Policia pastron Lazaratin nga droga, kriminelet largohen ne drejtim te paditur

[Albo]

Debati për Lazaratin përplas politikën, PD: Kokat e trafikut në qeveri

Tirane- Opozita përdori operacionin e policisë në Lazarat për të sulmuar sërish maxhorancën për lidhjet me trafikun e drogës.
Sipas deputetëve të PD, kokat e trafikantëve në qeveri hoqën nga lista e të kërkuarve bosët e vërtetë të Lazaratit për të mbrojtur interesat e tyre personale.
Ish kryeministri Berisha deklaroi se mbështeste policinë por nuk ishte me trafikantët në qeveri” madje kërkoi të tërhiqen njësitë operacionale nga Derviçani pasi po dëmtojnë biznesin.
Ndërkohë nga mazhoranca deputeti i PS-së Taulant Balla ka kërkuar të dijë edhe rolin e të arrestuarit Gate Mahmutaj në PD e Gjirokastrës, dhe pse kjo e fundit hesht në një kohë që anëtarët e kryesisë, përfaqësues të Lazaratit janë të arrestuar në akuzën për kultivim dhe trafikim droge. Ai ka shkuar më tej në akuzën e tij kur tha se në telefonat e të gjithë të arrestuarve, numri kryesor është ai numri i Sali Berishës.
Seanca në një moment pati një rrjedhë tjetër kur ish kryeministri përdori fjalor fyes për bashkëshorten e ministrit Veliaj. Në fakt Berisha thotë se emërimet “kurvë” e “prostitutë” nuk janë emërtimet që ka përdorur ai por janë thëniet e kryeministrit Edi Rama të thëna në mbrëmjen e Tedi Papavramit.
Seanca u ndërpre për disa minuta. Pas mbledhjes Byroja e Kuvendit vendosi të përjashtojë për dhjetë ditë nga punimet e parlamentit dhe komisionet parlamentare ish-kryeministrin Sali Berisha. Kryetari i Kuvendit, Ilir Meta, duke njoftuar vendimin e Byrosë, e mbledhur me kërkesë të deputetëve të shumicës, e konsideroi ‘të papranueshëm’ fjalorin e përdorur sot nga ish-kryeministri. “Kur deputeti fyen ndalohet të marrë pjesë në seancë për dhjetë ditë”, u shpreh Meta.
Nga ana e tij kryetari i grupit të PD-së, Edi Paloka, e konsideroi të turpshëm vendimin për përjashtimin për 10 ditë të deputetit Berisha nga salla e Kuvendit.
“Të përjashtohet Sali Berisha, ndërkohë që këtu në parlament disa nuk duhet të ishin fare, për një mijë e një arsye. Rrinë tërë kohës duke sharë dhe provokuar. Ai nuk tha asgjë më tepër, sesa ato që kanë thënë mediat”, deklaroi Paloka duke njoftuar largimin e deputetëve demokratëve nga salla e parlamentit.
Disa nga momentet e seancës sot nga deklarata e Ballës deri tek përjashtimi i Berishës nga Kuvendi

Balla: Berisha të shpjegojë lidhjet me Mahmutaj; Paloka: Gate viktimë, kapobanda në qeveri
Ora 11: 50 Që në nisje të seancës debatet janë ndezur bindshëm duke ndryshuar dhe rendin e ditës, kur deputeti i mazhorancës Taulant Balla akuzoi ish-kryeministrin Sali Berisha për lidhje me kreun e grupit kriminal të Lazaratit, tashmë të arrestuar Gate Mahmutaj. Ai ka shkuar më tej në akuzën e tij kur tha se në telefonat e të gjithë të arrestuarve, numri kryesor është ai numri i Sali Berishës.
“Si deputet kisha shpresuar shumë që grupi parlamentar i PD të mbante një deklaratë në mbështetje të aksionit policisë së shtetit për çlirimin e Lazaratit nga elementë kriminalë, kultivues dhe trafikantë droge, por kjo mungoi. Ndërkohë që gjithë populli shqiptar, gjithë komunitetit ndërkombëtar ka mbështetur njëzëri këtë aksion për çlirimin e kësaj pjese të Shqipërisë nga ata elementë trafikues dhe kultivues që e kanë marrë peng prej shumë vitesh. Policia e shtetit ka ngritur lart kokën e Shqipërisë kudo në botë. Meriton gjithë respektin policia dhe Ministri i Brendshëm për gjithë këtë aksion të suksesshmëm. Por më lejoni të shtroj dy pyetje për atë që tani nuk është në sallë. Janë dy pyetje të drejtëpërdrejta për ish-kryeministrin Sali Berisha. E para që duhet të vijë këtu në sallë dhe të japë përgjigje, është : A ka biseduar Sali Berisha pak minuta para dorëzimit në telefon me Gate Mahmutaj?Si shpjegohet që në shumicën e telefonave të të arrestuarve numri kryesor ishte numri i Sali Berishës. Tani nuk ka ardhur akoma se duhet të jetë duke biseduar akoma me grupin e zjarrit. Por duhet të vijë urgjentisht në sallë dhe të japë llogari për lidhjet me Gate Mahmutaj. Gojët e liga thonë se sapo e ka akuzuar Gaten si tradhtar për kauzën”tha ai.
Deputeti Balla ka kërkuar të dijë edhe rolin që i arrestuari Gate Mahmutaj në PD e Gjirokastrës, dhe pse kjo e fundit hesht në një kohë që anëtarët e kryesisë, përfaqësues të Lazaratit janë të arrestuar në akuzën për kultivim dhe trafikim droge.
“Unë kam dhe disa pyetje: Cili është roli i Gates në PD e Gjirokastrës. Ju që akuzoni për lidhje me drogën, si ka mundësi që kreu i PD Tepelenë u zgjodh Petrit Abedini i arrestuar për drogë.Si ka mundësi që PD e Gjirokastrës nuk flet fare në këto momente kur anëtarët e kryesisë së PD, përfaqësues të Lazaratit janë të arrestuar në akuzën për kultivim dhe trafikim droge. Dhe e fundit a mund të na thoni se çfarë roli të rëndësishmëm ka lagjia Mahmutaj në zgjedhjet e 23 qershorit që ju mundësoi marrjen e mandatit të vetëm në Gjirokastër”.

