Ndahet nga jeta Artistja e Madhe, Vaçe Zela

[Ingenuous]

Ndahet nga jeta Artistja e Madhe, Vaçe Zela. Amaneti: Dua të prehem në Atdhe



TIRANE-Shuhet artistja e madhe e skenës shqiptare, Vace Zela. Këngëtarja ndërroi jetë në moshën 74 –vjecare, sot rreth orës 01:00 në Basel të Zvicrës pas një sëmundje të gjatë. Lajmi konfirmohet nga familjarët e saj në Zvicër.

Vaçe Zela lindi në Lushnje në vitin 1939 dhe më 7 prill të këtij viti do të mbushte 75 vjeçe. Ajo është gruaja e parë shqiptare e nderuar sa qe gjallë me titullin “Nderi i Kombit.

Me dëshirën e saj të lënë amanet tek të afërmit e saj, artistja e madhe shqiptare Vaçe Zela do të prehet në atdhe. I vëllai Hysni Zela bëri të ditur për News24 se në rast se dokumentacionet vonojnë, trupi mbërrin në atdhe vetëm ditën e shtunë, me linjën tranzit.

Artistja e madhe e skenës shqiptare njihej me disa epitete. "Zëri i Artë i Shqipërisë", "Ikona e Shenjtë e Këngës Shqiptare", "Mbretëresha e Këngës Shqiptare", "Ylli Polar që vërtitet i vetëm në Galaktikën e Këngës së Lehtë Shqiptare", "Gjigandja e Skenës Shqiptare".

U zbulua rastësisht në moshë të re në Lushnjë. Vaçe Zela kishte një zë të jashtëzakonshëm. Me zërin e saj mahnitës e të papërsëritshëm për më shumë se 40 vjet krijoi mitin e saj të pavdekësisë duke hyrë në zemrën e çdo shqiptari brenda e jashtë atdheut. Këngët e saj në vite mbeten popullore dhe të preferuara edhe sot nga publiku.

Vaçe Zela u largua përfundimisht prej skenës në vitin 1992.

Sidoqoftë Vaçe Zela mbetet "Zëri i Jashtëzakonshëm" që mbushte me energji skenat shqiptare duke u bërë idhulli i shumë brezave. Ylli i muzikës shqiptare ka interpretuar këngët "Çelu si mimoza", "Djaloshi dhe shiu", "E dua vendin tim", "Ëndrra ime", "Lemza", "Nënave shqiptare", "O diell i ri", "Sot mbusha 20 vjet", "Të lumtur të dua", "Rrjedh në këngë e ligjërime", "Për ty atdhe", "Moj e bukur Arbëri", e shumë të tjera, që kanë mbetur në fondin e artë të muzikës shqiptare.
Çmimet e titujt që ajo ka marrë ndër vite janë: "Artiste e Merituar" në '73-in, "Artiste e Popullit" në '77-ën, "Mjeshtre e Madhe e Punës", "Qytetare Nderi" e Lushnjes, po në qytetin e lindjes.

Vaçe Zela i dhuroi publikut shqiptar si edhe Historisë së Muzikës Shqiptare zërin e saj të artë. Një kulm që nuk do të shlyhet kurrë nga kujtesa artistike.

Vaçe Zela ka marrë pjesë në shumë festivale të muzikës në Radio dhe më vonë në Radiotelevizion që prej organizimit të parë të tyre, duke fituar plot 12 çmime të para, një rekord i paarritur deri më sot. Vaçe Zela ka qene fituesja e parë e Festivalit të Parë. Me këngën “Fëmija i parë”, ajo dëshmoi se një idhull i muzikës po lindte atë mbrëmje të 26 dhjetorit të vitit 1962. Repertori i saj është shumë i pasur; numërohen me dhjetëra këngë popullore, të lehta, kantata, balada, etj. Ajo ka një kontribut të rëndësishëm edhe në muzikën e filmit, ku ka interpretuar shumë këngë si pjesë e muzikës së filmave.

