Banda e Tritolit: Dorëzohet Andon Mëhillaj, policia i merr në mbrojtje familjen

[Albo]

Nëna e viktimës së bandës së tritolit: Genis Mëhillaj më kërcënoi “mos fol”

Nga: AURORA KOROMANI


VLORE - Zbardhen detaje të reja pas shpërthimit me tritol në banesën e dy kushërinjve Mëhillaj në Vlorë. Burime nga grupi hetimor bëjnë me dije se në prokurori janë thirrur për të dhënë versionin e tyre disa persona si të dyshuar se mund të kenë lidhje me atentatin në banesën e Andon Mëhillaj mesnatën e së dielës. Mes personave që janë marrë në pyetje është edhe nëna e peshkatarit të vrarë dy vite më parë në qytetin e Vlorës, Sokol Veizit, krim për të cilin i dyshuari si vrasës me pagesë, Julian Sinanaj është shprehur se ka marrë urdhër nga kushërinjtë Mëhillaj.
E pyetur për këtë fakt, Nazo Veizi ka deklaruar para grupit hetimor se nuk ka dijeni për tritolin e shpërthyer në banesën e Andon Mëhillaj. E moshuara është shprehur e frikësuar para ekspertëve, duke kërkuar që të vendoset drejtësi për djalin e saj të vrarë. Nëna e peshkatarit, Sokol Veizi ka treguar para grupit hetimor edhe konfliktet që ka pasur djali i saj me 43-vjeçarin, Genis Mëhillaj. Madje, në dëshminë e saj, nëna e peshkatarit ka rrëfyer se dy javë para se të arrestohej Julian Sinanaj, Genis Mëhillaj i ka shkuar në shtëpi dhe i ka kërcënuar për të mos treguar asgjë. Sipas Naze Veizit, vrasësi i djalit të saj është 43-vjeçari nga Vlora, "sepse ai me djalin tim kishte një konflikt për tokën ku djali im do të niste themelet e shtëpisë.
Dy vëllezër me mbiemrin Mëhillaj, i thanë Sokolit që të ndërtonte një shtëpi në tokën e tyre. Genisi i kishte kushërinj këta dy vëllezërit. Unë di që kur Sokoli filloi të punonte tokën për nisjen e themeleve, në fillim Genisi i tha të largohej që aty dhe të mos punonte më. Ndërsa, herën tjetër ai e vrau". Ndërkohë, në pyetje është marrë edhe babai i biznesmenit të vrarë, Agron Çela. Babai i biznesmenit ka deklaruar para ekspertëve se nuk ka lidhje me tritolin në banesën e njërit prej të kërkuarve nga drejtësia shqiptare. Veç kësaj, në deklaratën e tij, babai i biznesmenit të vrarë një vit më parë në Vlorë, ka pohuar se nuk e dinte se kush ia kishte vrarë djalin, deri në momentin që në media është publikuar emri i Genis Mëhillaj. Ndërkohë, bëhet me dije se në total policia ka shoqëruar 12 persona si të dyshuar për shpërthimin e tritolit në banesën e Andon Mëhillaj.

Kërkimet
Genis dhe Andon Mëhillaj, dy kushërinjtë nga Vlora të dyshuar si ndërmjetës të bandës së tritolit që nga dita e djeshme janë shpallur edhe në kërkim ndërkombëtar. Fotot me të dhënat e tyre janë vendosur në faqen zyrtare të Interpolit, me shënimin si persona të cilët kanë financuar dhe kryer akte terroriste. Më konkretisht, ndaj dy kushërinjve Mëhillaj rëndojnë akuzat e "akteve terroriste; financimi i terrorizmit; fshehje/fshehjen e fondeve dhe pasurisë, mallrave të tjera që financojnë terrorizmin; dhënia e informacioneve nga persona që ushtrojnë funksione publike ose personat në detyrë; prodhim ilegal dhe mbajtjen e armëve dhe municioneve ushtarake, si dhe trafikim i armëve dhe i municionit.