Reagon Paloka
I menjëhershëm ka qenë dhe reagimi i kreut të grupit parlamentar të demokratëve, Edi Paloka, i cili duke ju referuar Ballës si avokat i Ramës, tha se Gate Mahmutaj është viktimë sepse kapobanda është në bllok.
“Nuk kanë marrë deputetët e Partisë Demokratike në Lazarat, e dini shumë mirë , emrat i keni nxjerrë vetë, nuk kam dëgjuar në listë emrin e ndonjë deputeti të Partisë Demokratike. Sa për atë emrin që përmend përsonalisht nuk e njoh, por mos mendoni se me histori të tilla, me sajesa të tilla që janë viktima. Kapobandat e dini shumë mirë se ku janë. Janë në bllok, nuk janë atje. Edhe ata që ndodheshin në Lazarat u njoftuan të largohen. Kapobandat janë në Tiranë , ata i kanë marrë parcelat fshatarëve. Kapobandat janë aty midis jush (tregon me gisht kabinetin qeveritar).I keni hapur luftë disa fshatarëve. Çfarë lufte po bëni , ata që u njoftuan dhe ikën që ditën e parë, atyre tju bëjmë thirrje, apo këtyre që bëjnë sikur gjuajnë për të treguar se gjoja po bëhet luftë e madhe në Lazarat. Katër ditë po bëhet operacion madhështor, kapobandat kanë ikur që ditën e parë, se janë lajmëruar prej këtyre këtu , dhe të gjithë në Tiranë i keni. Dhe vini e tregoni përralla me Gate , e ku di unë se çfarë. Ai qënka supërkrimineli, ai qënka kapobanda, kujt ja tregoni?Gatia qënka supërkapobanda e trafikut në Shqipëri”- tha Paloka.

Noka: Djali i Luiza Xhuvanit në Lazarat po qëllon mbi policinë
Nga foltorja e Kuvendit deputeti i Partisë demokratike Flamur Noka tha se djali i Luiza Xhuvanit, deputetes së Partisë Socialiste po qëllon policinë.
“Më thoni dhe një gjë tjetër, kush është atje që po gjuan kundër policisë? Djali i Luizës. Spartak çfarë të thanë drejtuesit e policisë kur shkove për të ngrënë bukë në Derviçan? E di çfarë i thanë Spartakut dhe të gjithë deputetëve të gjithë komisionit të sigurisë, i thanë djali i Luizës është këtu dhe ka gjuajtur kundër policisë. Po që se nuk është, sille Luiza për gjysëm ore këtu përpara nesh te Kuvendi dhe të kërkojmë ndjesë të gjithë si forcë politike. E ke atje, se ja thanë dje, ja pra kush e bën” – tha Noka.

Berisha: Tërhiqni policinë nga Derviçani, Tahiri kundërshton
Ish kryeministri Berisha deklaroi se mbështeste policinë por nuk ishte me trafikantët në qeveri”
“Jam me policinë por jo me trafikantët në qeveri.” tha Berisha dhe kërkoi tërheqjen e njësive të policisë nga Derviçani.“Kërkoj me urgjencë të hiqen urgjentisht njësitë nga Derviçani pasi është një zonë intensive biznesi dhe minotirtare pasi nuk ka nevojë për asnjë lloj presioni. Keni mbushur Kishën e Dervicanit me qindra policië. Ngrini çadrat” tha Berisha. Tahiri tund kokën në shenjë mohimi.

ORA NEWS

[Albo]

I paskemi futur Policat e Rilindjes ne Kishen e Dervicanit qe ti mbroje Zoti nga keta kriminelet e Lazaratit?

Bir Tahir i nenes, ke te qaj me pare...

