Rama ftese per takim kreut te opozites: Basha: OK, por jo sa per sy e faqe

[Albo]

Reforma territoriale, Rama letër Bashës: Synojmë konsensus, gati për takim sy më sy

TIRANE – Kryeministri Edi Rama i ka dërguar një letër kryetarit të opozitës Lulzim Basha, në përpjekje për të bërë të mundur arritjen e një konsensusi për reformën administrativo-territoriale. Kreu i ekzekutivit shpreh gatishmërinë e tij për tu takuar me kreun e PD-së, për të diskutuar mbi çdo shqetësim të opozitës lidhur me këtë çështje.



“I nderuar Zoti Basha, reforma administrative-territoriale është konsideruar e domosdoshme, jo vetëm nga të gjitha partitë më të mëdha politike në vend, por edhe nga partnerët e Shqipërisë dhe nga organizatat më të rëndësishme ndërkombëtare.
Synimi i shpallur i “Aleancës për Shqipërinë Europiane” është që kjo reformë të miratohet me konsensus të plotë dhe gjithëpërfshirje të të gjitha forcave politike dhe grupeve të interesit. Deputetët tanë kanë votuar për ngritjen e një komisioni parlamentar për reformën administrative-territoriale, të bashkëkryesuar nga opozita dhe shumica, secila palë me numër të njëjtë anëtarësh dhe po ashtu me të drejtë vetoje në procesin vendimmarrës të komisionit. Pra komisioni parlamentar i siguron opozitës të drejta të njëjta me ato të shumicës nga fillimi në fund të procesit. Kështu, besoj se jo vetëm kaq, por edhe fakti se e presim tanimë prej kohësh opozitën të vijë në komision, dëshmon qartë vullnetin tonë për të për ta nisur e bitisur së bashku këtë proces, edhe pse disponojmë 84 votat e nevojshme për miratimin e reformës administrative-territoriale. Për gjithë sa më lart, vendosa të bëj edhe këtë përpjekje të drejtpërdrejtë në adresën tuaj, duke ju ftuar ta nisim pa humbur kohë bashkërisht, shumicë dhe opozitë, punën në komisionin për këtë reformë me interes të posaçëm strategjik për vendin. Lejomëni tju shpreh në fund gatishmërinë time për t’ju takuar sy më sy, nëse ju do të donit të ndanit me mua çfarëdo shqetësimi lidhur me këtë çështje me interes kaq të veçantë për të gjithë. Për të sotmen dhe të ardhmen e Shqipërisë.”- përfundon letra e kryeministrit drejtuar kryetarit të PD-së, Lulzim Basha.

Balkanweb

[Albo]

META: INKURAJOJ TAKIMIN RAMA-BASHA

Kryetari i Parlamentit, Ilir Meta, inkurajoi dje një takim mes Kryeministrit Edi Rama dhe kryetarit të opozitës, Lulzim Basha, për të diskutuar lidhur me miratimin e reformës administrativo-territoriale. Meta ka vlerësuar ftesën që Kryeministri i ka drejtuar kreut të opozitës, duke uruar që ky takim të realizohet sa më shpejt.

“Dua të vlerësoj ftesën që Kryeministri dhe njëkohësisht kryetari i Partisë Socialiste, z. Edi Rama, i ka bërë kryetarit të opozitës dhe të Partisë Demokratike, z. Lulzim Basha, për t’u takuar dhe për të diskutuar lidhur me përmbushjen e një prej reformave më madhore, për të cilën vendi dhe qytetarët presin prej gati dy dekadash, siç është ajo që ka të bëjë me reformën administrative dhe territoriale”, u shpreh Meta.

Kryetari i LSI-së tha se lideri i opozitës nuk duhet të bëjë gabimin që të mos pranojë ftesën, pasi me tensione nuk do ta kthejë PD-në në pushtet.

“Shpresoj që ajo të mos humbasë vështrimin drejt së ardhmes, sepse ky do të ishte gabimi më i madh që do të bënte lidershipi i saj. Do të ishte shumë gabim që të binte pre e nervozizmit dhe e idesë se përmes bllokimit, përmes përkrahjes së tensioneve vend e pavend, do të arrijë të kthehet në pushtet”, theksoi ai.