(er.nu/Gazeta Shqiptare/BalkanWeb)

[Brari]

eshte vet dorzuar njeri nga mehillet..

te shohim cdo e ket mesuar kupola te thote ne prokurori..

shum interesante ceshtja tritoli

[Albo]

Vetëdorëzohet Andon Mëhillaj. Avokati: Juljan Sinanaj e ka kërcënuar

VLORE - Vetëdorëzohet në Policinë e Vlorës, Andon Mëhillaj, njëri nga dy kushërinjtë e dyshuar si porositësit e disa prej krimeve të “killerit” Julian Sinanaj, të cilët u shpallën në kërkim ndërkombëtar për “terrorizëm”.

Burime nga Policia e Vlorës bëjnë të ditur se Andon Mëhillaj ka mohuar të gjitha akuzat e ngritura ndaj tij, duke pretenduar se nuk e njeh vrasësin Juljan Sinanajn.

Mëhillaj ka kërkuar siguri për familjen e tij, duke u nisur edhe nga ngjarja e ditëve të fundit në banesën e tij në lagjen “28 Nëntori” në Vlorë, ku shpërtheu një sasi eksplozivi.

Andon Mëhillaj u transportua nga Vlora në Tiranë rreth orës 12:00, pasi ai është nën hetimin e Prokurorisë së Krimeve të Rënda. Me interes nga grupi i hetimit në Prokurorinë e Krimeve te Rënda, që po heton çështjen e “grupit të tritolit” pritet dhe seanca me pyetje ndaj Mëhillajt.
Mësohet se brenda tre ditësh, Mëhillaj do të dalë para Gjykatës së Krimeve të Rënda për t’u njohur me masën e arrestit marrë në mungesë ndaj tij.

AVOKATI: JULJAN SINANAJ E KA PËRNDJEKUR DHE KËRCËNUAR KLIENTIN TIM

Avokati mbrojtës i Andon Mëhillaj, Edmond Dema deklaroi se klienti i tij është akuzuar padrejtësisht nga mediat, pasi prokuroria nuk ka ngritur asnjë akuzë ligjore ndaj tij.
“Ka qenë një vetëdorëzim vullnetar i tij. Eshtë bërë tërësisht në vullnetin e tij të lirë. Eshtë vonuar pak pasi të rregullonte problemet e veta familjare, ka lënë jashtë gruan dhe dy fëmijë. Mediat kanë ngritur akuza ndaj tij, por nuk ka patur asnjë akuze ligjore te ngritur nga ana e prokurorisë. Ai nuk i pranon akuzat te cilat shtypi i ka drejtuar ndaj tij. Nuk ka pranuar asnjëherë se ka qenë ai personi qe ka urdhëruar dhe sidomos nuk ka lidhje me të gjitha ngjarjet e tjera siç është thënë nga shtypi se ai ka qenë ndërmjetësi. Andon Mëhillaj realisht është rënduar nga ana e shtypit, është quajtur si sekser, ndërmjetës, ai është baba i dy fëmijëve, ka bërë një jetë të rregullt familjare, nuk ka qenë asnjëherë i dënuar.”- deklaroi avokati.

Sipas avokatit Dema, Andon Mëhillaj ka patur njohje me vrasësin Juljan Sinanaj, madje ky i fundit e ka përndjekur dhe kërcënuar.

“Ka patur njohje me Sinanaj por jo të asaj shkalle dhe në atë kohëzgjatje të madhe që ka pretenduar Juljani. Ka patur një periudhë kohe të gjatë kur ata nuk kanë folur, ka qenë nën kërcënimin e Juljanit për pak kohë. Andoni ka qenë i përndjekur nga ana e Juljanit”- deklaroi avokati.

Avokati ka hedhur poshtë pretendimet se Andon Mëhillaj ka kaluar kufirin shqiptar, pas arrestimit të Juljan Sinanajt, duke siguruar se gjatë kësaj kohe ai ka qëndruar në Vlorë.

“Gjatë kësaj kohe Andoni ka qenë në Vlorë. Këmbëngulja për tu vetëdorëzuar ka qenë e tij. Dorëzimi i tij nuk është nga frika, por vetëdorëzim i ndërgjegjshëm. Nga ana e policisë është ofruar ndihma që për familjen e tij do ti qëndrojnë afër.”- deklaroi avokati.