Albo

[Albo]

VIDEOLAJM/ Noka: Djali i Luizës po qëllon policinë. Xhuvani sjell djalin në Kuvend

(Video: Momenti kur Luiza Xhuvani sjell djalin në Parlament)


Tiranë – Deputetja e PS-së, Luiza Xhuvani dhe djali i saj, Kostandin Xhuvani, janë takuar me njeri –tjetrin sot në hyrje të Kuvendit, në një takim të pazakontë me motiv politik.
Xhuvanët e kanë bërë këtë takim familjarë në sy të mediave, për të hedhur poshtë deklaratat e ish-Ministrit të Rendit Flamur Nokës, bërë sot në Kuvend, sipas të cilave, djali i saj ndodhej në Lazarat duke shtënë kundër policisë.
“Më thoni dhe një gjë tjetër, kush është atje që po gjuan kundër policisë? Djali i Luizës!” – tha Noka. – “Spartak, çfarë të thanë drejtuesit e policisë kur shkove për të ngrënë bukë në Derviçan? E di çfarë i thanë Spartakut dhe deputetëve të Komisionit të Sigurisë? I thanë:
“Djali i Luizës është këtu dhe ka gjuajtur kundër policisë.” Po që se nuk është, sille Luiza për gjysëm ore këtu përpara nesh te Kuvendi dhe të kërkojmë ndjesë të gjithë si forcë politike! E ke atje, se ia thanë dje, ja pra kush e bën,” – këmbënguli Noka.
Por, Luiza Xhuvani i është kundërpgjigjur menjëhërë: “Noka të vijë me mua, bashkë me median, e shkojmë në shtëpinë time dhe nëse im bir nuk është në shtëpi, unë nuk hyj më në parlament. Në të kundërt, të më kërkojne falje publike për akuzat.”
Dhe pikërisht pas kësaj, Xhuvani ka kontaktuar me djalin e saj dhe ka dalë në trotuarin përpara Kuvendit, me çadër, duke e pritur të vinte. Kostandin Xhuvani nuk ka vonuar të zbresë nga një makinë gri dhe të takohet me nënën e tij, madje, të bëjë disa metra rrugë drejt oborrit të Kuvendit për t’u parë nga mediat dhe më pas, për t’u larguar sërish me ngadalë.

ORA NEWS

[Albo]

Djalit te Gatos i hedhim hekurat. Djalit te Luizes, qe na del 5 dite me pas para Kuvendit te Shqiperise, nuk i hedhim hekurat, e ta marrim ne pyetje ne Prokurori!

Ore po vendoset Ligji ne Shqiperi! E po tani edhe ju, Ligji nuk eshte per Bllokmenet, Ligji eshte vetem per fshataret e Lazaratit!

Ju e dini shume mire kete gje, se u rritet e u thinjet nen komunizem!

Moj shoqja Luiza, a na e sjell prape te gjalle edhe ate djalin qe yt bir vrau ne mes te Tiranes disa vite me pare?

Albo

[Albo]

Berisha: Politika ime për të mos ndërhyrë me forcë në Lazarat

Ka qenë politika ime për të mos ndërhyrë, bëhet drogë atje, po qëndrimi im ka qenë tjetër, masa të tjera vec ndërhyrjes me forcë dhe s’ka qenë qëndrim i pabazuar. Është shoqëruar me rënie drastike të mbjelljeve, u bazua në disa cështje, heqjen e skafeve, tani prin superskafi i ministrit, italianët i shuan radarët se nuk kishte skafe, një në 6 muaj dhe ai gjendej, ua premë ujin e vaditjes, po i preve ujin kanabisit, ai ujë e diell do, u bë punë njohëse, disa muaj më parë u shit kanabisi i tre viteve më parë, kjo politikë bëri të mundur hyrjen në Nato, vizat, dy herë rekomandimin për statusin. Cdo qeveri ben zgjedhjen e vet, nderhyrje sipas rregullave e kjo kaos, te mos ndiqen boset e trafikut, te behet terror mbi popullaten, te behen bastistje te pandodhura me pare.

Jam kundër legalizimit të kanabisit, si jam kundër gjakderdhjes, duhet të jemi të prerë këtu.

Sherbime te infiltruara ne Lazarat?

Nuk kam dijeni, per sherbimet e huaja, por nga sherbimet e ligjit duhet te kete se kjo eshte normale. Dasho e njeh me mire se jeton cdo dite aty, di qe po ben perpjekje te medha dhe ka kontribuar edhe ne dorezimin e personave.

S’kam folur me Gaten, mund edhe te kisha folur
Taulant Gjura qe tha se gatja ka folur, ska folur kurre me mua, se ose s’ja kam njohur numrin, atij numri i bien gjithe diten, une nuk i pergjigjem cdo numri, po te kisha rastisur do flisja, me marin edhe nga burgjet, nga te gjitha anet. e pergezoj per faktin qe u dorezua. Asnje nga ata qe eshte me liste nuk i perket strukturave te partise, perkundrazi, ka prej tyre, qe u punesuan pasi erdhi kjo administrate ne kuadrin e alences se qelbesirave.

Pse nuk i beni publike emrat e boseve?
Sepse i njeh e gjithe zona, gjithe Gjirokastra, pse nuk u vune ne liste, policia nuk ka bere fjale per bose. Policia duhet te jete serioze ne komunikate se cdo fakt qe i pergenjeshtrohet i beton. Sot plackitesit informojne se kane gjetur 85 kg ne banesne e familjes Koli qe une e publikova dje ne nje status.

A ju kane kerkuar partneret per te nderhyre ne Lazarat?
Kurre, jane raportet e tyre me vleresimet me te medha, ka pasur nje moment qe me eshte thene problemi i Lazaratit dhe kam bere shpjegime qe do i them ne nje moment tjeter.