(er.nu/BalkanWeb)

[Albo]

Korrespondenca me Ramën; Përgjigja befasuese e Bashës: Jam i gatshëm të takohem

Kur të gjithë ishin duke vënë bast se kreu i PD do të refuzonte ftesën e kryeministrit për një takim mbi reformën territoriale, Basha ka befasuar. Por me anë të një letre, siç dhe Rama iu drejtua, ai u shpreh i gatshëm për takim. “Ne jemi të gatshëm të takohemi në çdo nivel, për çdo problem në interes të vendit dhe demokracisë, në radhë të parë për pesë prioritetet e marrjes së statusit dhe hapjes së negociatave me BE, si interes suprem kombëtar. Por edhe për reformën administrative-territoriale”. Para se të vijë te pranimi i takimit, kreu i PD-së i bën me dije kryeministrit se “Pika kyçe që mbetet për t’u pohuar qartë dhe publikisht është një dhe vetëm një: jeni apo nuk jeni për votimin me konsensus të kësaj reforme në sallën e Kuvendit të Shqipërisë. Konsensusi në komision është i pamjaftueshëm. Konsensusi në komision është i pamjaftueshëm. Vetëm pranimi i konsensusit do të bënte të mundur që takimi ynë të mos ishte një rilexim sy më sy i letrave që ju keni preferuar t’i shkëmbejmë publikisht.

Letra e Bashës

Z. Edi Rama

Kryetar

Partia Socialiste

Tiranë

23 mars 2014

I nderuar zoti Rama,

Me keqardhje vërej se në letrën që më keni dërguar nuk ka të reja përtej qëndrimeve dhe veprimeve të deritanishme të shumicës suaj në lidhje me reformën administrative-territoriale. Kjo reformë kërkon si minimum konsensus politik mes shumicës dhe opozitës dhe si optimum kushtetues, gjithpërfshirje të publikut.

Konsensusi ka kuptim vetëm kur finalizohet me votim në sallën e Kuvendit. Në këtë pikë, as teoria, as praktika nuk lenë hapësirë për shpikje apo eksperimente. Në thelb, ju na ftoni të hartojmë me konsensus në komision, por të votojmë sipas numrave në Kuvend.

Me fjalë të tjera, ju na ofroni vitrinën e konsensusit, por jo vetë konsensusin. Ju i ofroni opozitës me dorën e komisionit diçka që mund t’i merret me dorën e Kuvendit. Detyrohem të ripohoj se opozita gjithnjë është e distancuar nga çdo lloj teatri politik kundër interesit dhe të drejtës së qytetarëve për një reformë konsensuale deri në miratimin përfundimtar.

Me këtë rast, më lejoni t’ju rikujtoj zoti Rama se ju keni bërë mandatet pas zgjedhjeve, por nuk i keni fituar në zgjedhje votat e një shumice të cilësuar prej tetëdhjetë e katër deputetësh.

Në vizionin tonë si opozitë, reforma administrative-territoriale para se të jetë një rivizatim i kufijve të bashkive dhe rajoneve, ka qenë dhe është mbi të gjitha reformë e fuqizimit të demokracisë e qeverisjes vendore dhe përafrimit të pushtetit vendor në Shqipëri me standardet më të përparuara europiane.

Është e trishtueshme që sjellja në rendin e ditës e kësaj reforme përkon me bllokimin e shumfishtë dhe të përsëritur të pushtetit vendor nga qeveria juaj. Dhunimi dhe kthimi prapa i autonomisë vendore në Shqipërinë e sotme i kompromenton rëndë dhe i vë në dyshim tundimin dhe qëllimet e shumicës suaj për të miratuar në mënyrë të njëanshme këtë reformë.

