Bari: Sekuestrohet 1.3 ton marijuanë nga Durrësi, pranga transportuesit

[Albo]

BARI- Policia Italiane ka sekuestruar sot më shumë se një ton marijuanë që kishte mbërritur nga Shqipëria në portin e Barit.

Financierët e portit të Barit si dhe zyrtarë nga Shërbimi Doganor pas një kontrolli brenda portit për mallrat që vinin nga Europa Lindore gjetën sasinë e drogës të fshehur në thasë çimentosh.

Një 55-vjeçar, shoferi i automjetit, ka rënë në pranga të policisë italiane. Ngarkesa vinte nga porti i Durrësit.

Sipas autoriteteve sasia e madhe e lëndës narkotike ishte destinuar për tregun italian dhe kapte vlerën e 14 milion eurove. Hetuesit kanë kontrolluar ngarkesën pasi shoferi i automjetit ka pasur shenja ankthi.

Droga ishte vendosur në enë prej druri. Kjo është një ndër sasitë më të mëdha të drogës që autoritetet e Barit kanë sekuestruar.

(a.n/BalkanWeb)

[Albo]

Droga e Italisë, këmbanë alarmi për qeverinë

“1.4 tonë drogë i ka shpëtuar kontrollit të kufirit shqiptar, ka kaluar nën hundën e autoriteteve tona, në mos me bashkëpunimin e tyre, dhe u kap dje në Bari. Kjo vërteton edhe një herë shqetësimin e opozitës dhe të opinionit publik në Shqipëri, se segmente të rëndësishme të shtetit dhe anëtarët e qeverisë janë përfshirë në këtë trafik, duke e kthyer edhe një herë vendin tonë në listën e zezë të drogës. Droga e kapur dje në Itali, si një medalje e re në gjoksin e Tahirit, konfirmon gjithashtu mashtrimin me shifrat qeveritare dhe të vërtetën e përkeqësimit të treguesve të rendit dhe lëshimit skandaloz të punës nga drejtuesit e policies. Kjo medalje, por edhe medaljet e tjera që dalin nga mesazhi i Edi Ramës për Saimir Tahirin, e bëjnë edhe më urgjente rritjen e koshiencës për situatën ….Ngjarja e fundit e bën edhe më urgjente thirrjen e Ministres së Mbrojtjes për të dëshmuar në Komisionin e Sigurisë lidhur me informacionet që ekzistojnë për përdorimin e forcave të armatosura në trafikun e narkotikëve, cka mund të rezultojë një medalje e re edhe për ministren në fjalë. Droga e kapur dje në Itali është në serinë e këmbanave të alarmit, dhe kjo dukuri po shqetëson tashmë jo vetëm vendet fqinje, por gjithë Europën.

Partia Demokratike i bën thirrje kryeministrit Edi Rama të marrë masa të menjëhershme dhe të ndalojë këtë trafik të çmendur droge, që nuk mund të zhvillohet pa dijeni dhe pa bekimin e tij dhe të ministrave të tij. Partia Demokratike nuk mund të pajtohet me damkosjen e imazhit të vendit dhe me zhbërjen e gjithë reformave dhe punës së realizuar në vite për sigurimin e kufijve dhe për nxjerrjen e Shqipërisë nga harta e zezë e drogës.”

Teksti i mësipërm është pjesë e regimit të bërë nga Partia Demokratike,pas lajmit për kapjen e 1.4 tonë drogë në portin e Barit në Itali. Reagimin e vet PD e ka bërë nëpërmjet deputetit Arben Ristani.

KJ