Panorama

[Albo]

5 ditë aksion në Lazarat, Aliko: Janë infiltruar dhe shërbimet e huaja



Dasho Aliko: Mund të ketë të infiltruar shërbime të huaja në operacion. Pritet ndërhyrje nga ajri, 2 helikopterët pjesë e operacionit. Familja e Gates: Nuk e ka qëlluar policinë, ishte në mal me bagëti. (er.cu/BalkanWeb)

[Albo]

5 ditë aksion, policia: Kemi në kontroll gjithë Lazaratin. Tonelata kanabisi tek mitralozi

GJIROKASTER - Lazarati nuk është më fshati i paprekshëm dhe rebel. Policia e Shtetit ka arritur në zemër të tij, duke vendosur kontrollin e plotë pas 5 ditëve aksion dhe përplasje me banorët. Nuk ka më 'betejë', nuk ka të shtëna me mortaja, mitraloza të rëndë, të lehtë, antitanke dhe snajpera.

Lazaratasit lëshuan terren, ata që qëlluan dyshohet se u larguan nga fshati, të tjerët hapën dyert për kontroll dhe pranuan që kishin kultivuar kanabis. Kanabisit që kishin nëpër banesa i vunë flakën, e hodhën ku të mundnin, duke lënë pas tymin e flakën e tij.

RENA dhe FNSH e mbërthyen fshatin dhe thonë se e kanë atë nën kontroll. Për ta kthyer Lazaratin në një fshat normal, u angazhuan 800 forca policore të mbështetura nga mjete të posaçme, forca të Drejtorisë së Përgjithshme të Policisë së Shtetit, Drejtorisë së Policisë së Qarkut Gjirokastër, forcave speciale RENEA, forca të FNSH-së së Fierit, Shkodrës dhe Tiranës, Delta Forcë në Vlorë, si dhe shërbime të tjera speciale të Drejtorive të Policisë së Qarqeve të tjera, si forcat elitë të shërbimeve të Tiranës, Shkodrës etj. Po ashtu rreth 60 automjete policie u vunë në lëvizje.

Në kuadër të këtij operacioni deri në këto momente janë arrestuar 13 persona të dyshuar për sulmet me armë ndaj forcave të policisë, për kultivimin kanabisi, kundërshtim të punonjësve të policisë apo për shkatërrim prone.

Sipas policisë, gjatë ditës së djeshme janë vënë në pranga 5 persona, të dyshuar si autorë të sulmit me armë ndaj efektivëve. Në pranga kanë rënë shtetasit: Rustem Xhemal Mahmutaj, vjeç 19, banues në Lazarat, Teslim Xhemal Mahmutaj, vjeç 22, banues në fshatin Lazarat, Vandam Razip Mahmutaj, vjeç 19, banues në Lazarat, Hysen (Neni) Çela, vjeç 48, nga Lazarati.

Këta shtetas akuzohen për veprat penale vrasje e punonjësve të policisë e mbetur në tentativë e kryer në bashkëpunim, mbajtje pa leje e armëve dhe municionit luftarak, kultivimi i bimëve narkotike. Të arrestuarit dyshohen se së bashku me persona të tjerë kanë qëlluar me armë në drejtim të forcave të policisë gjatë operacionit të ndërmarrë nga forcat e policisë në fshatin Lazarat.

Gjatë kontrollit të ushtruar në banesën e shtetasit Vandam Mahmutaj janë gjetur e sekuestruar në cilësinë e provës materiale 1363 kg hashash, 8500 rrënjë bimë narkotike, 1000 fishekë model 56, 225 gëzhoja model 56, 1 granatë dhe një armë pistoletë shenjëdhënëse, si dhe një sasi e konsiderueshme fishekësh të llojeve të ndryshme.

Një lidhje telefonike në News24 Dasho Aliko ka deklaruar se situata në Lazarat mund të kthehet në një katastrofë pasi sipas tij brenda grupeve kriminale që qëllojnë më armë mund të ketë të infiltuar nga agjentuarat e huaja.

REZULTATE TË OPERACIONIT
Strukturat e Policisë së Shtetit gjatë ditëve të zhvillimit të këtij operacioni në Lazarat kanë mundësuar asgjësimin e rreth 80 mijë rrënjëve bimë narkotike dhe fidanë, si dhe të një sasie mbi 12 ton e 800 kg kanabis sativa, duke marrë dhe mostrat përkatëse në cilësinë e provës për ekzamimin.

Po ashtu gjatë këtyre kontrolleve janë gjetur dhe 2 laboratorë përpunimi të bimëve narkotike, si dhe sasi të konsiderueshme municioni dhe armë.

Është ushtruar kontroll në territoret e mbi 80 banesave dhe një numri të konsiderueshëm ambientesh të tjera në brendësi të fshatit Lazarat, tokave përreth tyre dhe në tokat e komunës në territorin ku forcat e policisë kanë depërtuar në zonë.

GRUPI I NEWS 24 I PARI NË LAZARAT, ARMË E KANABIS NËPËR BANESA
Ora 18:34- Grupi i News 24 ka mundur të hyjë i pari në Lazarat, duke na ofruar pamjet nga zona e quajtur Depoja e ujit, ku ishte vendosur mitralozi që hapi zjarr për 5 ditë resht. Gazetari Mariglen Mërtiri dhe grupi i xhirimit të News 24, kanë mundur të hyjnë me një autoblindë të policisë, duke na ofruar pamje nga zemra e Lazaratit, fshat të cilin shumica prej nesh nuk e kishin parë asnjëherë.

