Presidenti: Ligji i mazhorancës për Shkollën e Magjistraturës është antikushtetues

[Albo]

Tirane- Presidenti i Republikës kthen për rishqyrtim në parlament pr/ligjin për Shkollën e Magjistraturës, të ndryshuar.
Duke bërë publike dekretin Nr. 8675, bazuar në nenet 85, pika 1 dhe 93, të Kushtetutës së Republikës së Shqipërisë presidenca përcjell dhe arsyetimin mbi të cilat i kërkohet Kuvendit të Shqipërisë rishqyrtimi i ligjit. Madje në fund duke iu përgjigjur edhe akuzave të deputetëve se “arsyetimet e kthimit të ligjeve nga Presidenti i Republikës janë “të dobëta” kërkon që presidenca t’i mbrojmë para Komisionit.



Në argumentim thuhet se deputetet propozues nuk kanë justifikuar dhe arsyetuar në mënyrë bindëse nevojën e ndërhyrjes në ligj.
Përveç heqjes së kompetencës për emërimin e Drejtorit të Shkollës së Magjistraturës nga KLD, ulet numri i gjyqtarëve dhe prokurorëve (nga 2 në 1 për secilën kategori) që janë pjesë e Këshillit Drejtues dhe kushtëzohet përzgjedhja e gjyqtarit anëtar të Këshillit Drejtues nga Konferenca Kombëtare Gjyqësore dhe jo nga KLD.
Gjithashtu quhet antikushtetues ngritja e një komisioni me mjek psikiatër dhe psikolog për të dhënë një “leje aftësie për ushtrimin e profesionit të gjyqtarit apo prokurorit”.
Sipas presidentit “Ndryshimet ligjore që sjell ky ligj, janë në kundërshtim me Kushtetutën, nuk janë të justifikuara dhe shkelin parimin e sigurisë juridike në një shtet demokratik.”

Arsyet e kthimit të ligjit nr. 97/2014

“Për disa shtesa dhe ndryshime në ligjin nr. 8136, datë 31.7.1996,
“Për Shkollën e Magjistraturës”, të ndryshuar”