Balkanweb

[Albo]

Avokati: Andon Mëhillaj tentoi vetëvrasjen në qeli

TIRANE-I konsideruar si sekser tek vrasësi me pagesë Julian Sinanaj, vlonjati Adnon Mëhillaj ka tentuar të vetëvritet në ambientet e burgut 302, ku ndodhet në paraburgim me masën arrest me burg që iu caktua nga Gjykata. Lajmi është konfirmuar për mediat nga avokati mbrojtës i tij, Lazer Sokoli.

Sipas avokatit ngjarja është shënuar pasditen e djeshme, ku 38-vjeçari ka tentuar të presë damarët, por nuk ka dhënë më shumë sqarime sesi dhe me çfarë mjetesh ka tentuar të kryejë një veprim të tillë.

Avokati, Lazer Sokoli, tha se klienti i tij Andon Mëhillaj ka kërkuar ta takojë dhe të dërgohet në spital, por nuk është lejuar nga autoritetet e burgut, ndërsa ka mundur ti dërgojë atij disa ilaçe në qelinë e paraburgimit.

Policia nuk ka dhënë ende ndonjë deklaratë zyrtare rreth këtij akti, kurse drejtoria e Burgjeve e ka mohuar se ka ndodhur dicka e tillë në qeli me të dyshuarin, Mëhillaj.

Andon Mëhillaj u vetëdorëzua në polici pak ditë më parë, ndërsa avokati i tij mbrojtës deklaroi se është i pafajshëm dhe se nuk qëndrojnë akuzat ndaj tij si ndërmjetës apo porositës për disa vrasje me pagesë.
Ndërkaq mbetet në kërkim kushëriri i tij, Genis Mëhillaj, për të njëjtat akuza, “akte terrorizmi” dhe “financim të terrorizmit”.

(d.b/BalkanWeb)

[Albo]

Fakte të reja, raporti mbi sekserin e killerit: Andon Mëhillaj, jo i sëmurë mendor

NGA: AURORA KOROMANI

TIRANE-Zbulohen fakte të reja për çështjen e vrasjeve me pagesë. Burime nga grupi hetimor bëjnë me dije se ditën e djeshme është përpiluar ekspertiza e parë psikologjike e të dyshuarit si sekser i bandës së vrasjeve me pagesë. Duke iu referuar gjithmonë të njëjtave burime, në pjesën e parë të kësaj ekspertize citohet se gjendja mendore e Andon Mëhillajt është stabël dhe nuk shfaq shenja të një gjendjeje depresive. Pas kontaktit të parë të 38-vjeçarit me psikologen, kjo e fundit ka dalë në përfundimin se Mëhillaj shfaq shenja vetëm të një ngarkese psikologjike, si rrjedhojë e stresit që po përjeton.

Ekspertiza
Prej mëngjesit të 14 shkurtit, Andon Mëhillaj ndodhet në qelitë e paraburgimit nën masën e sigurisë së arrestit me burg. Nga ana e avokatit mbrojtës të tij, Lazër Sokolaj, është pretenduar se Mëhillaj është i tronditur dhe është në fazat e para të problemeve me shëndetin mendor. Por sipas psikologes, e cila ka arritur të bisedojë për 30 minuta me Mëhillajn, gjendja e tij shëndetësore nuk është aq e agravuar dhe e rëndë, siç e ka parashtruar avokati i mbrojtjes.

Psikologia është dërguar në qelinë ku ndodhet Mëhillaj dhe ka zhvilluar me të një bisedë të përgjithshme, duke u fokusuar më tepër tek jeta e 31-vjeçarit dhe familja. Ajo ka konstatuar se Mëhillaj është i stresuar nga kjo situatë në të cilën është përfshirë, duke shfaqur gjithmonë shqetësim për familjen e tij. Sipas konstatimit të psikologes, Andon Mëhillaj ka shfaqur simptomat e një njeriu të trembur dhe të frikësuar, duke qenë gjatë gjithë kohës në ankthin e asaj se çka do ta presë dhe si do të arrijë të dalë nga kjo gjendje.

