Zgjedhjet parlamentare 2014 ne Kosove

[Antiproanti]

Premtoi 15 mijë vende pune, punësoi vetëm 400 mitrovicas (Video)



Premtimi i madh i Agim Bahtirit, për hapjen e fabrikës së kërpudhave në Mitrovicë, nuk ka filluar ende të realizohet.

Për mosrealizimin e këtij premtimi, Bahtiri akuzon Qeverinë që sipas tij ia bllokon projektin!

Por, gjatë fushatës ai ka dhënë edhe një premtim tjetër: hapjen e 15 mijë vendeve të reja të punës për qytetarët e Mitrovicës. Deri më tash ai nuk ka arritur të punës më shumë se 400 vetë. /Rrokum/
http://www.telegrafi.com/lajme/premt...o-2-45328.html

[Antiproanti]

Krasniqi: Vota për Hashim Thaçin është votë për despotizëm!




Kryetari i Këshillit Kombëtar të NISMËS për Kosovën, Jakup Krasniqi, ka reaguar ndaj deklaratave të kreut të PDK-së, Hashim Thaçit, i cili gjatë ditës në Malishevë kërkoi që të mos votohen ata që nuk mund të hyjnë në Parlament.

Reagimin e tij do ta botojmë të plotë më poshtë:

Në palestrën ku ishte organizuar Konventa e PDK-së nuk u duk askush tjetër pos familjes së ngushtë të Hashim Thaçit! Në këtë konventë Hashim Thaçi e dëshmoi si asnjëherë tjetër despotizmin e vet! Ai e uzurpoi tërësisht PDK-në dhe e shndërroi në pronë të tij private!


Ai nuk la në binë asnjë person, pos familjarëve të vet! Ai nuk la të flasë asnjë kandidat tjetër të PDK-së, pos familjarëve të vet!

Pas uzurpimit të PDK-së, pas uzurpimit të Kryeministrisë, pas uzurpimit të Presidencës, Kryeministri që po IKË po përpiqet të uzurpoj edhe Parlamentin e Kosovës. Ai ka dalë në terren dhe po “shpërndanë poste parlamentare” dhe mundohet të tregojë se kush do të hyjë në parlament e kush jo!

Gjatë fushatës zgjedhore për pushtet vendor qytetarëve të Kosovës u kujtohet Hashim Thaçi si ua bënte “përhajr kryetarllëkun” kandidatëve që i kishte përzgjedhur vetë. Kësaj forme mospërfillëse të veprimit politik populli i thotë se “ka bërë Bajram me vetveten”!Hashim Thaçi kishte harruar se SOVRANI i Kosovës është POPULLI! Vetëm në dorën e tij ishte fuqia e vendosjes së kush do të udhëhiqte me Komunat e Kosovës! Sovrani i Kosovës ia tregoi vendin “kryetarëve të shpallur” nga Hashimi!

Hashim Thaçi, Kryeministër që po IKË, po harron se Parlamenti nuk është oda e tij e as selia e PDK-së për të vendosur se kush hyn dhe kush mbetet jashtë! SOVRANI i Kosovës është POPULLI! Më 8 qershor ai do të vendosë se kush do të ketë mandatin ta përfaqësojë e kush do të mbetet jashtë dyerve të Parlamentit të Kosovës!

Nëse epilogun e saktë të zgjedhjeve të 8 qershorit nuk e dimë, për një gjë jemi të sigurt: NISMA për Kosovën është shpresa e vetme se despotizmit të Hashim Thaçit i ka ardhur fundi! Ai nuk mundet të vë nën kontroll Parlamentin e Kosovës; ai do të IKË nga Kryeministria dhe në fund do t’i hapë rrugë demokratizimit të PDK-së! Edhe vetë anëtarët e PDK-së, të cilët ia duan të mirën Kosovës dhe PDK-së, nuk do të votojnë despotizmin e Hashim Thaçit!

http://koha.net/?id=32&l=11362

[busavata]

[Llapi]