Të nderuar deputetë,
Në seancën plenare të datës 24 korrik 2014, Kuvendi i Shqipërisë ka miratuar ligjin nr. 97/2014 “Për disa shtesa dhe ndryshime në ligjin nr. 8136, datë 31.7.1996, “Për Shkollën e Magjistraturës”, të ndryshuar”.
Ky ligj është paraqitur për shpallje më datë 30 korrik 2014. Në bindje të Kushtetutës së Shqipërisë dhe në ushtrim të drejtës së parashikuar në pikën 1 të nenit 85 të Kushtetutës kam vlerësuar se ky ligj i duhet kthyer për rishqyrtim Kuvendit, mbështetur në arsyet dhe argumentet e mëposhtme.
Së pari, ndryshimet e ligjit nr. 8136, datë 31.7.1996, “Për Shkollën e Magjistraturës”vijnë në një kohë kur vetë propozuesit e ligjit pranojnë se: “Përgjatë këtyre viteve, falë trupës akademike të përfaqësuar nga juristë të shquar në fushat e ndryshme të së drejtës, të cilët mbajnë tituj të lartë akademikë, si dhe drejtimit profesional të saj, Shkolla e Magjistraturës është evidentuar si një institucion serioz dhe efikas në formimin fillestar dhe atë vazhdues të magjistratëve” dhe kurpartnerët ndërkombëtare vlerësojnë cilësinë e mësimdhënies dhe transparencën e pranimit të kandidatëve për magjistratë në këtë shkollë (shih Progres Raportet e Komisionit Europian 2012, 2013).
Deputetet propozues nuk kanë justifikuar dhe arsyetuar në mënyrë bindëse nevojën e ndërhyrjes në ligj dhe sidomos në strukturat e Shkollës së Magjistraturë dhe në stafin akademik, kur pranohet se ka treguar “një nivel profesional të admirueshëm, që duhet të shihet dhe evidentohet si një ndër çelësat e suksesit të kësaj shkolle”.
Së dyti, ndryshimet e bëra në nenin 6 pika 1 shkronjat “ç”, “e” dhe “f” , në nenin 7 dhe shtimi i nenit 7/1 të ligjit nr. 9136, datë 31.7.1996, “Për Shkollën e Magjistraturës”, prishin ekuilibrat e vendosur në Këshillin Drejtues të Shkollës së Magjistraturës, i cili ka funksionuar në përputhje me parimin Kushtetues të ndarjes dhe balancimit të pushteteve.
Me përbërjen e re të Këshillit Drejtues shihet qartë se shtohet pjesëmarrja e pushtetit ekzekutiv në këtë Këshill dhe përjashtohet Këshilli i Lartë i Drejtësisë i cili sipas ligjit dhe Kushtetutës është “është autoriteti shtetëror përgjegjës për mbrojtjen, emërimin, transferimin, shkarkimin, edukimin, vlerësimin moral e profesional, karrierën, dhe për kontrollin e veprimtarisë së gjyqtarëve të gjykatave të shkallës së parë dhe të gjykatave të apelit”.
Përveç heqjes së kompetencës për emërimin e Drejtorit të Shkollës së Magjistraturës nga KLD, ulet numri i gjyqtarëve dhe prokurorëve (nga 2 në 1 për secilën kategori) që janë pjesë e Këshillit Drejtues dhe kushtëzohet përzgjedhja e gjyqtarit anëtar të Këshillit Drejtues nga Konferenca Kombëtare Gjyqësore dhe jo nga KLD.
Pjesëmarrja e përfaqësuesve të Këshilli të Lartë të Drejtësisë në Këshillin Drejtues të Shkollës së Magjistraturës është e vetmja mundësi e këtij institucioni për të qenë pjesë e vendimmarrjes në procesin e propozimit dhe emërimit të gjyqtarëve.
Përjashtimi nga kjo pjesëmarrje bie ndesh me nenin 136 pika 4 të Kushtetutës së Republikës së Shqipërisë, i cili parashikon se: “Gjyqtarët e tjerë emërohen nga Presidenti i Republikës me propozim të Këshillit të Lartë të Drejtësisë” duke qenë se magjistratët e pranuar në Shkollën e Magjistraturës janë de facto të emëruar gjyqtarë dhe prokurorë që me pranimin e tyre në Shkollën e Magjistraturës nga komisionet e ngritura nga Këshilli Drejtues i kësaj shkolle.
Pra, me ndryshimet që sjell ligji nr. 97/2014, përjashtimi i KLD-së nga pjesëmarrja në Këshillin Drejtues, de facto i heq kompetencat kushtetuese këtij institucioni dhe Presidentit të Republikës për emërimin e gjyqtarëve të rinj, duke i lënë thjesht kompetencën për të bërë shpërndarjen e magjistratëve në vendet vakante.
Së treti, lidhur me ndryshimi e procedurës së rekrutimit të magjistratëve të parashikuar në nenin 17, ngritja e një komisioni me mjek psikiatër dhe psikolog për të dhënë një “leje aftësie për ushtrimin e profesionit të gjyqtarit apo prokurorit” është antikushtetuese.