Megjithatë, pavarësisht ngushtimit gjithnjë e më kritik të hapësirës për opozitën në Kuvendin e Shqipërisë, pavarësisht rekordeve të arbitraritetit të mazhorancës dhe fjalorit të padenjë e arrogancës së atyre që kanë për detyrë të japin shpjegime dhe të përgjigjen për shqetësimet që ngre opozita, Partia Demokratike dhe unë i qëndrojmë e do t’i qëndrojmë deri në fund dialogut si vlerë dhe si mundësi e pazëvendësueshme për ecjen përpara të reformave në vend.

Në këtë kontekst, ne jemi të gatshëm të takohemi në çdo nivel, për çdo problem në interes të vendit dhe demokracisë, në radhë të parë për pesë prioritetet e marrjes së statusit dhe hapjes së negociatave me BE si interes suprem kombëtar. Por edhe për reformën administrative-territoriale.

Pika kyçe që mbetet për t’u pohuar qartë dhe publikisht është një dhe vetëm një: jeni apo nuk jeni për votimin me konsensus të kësaj reforme në sallën e Kuvendit të Shqipërisë. Konsensusi në komision është i pamjaftueshëm.

Vetëm pranimi i konsensusit do të bënte të mundur që takimi ynë të mos ishte një rilexim sy në sy i letrave që ju keni preferuar t’i shkëmbejmë publikisht.

Sinqerisht,

Lulzim Basha


MAPO

[Elian70]

..........

[Albo]

Basha: 'Ok' dialogut me Ramën, por mazhoranca të zbatojë vendimet e gjykatave



TIRANË-Opozita nuk do të ndalet, betejën do e vijojë në Kuvend, por mazhoranca duhet të zbatojë vendimet e gjykatave. Ky ishte mesazhi që përcolli në mbledhjen e grupit parlamentar, kryetari i PD Lulzim Basha.

Basha theksoi se opozita nuk i ka bërë bisht dialogut dhe këtë e vërtetoi dhe pas letrës së kryeministrit Edi Rama drejtuar atij si kryetar opozite.

“Mora një letër të hapur të kryeministrit ku më ftonte të pajtoheshim për çështje të reformës territoriale. Letra që kam marrë dhe kam kthyer janë tashmë të njohura. Koha ka treguar se dialogu për ne ka qenë dhe është vlerë, ka qenë dhe është mendësi për njëri-tjetrin”.

Por Basha theksoi se opozita nuk mund të bëhet palë me një mazhorancë që nuk zbaton vendimet e gjykatave. Në këtë pikë, Basha i ka bërë thirrje kreut të qeverisë të zbatojë menjëherë vendimin e Kushtetueses për statusin e Nëpunësit Civil dhe të kthehen në vendet e punës të gjithë të larguarit padrejtësisht.

“Një qeveri që refuzon të zbatojë vendimet e gjykatave padit veten si antidemokratike, kjo është e papranueshme në botën demokratike. Të prapësojë urdhin e paligjshëm, të zbatojë ligjin. Te tërheqë nga axhenda e kuvendit projektet për nëpunësin dhe AMA, pasi opozita refuzon lojën e shtyrjes së çdo projekti që bie ndesh të ligjeve të miratuara me konsensus, të heqë dorë nga sulmi kundër presidentit dhe institucioneve të pavarura”, tha ai.

Gjatë fjalës së tij në mbledhjen e grupit të PD-së, Basha theksoi se ‘opozita do ta bëjë me vendosmëri punën e vet si opozitë në Kuvend, me gjithë fjalorin rrugacëror të kryeministrit, apo isove me buzeqeshje të kryetarit të Kuvendit”.

