore, thelbësore, përmbajtësore të Presidentit të Republikës përpos të tjerave që janë protokollare, simbolike, është ajo e dekretit, është e dekretimit të ligjeve dhe Kushtetuta i ka dhënë tagrin kryesor duke mos i njohur të drejtën e vetos, por të gjykimit përmes dekretit; është i miratimit të një ligji, i kthimit mbrapa në Parlament kur konstatohet që është në cenim të Kushtetutës së vendit apo në heshtje kur nuk ka përputhshmëri të bindjes së Presidentit në raport me legjislacionin vendas. Presidenti ka bërë detyrën e tij. Ka ushtruar të drejtën kryesore kushtetuese përmes dekretit. Nuk ka asgjë politike. Ka thellësisht dhe drejtpërsëdrejti shprehje të bindjeve demokratike dhe të përgjegjësisë kushtetuese të Institucionit të Presidentit të Republikës ndaj atyre akteve ligjore, të cilat jo vetëm nuk janë në përputhje me Kushtetutën, por dhe e cenojnë atë. Është për të ardhur keq që, qëndrimi kushtetues, ushtrimi i detyrës nga Presidenti i Republikës ndesh me një mentalitet të së shkuarës. Përsa kohë nuk mendon si njëri prej aktorëve, njëri prej institucioneve, menjëherë akuzohesh si ‘armik politik’. Kjo ishte politika që ndiqej në të shkuarën. Ai që nuk mendon si ne menjëherë i vishet termi i ‘armikut politik’ për të justifikuar problemin, për të justifikuar realisht shqetësimin kryesor dhe në këtë rast shqetësimi kryesor i Presidentit është që ligjet që janë kthyer janë në cenim të Kushtetutës së vendit, sepse në argumentet publikë të bërë nga Institucioni i Presidentit të Republikës janë të renditura të gjitha arsyet ku cenohet Kushtetuta e vendit. Prandaj them që, jo vetëm që Presidenti ka bërë detyrën – ka folur. Çfarë kërkohet? Kërkohet që Presidenti të mos flasë. Kërkohet që zyra e Presidentit të Republikës të bëhet e paqenë. Kompetencat po hiqen nga dita në ditë. Kompetenca të tjera po ngrihen dhe nuk po lenë vend të zbatohen. Atëherë, ta ndalojmë Presidentin të flasë përmes dekretit dhe ta ç’bëjmë fare Zyrën e Institucionit të Presidentit të Republikës. Unë e kam shprehur dhe herë të tjera, unë jam i vendosur, pa diskutim, të qëndroj në korrektesë të plotë të hapësirës që i takon Presidentit të Republikës, Kryetarit të Shtetit, detyrave dhe përgjegjësive kushtetuese të Presidentit të Republikës, pavarësisht nga pëlqyeshmëria apo papëlqyeshmëria politike e institucioneve apo e aktorëve të tjerë e akteve të Presidentit të Republikës. Pra, nuk ka asgjë politike, nuk ka asnjë lloj sulmi. As ka pasur dhe as nuk do të ketë ndonjë inicim të ndonjë sulmi politik, sepse nuk ka arsye, nuk ka objektiva të tillë Presidenti i Republikës, por do të ketë në vijimësi qëndrim të hapur, transparent, publik, të argumentuar, të logjikshëm dhe të mbështetur pikërisht në legjislacionin dhe Kushtetutën e vendit, përsa kohë Presidenti konstaton se, për shkak të detyrës së tij duhet të angazhohet në paralajmërimet dhe ndalimet, me aq sa është e mundur nga Presidenti i Republikës, të mosrespektimit të Kushtetutës së vendit.

Komiteti ndërkombëtar, Bashkimi Europian, OSBE, SHBA bënë thirrje për një reformë në drejtësi që të nisë në mënyrë të matur, të marrë kohë, të paktën të nisë nga shtatori dhe të jetë gjithëpërfshirëse. Megjithatë, mazhoranca nuk u ndal dhe më 31 korrik miratoi ndryshimet ligjore për KLD-në dhe ndryshimet e tjera. Konkretisht për KLD-në ju u shprehët në relacionin që shoqëronte dekretin për kthimin e tij në Kuvend.

Po cenohet drejtësia me këto ndryshime ligjore? Fakti që nuk përfshihen gjyqtarë me të drejtën për t’u zgjedhur si Zv/kryetar të KLD-së, ishte një nga shqetësimet e shprehura në dekretin tuaj. Çfarë mund të na thoni konkretisht për KLD-në? Si do të funksiononte ai në rast se këto ndryshime ligjore do të futeshin në fuqi? Dhe, lidhur me reformën në drejtësi, në tërësi, çfarë mund të themi tashmë kur ajo pritet të rifillojë, të paktën, për diskutim nga mazhoranca nga shtatori që vjen.

