Skandali, mjekët receta me logon e depove farmaceutike

[Wordless]

Nga: Ola Mitre

TIRANE- Çdo lloj forme reklamimi apo promocioni për barnat ndalohet me ligj në vendin tonë, por duket se kjo nuk merret në konsideratë nga mjekët e qendrave shëndetësore apo të spitaleve në vend. Vetë ata kanë marrë në dorë promocionin e barnave dhe kjo në një formë shumë të hapur. Në fakt, reklama e tyre bëhet drejtpërdrejt, përmes recetave që lëshohen për pacientët. "Gazeta Shqiptare" ka realizuar një vëzhgim si dhe ka mundur të sigurojë disa receta të lëshuara nga mjekët e institucioneve shëndetësore publike, ndërsa në to shihet qartë logoja e depove farmaceutike që veprojnë aktualisht në vendin tonë. Në fakt duket se kompanitë farmaceutike kanë prodhuar enkas blloqe recetash për t'ua vënë në dispozicion mjekëve, të cilët duket se "nuk i shqetëson" aspak fakti se në këtë formë janë duke mbështetur hapur kompaninë përkatëse. Ndërkohë që, ndodh rëndom që edhe ilaçet e përshkruara në recetë i përkasin po së njëjtës kompani, e cila shfaqet në logo. Në fakt, përveç reklamimit që i bëhet një kompanie përkatëse të caktuar, prania e këtyre recetave në dorën e mjekëve është një konfirmim i asaj që flitet gjithmonë nën zë e që asnjëherë nuk është vërtetuar nga organet kompetente: mjekët janë të lidhur dhe bashkëpunojnë me kompani farmaceutike në vend. Megjithatë, në këto kushte, përgjegjëse janë pa dyshim edhe kompanitë farmaceutike, të cilat, në kundërshtim me ligjin kanë fabrikuar këto receta e më pas ua kanë shpërndarë mjekëve të sektorit publik në vend. Vetë mjekët pohojnë se blloqet me receta i marrin nëpër seminare të ndryshme të organizuara nga këto kompani e më pas i përdorin gjatë punës së tyre.
receta nga depot



LIGJI

Ndalimi i reklamimit të barnave përcaktohet në ligjin "Për barnat në Republikën e Shqipërisë". Në nenin 52 të këtij ligji saktësohet se lejohet reklama vetëm për barnat OTC (barna që shiten pa recetën e mjekut), ndërsa për barnat e tjera bëhet promocion vetëm në literaturë ose në veprimtari shkencore profesionale. Po ashtu, në nenin 53 të ligjit thuhet se ndalohet reklama e barnave për efekte mjekuese, të cilat nuk janë shpallur në kohën e regjistrimit, si dhe fshehja e kundërindikimeve dhe e efekteve anësore të njohura. Shkelja e neneve 52 dhe 53, reklamimi i barnave jo OTC, dënohet me 100 mijë lekë gjobë dhe, në rast përsëritjeje, me heqje të licencës. Në këto kushte, mbetet vetëm që organet kompetente të veprojnë e të marrin masa për të gjithë ata persona, qofshin mjekë apo kompani farmaceutike, të cilët janë duke shkelur hapur ligjin.

QUMËSHTI

Më herët, Qendra për Mirërritjen e Fëmijës konstatoi të njëjtin problem me kompanitë prodhuese të qumështit artificial. Sipas raportit të Monitorimit të Praktikave të Tregtimit të Zëvendësuesve të Qumështit të Gjirit në Shqipëri, për vitin 2013, "kompanitë prodhuese të qumështit artificial, në kundërshtim me ligjin, reklamojnë produktet e tyre nëpër institucione shëndetësore, e shprehur kjo me shpërndarjen e dhuratave për mjekët, kampioneve falas për nënat, zhvillimin e seminareve të shpeshta për mjekët, neonatologët dhe pediatrit, marrëveshjes me maternitetet private, dhe nxitjes në pikat e shitjes, sidomos farmacitë. Sipas raportit, kompanitë përpiqen të depërtojnë nëpërmjet personelit shëndetësor, i cili përdoret si kanal komunikimi me nënat, për shpërndarjen e kampioneve falas dhe nxitjen e shitjeve të formulave.

Gazeta Shqiptare/