Burime të grupit hetimor sqarojnë se në raportin psikologjik thuhet se Mëhillaj është mjaft i stresuar, por jo deri në atë pikë sa të ketë shenjat e para të prekjes së shëndetit mendor. Psikologia mohon që Mëhillaj të jetë në fazën e parë të depresionit dhe sipas saj nuk është e nevojshme që i dyshuari të kurohet me medikamente antidepresive. "Frika e qëndrimit në burg dhe e statusit si i dyshuar e trembin Andon Mëhillajn, duke stimuluar stresin tek ai. Por Mëhillaj nuk ka ngarkesë të agravuar psikologjike dhe shëndeti i tij mendor është ende në ekuilibër më ndërgjegjen. Andon Mëhillaj nuk ka nevojë për medikamente antidepresive, të cilat mund t'i stimulonin në gjendje të rënduar psikologjike dhe mendore", - vijon raporti i psikologes. Deri më tani, ndaj Mëhillajt rëndojnë 7 akuza nga organi i akuzës, mes të cilave financimi i terrorizmit, akte terroriste, armëmbajtja pa leje e armëve dhe municioneve luftarake, si dhe e lëndëve plasëse, si dhe akuza e vrasjes së peshkatarit Sokol Veizi dhe biznesmenit Agron Çela.

Fakte të reja
Burime nga grupi hetimor kanë zbuluar të dhëna të reja për sa i përket rrugës që ka ndjekur telefoni celular që u përdor nga Julian Sinanaj në atentatin ndaj prefektit Besnik Dervishi. Sipas burimeve të organit të akuzës, ka qenë i penduari Ndriçim Gjokona, ai që ka blerë aparatin celular në tregun e zi duke ia dorëzuar më pas Sinanajt. Siç bëhet me dije nga këto burime, Gjokona dyshohet si personi që furnizonte njeriun bombë me lëndë eksplozive dhe aparate celularë të nevojshëm për shpërthimet e telekomanduara. Sipas burimeve të grupit hetimor, celulari i është blerë një djali 19-vjeçar me inicialet A.SH., i cili mendohet se e ka pasur në përdorim aparatin celulat deri më datë 5 dhjetor të vitit të kaluar. Në datën 6 dhjetor, tek 19-vjeçari është paraqitur i penduari Gjokona, i cili ka blerë celularin dhe më pas ia ka dorëzuar Julian Sinanajt për të vazhduar më tej me planin e tij. Njeriu-bombë ka arritur që ta montojë duke e lidhur me detonatorin e lëndës plasëse, e cila ishte vendosur poshtë automjetit të prefektit Dervishi.

(d.b/GazetaShqiptare/BalkanWeb)

[Albo]

Sinanaj: Mëhillajt më porositën për krimet

TIRANE – Pas arrestimit më 25 janar 2014 në Tiranë, teksa po përpiqej të kryente një atentat ndaj biznesmenit Piro Bare, Julian Sinanaj, 30 vjeç, nga Vlora, dha dëshmi shokuese para hetuesve. Ai pranoi implikimin e tij në të paktën katër krime, dy vrasje në Vlorë, në vitet 2012-2013 dhe dy vendosje bombash në automjete. Sinanaj theksoi se në shumicën e rasteve porositë për kryerjen e krimeve i kishte marrë nga kushërinjtë Genis dhe Andon Mëhillaj. Dëshmia e dhënë nga i dyshuari si vrasës me pagesë dhe detajet që ai u serviri hetuesve, u bënë shkak për nxjerrjen e urdhrave të arrestit për dy kushërinjtë nga Vlora. Sinanaj i akuzoi ata si porositës të vrasjes së peshkatarit Sokol Veizi në Orikum të Vlorës më 26 gusht 2012 dhe atentatin ndaj biznesmenit Agron Çela, më 20 gusht 2013, po në Vlorë. Sinanaj pretendoi se prej Mëhillajve kishte marrë porosinë për vendosje tritoli në pallatin e Ardian Kollozit dhe së fundi, edhe për një atentat ndaj biznesmenit Piro Bare.