Më tej ata kanë shkuar në banesën nga ku qëllohej me mitraloz. Pranë tij është parë një sasi e madhe kanabisi, flitet për tonelata. Mësohet se banesa është në pronësi të shtetasit Jani Dervishi 18-vjeçar, por nuk dihet ende nëse është ai personi që ka qëlluar vazhdimisht.

Ndërsa gazetarja tjetër Eri Baco, ndodhet në lagjen Lëngzata, atje ku policia e ka vendosur tashmë kontrollin. Shtëpitë janë të mbyllura dhe të braktisura, rrugët janë pothuajse bosh. Sipas saj, policia ka raportuar për një shtëpi të mbushur me arsenal armësh. Fishekë, automartikë e armatime të tjera janë gjetur në banesat e braktisura.

ZBULOHEN TONELATA KANABIS DHE BAZA ME SASI TË MËDHA MUNISIONI, MITROLOZ NË SHTËPINË E JANI DERVISHIT
Ora 18:25- Policia bën me dije se është zbuluar një bazë me sasi të mëdha municioni si dhe tonelata me kanabis në zonën e quajtur depoja e ujit. Policia ka gjetur edhe mitralozin që qëllonte ndaj efektivëve. Mitralozi është gjetur në banesën e shtetasit Jani Dervishi por nuk dihet nëse ky i fundit ka qëlluar apo jo në drejtim të policisë apo ka qenë dikush tjetër. 18- vjeçari është gjetur pranë mitralozit

BANORËT PËR NEWS24: NETËT E PARA MBETËM PA GJUMË NGA TË SHTËNAT, S’KEMI ASNJË SHQETËSIM NGA POLICIA
Ora 18:10- Disa banorë nga Lazarati shprehen për News24 se nuk kanë asnjë shqetësim nga policia. Ata tregojnë se netët e para të operacionit kanë ngelur pa gjumë për shkak të të shtënave. Madje dy ditë janë larguar në Gjirokastër.

POLICIA PREZENTE NË TË GJITHË KOMUNËN E LAZARATIT, MBAN NËN MBIKQYRJE SITUATËN
Ora 17:50- Policia e Shtetit është prezent tashmë në të gjithë Komunën e Lazaratit, duke mbajtur nën mbikëqyrje situatën dhe duke ofruar dhe rend e siguri për banorët e Lazaratit. Policia e Shtetit u bën thirrje që të qëndrojnë në banesat e tyre dhe të asistojnë veprimet procedurale të Policisë së Shtetit, duke garantuar një veprim profesional, ligjor dhe në përputhje me standardet dhe në respekt të plotë të lirive dhe të drejtave të njeriut.

FORCAT SPECIALE MARRIN QENDRËN E LAZARATIT
Ora 17:40- FNSH kanë hyrë në qendër të Lazaratit, nga pjesa e poshtme, ndërsa forcat RENEA kanë hyrë nga zona e sipërme e Malit duke vendosur kështu kontrollin në “fshatin rebel”.

Mësohet se janë ngjitur në qendër të fshatit 8 autoblinda të policisë, të cilat kanë nisur kontrollin shtëpi më shtëpi. Janë gjetur shumë banesa të braktisura, të tjera me njerëz, por që janë treguar bashkëpunues me policinë, kanë hapur derën për kontroll. Kishte edhe nga ata që pranuar se kishin kultivuar hashash, por që tashmë nuk do ta bëjnë më.

POLICIA: FALEMINDERIT BANORËVE QË PO NA MBËSHTESIN NË LAZARAT
Ora 17:34- Polica e Shtetit ka falënderuar sot edhe ata banorë në Lazarat që e kanë mbështetur operacionin e policisë.

“Policia e Shtetit falënderon banorët e Lazaratit për mbështetjen që po i japin policisë gjatë këtij operacioni. Vijon përparimi i strukturave të policisë në brendësi të fshatit Lazarat”, - thuhet në njoftimin më të fundit nga Policia e Shtetit.

TAHIRI NË FB: VAZHDON PROGRESI I FORCAVE TË POLICISË, BRAVO ÇUNA BRAVO
Ora 16:25- Ministri i Brendshëm, Saimir Tahiri ka komentuar operacionin e sotëm të FNSH-ve të cilat po përparojnë gjithnjë e më shumë në brendësi të fshatit. Ai nuk ka nguruar të falënderojë policinë për këtë aksion.

“Vazhdon progresi. Policia tani gjendet në shtëpinë prej nga gjuante mitrolozi i rëndë. Bravo cuna bravo!

“Është marrë nën kontroll objekti ku ishte vendosur mitrolozi i rëndë që qëllonte me armë drejt policisë”, komentoi më tej Tahiri.

LAZARAT, FNSH MARRIN NË KONTROLL BAZËN KUR ISHTE MITRALOZI I RËNDË

Ora 16:00- Kur kanë kaluar vetëm pak minuta nga ndërhyrja në qendër të fshatit, forcat speciale të transportuara me helikopter kanë arritur në vendin ku qëllohej me mitraloz të rëndë, duke marrë kështu një nga bazat e “rebelëve” që prej 5 ditësh sulmojnë policinë, për ta ndaluar të përparojë drejt fshatit.