Reforma në drejtësi, së pari, përbën një çështje fondamentale për shoqërinë tonë, për demokracinë dhe për të drejtat e qytetarëve, edhe për jetën e përditshme të qytetarëve, për vetë konsolidimin e shtetit të së drejtës dhe nuk ka asnjë dyshim që reforma në drejtësi është një domosdoshmëri, është një fushë mjaft e gjerë, e cila kërkon investime intelektuale, investime të infrastrukturës dhe angazhime serioze të gjera dhe asistencë.

Në gjykimin tim, reforma në drejtësi fillon, së pari, tek zbatimi i vendimit të gjykatave. Nëse ne i kërkojmë dhe nuk e neglizhojmë që qytetari i thjeshtë ta zbatojë në çdo rast vendimin e gjykatës, a mund të besojmë ne që do të kemi një reformë në drejtësi eficente dhe për qytetarin nëse institucionet shtetërore refuzojnë të zbatojnë vendimet e gjykatave të vendit dhe gjykatave ndërkombëtare? Pra, duhet ta nisim tek kjo. Së pari, të konsolidojmë kulturën e zbatimit të vendimit të gjykatave. Reforma në drejtësi, më pas, kërkon angazhime shumë të thella, shumë serioze dhe gjithëpërfshirëse. Nuk mundesh dhe nuk do të mundet të jetë i suksesshëm askush nëse nën rëndësinë që ka, pritshmëritë e mëdha që ka opinioni publik dhe qytetari i thjeshtë për të parë një drejtësi funksionale dhe që i shërben qytetarit dhe jo pushtetit fshihen tendenca që pushteti që ka fuqi të vijojë dhe të komandojë më pas mënyrën sesi funksionon instrumenti, mekanizmi i shtetit të së drejtës që është: gjykata, prokuroria, avokatia, e me radhë. Po marrim rastin e Shkollës së Magjistraturës. Çfarë bëhet me ndryshimet aktuale? Hiqet nga bordi i Shkollës së Magjistraturës përfaqësuesi i Prokurorisë, hiqet nga bordi i Shkollës së Magjistraturës përfaqësuesi i Gjyqësorit, hiqet përfaqësuesi i KLD-së dhe këto shtohen me përfaqësues të qeverisë. Kjo është pavarësia e gjyqësorit? Aspak jo. Dhe ky bord që shtohet me përfaqësues nga institucionet qeveritare marrin më pas përsipër të emërojnë Drejtorin e Shkollës së Magjistraturës, marrin përsipër të emërojnë dhe gjyqtarët ndërkohë që Kushtetuta e ka të qartë – Është KLD dhe Presidenti i Republikës që emëron formalisht gjyqtarët e Republikës së Shqipërisë. Dhe unë e kam kundërshtuar dhe e kam denoncuar në kërcënim të Kushtetutës. Kjo është politike? Nuk besoj se qytetarët, shumica dërrmuese e qytetarëve të Shqipërisë mendojnë që ky është qëndrim politik. Çfarë bëhet me rastin e ligjit të KLD-së? Presidentit të Republikës në Kushtetutë i njihet e drejta e emërimi të Nënkryetarit të KLD-së nga një prej anëtarëve të KLD-së. Jo, – thotë mazhoranca. – Ti duhet ta zgjedhësh tani vetën nga tre anëtarët e KLD-së që emërohen nga Parlamenti, pra nga mazhoranca. Faktikisht e ke përcaktuar ti si mazhorancë parlamentare se kë duhet të emërojë Presidenti i Republikës dhe i heq të drejtën Presidentit të Republikës, që ia ka dhënë Kushtetuta, të përzgjedhë si Nënkryetar të KLD-së një nga anëtarët e këtij këshilli që janë 15, përjashto Ministrin dhe Kryetarin e Gjykatës së Lartë, mbeten të tjerët. Atëherë, kjo është politike kur Presidenti thotë që, këtu cenohet Kushtetuta dhe e drejta ekskluzive e Presidentit për të propozuar Nënkryetarin e KLD-së? Marrja e kësaj kompetence në mënyrë indirekte nga mazhoranca? S’ka rëndësi se cila do të jetë mazhoranca e radhës. Mazhorancat shkojnë e vijnë. Pra, janë çështje që kanë të bëjnë drejtpërdrejt me reflektimin e përgjegjësive kushtetuese që ne kemi. Mund të bëhen nesër, pasnesër, ligje që t’i përcaktojnë qytetarëve shqiptarë se çfarë duhet të hanë dhe si duhet të vishen. Me ligj bëhet kjo. Prandaj, çështja e qëndrimit, e përcjelljes së shqetësimeve dhe çështja e komunikimit madje në mënyrë shumë të hapur dhe transparente për këto cenime që i bëhen standardeve të demokracisë, parashikimeve dhe përcaktimeve kushtetuese nuk kanë asgjë politike. Janë thellësisht institucionale dhe me përgjegjshmëri të plotë.