Ngritja e një komisioni të tillë, i cili do të përcaktojë aftësinë mendore për të ushtruar këto profesione, faktikisht nuk bën gjë tjetër përveç se gjykon mbi zotësinë për të vepruar të kandidatëve. Zotësia për të vepruar mund të kufizohet ose hiqet vetëm me vendim të gjykatës referuar Kodit Civil të Republikës së Shqipërisë.
Së katërti, kriteret e vendosura në nenin 7 për zgjedhjen e Drejtorit të Shkollë së Magjistraturës janëtë ekzagjeruara duke përbërë në thelb kritere tepërpërjashtuese dhe absolutisht diskriminuese.
Jo të gjithë intelektualët në fushën e drejtësisë i kanë pasur mundësitë t’i plotësojnë të gjithë kriteret së bashku, që nga përmbysja e sistemit diktatorial deri më sot.
Së fundmi, dispozitat kalimtare të parashikuar në këtë ligj cenojnë parimin e sigurisë juridike dhe rrjedhimisht edhe parimin kushtetues të shtetit të së drejtës.
Ndryshimeve të parashikuara në ligj u jepet fuqi prapavepruese për drejtuesit që janë në detyrë me mandat dhe janë zgjedhur sipas kritereve të ligjit të kohës dhe bazuar në jurisprudencën e Gjykatës Kushtetuese ligjvënësi nuk mund të përkeqësojë në mënyrë të paarsyeshme gjendjen ligjore të personave, të mohojë të drejtat e fituara ose të shpërfillë interesat legjitime të tyre (vendim nr. 36/2007).
Lidhur me fuqinë prapavepruese të ligjeve duhet t’i referohemi vendimit të Gjykatës Kushtetuese nr. 9, datë 26.02.2007 në të cilin shprehet se: “Si rregull, ligjet i shtrijnë efektet e tyre për kohën e ardhshme dhe fuqia prapavepruese e tyre zbatohet në raste përjashtimore, sepse në të kundërt mund të krijohen situata me pasoja të paparashikuara. Teoria e së drejtës pranon se fuqia prapavepruese zbatohet si përjashtim si për shembull në ligjet penale favorizuese, në ligjet që ndërhyjnë për të rregulluar me ligj situata të paligjshme të krijuara më parë, në ligjet që interpretojnë anët e errëta ose të paqarta të një ligji të mëparshëm e në ndonjë rast tjetër ku paraqitet domosdoshmëria për të shmangur pasoja të rënda, negative ose të pandreqshme”.
Ndryshimet që sjell ligji nr. 97/2014, nuk vijnë si pasojë e asnjërës prej situatave të mësipërme. Duke i dhënë ligjeve fuqi prapavepruese në mënyrë të pajustifikuar do të krijohej një precedent duke e shndërruar në rregull dhe jo si përjashtim.
Fuqia prapavepruese e këtij ligji nuk mund të justifikohet as me interesin publik të pretenduar nga deputetët propozues në relacionin e paraqitur, pasi nga njëra anë pranojnë nivelin profesional të admirueshëm të stafit të Shkollës së Magjistraturës dhe nga ana tjetër vendosin kritere të cilat mund të përjashtojnë nga mësimdhënia në këtë shkollë të një pjese të pedagogëve që kanë kontribuar në cilësinë dhe efikasitetin e kësaj Shkolle të vlerësuar pozitivisht deri më sot.
Në dispozitat kalimtare parashikohet edhe ndalimi i zhvillimit të konkursit të pranimit për formimin fillestar në Shkollën e Magjistraturës për vitin akademik 2014-2015. Konkurset e pranimit zhvillohen duke marrë parasysh kërkesat e KLD-së dhe Prokurorisë së Përgjithshme të cilat bazohen në nevojat e sistemit gjyqësor dhe atë të ndjekjes penale.
Edhe konkursi i pranimit për vitin akademik 2014 – 2015 pasqyron nevojat për gjyqtarë dhe prokurorë, numri i të cilëve nuk përcaktohet dhe vlerësohet nga pushteti legjislativ.
Anulimi i konkursit për vitin akademik 2014 – 2015 gjithashtu është një parashikim ligjor me fuqi prapavepruese, i pajustifikuar, duke marrë në konsideratë faktin se njoftimi për zhvillimin e konkursit të pranimit mban datën 2 korrik 2014 dhe janë me qindra juristë që presin të konkurrojnë për një vend në këtë shkollë.
Për sa më sipër, ndryshimet ligjore që sjell ky ligj, janë në kundërshtim me Kushtetutën, nuk janë të justifikuara dhe shkelin parimin e sigurisë juridike në një shtet demokratik.