Prej disa vitesh jetonte në Zvicër. Ajo është e vetmja femër shqiptare e nderuar në të gjallë me Urdhrin "Nderi i Kombit" nga presidenti Alfred Moisiu me motivacionin: “Për vlerat e rralla si Artiste e Shquar, me popullaritet të jashtëzakonshëm, për interpretimin mjeshtëror të këngës së muzikës së lehtë dhe asaj popullore, për pasurinë e vyer që krijoi në shkollën shqiptare të interpretimit muzikor.”

Për nder të këngëtares, viti 2009 është shpallur nga Ministria e Turizmit, Kulturës, Rinisë dhe Sporteve si “Viti Vaçe Zela”. Së fundi, edhe një rrugë në Tiranë mban emrin e saj.

ARTISTËT: SI E KEMI NJOHUR VAÇEN, SI DO TA KUJTOJMË GJITHMONË
News24 nje maratone bisedash telefonike sot me artistet

Kompozitori Agim Krajka: Ka vdekur vetëm fizikisht, ajo do të mbetet e pavdekshme në skenën shqiptare.

Këngëtari Sherif Merdani: Na mësoi si të dashurojmë këngën. Është një humbje aq e madhe sa nuk e krahasoj as me 100 politikanë. E kam njohur kur kam qenë në Lushnjë, këndonte në estradën e Lushnjes, me shokun tim u njoh që iu bë dhe bashkëshorti i saj. Ishte mina e Shqipërisë. Një dhuratë nga Zoti

Bujar Kapexhiu: Do të mbetet e paharruar jo vetëm për mua, por për të gjithë të rinjtë që aspirojnë të ngjiten në skenën shqiptare. Ajo ka qenë shkollë për këngëtarët shqiptarë. Ajo këndonte në mënyrë të jashtëzakonshme. Marrëdhëniet e saj me regjisorin, kompozitorin kanë qenë të jashtëzakonshme. Nuk e besoj dot që ajo është ndarë nga jeta.

Agim Doci: Sapo e mësova lajmin. Po udhëtoj drejt Bazelit...

Aurela Gace: Sapo u zgjova dhe hap televizorin si rutinë e mëngjesit. Dëgjoj lajmin e hidhur të shuarjes nga jeta të artistes së Kombit, Vace Zela....menjëhere më erdhi në mend atë cfarë kam përjetuar kur e kam takuar për herë të parë...në shtëpinë e saj në Basel të Zvicrës shkova ta takoj shumë vite me parë...e shoh të buzëqeshur , me zërin e embël që më ftoi të ulesha dhe u bukosa fare, nuk flisja dot, nuk i thosha dot sa shumë e doja zerin e saj, sa shume kisha dëgjuar...më ofroi kek të cilin e kishin gatuar në shtepi....mezi e hengra nga emocioni i madh që kisha duke qëndruar afer saj. E pyes xhaxhi Pjetrin, bashkëshortin e saj, " si është të jetosh pranë kesaj artisteje kaq të madhe"? Ai mu përgjigj i qetë, për mua ka qenë dhe është njeriu i jetës time.

E kam takuar përsëri e kam folur në telefon për ti uruar ditelindjen e saj, dhe zëri i saj po i njëjtë, i qete, i ëmbël, i butë dhe kaq e dashur. Edhe kur kishte vështirësi të fliste nga sëmundja e saj, ajo prape nuk harronte të më pyeste se si isha e si e kisha vajzen..

Të dua shume teta Vace (sepse keshtu i drejtohesha), dhe emri yt e zëri yt do të jetojë në memorjen e të gjithëve ne, .... vajzës time do t'ja mesoj emrin dhe këngët e tua, që edhe ajo e brezat e tjere ta dinë se cfare thesari ka pasur e ka Shqipëria.
Shpirti yt prefte në paqe.