Thaqi : Kijeva do të jetë komuna më e bukur e Republikës së Kosovës


Malishevë 25 maj 2014 – Qytetarë të shumt nga Kijeva të dielën në mesditë e kanë pritur kryeministrin e Kosovës z. Hashim Thaqi me bashkëpunëtorët i cili në takimin e fundit të Qeverisë së Kosovës ka ngarkuar Ministrinë e Pushtetit Lokal që të përgadis dokumentacionin që Kijeva të jetë Komuna më e re e Kosovës. “Nëse gjatë luftës Kijeva ka qenë vendi më i rrezikshëm në botë unë u them tash se Kijeva do të jetë Komuna më e bukur e Republikës së Kosovës”, ka thënë Thaqi i cili ka përmendur të dhënën se Kijeva bëhet komunë për të gjithë qytetarët pa marrë parasysh përkatësinë partiake andaj edhe ka kërkuar mbështetjen e krejt spektrit politik për këtë vendim.
Thaqi ka bërë të ditur po ashtu se formimi i kësaj komune nuk lidhet aspak me fushatën elektorale e cila është në prag.
“Ju tash keni bërë kërkesë për themelimin e komunës suaj dhe unë skam bërë asgjë tjetër veqse kam mbështetur vullnetin tuaj” - ka thënë Thaqi duke falënderuar Këshillin Iniciativ dhe duke kërkuar jo vetëm dinamikën e paraparë për realizimin e këtij projekti por nga Këshilli Iniciativ ka kërkuar edhe projekte nga infrastruktura e nevojshme që t’i realizoj Qeveria e Kosovës.
Paraprakisht, tubimin i cili është mbajtur në oborrin e shkollës së mesme “Lasgush Poradeci” e ka përshëndetur edhe kandidati për deputet Halit Krasniqi kurse në emër të fshatit kan falënderuar kryetari i fshatit Arsim Bacaliu dhe Hysni Gashi.
Në takim kan marrë pjesë edhe kandidatët për deputet : zv.kryeministri Hajredin Kuqi, ministri Besim Beqaj, zv.ministri Fatmir Shurdhaj, Azem Syla, Halit Krasniqi, Hasime Krasniqi, Ramiz Rrustaj dhe Adem Berisha sikur edhe kryetari i degës së PDK-së z. Isni Kilaj.

[Llapi]

Tani e dini numrin i cili do të sjell ndryshimet në Kosovë për partinë e cila ka ndryshuar historinë e Kosovës.
Pas Pavarësisë dhe Shtet-Ndërtimit, numri 58/PDK është numri që do të sjell zhvillimin ekonomik dhe krijimin e vendeve të reja të punës.

H.TH.

[Antiproanti]

Aeroporti i plaçkës



Kryeministri në largim, Hashim Thaçi, e ka lavdëruar veten dhe kabinetin e tij për reformat që kanë bërë deri më tash në Aeroportin Ndërkombëtar të Prishtinës (ANP) “Adem Jashari”.

Ndërkaq, pronarëve të aviokompanive të huaja që operojnë në Kosovë, u ka premtuar mbështetje të mëtutjeshme, nëse arrin të marrë votat e elektoratit për ta qeverisur Kosovën edhe për katër vjet.

Thaçi para tyre është mburrur me lehtësirat që u ka krijuar. Mirëpo, ai nuk ka folur fare për dëmtimin e mijërave qytetarëve që kanë renë viktimë e aviokompanive mashtruese, pikërisht për shkak të “lehtësirave” që ka ofruar Qeveria e tij e deritanishme.

Heqja e depozitës prej 500 mijë euro për aviokompanitë e huaja që duan të bëjnë biznes në vendim tonë u ka mundësuar atyre veprimtari sa më të lehtë.

E në anën tjetër, ka dëmtuar rëndë qytetarët e vendit, nga të cilët tashmë po kërkon votat edhe për një mandat.
Nga “reformat” e Thaçit kanë pësuar po ashtu edhe aviokompanitë serioze që kanë operuar nga Aeroporti “Adem Jashari”, e ku pikërisht për këtë kohë më parë njëra nga aviokompanitë më të madha botërore, siç është “British Airways” braktisi Kosovën.

Mirëpo, vizita e Thaçit në Aeroport të premten si duket faktoi fjalët e deritanishme se ai dhe personat e tij kanë futur në treg kompaninë mashtruese. Të njëjtat po hyjnë në treg me dijeninë e tij dhe vartësve të tij.