Panorama

[Albo]

Sinanaj e Mëhillaj, bashkë në videon e vrasjes së biznesmenit

TIRANE-Organi i akuzës ka gjetur prova të tjera që implikojnë të dyshuarin si porositës të disa vrasjeve në qytetin e Vlorës, Andon Mëhillaj, në ekzekutimin e biznesmenit, Agron Çela në qytetin bregdetar. Burime nga grupi hetimor bëjnë me dije se këto pamje filmike kanë qenë të sekuestruara nga grupi hetimor, por asgjë nuk dukej qartë, sepse pamjet ishin pak të turbullta. Por pas rrëfimit të të dyshuarit si killer me pagesë, Julian Sinanaj, oficerët e policisë gjyqësore e kanë riparë edhe njëherë këtë video dhe kanë dalë në konkluzionin se në ato pamje shfaqej Andon Mëhillaj dhe Julian Sinanaj së bashku në vrasjen e biznesmenit nga Vlora, Agron Çela. Sipas organit të akuzës, çdo gjë përputhet me rrëfimin që ka bërë Sinanaj para ekspertëve të grupit hetimor.

Në dëshminë e tij, 31-vjeçari ka pohuar se për vrasjen e biznesmenit Çela ka marrë porosi nga kushërinjtë Mëhillaj, por se asnjëherë nuk ka pyetur për porositësit e vërtetë të vrasjeve që ai duhej të kryente. Sipas Sinanajt, për vrasjen e biznesmenit Çela, ai ka marrë shumën 35 mijë euro dhe se e ka filmuar skemën e vrasjes së tij. Sipas grupit hetimor, i dyshuari si vrasës me pagesë është shprehur se bashkë me të në momentin e ekzekutimit ka qenë edhe një person tjetër, që pas rishikimit të pamjeve shihet qartë se Sinanaj atë ditë ka qenë me Andon Mëhillaj. Sipas grupit hetimor, Sinanaj e ka pritur për disa orë me radhë që të futej në banesë biznesmeni i ndërtimit, Agron Çela dhe e ka ekzekutuar në momentin që ka qenë duke parkuar makinën. 31-vjeçari më herët kishte pohuar se për këtë vrasje ishte paguar nga kushërinjtë Mëhillaj, njëri prej të cilëve, Genis Mëhillaj, është në kërkim ende nga policia.

Ndërsa Andon Mëhillaj pas vetëdorëzimit në polici ka sqaruar se nuk ka dijeni për atentatet që ka kryer Sinanaj, fakt që bie në kundërshtim me provat që ka organi i akuzës. Ndërkohë, mësohet se vetë 31-vjeçari Julian Sinanaj është shprehur se pas arrestimit të Mëhillajt, ndihet i kërcënuar. “Kam frikë që të flas, ndihem i kërcënuar, tani që u arrestua Andon Mëhillaj. Ju duhet të më jepni garanci”, është shprehur Sinanaj.

(d.b/GazetaShqiptare/BalkanWeb)

[Albo]

Andon Mëhillaj pranon “vrasjen” e parë: Unë e porosita eleminimin e Sokol Veizajt

