Vrasësi me pagesë Sinanaj: Më jepni garanci, të flas për politikanët

[Albo]

Killeri Sinanaj: Më jepni garanci, të flas për politikanët

TIRANE-Autori i të paktën dy vrasjeve dhe katër atentateve me eksploziv të kryera me pagesë, 30-vjeçari Julian Sinanaj, ka kërkuar të mos e ngatërrojnë me çështjet e politikës.

Gjatë dëshmive të tij të gjata për Prokurorinë e Krimeve të Rënda, i dyshuari ka mohuar që të ketë dijeni se ndonjë nga porositësit e vrasjeve me pagesë mund të jetë politikan apo zyrtar i shtetit.

“Nuk dua të përfshihem me politikën”, mësohet të ketë thënë para hetuesve Julian Sinanaj, duke mos mohuar dijeninë e tij për këto raste. Sipas burimeve nga hetimi, 30-vjeçari që pranoi se njihte direkt biznesmenin Ilir Karçini, të cilin e akuzoi si porositës për vrasjen e biznesmenit Piro Bare më 25 janar, ka mbajtur qëndrim tjetër kur është pyetur nëse kishte marrë porosi nga emra të politikës.

I pyetur në lidhje me këtë, Julian Sinanaj mësohet të ketë pohuar se atij porositë për kryerjen e vrasjeve i janë përcjellë nga shtetasit Genis Mëhillaj dhe Andon (Erion) Mëhillaj, të dy nga Vlora, tashmë në kërkim. “Pyetini ata për këtë çështje, unë kam dhënë shpjegime dhe po dëshmoj për veprimet konkrete që kam kryer unë”, mësohet të ketë thënë Julian Sinanaj.

Një burim nga hetimi i çështjes pohoi dje se i riu nga Vlora ka hezituar të flasë për emrat e porositësve të atentateve dhe në këtë kohë ka theksuar se kërkon mbrojtje fizike dhe garanci nga organet e drejtësisë për veten dhe familjen e tij.

(d.b/Panorama/BalkanWeb)

[murik]

shikoni kur te vrasi veten ky gjoja ne burg a dicka e ngjashme..do ta heqin qafe shpejt me duket...

[teta]

jo murik e ke gabim,do beje vetvrasje me 7 here thike vetes ne gjoks,si para ca kohe ne Kosove.
do patentohemi si popull me stile unike te vetvrasjes

[par]

per te mesuar te vereten duhet ndonje robin hood qe ti terheq per hundesh, pusht-tetare, ish-et, anal-istat, media-liget, qyqaret (GJYGJTARET) etj

[Albo]

I dyshuari për vrasje me pagesë ka frikë, s‘flet për krime të tjera

TIRANE – Grupi i hetimit ka kontaktuar ditët e fundit me 30-vjeçarin Julian Sinanaj për t’i marrë atij deklarime në lidhje me krime të tjera ku dyshohet se është implikuar. Burimet nga hetimi kanë pohuar se i dyshuari për vrasjet me pagesë nuk ka mohuar implikimin në ngjarje të tjera, megjithëse ka pohuar qartë se nuk do të flasë për asnjë ngjarje tjetër, pasi ka frikë dhe nuk ndihet i sigurt. Marrja në pyetje e Julian Sinanajt është bërë pas gjetjes së fotove dhe videove të reja në tabletin elektronik që i dyshuari mbante me vete. Ai besohet se ka ruajtur në atë aparat pamje filmike dhe foto që lidhen me krimet e kryera prej tij, të cilat i ka fshirë kohët e fundit para se të arrestohej. Megjithatë, disa foto dhe regjistrime filmike janë rikuperuar pas ekspertimit të pajisjes nga ana e policisë shkencore. Pavarësisht këtyre provave të reja, mësohet se Julian Sinanaj ka deklaruar prerë se nuk dëshiron të japë deklarime për ngjarje të tjera, veç atyre krimeve të cilat i ka pranuar tashmë. I riu nga Vlora, pas arrestimit në flagrancë më 25 janar 2014, ka marrë statusin e bashkëpunëtorit të drejtësisë. Ai ka kërkuar vazhdimisht siguri dhe masa mbrojtëse dhe garanci për paprekshmërinë e tij. Një pjesë e këtyre masave mësohet se janë marrë pasi Sinanaj ka nënshkruar dokumentin e bashkëpunimit me drejtësinë. Pas këtij momenti, 30-vjeçari është dërguar në një vendndodhje sekrete, ndërsa mësohet se policia ka marrë masa mbrojtëse edhe ndaj familjarëve e të afërmve të tij në Shqipëri dhe Greqi. E njëjta gjë ka ndodhur edhe me Ndriçim Gjokonën, një tjetër i arrestuar i kësaj çështjeje, i cili ka marrë tashmë statusin e të penduarit, duke firmosur edhe ai dokumentin e bashkëpunimit me organet e drejtësisë.