“Qeveria e Kosovës ka punuar bashkë me Aeroportin e Prishtinës për të ofruar një program gjithëpërfshirës lehtësimesh për kompanitë ajrore, që synojnë rritjen e numrit të fluturimeve, destinacioneve dhe uljen e kostove të biletave për udhëtarët”, ka thënë Thaçi të shtunën gjatë vizitës që ia ka bërë Aeroportit Ndërkombëtar të Prishtinës “Adem Jashari”

Sipas tij, ky program ofron lehtësira dhe stimulime për kompanitë ajrore që të fillojnë fluturimet në destinacione të reja, të rrisin numrin e fluturimeve në destinacionet ekzistuese dhe të ulin koston e biletave për udhëtarët.


Numri i udhëtarëve bie për 30 %

Mirëpo, në fakt realiteti është i kundërt. Numri i udhëtarëve në Aeroportin e Prishtinës është duke rënë dukshëm, e në anën tjetër numri i kompanive që kanë plaçkitur udhëtarët me dijeninë e Qeverisë është duke u rritur dita ditës.

Burime të besueshme të gazetës “Zëri” bëjnë të ditur se numri i udhëtarëve në Aeroport ka rënë gati për 30 për qind. Mirëpo, trendi vazhdon me rënie.

“Aeroporti i Prishtinës ofron shërbimet më të shtrenjta se të gjitha aeroportet tjera. Për këtë numri është në rënie. Është Aeroporti ku në vazhdimësi udhëtarët plaçkiten nga kompanitë mashtruese që lejohen të futen në treg me leje të Qeverisë Thaçi”, ka thënë burimi i besueshëm i gazetës “Zëri”

Sipas këtij burimi, përpos dëmeve që u janë shkaktuar udhëtarëve, dëm i madh i është shkaktuar edhe arkës së shtetit nga mospagesa e taksave sidomos në kohën kur Aeroporti ishte pa komercializuar.


Taksa dyfish më të larta

Edhe më tutje Aeroporti Ndërkombëtar i Prishtinës (ANP) vrazhdon të aplikojë taksat ndër më të lartat në vende të rajonit, por edhe më gjerë. Derisa në ANP taksat janë rreth 21 euro, në Aeroportin e Rinasit dhe atë të Shkupit sillen rreth 10 euro. Por në shumë aeroporte tjera këto taksa janë edhe më të ulëta.


Falimentoi për 8 ditë

Ishte data 26 e muajit nëntor 2013, kur aviokompania “Belle Air Europe” ka zyrtarizuar falimentimin e saj. Por, ende pa kaluar një muaj i plotë, me datë 24 dhjetor 2013, nga Ministria e Infrastrukturës u pajis me licencë aviokompania tjetër mashtruese “Valahia Air”. Kjo aviokompani rumune, e cila nuk operoi as një muaj të plotë, kishte lënë në Aeroportin e Dusseldorfit qindra pasagjerë.

Përveç tyre, kjo aviokompani së bashku me tour-operatorët që kishte kontraktuar ka shitur me mijëra bileta te bashkatdhetarët tanë.

Në këto mashtrime kontributin e tyre e kishin dhënë edhe institucionet e Kosovës, pasi që po licencojnë aviokompani mbrapa të cilave po qëndrojnë persona mashtrues. Burime të besueshme të gazetës kishin bërë të ditur se Fahri Zeneli, Kujtim Beqiri dhe Ajan Xhaferofski janë personat të cilët qëndrojnë mbrapa këtij mashtrimi.

Po ashtu, mbrapa aviokompanive mashtruese në Kosovë kishin qëndruar edhe Florim Rudaj e Gafurr Aliu


Rasti “Belle Air”

Kompania “Belle Air” para pak kohësh shpalli falimentimin. Sipas burimeve të gazetës “Zëri” kompania i ka pasur borxh Aeroportit të Prishtinës 3 milionë euro. Ndërkaq, mijëra udhëtarëve u kishte marrë paratë dhe nuk iu kishte ofruar shërbim.
Sipas të njëjtave burime, kjo kompani ka pasur të shitura edhe më shumë se 20 mijë bileta pas kohës kur ajo e ka shpallur falimentimin, ku edhe më tutje nuk është bërë e ditur se çka ka ndodhur më qytetarët që kanë rezervuar këto bileta dhe nuk kanë mundur të fluturojnë me avionët e kompanisë në fjalë.

Po ashtu, para se ta shpallë falimentimin në Kosovë e njëjta, një ditë më parë e pati shpallur falimentimin edhe në Shqipëri për shkak se nuk mundi të mbulonte borxhin prej 12 milionë euro të pagave dhe 4 milionë autoriteteve shtetërore.