Fjala e plotë e kryetarit te PD-së

Anëtarë të Grupit Parlamentar të Partisë Demokratike dhe anëtarë të opozitës e aleatëve,
Më lejoni ta nis me një urim për nënkryetarin e Kuvendit z Edmond Spaho i cili i bashkëngjitet grupit opozitar pas një mungese disa mujore për shkak të aksidentit e ti uroj një shërim sa më të shpejtë dhe mirë se kthehesh në familjen dhe përpjekjen tonë të përbashkët.
Siç e dini, javën e kaluar isha sërish në samitin e radhës të EPP në Bruksel, ku vijova punë tonë konstante në funksion të marrjes së statusit të vendit kandidat dhe hapjen në vijimësi të negociatave për anëtarësimin e vendit në BE. Me bindjen se Shqipëria dhe shqiptarët e meritojnë ketë.
Partitë simotra, kryetarët e tyre në qeveri e kanë konsideruar qëndrimin tonë të drejtë dhe largpamës, të denjë të një opozite europianiste dhe kombëtare, që di të vlerësojë përparësinë e aspiratës popullore për integrim në raport me pengesat serioze që janë krijuar në këtë rrafsh qeveria Rama-Meta.
Në këtë kuptim, aleatët dhe miqtë tanë në PPE vlerësojnë dhe mbështesin pa asnjë hezitim betejën tonë tashmë gjashtëmujore në mbrojtje të vlerave të lirisë, kolonave të demokracisë dhe shtetit ligjor, një betejë ekzistenciale, që na është imponuar nga oreksi anti-demokratik i kësaj qeverie.
Kjo nuk ka qenë e lehtë për faktin se publiku ka patur shpresa dhe pritshmëri të mëdha nga kjo shumicë.
Por me zbehjen e përshpejtuar të këtyre iluzioneve, sa për shkak të mashtrimeve dhe dështimeve, aq edhe falë vendosmërisë sonë për të bërë një opozitë të mbështetur në fakte, argumente dhe arsye, e drejta në gjithë këtë betejë politike dhe ligjore është kthyer me fytyrë nga ne. Shpresa gjithashtu.
Nuk do të kishim e nuk do të kemi zë në Europë po të mos mbrojmë vlerat e lirisë dhe shtetit ligjor. Lobimi ynë për statusin nuk do të kishte vlerë, nuk do të mirëkuptohej, për të mos thënë se do të tingëllonte i turpshëm, nëse ne do të shkonim për të bërë mburojën e shkeljeve të qeverisë apo nëse do të investoheshim për një paqe teatrale në Tiranë gjoja për t’ja hedhur Brukselit. Këtu truket nuk funksionojnë. Demagogjia nuk pi ujë.
Do të vazhdojmë ta bëjmë me vendosmëri punën tonë si opozitë, pavarësisht ngushtimit gjithnjë e më kritik të hapësirave në Kuvend, pavarësisht fjalorit të ulët, deri rrugaçëror të kryeministrit, apo isove me buzëqeshje të kryetarit të Kuvendit, të cilët kanë harruar, nëse e kanë ditur ndonjëherë se është detyrë e opozitës të pyesë qeverinë, t’i kërkojë llogari qeverisë, të denoncojë aktet e qeverisë në bazë të fakteve apo edhe dyshimeve të përligjura. Siç bëmë javën e kaluar me marrëveshjen me FMN të vërtetës tronditëse të së cilës do t’i kthehemi sërish në Kuvend e jashtë Kuvendit. Ndërsa detyra e kryeministrit, ministrave dhe qeverisë është të japin përgjigje, të japë shpjegime, të bëjnë transparencë, ju pëlqen apo jo.
Ky është kuptimi i parlamentarizmit. Fyerjet në vend të përgjigjeve, sharjet në vend të transparencës dhe argumentit janë shkatërrimi i parlamentarizmit.
Në sfondin e shijes shumë të keqe që la javën e kaluar një sjellje si kjo e zotit Rama, unë, siç e dini mora një letër të hapur prej tij ku më ftonte ta takoheshim për çështjen e reformës territoriale-administrative.
Letra që kam marrë dhe letra që kam kthyer janë tashmë të njohura për gjithë publikun.
Sot, në këtë takim, dua të nënvizoj disa momente, në dritën e rikthimit të temës së dialogut në fjalorin politik të ditës.