Forcat speciale kanë mundur të sekuestrojnë edhe mitralozin me të cilin banorët e Lazaratit sulmonin policinë. Mësohet se banesa ndodhet në pjesën veriore të fshatit.

Policia ka zbritur në këmbë nga mali i Sopotit. Ndërkohë operacioni po drejtohet nga afër nga Drejtori i Policisë Artan Didi. Policia bën me dije se në shtëpinë e R.Gevenit u gjetën 150 kg dhe 200 rrënjë kanabis, ndërsa në shtëpinë e E.Mahmutaj u gjetën 18 thasë dhe të mbjella me kanabis.

FNSH NIS OPERACIONIN, U TRANSPORTUAN ME HELIKOPTER. DIDI I DREJTON

Ora 15:40- FNSH sapo ka nisur operacionin për të depërtuar në brendësi të Lazaratit. Mësohet se ata janë transportuar me helikopterë dhe ndodhen rreth 200 metra larg xhamisë së Lazaratit. Gazetari Mariglen Mërtiri raporton nga vendngjarja se policia po kontrollon tokat dhe banesat, ndërsa në fshat mbizotëron zjarri dhe tymi i hashashit, siç tha ai.

Helikopterët janë përdorur nga Forcat e Ndërhyrjes së Shpejtë vetëm për transportim. Kjo u saktësua në orët e fundit, pasi më herët u fol se do kishte edhe ndërhyrje nga ajri.

Vetë banorët po djegin hashashin e mbetur në fshat, ndërsa për momentin nuk raportohet për të shtëna. Forcat e policisë, duket se ia kanë bllokuar të gjitha daljet lazaratësve rebelë. Kështu është bllokuar dalja nga Mali i Sopotit.

Operacioni i policisë po drejtohet nga vetë Drejtori i Përgjithshëm i Policisë, Artan Didi.

POLICIA: PARADITEN E SOTME JANË ASGJËSUAR 287 KG MARIJUANË
Ora 15:10- Forcat e Policisë së Shtetit po vijojnë me depërtimin hap pas hapi për në brendësi të fshatit Lazarat, duke ushtruar kontroll në territoret e banesave, tokave përreth tyre dhe në tokat e komunës. Gjatë veprimeve në terren forcat policore janë të pajisura me mjete të posaçme për veprime kundër grupeve dhe bandave të armatosura dhe armatim i rëndë për t’iu përgjigjur reagimit me armë të grupit kriminal.

Për transportin e forcave dhe të pajisjeve policore janë përdorur dhe helikopterët. Gjatë paradites së sotme është ushtruar kontroll në territoret e një numri të konsiderueshëm banesash dhe ambientesh të tjera në brendësi të fshatit Lazarat, tokave përreth tyre dhe në tokat e komunës në territorin, ku forcat e policisë kanë depërtuar në zonë.

Në kuadër të këtyre kontrolleve janë gjetur e asgjësuar mbi 287 kg marijuanë, si dhe sasi armatimi e municioni.
Policia e Shtetit do të vijojë me vendosmëri operacionin e ndërmarrë gjatë këtyre ditëve deri në përmbushjen e plotë të objektivave.

POLICIA GJEN DROGË DHE ARMË NË NJË MAGAZINË TË GATE MAHMUTAJ
Ora 14:20- Policia gjen drogë në një nga magazinat, që mësohet se është në pronësi të Gate Mahmutaj. Bëhet me dije se një pjesë e drogës ishte e presuar.

Ndërkohë, policia përveç drogës, ka sekuestruar një pushke dhe një Kallashnikov. Gjatë kontrollit në magazinë u bllokuan dhe fishekë të llojeve të ndryshme.

FAMILJA E GATES: NUK E KA QËLLUAR POLICINË, ISHTE NË MAL ME BAGËTI
Ora 12:00 - Në ‘kor’, familjarët e Gate Mahmutajt kanë shfajësuar të afërmin e tyre, duke këmbëngulur se nuk ka lidhje me sulmin ndaj policisë dhe nuk është marrë me kultivimin e hashashit. Behanime Meçi, motra e të akuzuarit Mahmutaj, deklaroi dje se ai nuk ka lidhje me asnjë prej ngjarjeve në të cilat e implikojnë. “Vëllai im nuk ka qëlluar. Ai ishte me bagëti”, - tha Meçi.

Në një prononcim për mediat, Nasip Mahmutaj, vëllai i personazhit më të shumëpërfolur përgjatë tri ditëve të fundit, e mbase dhe për një kohë të gjatë në të ardhshmen, theksoi se Gatja po viktimizohet, pasi ai nuk ka as vila e pasuri dhe, sipas tij, po vuan pasojat e një fshati. “Vëllai im po viktimizohet. Kjo është një lojë politike, ai nuk është bos”, - tha vëllai i Mahmutajt.