Andon Mëhillaj,ndërmjetësi dhe punëdhënësi për vrasësin Julian Sinanaj pranon se është porositësi për të paktën një nga vrasjet e kryera nga 31-vjeçari. Në seancen e marrjeve në pyetje Mëhillaj ka pranuar se është ai pas vrasjes së peshkatarit Sokol Veizaj, ngjarje kjo e ndodhur në gushtin e vitit 2012 në Orikum.
Ndërmjetësi Mëhillaj është dorëzuar përpara fakteve të prokurorëve të Krimeve të Rënda, duke u justifikuar se Veizaj i kishte zaptuar pronën duke ndërtuar edhe një shtëpi aty. Ai ka vazhduar me tej, se me peshkatarin Veizaj nuk mund të negociohej pasi ai ishte një person me preçedent penal dhe figurë e njohur në zonë në vitin famëkeq 1997.
Por ajo që ka ndikuar më shumë në deklaratat e 41-vjeçarit është përballja me dy të penduarit e drejtësisë, tashme vrasësin Julian Sinanaj dhe Ndriçim Gjokona, të cilët kanë deklaruar se punëdhënësi i tyre është Andon Mëhillaj.
Por ajo çka nuk ka pranuar Andon Mëhillaj, është porosia për vrasjen e biznesmenit Agron Çela, ngjarje kjo e ndodhur në Vlorë. Në sitën e grupit hetimor priten të kalojë edhe komunikimi elektronik mes Sinanaj dhe Mëhillajve, pasi nën akuzë është edhe kushuriri i Andonit, Genis Mëhillaj i shpallur në kërkim nga autoritetet shqiptare.
Sipas akuzës çdo veprim dhe komunikim kryehej me anë të emailit. Një bllok i sekuestruar nga hetuesit i cili i përket vrasësit Sinanaj, ka zbardhur mjaft detaje të reja. Aty killeri shenonte targa makinash,numra celulari , e-maile të ndryshme si dhe përshtypje të njerëzve që ai takonte apo kishte në shenjestër.

[Albo]

Sekuestrohen pronat e grupit të tritolit, Kollozi: S’njoh killerin, as porositësit



Pas mbylljes së hetimeve për bandën e tritolit, e cila terrorizonte Vlorën dhe Tiranën me vrasje dhe atentate me pagesë, Prokuroria ka vendosur të sekuestrojë pronat e të gjithë akuzuarve.
Prokuroria për Krimet e Rënda ka kërkuar sekuestrim paraprak për prona dhe llogaritë bankare, të cilat dyshohet se janë përfituar nga aktiviteti kriminal.
Përkatesisht killerit Julian Sinanaj, porositësve të disa ngjarjeve kriminale në Vlorë, kushurinjtë Genis dhe Andon Mëhillaj si dhe Marion Mitros, porositësi për atentatin e mbetur në tentativë ndaj ish-Prefektit të Vlorës, Besnik Dervishi.
Në listën e pronave të sekuestruara janë disa apartamente në qytetin e Vlorës dhe Orikumit, të cilat i përkasin kushurinjve Mëhillaj dhe Marion Mitros, ku ky i fundit njihej dhe si ndërtues në Vlorë.
Organi i hetimit ka kërkuar dhe bllokimin e sipërfaqe tokash që shkojnë në disa dynym në Karaburun, Orikum dhe Vlorë.
Edhe llogaritë bankare të këtyre katër shtetasve janë ngrirë me kërkesë të akuzës, pasi ka dyshime se ato mund të tjetërsohen.
Nga hetimi i deritanishëm është mundur të konfirmohet se vrasësi Julian Sinanaj,të gjitha paratë e fituara nga aktiviteti i tij kriminal ia dërgonte gruas së tij greke,në shtetin helen.
Në bazë të përllogaritjeve pasuritë e këtij grupi të strukturuar kriminal shkojnë në disa milion euro.
Ndërkohë ditën e shtunë në Prokurorinë e Krimeve të Rënda dëshmoi dhe ish-deputeti i PD-së, Ardian Kollozi. Ky i fundit ka qenë dhe shenjestër e serial-killerit, pasi në qershor të 2013-ës iu vendos një sasi tritoli në banesë.
Ai ka mohuar se e njeh Sinanaj dhe kushurinjtë Mëhillaj, të akuzuar si pororsitës të atentatit.
Pavarësisht se prokurorët i kanë treguar fotografite e të pandehurve tashmë,Kollozi është shprehur se këto fytyra nuk i kujtonin asgjë dhe se nuk ka asnjë konflikt me ta.
Vrasësi Sinanaj ka pranuar se ka marrë 7500 euro për këtë ngjarje, e cila nuk kishte synime të vritej ish-deputeti, por thjesht ta trembte,duke qenë se ishte dhe fushatë elektorale në atë kohë.

ORA NEWS