Rama: Iku koha e hajvanëve në diplomaci
Kryeministri Rama ishte kritik gjatë fjalës së tij para ambasadorëve, duke u kujtuar atyre qëndrimin që disa prej tyre kanë mbajtur ndaj tij kur ishte kryetar i opozitës.
“Jo një herë jam ndier keq për ju dhe për vendin tonë të përbashkët, pa dyshim. Protokoll për kryetarin e opozitës nuk kishte. As porosi për të respektuar vetveten si shtet dhe si vend, duke respektuar përfaqësuesit e opozitës në vizitat e tyre të punës, nuk kishte. Madje, le ta themi deri në fund, opozita ishte kthyer në një shënjestër kryesore e Diplomacisë së vendit tonë. Sidomos, në vendet kyçe të Bashkimit Europian dhe po ashtu në Shtetet e Bashkuara të Amerikës, ku ju ishit përfshirë, me hir apo me pahir, në një operacion dëmtimi të imazhit të opozitës”, tha Rama. Kreu i qeverisë ftoi dje në Sallën e Hartave ambasadorët e Shqipërisë, pjesëmarrës në konferencën vjetore të zhvilluar nga Ministria e Jashtme. Ai tha se kryetari i opozitës do të trajtohet njëlloj si Kryeministri në përfaqësitë tona jashtë vendit. “Ju me siguri e keni dëgjuar atë fjalën e famshme që thotë, ‘ambasadori është një njeri i ndershëm që gënjen për të mirën e atdheut të vet’. Unë jam krenar që e mira e atdheut tonë ka pushuar së qeni për ju një detyrim i ardhur nga qendra, për të gënjyer në zyrat e Europës që të dëmtohet imazhi i opozitës. Ndihem mirë që nuk ndihem më keq për ju, sepse duhet ta them, qysh se unë kam ardhur në këtë vend, vendi i kryetarit të opozitës në protokollin e Shërbimit Diplomatik është bërë i barasvlershëm me atë të Kryeministrit”, tha Rama. Duke sjellë në vëmendje cilësinë profesionale të personelit të ambasadave tona jashtë, Rama nuk i kurseu epitetet e rënda ndaj tyre. “Unë besoj që Shërbimi Diplomatik shqiptar ka brenda vetes shumë kapacitete për t’u bërë një forcë vetëtransformuese dhe për të siguruar që edhe një epokë e gjatë e mbushësve, pas ambasadorit e organigramës së ambasadave dhe të përfaqësive me gjithfarëlloj injorantësh, gjithfarëlloj parazitësh, me gjithfarëlloj kushërinjsh dhe me gjithfarëlloj hajvanësh, të marrë fund”, tha Rama. Kreu i qeverisë kërkoi nga ambasadorët që ta kthejnë shërbimin e tyre diplomatik në promovues ekonomikë dhe kulturorë të vendit.
Flet Besnik Mustafaj, ish-ministri i Jashtëm
“Shqipëria në Konferencën Islamike me rol të ri”
Ish-ministri i Jashtëm, Besnik Mustafaj, kërkoi dje nga qeveria që të riaktivizojë rolin e Shqipërisë në Konferencën Islamike.
Duke folur në konferencën vjetore të ambasadorëve, në panelin “Rendi i ri botëror: sfidat dhe mundësitë për Shqipërinë”, Mustafaj tha se në Konferencën Islamike, Shqipëria mund të tregojë vlerat europiane të saj. “Pyetja është si mundemi ne ta riaktivizojmë dhe ta dinamizojmë si aset diplomatik bashkekzistencën fetare dhe tolerancën fetare që ne kemi si shoqëri? Për këtë mundet që të kemi një riaktivizim më të madh të Shqipërisë brenda Konferencës Islamike dhe sigurisht në respekt të Kushtetutës sonë dhe të normave tona, por duke u bërë si një lloj zëdhënësi i vlerave europiane të këtyre cilësive”, tha Mustafaj. Duke folur për rolin që Shqipëria ka luajtur këto vite në këtë Konferencë, Mustafaj tha se ka ardhur dita, brenda idesë globaliste, që zëri i saj të jetë më i fortë dhe të dëgjohet siç duhet. “Për mendimin tim, Shqipëria mund ta luajë rolin e vet duke qenë realiste për fuqinë e saj. Ne nuk jemi superfuqi në asnjë aspekt, por duke i parë me realizëm ato vlera që Shqipëria dhe shqiptarët kanë, mundet të fitojë një rol ndërkombëtar. Në kuadrin e globalizmit, çdo vend mundohet të luajë një rol për të bërë së bashku një koncert harmonie”, tha Mustafaj. Ai e cilësoi Konferencën Islamike një organizatë diplomatike që nuk duhet nënvlerësuar. “Gjatë gjithë këtyre viteve ne kemi pasur një marrëdhënie me Konferencën Islamike që ka qenë as mish as peshk, duke