Vëllai i Gates tha më tej se në të gjithë Lazaratin ka drogë, por flitet vetëm për një emër. “Kërkojmë drejtësi, të kontrollohen të gjithë!”, - u shpreh i afërmi i një prej njerëzve që duket se është kryefjala e drejtësisë shqiptare. Nëna e të akuzuarit kryesor, tha gjithashtu se i biri, Gatja, “iku për hiçgjë”. “Gatja ka jetuar në mal. Djali ka lopë dhe rri atje. Sivjet nuk kanë mbjellë kanabis”, - tha Hënë Mahmutaj.

PRITET NDËRHYRJE NGA AJRI, 2 HELIKOPTERËT PJESË E OPERACIONIT
Ora:11:57- Ditën e sotme, pritet një ndërhyrje nga ajri, ku dy helikopter do jenë pjesë e operacionit. Ky lajm bëhet i ditur nga vendngjarja, informacione të cilat i përcjell gazetari Mariglen Mërtiri. Mësohet se Forcat e Ndërhyrjes së Shpejtë presin të nis dhe operacioni i sotëm. Bëhet me dije se janë shtuar forcat policore në aksionin. Bëhet me dije se 2 helikopterë transportuan forcat policore, mes të cilëve dhe efektive femra, të cilët zbritën në perëndim të Lazaratit nga Mali i Sopotit.

“Forcat e FNSH-së presin dhe nuk duhet nëse do të ketë një ndërhyrje nga ajri apo jo. Pasi një avion ka tentuar diçka të tillë. Rreth 11 e 30 minuta nisi dhe shkëmbimi i armëve mes grupeve kriminale dhe efektivëve të policisë. Në Lazarat shihet tym e zjarr, pasi po digjet hashash.”-përcjell për News24, gazetari Mërtiri.

POLICIA THIRRJE BANORËVE: QENDRONI NË BANESAT TUAJA
Policia e Shtetit u bën thirrje banorëve të fshatit Lazarat të qëndrojnë në banesat e tyre dhe të asistojnë veprimet procedurale të Policisë së Shtetit.

“Paralelisht me veprimet operacionale të strukturave të Policisë së Shtetit në terren grupe speciale të hetimit të orientuara nga Prokuroria për Krime të Rënda dhe Drejtoria për Krimet e Rënda në Policinë e Shtetit, kanë vijuar me veprimet për kryerjen e hetimeve dhe fiksimin e provave materiale. Këto veprime po kryhen me korrektësi maksimale në respekt të plotë të ligjit, nën drejtimin e Prokurorisë për Krime të Rënda Tiranë, duke garantuar një komunikim profesional dhe etik me banorët e fshatit Lazarat.”- bën të ditur Policia e Shtetit.

DASHO ALIKO: LAZARATI NUK MUND TË “DIGJET” PËR 5 KOKRRA. JANE PERFSHIRE DHE SHERBIMET E HUAJA
Ora:10:00- Situata në Lazarat mbetet problematike dhe banorët po përjetojnë ditë paniku. Kështu ka deklaruar për News24, kreu i komunës Lazarat, Dasho Aliko. Një lidhje telefonike në News24, Dasho Aliko ka deklaruar se situata në Lazarat mund të kthehet në një katastrofë pasi sipas tij brenda grupeve kriminale që qëllojnë më armë mund të ketë të infiltuar nga agjentuarat e huaja.

“Kam informacion se këto shtëpi janë braktisur nga banorët, ku një pjesë janë larguar vetë, disave u është kërkuar nga efektivët e policisë, duke u nxjerr me dhunë nga ata. Kam informacione, se brenda personave që kanë probleme me ligjin, ka dhe njerëz të tjetër të infiltruar nga persona të tjerë, faktorë të huaj, apo vendas. Ka të infiltruar nga gjenturat e huaja të cilët mund të qëllojnë policinë dhe situata mund të dalë jashtë kontrollit.”-theksoi më tej kreu i Komunës së Lazarati, Aliko.

Po keshtu, sipas Alikos, politika duhet të tregohet më e butë dhe të ulë tonet, duke mos përfshirë në këtë “luftë” dhe njerëz të pafajshëm. Më tej ai ka shtuar se forcat policore duhet të tregojnë kujdes gjatë kontrolleve që ushtron në banesat e lazaratasve, pasi shumë prej tyre janë ankuar për bastisje shtëpie.

“I bëj thirrje banorëve që të ruajnë gjakftohtësinë dhe të tregohen të kujdesshëm, bashkëpunëtor, për vetë dhe familjarët. Të gjithë ata banorë që duan të lehtësojnë veten, duhet të kërkojnë të kontrollet banesa e tyre. Pasi ky është një tmerr i vërtetë dhe nuk mund të kalohet me frikë. Situatë është shumë e keqe, si të fajshmit dhe ata të pafajshmit janë në panik. Unë mbroj ata që janë të pafajshëm. U kam bere thirrje banorëve të rrinë në shtëpi, mos të quajnë, të mbrojnë familjarët. Policia të ketë kujdes, të shkojë nën mbikëqyrjen e mediave, prokurorëve.”