Panorama

[Albo]

Killeri Julian Sinanaj rrëfen: Vrava një tjetër biznesmen

TIRANE- Zbardhen të tjera detaje nga dëshmia e të dyshuarit si vrasës me pagesë. Burime nga grupi hetimor bëjnë me dije se Julian Sinanaj ka rrëfyer para oficerëve të policisë se ai ka kryer edhe vrasjen e një biznesmeni tjetër në vend, emrin e të cilit nuk e ka thënë.

Sipas ekspertëve, 31-vjeçari ka kërkuar që të sigurohet se nuk do t‘i ndodhë asgjë, përpara se të flasë dhe të nxjerrë detaje të tjera. Gjatë rrëfimit të tij, Sinanaj është shprehur se ai ka pranuar që të ekzekutojë edhe një biznesmen tjetër, për të cilin nuk ka dhënë shumë detaje. Gjithçka është zbuluar në sajë të një videoje që disponon organi i akuzës, ku shihet qartë skema e një ekzekutimi. Burime nga grupi hetimor sqarojnë se gjatë momentit të arrestimit, Sinanajt i është sekuestruar edhe një kartë me pamje filmike, në të cilat shfaqet dukshëm edhe njëri prej ekzekutimeve që i dyshuari si vrasës me pagesë ka kryer në vendin tonë.

Burime pranë këtyre ekspertëve sqarojnë se në njërën prej këtyre videove, pamjet nuk janë shumë të qarta, por tek ato shihet vetëm Julian Sinanaj, i cili i afrohet një makine me xhama të zinj. Sipas të njëjtave burime, në këtë video, 31-vjeçari afrohet tek xhami dhe qëllon drejt saj në një distancë shumë të shkurtër. Por, në video nuk duket personi që qëllohet, pasi pamjet janë shumë të paqarta. Për këtë arsye, grupi hetimor i ka mëshuar fort faktit për të mësuar të vërtetën rreth këtij ekzekutimi, dhe para dy ditësh ka dhënë detaje të reja rreth kësaj ngjarjeje. Sipas Sinanajt, personi që qëllohet në këtë video është një biznesmen, për të cilin ka marrë porosi për ta vrarë.

(m.a/Gazeta Shqiptare/BalkanWeb)

[Bau]

politikanet paguajne vrases me pagese

[Albo]

Killeri Julian Sinanaj i shpëton burgimit të përjetshëm

NGA KLODIANA LALA

Killeri Julian Sinanaj i shpëton burgimit të përjetshëmTIRANE-Julian Sinanaj, i cilësuar si vrasës me pagesë dhe "truri" i të ashtuquajturës "banda e tritolit", duket se i ka shpëtuar përfundimisht dënimit me burgim të përjetshëm. Burime nga Prokuroria e Krimeve të Rënda thanë se zyrtarisht Sinanaj është me status të bashkëpunëtorit të drejtësisë, çka lehtëson pozitën e tij përballë gjy-katës. Ndonëse mbi supe i rëndojnë akuza të rënda, si akte terroriste, krijim të grupit të strukturuar kriminale, vrasje me pagesë, etj., dhe për këto akuza ai rrezikon dënimin maksimal të parashikuar nga Kodi Penal, Sinanaj, do t'ia hedhë lehtë, pasi sido që të jetë verdikti i Gjykatës së Krimeve të rënda, sërish i riu vlonjat nuk do të mbyllet përjetësisht në qeli.