Të nderuar deputetë,
Si përfundim, kërkoj mirëkuptimin tuaj në rishqyrtimin e ligjit nr. 97/2014 “Për disa shtesa dhe ndryshime në ligjin nr. 8136, datë 31.7.1996, “Për Shkollën e Magjistraturës”, të ndryshuar”.
Gjithashtu, referuar prononcimeve Tuaja se arsyetimet e kthimit të ligjeve nga Presidenti i Republikës janë “të dobëta” kërkojmë t’i mbrojmë para Komisionit duke respektuar parimin e të drejtës për t’u dëgjuar.

Me respekt,
Bujar Nishani

ORA NEWS

[Albo]

Nishani kthen ligjin, Rama: Zgjodhe rrënimin, replikon Basha: Kthim kushtetues

Tiranë – Beteja ndërmjet Presidentit Nishani dhe mazhorancën nuk njeh pushime.
Bujar Nishani ka vendosur t’i trazoje qetësinë mazhorancës, duke i kthyer për rishqyrtim ligjin për “Për Shkollën e Magjistraturës”, i mbështetur nga opozita, me arsyetimin se dispozitat e tij cenojnë Kushtetutën dhe kompetencat e Presidentit, por dhe se nuk është arsyetur në mënyrë bindëse nevoja për të ndërhyrë në të.
Pak orë më pas, ka reaguar menjëhërë Kryeministri Rama, që nëpërmjet një postimi në Fb, shpreh keqardhjen që Presidenti ka zgjedhur rrënimin e drejtësisë.
“Keqardhje per Presidentin, – shkruan Rama, – që mes inercisë së rrënimit të drejtësisë dhe reformës rrënjësore në drejtesi, ka zgjedhur inercinë.”
Sulmit të Ramës i është kundërpërgjigjut kreu i opozitës Basha, i cili ka mbështetur Nishanin në agumentat e tij.
“Kthim kushtetues nga Presidenti, – shkruan Basha në Fb, – i kapjes së paligjshme të Magjistraturës nga treshja Rama-Meta-Krimi në Kuvend. Reforma e drejtësisë kërkon gjithpërfshirje, racionalitet kushtetues dhe transparencë, jo kapje nga oligarkët e shartuar me krimin që vetëm drejtësi të reformuar nuk duan!
Në ligjin e mosdrekretuar, Presidenti ka argumentuar se ndryshimet në ligjin “Për Shkollën e Magjistraturës” prishin ekuilibrat e vendosur në Këshillin Drejtues të Shkollës së Magjistraturës, i cili ka funksionuar në përputhje me parimin kushtetues të ndarjes dhe balancimit të pushteteve.
Me përbërjen e re të Këshillit Drejtues, sipas kreut të shtetit, shihet qartë se shtohet pjesëmarrja e pushtetit ekzekutiv në këtë Këshill dhe përjashtohet Këshilli i Lartë i Drejtësisë. Këtë ai e arsyeton duke theksuar, se përjashtimi i KLD-së nga pjesëmarrja në Këshillin Drejtues, “de facto” i heq kompetencat kushtetuese këtij institucioni dhe Presidentit të Republikës për emërimin e gjyqtarëve të rinj, duke i lënë thjesht kompetencën për të bërë shpërndarjen e magjistratëve në vendet vakante.
Po në shkeje të Kushtetutës, Presidenti gjen dhe nenin ku përcakton kriteret e vendosura për zgjedhjen e Drejtorit të Shkollës së Magjistraturës, duke i cilësuar të ekzagjeruara dhe që përbëjnë në thelb, kritere tepër përjashtuese dhe absolutisht diskriminuese.
Gjithashtu në shkelje të Kushtetuës, Nishani gjen dhe ndryshimin e procedurës së rekrutimit të magjistratëve pikërisht ngritjen e një komisioni me mjek psikiatër dhe psikologë për të dhënë një “leje aftësie për ushtrimin e profesionit të gjyqtarit apo prokurorit”
Në fund të dekretit, Presidenti i paraprinin vendimit por dhe deklaratave të mazhorancës, për këtë dekret. Ai kërkon nga Parlamenti, pjesmarrjen në komision për të mbrojtur dhe respektuar parimet e së drejtës.

ORA NEWS

[Wonder Woman]

Amerika na mëson se pushtetet duhet të jenë të ndara nga njëri tjetri. Pra: çek end balas. Kjo sepse vetëm ashtu mund të funksionojë një demokraci dhe një shoqëri e zhvilluar.

Të gjitha vendet e zhvilluara kanë ndarje të rrepta të pushteteve, të cilat rregullohen nga Kushtetuta. Ndërsa vendet që vuajnë në mizerje, kanë një grumbullim të pushtetit në duart e një ose disa personave të vetëm. Është ajo që ndodhi me ne për 50 vite Diktaturë Socialiste, dhe që ndodh akoma sot në vende afrikane apo aziatike që nuk mësojnë nga gabimet e veta.

Një kryeministër që kërkon të gjitha pushtetet për vete, nuk është asgjë më pak se një neodiktator dhe një tiran që po përgatitet për instalimin e një diktature mbi jetën e qytetarit të thjeshtë e të pambrojtur.

[Xinxerfilli]

Drejtori i shkolles se magjistratures eshte avokati i Sali Berishes i vendosur ne ate post nga Keshilli i Langove Demokrate me ne krye Nishanin.

Vellai i drejtorit eshte i burgosur prej 12 vjetesh ne Ameriqi per tentative vrasjeje.

Qe prej humbjes se 23 qershorit ne cdo post te rendesishem ne institucionet e "pavarura" shteterore u emerua nje njeri i afert me Berishen si per favor te fundit!