Së pari, sa i përket reformës territoriale-administrative, më duhet të ripërsëris se kjo reformë, për vetë rëndësinë dhe përmasat që ngërthen, kërkon si minimum konsensus politik dhe si optimum kushtetues konsensus dhe gjithpërfshirje të publikut.
Vetë natyra e reformës e dikton këtë dhe jo tekat, dashja apo mosdashja e palëve. Nëse kundërshtarët tanë vinë te ky qëndrim: mirë se të vinë.
Së dyti, për kundërshtarët tanë, dialogu, siç mund të jetë shprehje e një reflektimi pozitiv dhe kthimi nga rruga pa krye e arbitraritetit dhe arrogancës, mund të jetë edhe një lojë politike, një manovër meskine për të kaluar një situatë, për t’i hedhur hi syve dikujt, për t’u dukur çfarë nuk janë.
Në parim, do të ishte mjerim i madh të kesh një koncept të tillë për dialogun. Por do të ishte edhe pa asnjë vlerë praktike gjithashtu. E vërteta del. Koha ka treguar se dialogu për dialog është edhe më keq se përballja në pasojat negative që prodhon.
Për ne dialogu ka qenë dhe është vlerë, ka qenë dhe është një mjet i pazëvendësueshëm për çuarjen përpara të reformave, ka qenë dhe është një mendësi e marrëdhënieve me njëri tjetrin, me shoqërinë civile, me njerëzit e lirë, me palën kundërshtare; ka qenë dhe është mendësia për t’i ballafaquar dhe jo për t’i majisur problemet, për t’i zgjidhur e jo për ti fshehur.
Në kulturën dhe sjelljen tonë, vlera e dialogut në parim u mbivendoset pengesave që e vështirësojnë atë, qëndron mbi to.
Ndërkohë, ne e kemi shumë të qartë se ekziston një kulturë dhe një etikë e tërë e dialogut, ekzistojnë norma dhe standarde që duhen respektuar me qëllim që dialogu të jetë i pasforcuar, i natyrshëm, i sinqertë, konkret, produktiv, i përligjur me rëndësinë e çështjes, pra të mos jetë për fasadë, të mos jetë shou.
Është pikërisht në një funksion të tillë, dhe një produkti të tillë, të një klime të re politike, në funksion të marrjes se statutit dhe shtrimit të rrugës për kryerjen e reformave të integrimit të vendit në Bashkimi Europian, që Partia Demokratike, opozita dhe unë i drejtohemi sërish kryeministrit dhe shumicës së tij:
1-Të zbatojnë menjëherë, pa asnjë hezitim dhe ekuivok vendimet e Gjykatës Kushtetuese për Nëpunësin Civil dhe INUK-un. Të zbatojnë vendimet e gjykatave të vendit për kthimin në vendin e tyre të punës të të gjithë burrave dhe grave, të rinjve dhe të rejave të administratës publike të larguar nga puna në mënyrë të paligjshme.
Një qeveri që refuzon të zbatojë vendimet e formës së prerë të gjykatave padit veten e saj si një qeveri thelbësisht anti-demokratike. Kjo është e patolerueshme dhe e papranueshme në botën demokratike.
Raprezalja e nisur që në tetor të vitit të kaluar ka bërë kërdinë, ka vazhduar dhe vazhdon edhe sot me intensitet të lartë. Ligjvënësit e opozitës i kanë kërkuar zyrtarisht informacion të gjitha ministrive që prej datë 19 shkurt mbi largimet nga puna dhe rekrutimet e reja në administratën e tyre dhe të institucioneve të varësisë. Pesëmbëdhjetë ditë është afati ligjor për të kthyer përgjigje, që do të thotë se me 6 mars duhej ti kishim në dorë të gjitha të dhënat e kërkuara. Deri më sot, informacioni është dhënë vetëm nga dy ministra pa portofol dhe pa administratë si dhe nga tre ministri, prej nga rezulton se janë larguar rreth një mijë nëpunës, tetëqind prej të cilëve vetëm në Ministrinë e Drejtësisë.