Rasti “Montenegro”

“Montenegro Airlines” pati ikur nga Prishtina, duke lënë prapa vetes një borxh prej rreth 500 mijë euro.

Aeroporti i Prishtinës, kohë më parë pati bllokuar me orë të tëra avionin e kësaj kompanie, duke lënë udhëtarët të presin me orë të tëra në Aeroport.

Avioni u lejua të fluturojë, pasi që pronarët e “Montenegro Airlines”, paguan rreth 50 mijë euro. Por, menjëherë pas kësaj, ata ndërprenë fluturimin për në Prishtinë, duke e konsideruar si linjë joprofitabile.

Promovimet joshëse gjithmonë kanë pasur cak diasporën, e cila jo rrallëherë është mashtruar dhe ka mbetur duke u sjellë “me gishta në gojë” nëpër Aeroportin e Prishtinës pa u marrë askush me ta, as kompanitë e as aeroporti. Udhëtarë të shumtë mbeteshin në mëshirë të zotit.

Kompanitë të cilat kanë mashtruar udhëtarët, sidomos gjatë festave të fundvitit dhe në sezonin veror, kur diaspora vërshon Kosovën, janë “Aurora”, “Tafa air”, “Proner”, “Skënderbeu”, “Dardania”, “Air Kosova”, “Belle Air”, “Montenegro” etj.

E numri i kompanive mashtruese, e i qytetarëve të mashtruar mund të rritet edhe më tutje nëse institucionet kosovare heshtim dhe lejojnë që në treg të futen kompani të papërgjegjshme.

http://www.zeri.info/artikulli/35409...orti-i-plackes

[Antiproanti]

PF:185 mijë vende punë, shumica në bastore





Partia e Fortë, premton krijimin e më shumë vendeve të punës se numri i të papunëve në Kosovë.

Visar Arifaj në një konferencë të mbajtur për media, ka thanë se Kosova do të bëhet qendër e kryesore e punësimit në rajonin e Ballkanit dhe më gjerë, duke krijuar më shumë vende të punës se numri total i të papunëve në Kosovë.

Sipas të dhënave zyrtare të Agjencisë së Statistikave të Kosovës, ne vendin tonë, Arifaj tha se janë vetëm 135,700 persona të cilët konsiderohen sit ë pa punë.

“Partia E Fortë, premton se gjatë mandatit të ardhshëm do të krijojë 185,000 vende të reja të punës. Pra 50,000 vende pune më shumë se nevojat tanishme të vendit. Këto vende të tepërta të punës do të krijohen për çdo rast dhe do të ruhen në fondin rezerve të vendeve të punës, për tu hapur kurdo qe shfaqet nevoja “, ka thënë Arifaj.

Sipas Arifar, numri më i madh i vendeve të reja të punës do të krijohen në industrinë e bastarëve sportive. Kjo sferë e ekonomisë, siç ka thënë ai ka arritur të krijojë një ekspertizë më të theksuar gjatë viteve të fundit.

http://www.zeri.info/artikulli/35468...ica-ne-bastore

[Antiproanti]

Vetëm 3369 votues nga diaspora



KQZ në Prishtinë ka pranuar 3936 aplikacione për regjistrim nga diaspora, ndërsa i ka certifikuar vetëm 3369 aplikues. Opozita e quan dështim qeveritar anashkalimin e mërgatës.
Diaspora kosovare, që përbën një të tretën e trungut demografik të vendit, sërish ka mbetur jashtë zgjedhjeve të parakohshme parlamentare që mbahen më 8 qershor në Kosovë. Edhe kësaj here vetëm 3900 mërgimtarë, nga mbi 700 mijë sa janë jashtë vendit, kanë aplikuar për t’u regjistruar në Komisionin Qendror të Zgjedhjeve, për t’u bërë pjesë e listave të votuesve.

Kjo pjesëmarrje kaq e vogël e diasporës në Prishtinë arsyetohet me mungesën e informimit të mërgatës për t’u regjistruar në lista zgjedhore. Madje, thuhet se natyra e zgjedhjeve të parakohshme parlamentare e limiton teknikisht periudhën e regjistrimit të mërgatës në listat e votuesve.

Enis Halimi është kryeshef i Sekretariatit të Komisionit Qendror të Zgjedhjeve (KQZ). Ai tha për albinfo.ch se periudha e regjistrimit për votim jashtë Kosovës ka filluar më 13 maj dhe ka përfunduar më 19 maj 2014.

