Afera Rama-Koço-Veliaj 3 milionë euro me reklamat!
“Propaganda përmes reklamimit nuk është vetëm tentativë për të indoktrinuar masat, por është edhe kosto shumë e rëndë financiare njëkohësisht”.
I vetmi investim që Rama ka bërë me ardhjen e tij në pushtet janë reklamat super të mëdha që kanë mbuluar gjithë vendin për “suksesin” e 300 ditëve të para, fatura e së cilës i kalon pa frikë 3 milionë euro. Të gjitha rrugët dalëse dhe hyrëse të kryeqytetit prej javësh janë mbushur me reklama të mëdha, ku proklamohen 300 ditët e para të çdo sektori të udhëhequr nga qeveria.
Të ashtuquajtura si billboard-e (tabela të mëdha reklamash që vendosen brenda dhe jashtë qytetit në zona strategjike ku mund të shihen nga të gjithë) dhe citylight (tabela që vendosen brenda qytetit në të gjitha rrugët kryesore apo edhe nëpër stacione autobusësh etj.,) kanë mbushur Tiranën dhe shumë qytete të tjera të mëdha. Kushdo që del nga kryeqyteti dhe niset drejt Jugut apo Veriut të vendit në çdo 30-50 metra rrugë ka parë këto reklama të mëdha që qeveria nuk ka lënë cep rruge pa mbushur.
Por, krahas çështjes së propagandës dhe faktit se secila prej këtyre reklama nuk përmban asgjë të vërtetë nga ato që propagandon, kostoja që qeveria ka paguar për to është marramendëse dhe shkon në vlerat e disa miliona eurove. Por jo vetëm kaq. Këto para përveçse i janë marrë buxhetit të shtetit dhe parave të taksapaguesve shqiptarë kanë shkuar për njerëzit më të afërt të Ramës, tek ortaku i mikut të tij, i njohur si Besua i Tajvanit, Koço Kokëdhima, i cili ndër bizneset e shumta të tij ka edhe një agjenci të posaçme që merret me ekspozimin e reklamave citylight, si dhe vëllait të Erion Veliajt, i cili përmes agjencisë së tij të marketingut Gogël është marrë me prodhimin e reklamave dhe me shumë evente e aktivitete të tjera në shërbim të propagandës së 300 ditëve, përfshirë këtu të gjitha aktivitetet që janë organizuar nga qeveria për çdo ministri përkatëse gjithmonë lidhur me bilancin e 300 ditëve.
Të vendosura mbi kodra, mbi ura kalimi në autostradë, të mëdha dhe në vende me lartësi të konsiderueshme janë mesatarisht mbi 400 reklama të tilla që qeveria ka shpërndarë në të gjithë vendin, ku pjesa kryesore e të cilave është përqendruar në Tiranë. Aty ku dhe çmimet janë stratosferike. Bota e marketingut është ndër më të shtrenjtat, por ajo bëhet edhe më e shtrenjtë kur në rastin konkret kemi të bëjnë me përfitime që shkojnë në xhepat e pushtetarëve. Qindra mijëra euro Rama ia ka kaluar agjencisë së vëllait të Veliajt për prodhimin e reklamave propagandistike, ku çmimi vetëm në prodhimin e njërës prej tyre kap vlerën e disa mijëra eurove. Ndërkohë që qeveria ka porositur prodhimin e rreth 400 reklamave të tilla.
Agjencia e vëllait të Veliajt është gjithashtu agjencia së cilës Rama i beson eventet dhe aktivitetet e tij kryeministrore, kostot e të cilave gjithashtu shkojnë në qindra milionë lekë. Për të kaluar tek shfaqja e reklamave përballë qytetarëve, kostoja vjen gjithnjë e më në rritje. Vendosja e një reklame të vetme në pjesën e rrugëve të autostradës, pozicionet e të cilave menaxhohen nga agjenci private kushton miliona lekë, dhe çmimi sa vjen dhe rritet kur vendosja e reklamave përzgjidhet në pozicionin më të dukshëm siç janë ato mbi kodra apo tabelat e lartësuara.
Kur vetëm vendi për një reklamë kushton disa milionë lekë mendoni se sa shkon shifra me mbi 400 reklama që ka shpërndarë qeveria në çdo cep të vendit. Ky është i vetmi investim që Rama ka bërë në këto 300 ditë, ku përmes kësaj propagande super të shtrenjtë ai ka zhvatur nga taksat e qytetarëve qindra miliona euro për t’i mashtruar ata me premtimet e parealizuara. Këto para Rama mund t’i kishte shpenzuar për të realizuar premtimet e bëra ndaj qytetarëve dhe jo për ngritjen e tabela për t’u shitur qytetarëve mashtrimin me premtimet e tij.
Ekspres.al
Përgjigju Duke Cituar
Krijoni Kontakt