"Julian Sinanaj është një i pandehur që ka njëkohësisht dhe statusin e bashkëpunëtorit të drejtësisë, pasi deklarimet e tij janë konsideruar të vlefshme për të zbardhur disa krime të rënda", tha një burim i prokurorisë. Ndo-nëse nuk dha detaje, i njëjti burim konfirmoi se "kontrata" e prokurorisë e lidhur me Sinanajn parashikon qartë lehtësitë që përfiton i akuzuari për krime të rënda, që nga vrasjet e deri me ekzekutimet me eksploziv të biznesmenëve të njohur në vend. Por, Julian Sinanaj, rrëfimi i të cilit ishte shokues edhe për vetë prokurorët, nuk është i vetmi nga "banda e tritolit", që do t'i mbyllë me dënim të ulët hesapet me drejtësinë. Ndriçim Gjokona mban statusin e të penduarit dhe sikurse është vepruar dhe me të tjerë të "penduar" të bandave kriminale, edhe ky i fundit do të marrë një dënim te lehtë. Duket se më të rënduarit përballë ligji, do të jenë kushërinjtë Andon dhe Genis Mëhillaj, të cilët Julian Sinanaj i ka identifikuar si sekserë të tij. Në dëshminë e tij, vrasësi me pagesë ka pohuar se Andoni dhe Genisi i gjenin "klientët" prej të cilëve merrte porosi për të vrarë. Dje Andon Mëhillaj është përballur me prokurorët Ardian Nezha e Behar Dibra, të cilët i kanë komunikuar zyrtarisht akuzat.

"Sot (dje) ne jemi thirrur në prokurori ku na janë komunikuar akuzat dhe jemi njohur me aktet e prokurorisë. I mbrojturi prej meje, Andon Mëhillaj, nuk i pranon akuzat e prokurorisë. Ne do të provojmë para gjykatës pretendimet tona", tha avokat Edmond Demaj, i kontaktuar nga "GSH". Prokuroria është në fazën përfundimtare të hetimeve ndaj shtatë të akuzuarve, mes të cilëve dhe biznesmeni Ilir Karcini dhe do t'i dorëzojë brenda pak ditësh dosjen gjykatës së Krimeve të Rënda.

AKUZAT PER JULIAN SINANAJN
1. Vrasja e Sokol Veizit, më datë 26 gusht 2012 në Orikum të Vlorës.
2. Vrasja e Agron Çelës, në datë 20 gusht 2013 në Vlorë.
3. Vendosje e lëndës plasëse në banesën e Ardian Kollozit, më datë 1 qershor 2013 në Vlorë.
4. Vendosje e lëndës plasëse në automjetin e prefektit të Vlorës, Besnik Dervishi, në datë 13 dhjetor 2013 në Tiranë.
5. Vendosje e lëndës eksplozive në motoçikletën e shtetasit E.B. në rrugën Transballkanike në Vlorë më datë 24 tetor 2013.
6. Vendosje e lëndës eksplozive në automjetin e shtetasin E.B. në Vlorë në datë 31 gusht 2013.

(d.b/GazetaShqiptare/BalkanWeb)

[Albo]

Banda e Julian Sinanajt, prokuroria publikon akuzat për 7 anëtarët

Prokuroria e Krimeve të Rënda, bën publike akuzat që rëndojnë mbi grupin e vrasjeve me porosi, më në krye Jualian Sinanajn. Hetimet kanë nisur në janar të 2014, pas disa atentatesh me armë zjarri dhe lëndë plasëse që ndodhën ose mbetën në tentativë në Vlorë dhe Tiranë.