Myfarete Laze: Këngëtare komplekse për të gjitha zhanret. Kam pasur fatin që të këndoj këngë në festival, kompozime me të. Vaçja një talent i rrallë...

Zhani Ciko: Në këtë ditë të trishtë ku duket sikur dhe natyra ka marrë pjesë në të. Vacja, artiste shumëdimensionale. Figura e Vaces do të mbetet e paharruar dhe do të vlerësohet nga populli

Sidrit Bejleri: Nderroi jete nje nder figurat me te medha te artit skenik shqiptar... Iku pertej artistja e madhe, ajo te ciles te gjithe i referohen kur flitet per majat e vokalit shqiptar... Iku Vaçja...
Paqja e Zotit qofte me te!

Irma Libohova: Jam tepër e hidhëruar. Jam këngëtare e brezit të saj dhe për mua ka qenë shkollë. Ajo ka qenë autoritare, e vendosur, në biseda që kemi pasur bashkë më tregonte shumë mbi muzikën. Për mua ka qenë mike, shoqe, dhe ngushëlloj familjen. Nuk e di, por kjo ditë e trishto. Vacja nuk ka vdekur. Për mua ka qenë krenari që krahasonin zërin tim me të sajin

Mimoza Selimi: E kisha ike, ngushëlloj familjarët e saj. Në Zvicër, takoheshim gjithmonë bashkë, nuk kam fjalë aq dhimbje ndjej

Bashkim Alibali: E pritëm me shumë dhimbje, se Vacen e kam njohur prej vitesh. Artiste dhe njeri me zemër të madhe. Ka ik një yll shumë i ndritshëm i muzikës shqiptare. Kangët e saj dhe mund të këndohen, do të doja të dëgjoja vetëm zanin e Vace Zelës, një zë i papërsëritshëm i Shqipërisë. Ajo ka qenë me vërtet një këngëtare e madhe dhe një njeri i thjeshtë. Para se të dilte në skenë i kishte duart akull, por sa hynte ishte zjarr i vërtetë. Duhet të bëhet më shumë për figurat e nderuara që të mos lihen në harresë...

Kozma Dushi: Artiste e madhe, nuk prishte qejf, ruaj kujtimet më të mira, një humbje kaq e madhe. Interpretimi i saj, buzëqeshja e saj në skenë, me dirigjentët e saj që dirigjonin, një komunikim të rrallë. Veprat e saj do të mbeten në jetë të jetëve, unë kam mësuar kaq shumë nga ajo

Manjola Nallbani: Këngë, interpretime, emocione që shqiptarëve ju kanë shërbyer në momente të ndryshme u kanë ngritur moralin lart, dhe kjo është arritja më e madhe e një artisti që me zërin tënd tu japësh emocion, që të të këndojnë. Vacja këtë e bëri dhe gjithkush nga ne është mirënjohës për atë që dha me zërin dhe shpirtin e saj.

Qemal Kërtusha: Ajo është një medalje e madhe e muzikës, një trashëgimi e madhe, një meteor, që zbret 1 herë në 100 vjet në tokë, ashtu ishte zëri i Vace Zelës. Kur është kënduar, fëmija i parë, duke shëtitur, njerëzit na habiteshin me fjalët më të mira, duke thënë cfarë kange të bukur keni kënduar.
Para se të dilte në skenë, ajo më thoshte Qemal, kam emocion, ma ver dorën tek gjoksi. Asaj sikur do i delte zemra nga vendi, por kur shkonte tek mikrofoni, e ngrinte sallën peshë. Të jepte emocion të jashtëzakonshëm.