Ky informacion u ndërpre papritur, me një urdhër të paligjshëm të kryeministrit, që mendon se në këtë mënyrë nuk do të merret vesh e vërteta skandaloze e aktit të tij normativ antikushtetues me anë të të cilit ka flakur në mes të katër rrugëve mbi shtatë mijë burra dhe gra, të rinj dhe të reja dhe familjet e tyre dhe vazhdon përditë të flakë të tjerë. I përsëris thirrjen kryeministrit të prapësojë urdhrin e paligjshëm, e t’u kërkojë institucioneve nën vartësinë e tij të zbatojnë ligjin e t’u përgjigjen ligjvënësve tanë.
Mazhoranca duhet të tërheqë fare nga axhenda e Kuvendit, dhe jo t’i shtyjë, projektet e tyre arbitrare për Nëpunësin Civil dhe AMA-n. Opozita e refuzon me përbuzje lojën me shtyrje në formën e karrotës apo shantazhit të çdo projekti që bie ndesh me natyrën konsensuale të projektligjeve dhe ligjet në fuqi të miratuara më parë dhe Kushtetutën.
Mazhoranca duhet të heqë dorë në mënyrë të qartë e përfundimtare nga sulmet kundër institucionit të Presidentit të Republikës dhe institucioneve të pavarura, të tërhiqen nga marrja arbitrare e kompetencave të Presidentit si në rastin e shkarkimit të kreut të ILDKP-së. Të kthejnë normalitetin ligjor në këtë institucion. Të ndalin revanshin e tyre ndaj institucioneve e pavarura dhe kushtetuese me qëllim për t’i vënë nën thundrën politike ose përmes ndërprerjes antikushtetuese të mandateve të tyre ose përmes intimidimit.
Zonja dhe zotërinj deputetë,
Një çështje madhore në vete e evidentuar gjatë javës së kaluar është promovimi në poste drejtuese nga kjo qeveri e personave me precedentë penalë dhe rekorde kriminale. Javën e kaluar, vetëm në katër ditë ne kemi bërë katër denoncime me emra konkretë.
Shqiptarët janë skandalizuar duke parë se dyshja Rama Meta në poste kyçe të administrimit të vendit i kanë varur ujkut mëlçitë në qafë, siç thotë populli. Aty ku certifikohet siguria ushqimore, emëruan një prodhues dhe trafikant të ushqimeve dhe pijeve fallso. Aty ku kontrollohet cilësia e kujdesit shëndetësor, një kontrabandist ilaçesh. Aty ku duhet ti ofrohen rinisë perspektiva dhe shanse punësimi, një person në kërkim ndërkombëtar për kontrabandë cigaresh. Në portin më të madh të vendit , një person të dënuar për trafik droge.
Sipas të dhënave tona, fenomeni është në përmasa shumë shqetësuese. Është e tmerrshme kur dëgjon se Shqipëria e qeverisë Rama-Meta po konsiderohet çdo ditë e më shumë si vendi ku krimi jo vetëm punësohet me përparësi, por kërkon dhe ia ka arritur në shumë fusha dhe zyra të jetë në timon.
Të denoncuarit me fakte nga opozita po japin dorëheqjen dhe mirë bëjnë. Nuk ka dyshim se emërimi i tyre është bërë në kundërshtim me ligjin, rregullat dhe kriteret. Emërimi i tyre provon falsitetin e meritokracisë që predikon qeveria Rama-Meta. Jo meritokracia, por krimokracia është e reja që kanë sjellë. Dhe kjo duket qartë edhe në qëndrimet që mbajnë, duke u mjaftuar me heshtjen vetëkompromentuese për dorëheqjet e atyre që kap me fakte opozita.
Po si erdhën këta të inkriminuar në këto poste? Kush i solli? Me çfarë sistemi? I kanë blerë me para në dorë këto poste, apo jemi në hullinë e rrezikshme të kapjes së drejtimit të administratës nga krimi dhe grupet kriminale?
Nëse qeveria nuk arrin të godasë fort mekanizmin që prodhon këtë përçudnim të mirëfilltë të drejtimit, do të thotë se është ajo që e prodhon.
Opozita po vazhdon ta ndjekë me vëmendje të madhe ketë dukuri të pashembullt në shëmtimin dhe rrezikun që paraqet. Kemi kërkuar, kemi marrë dhe përshëndesim dhe inkurajojmë publikun në mbështetjen që po jep.
Nuk ka paqe e nuk do të këtë paqe, pajtim jo se jo, me krimin dhe shkeljen e ligjit nga ana jonë.

(d.b/BalkanWeb)