Si të pandehur, argani i akuzës së krimeve të Rënda ka marrë 7 persona, të cilët dyshohet se bëjnë pjesë në grupin e strukturuar kriminal dhe mbi ta rëndojnë në total 38 akuza. Julian Sinanaj është personi që ka mbi supe më shumë akuza, për vetë veprimtarinë e tij kriminale që ka kryer ndër vite.

Burimet zyrtare të Prokurorisë thonë se 31-vjeçari akuzohet për “vrasjen me paramendim për interes’, të Sokol Veizit e Agron Çelës. Gjithashtu Sinanaj ka tentuar që të vrasë, Besnik Dervishin ish-prefektin e Qarkut të Vlorës, duke i vendosur tritol poshtë automjetit.

Hedhja në erë e banesës së ish-Drejtorit Përgjithshëm të ALUIZNI-t, Ardian Kollozi thuhet se është realizuar nga Sinanaj, për të krijuar terror në prag të zgjedhjeve elektorale. Ndërkaq mbi vrasësin me pagesë rëndojnë akuzat e mbajtjes pa leje të armëve luftarake, sigurimi i kushteve dhe mjeteve materiale, për të kryer vrasjen e një shtetasi të paidentifikuar nga prokuroria për çështje sigurie, vepra me qëllim terroriste, pjesëmarrjen në grup të strukturuar kriminal, e të tjerë.

Mbi bashkëpunëtorin e grupit kriminal, Andon Mëhillaj rëndojnë 6 akuza, vrasje me paramendim, vepra me qëllime terroriste, e sigurim i kushteve dhe mjeteve material për kryerjen e në vrasjeje. Kushëriri i tij, Genis Mëhillaj akuzohet për 5 vepra penale.

Për të penduarin e drejtësisë, Ndriçim Gjokona, i cili dekonspiroi grupin kriminal, rëndojnë 7 akuza të rënda, ndërsa ndaj biznesmenit të hidrokarbureve, rëndon akuza e sigurimit të kushteve dhe mjeteve materiale, për vrasjen e konkurruesit të tij, Pirro Bare.

Fatmirësisht vrasja nuk u krye, pasi policia ndërhyri duke arrestuar ekzekutorin Julian Sinanaj. Antëari i gjashtë i grupit kriminal, Marjon Mitro akuzohet për 3 vepra penale, ndërsa Albin Mexhaj dyshohet se në tre raste i ka shitur armë e municion luftarak, Sinanajt dhe Gjokonës.

Shqip

[Albo]

Banda e tritolit, zbardhet skema e vrasjeve dhe pagesat per Julian Sinanajn

Prokuroria lehtëson pozitën e biznesmenit Ilir Karçini, akuzohet për “sigurim të kushteve dhe mjeteve materiale” për kryerjen e vrasjes. Të pandehurit e tjerë pjesëmarrës në të gjitha krimet e kryera nga Julian Sinanaj, akuzohen si grup i strukturuar kriminal

