“Channel 4” ka vizituar atë që dikur konsiderohej si perëndimi i egër i Shqipërisë, ku prodhuesit e marijuanës po bënin me biliona dollarë derisa rendi dhe ligji si dhe Bashkimi Europian nisi të merrej me ta.
Kështu nis reportazhi i gazetarëve britanikë për atë që po ndodh tashmë në Lazarat pas ndërhyrjes së policisë.
Reporterët e “Channel 4″ tregojnë se si kanë arritur në Lazarat pa lajmëruar më parë dhe duke kaluar dy postblloqe.
Ata thonë se ushtarët e forcave speciale shqiptare u kërkuan kartën e identifikimit si gazetarë dhe më pas i kanë lënë të kalojnë.
Gazetarët e përshkruajnë ndjesinë njësoj me atë të kalimit të kufirit nga një shtet në tjetrin.
Reportazhi tregon se si Lazarati, kalimin e viteve, nga nje fshat i varfër dhe i izoluar u bë parajsa europiane e marijuanës.
Sipas tyre krimi i organizuar u zhvillua dhe prodhoi aq shumë marijuanë sa nuk kishte më vend ku të mbahej dhe kështu që ata u bënë shumë të pasur.
Sipas të dhënave zyrtare bëhet fjalë për 4.5 bilion dollarë fitim në vit.
Fshatarët e Lazaratit sipas britanikes u bënë aq të pasur sa nisën të punësonin dhe të tjerë për ndihmë.
Rreth 3 mijë punëtorë nga vende të tjera vinin të kujdeseshin për kultivimin e marijuanës.
Fshatarët tashmë mund të përballonin që të lëviznin nga shtëpitë modeste në male dhe të ndërtonin vila luksoze dhe të mëdha buzë rrugës. Dhe shtëpitë e vjetra u kthyen në laboratorë.
Disa nga shtëpitë e reja u adaptuan me rrjete për bunkere – magazinë poshtë në bodrume.
Fshati dhe fermat përreth u bënë prodhuesit më të mëdhenjtë marijuanës në Europë.
Banorët e fshatit kishin armatime të ndryshme dhe ndërhyrja e policisë mund të përshkruhet si një betejë tre ditore.
Për forcat e policisë në kërkim të rekuperimit të imazhit ishte një sukses shumë i madh.
Nuk pati asnjë viktimë, më shumë se 50 arrestime dhe u sekuestruan 500 armë.
Por pse nuk kishte ndërhyrë qeveria shqiptare deri tani dhe pse sapo u mor vesh që qeveria e re do ndërhynte pati reagime?
Sipas gazetarëve përgjigja është e thjeshtë: Bashkimi Europian!
Sipas tyre nuk është rastësi që pikërisht një javë pas betejës së Lazaratit, Bashkimi Europian votoi për t’i dhënë Shqipërisë statusin e vendit kandidat për anëtarësimin në BE.
Krijoni Kontakt