Zoti Nishani, ju keni qenë Ministër i Brendshëm kur u miratua ligji i ri për Policinë e Shtetit kur Partia Demokratike ishte në pushtet. Ishte një ligj në të cilin, për të mos u politizuar Policia e Shtetit ku specifikisht u konkretizua në ligj që, Policia të jetë në varësi të Ministrisë së Brendshme dhe jo të Ministrit. Tashmë me ligjin e ri, varësia e Policisë së Shtetit do të jetë nën Ministrin. E keni quajtur këtë rrezik për politizimin e Policisë. Keni parashtruar dhe disa argumente të tjera lidhur me ligjin e Policisë së Shtetit, prandaj e keni rikthyer atë për rishqyrtim në Parlament. Një prej tyre ishte krijimi i Byrosë së Hetimit si një mekanizëm që do të dublonte Prokurorinë apo Policinë Gjyqësore. Më konkretisht, nisur dhe nga eksperienca juaj si Ministër i Brendshëm – Çfarë mund të na thoni për këtë ligj? Çfarë rrezikojmë sipas argumenteve tuaja?

Në fakt, arsyet e kthimit për rishqyrtim në Parlament të ligjit për Policinë e Shtetit janë disa, por dhe eksperiencat personale, pa dyshim, që më kanë ndihmuar në kthjelltësinë dhe qartësinë e marrjes së vendimit për ta rikthyer për shqyrtim. Ishte një koincidencë që, në fakt unë për herë të parë detyrën e Ministrit të Brendshëm e nisa me aktin e parë, ligjin për Policinë e Shtetit dhe ishte një nga kriteret kryesore të udhërrëfyesit që i ishte përcaktuar Shqipërisë si detyrim për t’u plotësuar për anëtarësimin në NATO. Një nga kërkesat e ligjit ishte pikërisht shkëputja e Policisë së Shtetit nga varësia e Ministrit të Brendshëm i cili është një njeri politik, që përfaqëson një forcë politike, një program politik dhe kjo është normale. Ka qenë një investim i aleatëve tanë kryesorë. Madje janë shpenzuar disa qindra mijë dollarë të taksapaguesve amerikanë përmes asistencës të dhënë nga specialistët pranë Policisë së Shtetit. Janë shpenzuar disa qindra mijëra euro nga taksapaguesit evropianë përmes asistencës që dhanë specialistët e ardhur nga Bashkimi Europian. Sot, me ndryshimet, të gjitha këto kontribute janë shumëzuar me zero dhe këto mund të përbëjnë shqetësime. Pra, rikthimi i varësisë së Policisë së Shtetit tek Ministri i Brendshëm krijon shqetësime të mëdha. Krijon shqetësime të mëdha për riskun e politizimit të veprimtarisë së Policisë së Shtetit. Një nga argumentet kryesore që ligji për Policinë e Shtetit është kthyer për rishqyrtim në Parlament, është veprimi i paprecedent për të krijuar një strukturë paralele të Prokurorisë brenda Policisë së Shtetit. Ndërkohë që, Kushtetuta e përcakton qartë që tagrin e hetimit dhe të përfaqësimit të akuzës e ka tërësisht Prokuroria e Shtetit. Nëse qeveria kërkon të marrë nën varësi Prokurorinë, dakord le ta bëjë, por përmes ndryshimit kushtetues, përmes ndryshimit ligjor dhe mund të merret Prokuroria në varësi të qeverisë, por jo të krijojmë në cenim të Kushtetutës një strukturë paralele herë-herë me kompetenca akoma më të mëdha se ajo e Prokurorisë brenda një strukture të tillë siç është Policia e Shtetit. Pra, këtu kemi të bëjmë me një cenim të drejtpërdrejtë të parashikimeve dhe përcaktimeve kushtetuese. A është ky qëndrim politik i Presidentit të Republikës i cili e evidenton këtë fakt dhe ua risjell në vëmendje deputetëve të Kuvendit? Unë besoj që jo. Jam i bindur që shumica e qytetarëve shqiptarë mendojnë që nuk ka asgjë politike dhe është tërësisht institucionale dhe e përgjegjshmërisë kushtetuese, e standardeve që kemi vendosur dhe të cilat duhet t’i ruajmë dhe t’i çojmë përpara, në aspektin e demokracisë, të lirisë dhe të mekanizmave të garantimit të shtetit të së drejtës…

Zoti President, ka ligje të tjera në proces që presin firmën tuaj. Keni vendosur për ndarjen administrative, territoriale apo për strategjinë e Sigurisë Kombëtare?