Prokuroria e Krimeve të Rënda ka ngritur 38 akuza ndaj shtatë të pandehurve pjesë e grupit të tritolit, të akuzuar për disa vrasje e vendosje eksplozivi. Mes të pandehurve është edhe biznesmeni i gazit, Ilir Karçini, i akuzuar për sigurimin e kushteve me qëllim vrasjen e rivalit të tij në biznes, Pirro Bare. Në qendër të akuzave është Julian Sinanaj, i cilësuar si vrasës me pagesë, ndaj të cilit prokuroria ka ngritur 15 akuza. Ai akuzohet se në bashkëpunim me kushërinjtë Genis Mëhillaj, Erjon Mëhillaj dhe bashkëpunëtorin e tij, Ndriçim Gjokona kanë kryer një sërë krimesh, ku secili prej të pandehurve ka patur role të ndryshme. Në të gjitha rastet Julian Sinanaj ka qenë ekzekutori i krimeve, të cilat i ka kryer me qëllim përfitimin. Hetimi për këtë çështje ka nisur në janar të vitit 2014, pas disa atentatesh me armë zjarri dhe lëndë plasëse, që ndodhën ose mbetën në tentativë në Vlorë dhe Tiranë. Në përfundim të hetimeve, Prokuroria e Krimeve të Rënda akuzon Julian Sinanajn për vrasje me paramendim të shtetasit Sokol Veizaj, të cilën e ka kryer në bashkëpunim me Ndriçim Gjokonën si ekzekutor dhe kushërinjtë Erjon dhe Genis Mëhillaj si nxitës. Po ashtu ndaj Sinanajt rëndon akuza e “sigurimit të kushteve për vrasjen e shtetasit M. L”, kryer në bashkëpunim me të pandehurit e tjerë dhe shtetasin Marjon Mitro. Vepra me qëllime terroriste është një tjetër akuzë ndaj Sinanajt dhe këtë radhë prokuroria i referohet vendosjes së lëndës plasëse në banesën e Ardian Kollozit, ish-drejtor i ALUIZNI-t. Lista e akuzave ndaj 31-vjeçarit të cilësuar si vrasës me pagesë vijon me vrasjen e shtetasit Agron Çela, krim i kryer në kuadër të grupit të strukturuar kriminal, vendosjen e tritolit në automjetin e Prefektit të Qarkut Vlorë, Besnik Dervishi, tentativën e vrasjes së biznesmenit Pirro Bare, si dhe armëmbajtje pa leje, kryerje e krimeve në kuadër të grupit të strukturuar kriminal dhe pjesëmarrje në grup të strukturuar kriminal. Akuza të rënda prokuroria ka ngritur edhe ndaj personave të akuzuar si bashkëpunëtorë të Sinanajt, kushërinjtë Mëhillaj, Ndriçim Gjokonës dhe shtetasit Marjon Mitraj. Sipas prokurorisë, Andon alias Erjon Mëhillaj akuzohet për 6 vepra penale si: vrasje me paramendim të shtetasit Sokol Veizaj, sigurimi i kushteve për kryerjen e vrasjes së shtetasit M. L, vepra me qëllime terroriste në formën e grupit të strukturuar kriminal për vendosjen e tritolit në banesën e ish-kreut të PD-së Vlorë, Ardian Kollozi, si dhe vrasje me paramendim të shtetasit Agron Çela. Ndaj të pandehurit tjetër, shtetasit Genis Mëhillaj, prokuroria ka ngritur pesë akuza, ndërsa nuk ka provuar pjesëmarrjen në vrasjen e shtetasit Agron Çela. Një tjetër i pandehur, shtetasi Ndriçim Gjokona akuzohet nga prokuroria si një nga bashkëpunëtorët më të afërt të Julian Sinanajt. Ndaj tij janë ngritur shtatë akuza, duke përfshirë vrasjen e shtetasit Sokol Veizaj, tentativën e vrasjes së shtetasit M.L, prodhim dhe mbajtje pa leje të armëve luftarake, sigurimin e kushteve për vrasjen e shtetasit Pirro Bare dhe pjesëmarrje në grup të strukturuar kriminal. Sipas dosjes së prokurorisë, akuza për pjesëmarrje në grup të strukturuar kriminal janë ngritur edhe ndaj shtetasit Marjon Mitro, ndërsa i pandehuri Albi Mexhaj rezulton t’i ketë shitur armë bashkëpunëtorit të Sinanajt. Ndaj biznesmenit të gazit, Ilir Karçini, prokuroria ka ngritur akuzën e “sigurimit të kushteve dhe mjeteve materiale” për kryerjen e vrasjes së shtetasit Pirro Bare, vepër kjo e kryer në bashkëpunim me të pandehurit Julian Sinanaj, Genis Mëhillaj dhe Ndriçim Gjokona.