Gjatë kësaj periudhe KQZ, sipas tij, ka pranuar 3 936 aplikacione për regjistrim, ndërsa janë regjistruar suksesshëm 3369 aplikues. “Gjegjësisht nga diaspora kemi 3369 votues të përfshirë në listën e votuesve jashtë Kosovës për këto zgjedhje”, precizoi Halimi.

Në pyetjen se a ka qenë diaspora e njoftuar sa duhet lidhur me procesin zgjedhor, ai tha se Komisioni Qendror i Zgjedhjeve, në bazë të ligjit për zgjedhjet e përgjithshme ka obligim informimin e votuesve për të gjitha periudhat zgjedhore, duke përfshirë edhe tv. spote dhe radio spote, por edhe njoftime nëpër gazetat ditore që botohen jashtë vendit, njofton albinfo.

Sipas Halimit, faza e votimit për ata që janë regjistruar fillon më 27 maj dhe zgjat deri më 6 qershor 2014. “Aktualisht jemi në përgatitjet përfundimtare që kanë të bëjnë me dërgimin e pakove me fletëvotime për votuesit, të cilët suksesshëm kanë aplikuar për regjistrim për votim jashtë vendit”, deklaroi Halimi.

Ndryshe për periudhën e regjistrimit për votimin jashtë vendit Komisioni Qendror i Zgjedhjeve ka shpërndarë aplikacione në 190 pika, në 2 shtete të botës. Në pikat shpërndarëse janë të përfshira ambasadat dhe konsullatat e Republikës së Kosovës në të gjitha kontinentet.


Diaspora e Zvicrës, më e interesuara për zgjedhje

Nga aplikacionet e pranuara nga KQZ prin Zvicra me 1307 aplikacione, pasuar nga Gjermania me 1268, ndërsa e treta vjen Austria me 234 aplikacione të plotësuara. KQZ, sipas një raporti që ia ka dërguar albinfo.ch, i ka refuzuar si të pasakta 138 aplikacione të Zvicrës dhe 146 të Gjermanisë.

Ndërsa ministri në largim i Diasporës, Ibrahim Makolli, thotë se afatet e shkurtra për organizimin e zgjedhjeve e kanë pamundësuar pjesëmarrjen e duhur të mërgatës në zgjedhje. Sipas tij, vetë shkuarja në zgjedhje të parakohshme parlamentare i limiton procedurat për informim dhe votim.

Dhe në këtë vazhdë, sipas tij, diaspora nuk ka pasur kohë të mjaftueshme që të informohet për votim me postë, e madje as të marrë aplikacionet e duhura për regjistrim. Ai tha se edhe kësaj here, sikurse dhe herëve të tjera, i është bërë e padrejtë diasporës sa i përket votimit.

“Por shpresojmë se këto janë zgjedhjet e fundit që diaspora kosovare anashkalohet nga procesi zgjedhor. Ky lëshim duhet të shërbejë si leksion posaçërisht për Kuvendin e Kosovës, që në zgjedhjet e ardhshme t’u krijojë infrastrukturë mërgimtarëve që edhe ata të bëhen pjesë e vendimmarrjes”, deklaroi Makolli.

Ai tha se përveç votimit me postë, diasporës duhet t’i krijohet mundësia edhe për votim në vendet ku jetojnë, e mbi të gjitha votim elektronik.

Në pyetjen se a do të ishte më mirë që zgjedhjet të mbaheshin në korrik ose gusht, kur mërgata vjen në Kosovë, Makolli tha se “edhe kjo nuk do të ishte zgjidhje”.

“Edhe në këtë periudhë të gjithë mërgimtarët nuk do të mund të votonin. Por, e rëndësishme është që atyre t’u krijohet infrastrukturë për votim në vendet ku jetojnë, qoftë duke votuar atje nëpër ambasada, ose edhe më mirë, votim elektronik”, deklaroi mes tjerash ministri që tashmë e përfundon mandatin, Ibrahim Makolli.



Opozita: Qeveria po e anashkalon diasporën

Ndërsa Jahja Lluka, kryesues i Departamentit për Diasporë në Aleancën për Ardhmërinë e Kosovës, akuzoi Qeverinë që nuk iu ka krijuar kushte mërgimtarëve për të marrë pjesë në zgjedhje. Ai tha se diaspora në vijimësi është anashkaluar nga institucionet e vendit, duke mos iu dhënë mundësi që të jenë pjesë e vendimmarrjes.