Sa i takon akuzave të hedhura nga ish-kreu i Partisë Demokratike në lidhje me bastisjen e disa banesave nga ana e forcave të policisë, Aliko është shprehur se në zyrat e komunës kanë mbërritur shumë banorë që kanë shprehur shqetësime të tilla. “Banorët me kanë paraqitur disa prova me filmime, që thonë se janë bastisur, janë plaçkitur. Një grua madje ka ardhur dhe më ka rrëfyer se është mbyllur në banjë nga frika, dhe ka dal nga dritarja. Madje kjo grua, ka deklaruar se është ndjerë e ngacmuar nga forcat policore. i kam bërë thirrje të gjithë banorëve që kanë ankesa të tilla për forcat policore, të bëjnë ankesat e tyre.”-shton më tej Dasho Aliko.

Më tej Aliko theksoi se duhet të ulen tensionet mes policisë dhe vetë banorëve të Lazarati. “Mendoj se sot Lazarati është 95 për qind e pastër nga lëndët narkotike. Politika duhet të ul ton, karshi grupeve të caktuara. Nuk duhet të godas të pafajshmit. Nuk mund të vihet në panik një fshat me mbi 7 mijë banorë. Unë mendoj se politika duhet të ul tonet e saj. Një pjesë e Lazaratit u pastrua nga forcat e policisë dhe një pjesë u pastrua nga vetë banorët.

Lazarati, para se të hynte policia, ishte një terren i pastër me 60 për qind, krahasuar me një vit më parë. Ky ndryshim është bërë me ndihëm e faktorëve dhe aktorëve të policisë së Gjirokastër, dhe banorëve.”- theksoi Dasho Aliko. Më tej Aliko i bëri thirrje banorëve të Lazaratit, qytetarëve të ndershëm, mos të bien preh e grupeve kriminale që kanë probleme me ligjin. “Lazarati nuk mund të digjet për 5 kokrra, ndaj ata që janë të huaj, i bëj thirrje të largohen.”-përfundojë Dasho Aliko.

GAZETARI I NEWS24: 20 MAKINA TË POLICISË HYNË NË BRENDËSI TË FSHATI
Ora: 09:30- Edhe ditën e sotme, vijon operacioni në fshatin Lazarat, të Gjirokastrës. Sipas informacioneve që vinë nga vendngjarja, mësohet se 20 makina policia kanë hyrë më në thellësi të fshatit, duke shtuar kështu sipërfaqen e kontrolluar nga efektivët.

“Është ngritur një tjetër postbll në fshat. Policia po shkon më në brendësi të fshatit, gjë që lehtëson dhe aksionin e efektivëve për të në çdo banesë. Kjo pjesë ka qenë deri diku e rrezikshme, gjë që e lehtëson punën e efektivëve. Të shtënat me armë ditën e djeshme kanë qenë të pakta, pasi ka pasur maturantë që i janë nënshtruar provimit të shtetit, ndaj dhe ka pasur lëvizje.”-kështu përcjell gazetari Mariglen Mërtiri, për News24.

(er.nu/ed.me/d.b/m.a/a.n/BalkanWeb)

[Albo]

Kunata e Gate Mahmutaj: Tahiri të hetojë vetën, e bënë Gaten si Bin-Laden



Ndërkohë që Policia e Shtetit ka marrë nën kontroll Lazaratin, kunata e Gate Mahmutaj, është shprehur shumë e shqetësuar për atë se çfarë po ndodh në fshat . Gruaja shprehet e shqetësuar nga të shtënat e armëve nga ana e policisë. Sipas saj në shtëpinë ku ajo jeton policia nuk ka gjetur asgje dhe se mban përgjegjësi vetëm për familjen e saj. Ajo i është drejtuar ministrit Saimir Tahiri që të hetojë veten e vet, pastaj fëmijët e saj dhe burrin.
“Tahiri të hetojë njëherë veten e tij pastaj të hetojë fëmijët dhe burrin tim, se neve e shikojmë në televizor, popullin e thjeshte e fundosin”, u shpreh kunata e Gate Mahmutaj.
E indinjuar, ajo është shprehur se policia i ka shoqëruar djemtë e saj që ditën e parë, kurse për bashkëshortin, nga frika se është vëllai i Gate Mahmutaj ajo thotë se ai nuk ka dalë nga shtëpia, por edhe atë do ta arrestojnë sepsë është i vëllai I Gates. Por ajo këmngul që në shtëpinë e saj policia ka bërë kontroll dhe nuk ka gjetur asgjë dhe nuk është e drejtë që asaj t’i mbahen djemtë në polici. Nëse kanë gjetur gjë në shtëpinë e Gates, thotë ajo, lë të mbajë përgjegjësi Gatja.
“Mi kanë shoqëruar çunat që atë ditë, bashkëshortin do e marrën se është I vëllai I Gate Mahmutajt, në shtëpinë time nuk është gjetur gjë. I prura te shpia ime dhe nuk kanë gjetur gjë. Nëqoftëse ka gjetur gje te Gati, përgjigjet Gati, ai u dorëzua, pse e bëjnë Gatin si Binladen, cfarë ka bërë Gati, pse nuk gjejnë kokat e tjera po Gatin?”, foli e shqetësuar para mediave kunata e Gate Mahmutajt.

ORA NEWS

[Antiproanti]

Shih kujt i japin hapesire publike "gazetat" shqiptare...
Grave apo anetareve te ngushte te familjeve te kryemafisheve dhe krimineleve te droges.
Turp!

[PINK]

Ec aty Rilindja! Drejt Europes, lazarati, show must go on/ down.