Zhuliana Jorganxhi: Vacja të frymëzonte dhe gjithmonë kur punoja me të, me vinin fjalët vetvetiu. Kam punuar tekstin mbi melodinë, më kujtohet kur bëmë këngën “Gonxhe në pemën e lirisë” kemi ndejtur deri në 2 të natës në teatrin e operas, dhe kur më mungonte fjala ajo ta jepte. Mund ta quaj, foltore të teksteve. Ajo sa dëgjonte tekstin, merrte këngën.
Ishte dhe rregullatore e melodive. Kur kishte dicka që nuk shkonte, ajo u sugjeronte kompozitorëve, vijën melodike.

POLITIKANET
Mesazhe ngushëllimi për ndarjen nga jeta të bilbilit të skenës shqiptare kanë bërë dhe njerëz të politikës.

Edi Rama: Ne nje kohe e vend tjeter Vacja do ishte yll i ndezur ne qiellin e botes, iku duke lene perjete ndezur yllin e vet ne qiellin e Shqiperise.

Presidenti: Presidenti Nishani shpreh ngushëllimet për ndarjen nga jeta të “Mbretëreshës së këngës shqiptare”, artistes Vaçe Zela Nëpërmjet një mesazhi të bërë publik, Presidenti i Republikës, Bujar Nishani shpreh ngushëllimet e sinqerta dhe dhimbjen e thellë për ndarjen nga jeta të këngëtares së papërsëritshme shqiptare, Vaçe Zela.
“Në këto çaste dhimbjeje, kur mbarë kombi ynë po përjeton me hidhërim të thellë humbjen e këngëtares së papërsëritshme Vaçe Zela, dëshiroj të shpreh, edhe në emër të shtetit shqiptar, ngushëllimet më të ndiera e të sinqerta.
Vaçe Zela ishte magjia e madhe që e bëri kombin shqiptar të gëzojë dhe të jetë optimist për jetën, edhe kur jeta premtonte shumë pak mirësi.
Artistja e madhe po ikën si rrallëkush: ajo ka fatin të ndahet nga jeta duke merituar respektin, vlerësimin dhe përjetësinë, sepse kënga dhe arti i saj, vetë emri i ‘Artistes’ është shënuar në historinë e artit dhe të muzikës shqiptare.
Vaçen tonë do ta mbajmë mend përjetë me admirim dhe mirënjohje për kontributin e saj të paarritshëm artistik, që e kurorëzoi me plot të drejtë si ‘Mbretëreshën e këngës shqiptare’.
Kujtimi i interpretimeve të saj në skenat shqiptare dhe botërore, talenti dhe aftësia e lindur për të sjellë më tepër gëzim dhe liri mes atyre që kanë patur fatin ta shohin e ta ndjekin, ta njohin dhe ta vlerësojnë, thyerja e tabuve ideologjike në art e në jetë si dhe virtuoziteti i saj i pashoq do të mbeten ngahera të gdhendura në mendjet dhe zemrat e artdashësve shqiptarë e të huaj.
Familja, të afërmit, miqtë dhe dashamirët e panumërt do ta vuajnë mungesën e saj të pazëvendësueshme, por shpresoj që forcën për ta përballuar këtë humbje kaq të madhe do ta gjejnë tek shpirti i saj i pavdekshëm prej artisteje mbarëkombëtare, që do t’i shoqërojë e do t’i bekojë përjetë me ngrohtësinë e zërit melodioz, interpretimet e paharrueshme dhe vlerat e saj të rralla njerëzore. Iu prehtë shpirti në paqe!” – theksohet në mesazhin ngushëllues të Kreut të Shtetit shqiptar.

Basha: Mësova me hidhërim të thellë për ndarjen nga jeta të artistes së shquar “Nderit te Kombit” Vace Zelës. Për të gjithë ne që u rritëm me zërin e saj unik, sa më shume që koha kalon aq më e dashur dhe e veçantë është figura e saj.

“Vaçe Zela do te mbetet përjetë mes nesh. Ngushëllimet e mia për familjen, të afërmit dhe miqtë e kësaj ikone te muzikës shqiptare. U prehtë ne paqe.