Akuzat e Prokurorisë, Sinanaj mori tokë 120 mijë euro dhe shtëpi për vrasjen e Veizit

Si u ekzekutua Sokol Veizi pas konfliktit për pronën me kushërinjtë Genis dhe Andon Mëhilli. Prokuroria: Pas vrasjes, ata i dhanë një tokë në Karaburun Julian Sinanajt, me vlerë 120 mijë euro dhe një apartament në Orikum. “Sinanaj ekzekutoi me gjakftohtësi biznesmenin Agron Çela, për 35 mijë euro të paguara nga Andon Mëhillaj”

Pas përfundimit të hetimeve të Prokurorisë së Krimeve të Rënda, zbardhen dy nga vrasjet për të cilat akuzohet killeri Julian Sinanaj. Prokuroria thotë se ka zbardhur dhe dokumentuar autorësinë e Sinanajt në vrasjen e shtetasit Sokol Veizi, e ndodhur në Orikum në gusht të vitit 2012, si dhe vrasjen e biznesmenit Agron Çela, e kryer në vitin 2013, në qytetin e Vlorës. Për vrasjen e Veizit, Julian Sinanaj ka marrë një tokë me vlerë 120 mijë euro në Karaburun, e cila i është dhënë nga kushërinjtë Genis dhe Andon Mëhillaj, që kishin konflikt me shtetasin Sokol Veizi, pasi ky i fundit kishte ndërtuar banesën dhe një lokal në tokën e kushërinjve Mëhillaj. Po ashtu prokuroria thotë se Julian Sinanaj është ekzekutor i biznesmenit Agron Çela, ngjarje e ndodhur në qytetin e Vlorës në gusht të vitit 2013, pas konfliktit që biznesmeni kishte patur në Itali me shtetasin Andon Mëhilli. Ky i fundit rezulton se ka çuar Sinanajn me automjetin e tij pranë banesës së biznesmenit, skenë kjo e filmuar nga kamerat e sigurisë. Kamerat kanë filmuar edhe momentin e vrasjes, të cilën prokuroria e përshkruan si ekzekutim me gjakftohtësi nga Julian Sinanaj. Për këtë vrasje, i akuzuari, sipas prokurorisë ka marrë 35 mijë euro nga shtetasi Andon Mëhilli.

Arrestimi i Sinanajt

Më datë 25.01.2014, rreth orës 17:30, pas informacionit të marrë nga Drejtoria e Policisë së Qarkut Durrës është arrestuar në flagrancë i pandehuri Julian Sinan Sinanaj, person i dyshuar në kryerjen e disa veprave penale që kishin ndodhur në rrethet e Vlorës, Tiranës dhe Durrësit.

