Policia e shtetit Shqipëtar !

[Wordless]

Përkundër akuzave të opozitës për rritjen e shifrave të kriminalitetit në vend, Kryeministri Edi Rama vlerësoi punën e Policisë së Shtetit në 6 muajt e fundit, duke shprehur bindjen se ky vit do të shënojë një kthesë që do ta vendosë policinë njëherë e përgjithmonë në krahun e qytetarit.

Duke folur në ceremoninë e organizuar në kuadër të dhurimit të 30 motorëve dhe 20 kamerave nga një kompani turke për Policinë e Shtetit, kryeministri tha se deri tani krimi ka qenë me një këmbë brenda Ministrisë së Brendshme, e cila sipas tij, tashmë është këputur.

“Mes Policisë së Shtetit dhe krimit ka ndodhur një divorc dhe ka filluar një luftë e cila ende është e pabarabartë në kushtet kur kemi trashëguar një polici të lodhur në të gjitha aspektet. Këto gjashtë muaj janë prova më e sigurt se njerëzit në Policinë e Shtetit janë të gatshëm për këtë luftë. Nëse deri dje Policia e Shtetit ishte në një varësi ndaj krimit. Në këto gjashtë muaj krimit i është këputur njëra këmbë, ajo që kishte këtu në këtë godinë. Bindjen se ky vit do të shënohet në historinë e policisë së shteti si një vit kthese, një epoke që po mbyllet dita-ditës dhe një epoke të re që do të hapet dhe do të shënojë kalimin njëherë e përgjithmonë të policit të shtetit në krahun e qytetarit.”- deklaroi kryeministri.

Duke iu referuar pajisjeve të reja, Kkryeministri Edi Rama u shpreh se nga sot nis faza e re e transformimit të policisë, duke kapërcyer vitet e prapambetjes.

“Në Europë jam i sigurt, por besoj që edhe në botë do të jetë një ushtrim i vështirë nëse kërkojmë një rast të dytë që ministria e Punëve të Brendshme të jetë në këtë derexhe. Ne nuk gjetëm një godinë por një strukturë të tërë të Punëve të Brendshme, të Policisë së Shtetit me 46% të ndërtesave në gjendje të dobët, e shumë të dobët, me 70% të automjeteve në gjendje të dobët e shuam të dobët, automjetet policore më të vjetra se 15 vjet, të stërlodhura, një sistem komunikimi dhe informimi të stërvjetëruar, policë të pa pajisur me radio, sistem policor pa kompjuterë. Këto të dhëna i kemi marrë nga raporti i fundit i ICITAP, e kemi si pikë referimi për të çuar përpara, pasi policia ka nevojë jetike për një epokë të re. Sot fillon faza e dytë e transformimit të policisë shqiptare me hapin e dytë të inovacionit, në një kohë të shkurtër kapërcejmë vite të tëra prapambetje”, tha Rama.

Duke nënvizuar rëndësinë që do kenë kamerat monitoruese të vendosura në mjetet e policisë, kryeministri u shpreh se tashmë do jetë e lehtë të monitorohet marrëdhënia polic-qytetar, rastet e ankesave për gjobat

“U vendos guri i themelit për një Polici të Shtetit shqiptar të vendosur tek teknologjia e re. 20 kamera në makinat e policisë për të monitoruar marrëdhëniet e policisë me qytetarët. Japin mundësinë e një transmetimi të pandërprerë të të gjithë veprimit dhe marrëdhënies së ditës të çdo punonjësi dhe qytetari, kemi në dorë një instrument të ri e të panjohur, jo vetëm të monitorimit të punës së çdo polici në patrullë por të çdo komunikimi me qytetarët. Na jep mundësinë të rrisim përgjegjshmërinë e çdo punonjësi të policisë me qytetarin, nivelin e etikës së komunikimit, kontrollin e plotë që mund të vijë nga çdo qytetar. Kështu për çdo qytetar që mund të ankohet se u gjet përballë një sjellje të papërshtatshme apo një gjobe të pamerituar me sistemin e sotëm bëhet identifikimi me zë dhe figurë. Identifikohet çdo lloj presioni ndaj uniformës blu nga cilido që flet nga pozitat e të fortit, mund të dal qartë në pah dhe të ndëshkohet sipas ligjit. Shumë i inkurajuar nga ky hap i madh, pavarësisht shtrëngesave të njohura financiare ne realizuam në kohë rekord fillimin e rrugëtimit drejt një objektivi të panjohur më parë, siguri më të lartë përmes teknologjisë së lartë”, tha Rama më tej.

TAHIRI: OPOZITA HEDH BALTË MBI POLICINË, SULMEVE U PËRGJIGJEMI ME PUNË E REFORMA

Ministri i Punëve të Brendshme, Saimir Tahiri akuzoi opozitën se po synon të mbjellë pasigurinë tek qytetarët, duke hedhur baltë mbi Policinë e Shtetit. Gjatë fjalës së tij në ceremoninë e organizuar me rastin e dhurimit nga një kompani turke të 30 motorëve dhe kamerave për makinat e policisë, ministri Tahiri theksoi se institucioni që ai drejton ka zgjedhur t’i përgjigjet me punë e reforma sulmeve të opozitës.

“Po bëjmë realitet policinë moderne duke garantuar standardet më të larta të shërbimit. Mes debateve sa të tepërta, aq edhe bosh pa kursyer baltën e hedhur mbi Policinë e Shtetit, duke synuar mbjelljen me zor të pasigurisë tek qytetarët, ne kemi zgjedhur të flasim me punë, me reforma në sistem, për më shumë siguri për qytetarët dhe shoqërinë.”- deklaroi Tahiri.

Ministri theksoi se kamerat në makinat e policisë do të bëjnë të pamundur korrupsionin, shkeljen e të drejtave të njeriut apo abuzimin me detyrën nga ana e punonjësve të policisë. Megjithatë sipas tij, në gjashtë muajt e fundit hija e korrupsionit është larguar nga policia.

“Tashmë qindra e mijëra sy do të monitorojnë punën e Policisë së Shtetit. Kamerat janë garancia më e mirë për të shndërruar policinë në pararojën e modernizimit të shtetit. Kemi arritur ta largojmë hijen e korrupsionit nga policia e shtetit në më pak se gjashtë muaj. Me kamerat në bordin e makinave do të jetë tërësisht e pamundur të korruptosh apo korruptohesh.”- u shpreh ministri Tahiri.


BW/