Shekulli
TIRANË – Komisioneri i Bashkimit Europian, përgjegjës për problemet e rendit dhe drejtësisë, Franko Frattini është shprehur dje, se “emri i Shqipërisë pak nga pak po hiqet nga “lista e zezë” e BE-së e trafikimit të qënieve të gjalla”. Sipas të dhënave të institucioneve ndërkombëtare të specializuara, duke përfshirë këtu edhe Interpolin si dhe Europolin, numri i personave në botë që janë viktimë e trafiqeve të ndryshme rrotullohet nga 600 000 deri në 800 000 çdo vit. Fakti që deri më sot masat e ndëshkimit ndaj autorëve dhe organizatorëve të këtyre trafiqeve, kanë qenë relativisht të buta, po të krahasohen psh me ato që merren ndaj shpërndarësve të drogës, ka bërë që gjithmonë e më shumë organizata dhe grupime të ndryshme mafioze t’i kthehen këtij aktiviteti, viktimat kryesore të të cilit janë gratë dhe fëmijët. Ky është edhe shkaku që Bashkimi Europian po tregon një kujdes të veçantë për të parandaluar apo ndëshkuar autorët e këtyre trafiqeve. Një grup i ekspertëve i Komisionit Europian bëri të njohur dje edhe një raport mbi shtrirjen dhe rrezikshmërinë e trafikut të qënieve të gjalla në vendet e BE-së, të shoqëruar edhe me propozime konkrete për mënyrat dhe mjetet e luftimit të një praktike të tillë. Komisioneri i BE - së, dha me këtë rast edhe disa shifra rreth përmasave të kësaj dukurie në Europë duke e vënë gishtin gjithashtu edhe në vendet që shërbejnë sot si burim trafiqesh të qënieve njerëzore. Në listën e hartuar nga BE-ja ra në sy se në mesin e vendeve që shërbejnë si burim trafiqesh apo tranziti të qënieve të gjalla, Shqipëria nuk renditej më. Ndër vendet problematike Frattini përmendi me këtë rast Ukrainën, Moldavinë, Rumaninë, Nigerinë etj. Muajt e fundit Shqipëria është përgëzuar në nivele të ndryshme ndërkombëtare për ndërprerjen pothuajse të plotë të trafikut të qënieve të gjalla. Vetë ministri italian i Rendit Pisanu deklaroi muaj më parë në selinë e Këshillit të Ministrave të Bashkimit Europian në Bruksel se qeveria shqiptare e ka zbritur pothuajse në zero trafikun shumëvjeçar të qenieve njerëzore, qoftë ky me burim nga Shqipëria por po ashtu edhe nga vendet e treta. Siç dihet ndërprerja e trafiqeve të tilla ishte dhe mbetet njëri nga kushtet kryesore të afrimit të Shqipërisë me BE-në në kuadër të procesit të asociim -stabilitetit, kusht që Shqipëria duket se po e realizon me sukses.
Përgjigju Duke Cituar
Postuar më parë nga Leshator
Krijoni Kontakt