Jam duke i shikuar me shumë përgjegjësi. Kam ftuar të kem një diskutim, për rastin e ligjit që ka të bëjë me reformën territoriale, përfaqësues të pushtetit lokal. Gjatë gjithë këtyre javëve kam marrë peticione të shumta nga strukturat e zgjedhura të pushtetit lokal, komuna, këshilla komunash, nga komunitete qytetarësh të cilët më kërkojnë të qëndroj me kujdes. Vënë në dijeni Presidentin e Republikës për shqetësimet që ata kanë në lidhje me këtë reformë pikërisht nisur edhe nga këto letra të shumta, ankesa të shumta që i janë drejtuar Presidentit të Republikës nga qytetarët dhe komunitet lokale.Jam duke përgatitur një takim të shpejtë me përfaqësues të zgjedhur të pushtetit lokal dhe natyrisht që do të kem dhe qëndrimin tim institucional edhe mbi këtë çështje, por dhe mbi strategjinë e Sigurisë Kombëtare.

Intervistoi: Merita Haklaj/ ABC News

[Albo]

Kryeministri Rama: Në shtator takohemi Zoti President !

Pas intërvistes së Presidentit të Republikës zotit Nishani në një media shqiptare ku atakoi Qeverinë dhe Mazhorancën për sulmet dhe praktika të gabuara është kundërpërgjigjur mënjëherë Kryeministri Rama. Përmes një postimi në rrjetin social Facebook, Kryeministri siguroi se “reforma nuk do të ndalet. Më shumë se keqardhje për “shpjegimet” e Presidentit ! Për shqiptarët e botën kanceri është drejtësia, për Presidentin problemi është qeveria”, shkruan Kryeministri Rama në Facebook. Dhe vazhdon duke thënë se në shtator fillon stuhia antikorrupsion në drejtësi, pra nënkupton edhe në KLD e kudo ku bie hija e Presidentit të Republikës. Ndër të tjera Presidenti ankohet se mazhoranca e sotme po i tkurr përditë kompetencat , por thotë se nuk tërhiqet nga e drejta kushtetuese për të folur më anë drekretesh. Reagimi kryeministror ishte i idhët , se thotë se në shtator do të fillojmë ashpër në drejtësi, tamam aty ku është Kryetar i Keshillit të Lartë të Drejtësisë, vetë Presidenti.

Në të vertetë për drejtësinë ka shumë akuza për korrupsion dhe mazhoranca ka një përgjegjsi të madhe për të realizuar reformën në drejtësi, gjithnjë nëse nuk ka synim kapjen e këtyre institucioneve të pavarura. Është herët për të folur për “luftën e shtatorit”, por duket se ditë rrebeshi do të jenë që në mesin e muajit shtator, kohë kur ende njërëzit janë në plazhe.

Dhe Edi Rama i ka me qejf rrebeshet dhe duelet e mëdha !

Koha Jone

[EXODUS]

Gjynah doktori, edhe gurin e fundit te shahut, presidentin e tij "personal" Z.Nishani po ja nxjerr lagardhi kryerilindasi! Edhe kjo s'durohej, anti-kushtetuse!!
Po normal, "c'te korresh do mbjellesh" shoku Sali.

Ne shtator furtuna...

p.s gjuha shkon ku dhemb dhëmbi.

[Wordless]

Debati për dekretet, Nishani: Po kërkohet që Presidenti të bëhet i paqenë

“Kërkohet që Presidenti të mos flasë. Kërkohet që zyra e Presidentit të Republikës të bëhet e paqenë. Kompetencat po hiqen nga dita në ditë. Kompetenca të tjera po ngrihen dhe nuk po lënë vend të zbatohen. Atëherë, ta ndalojmë Presidentin të flasë përmes dekretit dhe ta ç’bëjmë fare Zyrën e Institucionit të Presidentit të Republikës”.

eh kur ishte Berisha Kryeministër, atëhere po që Presidenti kishte kopetenca .. ç'e do, vate qo punë !!

[Albo]

O shoku Rama,

Kujdes me kete "kapterin e Berishes" sic te pelqen ta quash, se ai kapteri i Berishes, u ul ne krah te Xhon Kerry kur erdhi ne Washington e ku ishin mbledhur te ftuar nga mbare bota. Ai Xhon Kerry qe na i quajti shoket tane te rilindjes "oligarke". E kujdes edhe me keto "ciklonet" ne shtator, se kam frike se do te na fluturoje ndonje kuceder qe leshon flake nga goja prodhim amerikan, mbi Kryeministri, e ku te futim koken ne pastaj. Apo nuk jemi edhe te gjate e na del koka mbi kokat e te tjereve.

Piji dozat rregullisht sic t'i ka rekomanduar mjeku, e mos u bej shume trim, se nuk te ka lezet.

Albo