qenë edhe brenda, edhe jashtë. Unë mendoj se ne duhet të jemi aty më prezent në ligjërimin që ka brenda kësaj organizate. Konferenca Islamike është një organizatë diplomatike dhe jo fetare, pavarësisht se i bashkon të gjithë përkatësia e popullsisë qoftë dhe pjesërisht myslimane, ajo është një organizatë diplomatike, dhe duke qenë aty si një vend anëtar i NATO-s, si një vend aspirant për në BE, Shqipëria duhet të flasë në emër të këtyre vlerave që na kanë çuar në NATO dhe aspirojmë të na çojnë në BE për të ngritur ato problematika që kanë sfidat botërore. Duke synuar një rol identifikues ndërkombëtarisht të Shqipërisë, Mustafaj propozoi vendosjen në Tiranë të selisë qendrore të Aleancës së Qytetërimeve. “Shqipëria nuk njihet si adresë. Qeveria shqiptare mundet t’i propozojë sekretarit të Përgjithshëm të OKBsë që në Tiranë të vendoset Sekretariati i Aleancës së Qytetërimeve, që është një lëvizje brenda OKB-së. Trashëgimia shumë e mirë e jona në bashkekzistencën e besimeve fetare dhe kulturave, do të ishte një bazë e mirë që selia qendrore e saj të vendoset në Tiranë. Një seli e tillë në Tiranë do t’ia rriste reputacionin kryeqytetit tonë dhe vendit tonë, sepse Tirana nuk ka asnjë adresë ndërkombëtare”, tha Mustafaj.
Dade: Ndryshim të stereotipit të diplomatit
Kryetarja e Komisionit Kuvendor për Politikën e Jashtme, Arta Dade, kërkoi nga diplomatët shqiptarë të punojnë më shumë në drejtim të përmirësimit të imazhit të Shqipërisë në botë. E ftuar në konferencën e ambasadorëve Dade theksoi edhe rolin që duhet të kenë ambasadorët në procesin e integrimit. “Emërimi i ambasadorëve me përvojë është një hap i mirë në këtë drejtim, por nevojitet një ndryshim i stereotipave dhe imazhit të diplomatëve, i cili është shpeshherë i keqinterpretuar”, tha Dade. Si një element i rëndësishëm ku duhet të përqendrohet puna e ambasadorëve shqiptarë nëpër botë, sipas Dades, është edhe thithja e investimeve të huaja në Shqipëri.
Ambasadori Demi: Të rriten fondet për Ushtrinë
Për një përfaqësim më të mirë në NATO, ambasadori ynë në Aleancë, Leonard Demi, kërkoi nga qeveria rritjen e fondeve për Ushtrinë. Në vijim të konferencës treditore me ambasadorët, që po mbahet në Tiranë, diskutimi është ndalur te çështjet e sigurisë. Në ketë pikë roli real i Shqipërisë në NATO është parë me rezerva nga ambasadori ynë në NATO, Leonard Demi, i cili në replikë me ministren e Mbrojtjes, Mimi Kodheli, shprehu domosdoshmërinë që qeveria të rrisë fondet për Ushtrinë. Ambasadori Demi u shpreh se qeveria shqiptare duhet të shtojë buxhetin për Ushtrinë në përmbushje të detyrimeve që ka ndaj Aleancës së Atlantikut të Veriut, dhe kjo pa bërë shkurtime në numrin e Forcave të Armatosura. Në përgjigjen e saj ministrja Kodheli u shpreh se për herë të parë Forcat e Armatosura kanë një buxhet real dhe jo fiktiv, si gjatë qeverisjes së djathtë.
AHMETAJ: NXISNI INVESTIMET E HUAJA
Duke i ftuar ambasadorët të sjellin në Shqipëri investitorë të interesuar për vendin tonë, ministri i Ekonomisë, Arben Ahmetaj, renditi disa arsye kryesore pse Shqipëria paraqet interes për investime, siç janë rritja ekonomike e orientuar nga eksportet, kapitali njerëzor konkurrues dhe i kualifikuar, sektorët premtues që po zhvillohen me ritme të shpejta si manifaktura, energjia, bujqësia dhe turizmi etj.
BUSHATI: DIPLOMACI EKONOMIKE
Ministri i Jashtëm, Ditmir Bushati, tha se diplomacia ekonomike do të jetë synimi për secilin prej ambasadorëve shqiptarë në botë. “Kemi shumë ambasadorë de fakto ndërkohë që shumë pak prej tyre janë de juro. Diplomatët shqiptarë në kohët e reja që kanë ardhur duhet të kuptojnë që kanë një rol vetëveprues. Secili prej tyre duhet të punojë për të përthithur sa më shumë investime, të cilat më pas mbështeten nga qeveria”, tha Bushati.
ARISTIR LUMEZI
Panorama
Përgjigju Duke Cituar
Krijoni Kontakt