Topalli: E dashura e Shqiptarëve! Iku Vaçe Zela, mbeti zëri i Saj! I këndoi me dashuri pa kufi vendit të saj si askush tjetër! I gëzoi jetët e shqiptarëve me magjinë e zerit te saj, kur nuk kishte asnjë gëzim për to! Ajo ishte e dashura e shqiptarëve!

Kastriot Islami: Ndahet nga jeta bilbili i këngës shqipe Vace Zela, për t’u bërë e pavdekshme.
Këngëtarja me popullore dhe më e dashur, Mbretëresha e këngës shqiptare, që do të mbetet me mendjen e cdo shqiptari kudo në botë... Zëri i saj i fuqishëm, i ëmbël e kumbues, Zëri i Artë i Shqipërise, do të jetojë përjetë... Vace Zela, këngëtarja me e madhe e të gjithë kohrave, padyshim meriton të vendoset në krye të Panteonit të Këngës Shqiptare...
U prehtë e qetë dhe në paqe....

Ditmir Bushati: Talent i papërseritshëm që do të na mungojë! RIP Vace Zela!

Saimir Tahiri: Përulem me nderim për Vace Zelën. Iku për të mbetur në përjetësi, në zemrat dhe shpirtin e çdo shqiptari.

Ambasada Amerikane
Sot, Shqipëria humbi një nga këngëtaret e saj më të mëdha. Vaçe Zela ishte një artiste e madhe dhe kushdo që e ka dëgjuar atë të këndojë, mund të dëshmojë për bukurinë e zërit dhe talentin e saj të pafund. Me këngët që interpretoi, ajo u kthye në një legjendë të muzikës shqiptare – jo vetëm për brezin e saj, po për të gjithë shqiptarët e çdo moshe. Mendimet dhe lutjet tona shkojnë për familjen dhe të dashurit e saj. U prehte në paqe!

Hashim Thaci: Me pikëllim mora lajmin për ndarjen nga jeta të këngëtares dhe artistes së shquar Vaçe Zela. Vaçe Zela ka qenë dhe mbete ikonë e muzikës së lehtë dhe asaj popullore, një zë origjinal, i papërsëritshëm dhe unikat në muzikën shqiptare.
Zëri i mrekullueshëm dhe këngët e saj për Atdheun janë perla të përhershme të trashëgimisë sonë muzikore.
Ngushllime familjes dhe dashamirëve të shumtë. (Kryeministri i Kosoves poston ne Facebook nje video me Vace Zelën)

(d.b/BalkanWeb)

[bili99]

Njeriu vdes por arti nuk vdes,permes kengeve ajo e la shpirtin si trashigimi gjithe kombit ,zeri i saj do rroje perjetesisht brez pas brezi .Nderi i Kombit Vace Zela ka fituar perjetesine ... Lavdi !

I perjetshem do te jete kujtimi per kengetaren tone me te madhe te muzikes se lehte Vace Zelen.

Me nderime,
Bili99

[Archon]

I perjetshem kujtimi

[Lexuesi_]

Ajo nuk kendonte kur kete e donin te tjeret, kendonte kur asaj i kendohej

[Nete]

Ngushllime te sinqerta,u preht ne paqe shpirti i saj !

[mesia4ever]

Ngushllime

[arbereshi_niko]

Kengetare si ajo Shqiperia nuk ka patur dhe zor se do te kete sot.
Shqiptaret do ta kujtojne per shume e shume kohe...
Marr pjese ne hidherimin e familjes dhe gjithe artedashesve qe e kane vleresuar perhere!
pershendetje

[Gentian_gr]

Dheu i lehte ,edhe ngushellime familjes e te afermeve,e te gjithe atyre qe admironin zerin e saj.

[Fleur Blanche]

Këndoftë me Ëngjëjt...!

[loneeagle]

Ngushellime familjes, shpirti ti prehet ne paqe. Sa keq qe humbem nje artiste kaq te talentuar!