Lëshimi i parë, sipas Llukës, është bërë që atyre nuk u është krijuar mundësi t’i kenë deputetët e vet në Kuvendin e Kosovës. Ndërsa lëshimet e tjera kanë ardhur duke i anashkaluar nga zgjedhjet. “Ne konsiderojmë se atyre u është dashur t’u mundësohet votimi aty ku janë, nëpër ambasadat e Kosovës dhe të Shqipërisë”, tha Lluka.

Përfaqësuesi i AAK-së po ashtu i konsideroi jo të sakta shifrat e Agjencisë së Statistikave të Kosovës se në diasporë jetojnë rreth 700 mijë kosovarë. Ai tha se kjo shifër, pa i përfshirë shqiptarët në Turqi, kalon mbi 1 milion mërgimtarë, ndërsa rreth 300 mijë prej tyre, siç tha Lluka, janë votues potencial.

Sipas tij, kur shihet se sa është numri i tyre i regjistruar për zgjedhje, atëherë është tepër shqetësuese.

“Kur është e nevojshme, diasporës ia marrim 700 milionë euro çdo vit duke siguruar paqe sociale në Kosovës, e më pas Qeveria i anashkalon dhe i injoron si të mos ishin pjesë jona”, deklaroi mes tjerash Lluka.

Ndryshe edhe në zgjedhjet lokale të 3 nëntorit 2013 është vërejtur një pjesëmarrje e vogël e mërgimtarëve në zgjedhje. Vetëm 1500 bashkatdhetarë u regjistruar për të marrë pjesë në zgjedhjet lokale, që gjithashtu ishte shpërputhje radikale me numrin e bashkatdhetarëve në diasporë.
http://botasot.info/diaspora/301084/...-nga-diaspora/

[Antiproanti]

Ahmeti: Siç e fituam Prishtinën pa para, ashtu do ta fitojmë Kosovën



Lëvizja Vetëvendosje! ka zhvilluar takimin e radhës në fshatin Zhegër. Në këtë takim ishin prezentë kandidatët e Lëvizjes Vetëvendosje nga Gjilani për deputetë, si dhe kryetari i Komunës së Prishtinës, Shpend Ahmeti.

Ahmeti tha se “unë i vetëm nuk jam i fuqishëm, por ajo që më bënë të tillë është familja e quajtur Vetëvendosje”.

“Sikur në Prishtinë, ku fituam pa shuma të mëdha parash, pa ndihmë të bizneseve, por vetëm me punë dhe angazhim, ashtu do të fitojmë edhe Kosovën e gjendja e qytetarëve tanë do të ndryshojë për të mirë”, ka thënë ai.

Ahmeti tha se implementimi i këtij programi do të thotë barazi e sundim të ligjit, zhvillim ekonomik e hapje e vendeve të reja të punës, dhe mirëqenie sociale për Kosovarët. /RajoniPress/

http://www.telegrafi.com/lajme/ahmet...n-2-45358.html

[Antiproanti]

Kurti: Kosova ka alternativë




Kryetari i Lëvizjes Vetëvendosje, Albin Kurti, bashkë me kandidatët për deputetë të Republikës së Kosovës, kanë qëndruar gjatë ditës në qytetin e Pejës, ku edhe është mbajtur një tubim me qytetarë.

Kurti ka thënë se me Vetëvendosjen në pushtet do të marrin fund mënyrat e mbajtjes së pushtetit të deritashëm.

“Ne quhemi Alternativë Qeverisëse, ata të tjerët thoshin se këto mënyrat e tyre - privatizim, asfalt, pazare me Serbinë, korrupsion - nuk kanë alternativë, kurse ne u themi se ato janë krejt të gabueshme dhe ekziston alternativa”, ka thënë Kurti. “Partitë e tjera nuk kanë qeverisur, por kanë sunduar. Ne synojmë dhe përpiqemi që ta zbusim pabarazinë, sepse sa më e barabartë shoqëria, më shumë ka rritje ekonomike. Barazia i ndihmon harmonisë së brendshme në shoqëri, por edhe rritjes ekonomike”. /Telegrafi/
http://www.telegrafi.com/lajme/kurti...e-2-45356.html