Arrestimi në flagrancë i shtetasit Julian SINANAJ është bërë nga Seksioni i Operacioneve Speciale pranë Drejtorisë së Policisë së Qarkut Tiranë, ku në momentin e arrestimit shtetasi Julian Sinanaj (lindur në Elbasan dhe banues në Vlorë) ka qenë i shoqëruar nga një person tjetër (femër), banuese në Vlorë. Gjatë momentit të arrestimit në flagrancë, shtetasit Julian Sinanaj i është gjetur dhe sekuestruar në cilësinë e provës materiale një armë zjarri pistolete me një krehër me 7 copë fishekë, të cilën e mbante pa lejen e organeve kompetente, si dhe dy granata difensive që i mbante në një çantë, të cilën e kishte të hedhur krahëve. Pas këtij momenti është ushtruar kontroll në banesën e marrë me qira nga ky shtetas, ku gjatë kontrollit të ushtruar në këtë banesë në një pallat në rrugën “Him Kolli”, përveç sendeve të tjera janë sekuestruar në cilësinë e provës materiale: 127 fishekë arme zjarri kalibër, 110 fishekë arme zjarri kalibër 7.65 mm, 12 fishekë arme zjarri kalibër 9X18mm, 3 fishekë arme zjarri kalibër 7.62 mm, armë zjarri pistoletë e markës “Cervena Zastava 99” me një krehër me 15 fishekë, si dhe një krehër për këtë lloj arme bosh, armë zjarri “Scorpions” me një krehër pa fishekë, zhurmë-zbutës me mbishkrimin “Ziroskopi”, doreza ebaniti për armë zjarri pistoletë model 54 copë 2(dy). Telefon celular 6 copë, lëndë plasëse e paketuar në forma katrore e llojit tritol, 8 copë, kapsolla të ndryshme detonatore dhe elektrodetonatore, fitila zjarrpërcjellës e materiale të tjera që shërbejnë për prodhimin e bombave dhe lëndëve plasëse, dy foto të të pandehurit Andon (alias Erjon) Mëhillaj, si dhe një foto e prerë me ngjyra, e cila pas hetimit ka rezultuar se i përkiste shtetasit Pirro Bare, personit i cili ishte përgatitur për t’u ekzekutuar ato ditë prej Julian Sinanajt dhe Ndriçim Gjokonës. Pas këtij momenti dhe pasi ka sekuestruar në cilësinë e provave materiale një arsenal të tërë armësh zjarri, veçanërisht lëndë plasëse e materiale të tjera për prodhimin e minave dhe bombave të telekomanduara, organi procedues ka konkluduar se subjekti i arrestuar, Julian Sinanaj ishte një subjekt me background të lartë kriminal dhe me një rrezikshmëri të theksuar shoqërore.

Vrasja e Sokol Veizit

Në muajin gusht të vitit 2012, të pandehurit Julian Sinanaj i është ofruar pagesë nga të pandehurit Andon Mëhillaj dhe Genis Mëhillaj, për të vrarë shtetasin Sokol Veizi, banues në qytetin e Orikumit Vlorë, me të cilin familja Mëhillaj kishte konflikte pronësie, pasi Sokol Veizi kishte ndërtuar banesën dhe një lokal ku ushtronte aktivitet tregtar në tokën e fisit Mëhillaj. Nga provat e grumbulluara është provuar se në vrasjen e shtetasit Sokol Veizi janë implikuar drejtpërdrejt Julian Sinanaj, Ndriçim Gjokona, Andon Mëhillaj dhe Genis Mëhillaj, të cilët e kanë kryer këtë vrasje në një lokal pranë qytetit të Orikumit. Ekzekutimin e shtetasit Sokol Veizi e ka kryer personalisht Julian Sinanaj, me një armë pistoletë të llojit “Makarov”, të cilën e ka marre në Greqi tek një shtetas rus. Të pandehurit Julian Sinanaj, për vrasjen e shtetasit Sokol Veizi, i pandehuri Andon alias Erjon Mëhilli, me interesimin e drejtpërdrejt dhe të Genis Mëhillit, i ka ofruar atij një tokë prej 1500 m2 në Karaburun, e cila, e konvertuar në vlerë parash kapte shumën e 120 000 eurove. Pas ekzekutimit të Sokol Veizit, të kryer nga Julian Sinanaj, i pandehuri Andon Mëhilli i ka ofruar Julianit një apartament 50 m2 në Orikum Vlorë, të cilin Juliani e ka venë në emrin e nënës së tij dhe më vonë, në muajin gusht e ka shitur këtë apartament në vlerën e 15 000 eurove. Në lidhje me këtë fakt kriminal, pas verifikimeve të kryera në Prokurorinë e Vlorës është regjistruar procedimi penal nr. 1346 i vitit 2012 për veprën penale të “vrasjes me paramendim”. Hetimet e kryera në kuadër të këtij procedimi penal kanë provuar se autorët e vrasjes së shtetasit Sokol Veizi në qytetin e Orikumit në Vlorë, janë të pandehurit Julian Sinanaj dhe Ndriçim Gjokona, të cilët në këtë ngjarje kanë luajtur rolin e ekzekutorit dhe ndihmësit për të vrarë Sokol Veizin, ndërsa dy të pandehurit e tjerë, Andon Mëhilli dhe Genis Mëhilli janë identifikuar si organizatorë financues dhe shtytës të dy ekzekutorëve të kësaj ngjarjeje.

Vrasja e Agron Çelës

Prokuroria e Rrethit Gjyqësor Vlorë ka njoftuar Prokurorinë për Krime të Rënda Tiranë, se kjo prokurori më datë 22.08.2013 kishte regjistruar procedimin penal të vitit 2013 për veprat penale “mbajtje pa leje të armëve luftarake” dhe “vrasje me paramendim” të shtetasit Agron Çela, banues në lagjen “Pavarësia” në qytetin e Vlorës, ngjarje e ndodhur në orën 00:15 të datës 21.08.2013 . Hetimet e këtij procedimi kanë provuar se më datë 21.08.2013, viktima Agron Çela së bashku me familjen e tij kanë qenë duke darkuar në një lokal në Vlorë. Kur janë kthyer në banesë, para se automjeti i drejtuar nga viktima Agron Çela të hynte në parking, nga makina kanë zbritur bashkëshortja e Agronit së bashku me vajzën. Viktima Agron Çela ka mbyllur automjetin në parking dhe sapo ka dalë nga dera e makinës, është qëlluar me armë në gjoks nga i pandehuri Julian Sinanaj, i cili nga veprimet e para hetimore nuk është arritur të identifikohet si autor i kësaj ngjarjeje, e cila deri në muajin janar 2014 ka qenë e pezulluar për mungesë autori. Nga hetimi në Prokurorinë për Krime të Rënda është provuar se ishte pikërisht Julian Sinanaj autori i vrasjes së biznesmenit Agron Çela në vendin e quajtur afër “Kalit të Trojës”, në verën e vitit 2013. Nga hetimi ka rezultuar se në vitin 2013, Julian Sinanajt i është ofruar një “punë” nga Andon Mëhilli. Konkretisht, Andoni ka kërkuar eliminimin e një biznesmeni vlonjat, i cili ishte me shtëpi afër “Kalit të Trojës”. Andoni me këtë biznesmen kishte problem financiare të nisura në Itali. Për kryerjen e kësaj vrasjeje Juliani ka marrë 35 mijë euro. Andoni i ka treguar biznesmenin fizikisht dhe lagjen ku ai jetonte. Biznesmeni banonte në një shtëpi dy ose trekatëshe. Juliani e ka ndjekur biznesmenin dhe e ka pritur atë për disa ditë me radhë derisa i ka mësuar adresën e banimit, afër shtëpisë së tij. Hetimi e ka provuar këtë pistë nëpërmjet një numri të madh veprimesh procedurale. Konkretisht, gjatë hetimit është arritur të evidentohen dhe zbulohen dhe pamje filmike të përftuara nga kamerat e sigurisë të bizneseve aty pranë ku ka ndodhur ngjarja, në të cilën është filmuar krejtësisht momenti i ekzekutimit të Agron Çelës. Pamjet filmike kanë fiksuar Julian Sinanajn, të cilin e sjell në vendngjarje me makinë Andon Mëhillaj dhe me gjakftohtësi vetë Juliani ekzekuton viktimën Agron Çela. Për organin procedues është plotësisht i provuar fakti se autorët që kanë marrë pjesë në vrasjen e shtetasit Agron Çela janë të pandehurit Julian Sinanaj dhe Andon alias Erjon) Mëhilli.

MAPO