Biznesmeni Bare: Ilir Karçini i dha vrasësit foton që kishim dalë bashkë në Milano

[Albo]

Biznesmeni i gazit pagoi 120 mijë euro për eliminimin e rivalit, zbulohet identiteti i tij



TIRANË- Në momentin që u arrestua nga policia, Juljan Sinanaj po përgatiste vrasjen e një biznesmeni. Tashmë i akuzuari si vrasës me pagesë ka rrëfyer se biznesmeni, për eliminimin e të cilit ishte paguar 120 mijë euro, është Pirro Bare, pronar i kompanisë “Romano Port” me 99,8% të aksioneve. Por përveç kësaj, policia ka arritur të mësojë edhe porositësin e vrasjes së biznesmenit të hidrokarbureve.

Porositësi, i cili kishte paguar 120 mijë euro për vrasjen e Bares, është Ilir Karçini biznesmen gazi. Arrestimi i biznesmenit të gazit u bë pas marrjes së dëshmisë nga Juljan Sinanaj, i cili ka zbardhur një sërë vrasjesh me pagesë. Karçini është aksionari i vetëm i firmës së gazit “PrimaGaz”.

Ai u vu në pranga pas hetimeve të kryera nga Krimet e Rënda. Karçini mësohet të ketë paguar 120 mijë euro Juljan Sinanaj për të vrarë biznesmenin Bare me të cilin kishte konflikte të vjetra. Mësohet se para dy vjetësh në makinën e biznesmenit Bare është vendosur një sasi eksplozivi. Nga shpërthimi Bare dhe djali i tij shpëtuan. Në 12 gusht 2011 Karçini i është drejtuar Autoritetit të Konkurrencës për të marrë masa ndaj “Romano Port”

Tre ditë më parë kreu i Policisë së Tiranës Ardian Çipa bëri me dije se policia mundi të parandalonte vrasjen e një biznesmeni emri i të cilit nuk u bë publik, një vrasje kjo e porositur, e cila ishte marrë përsipër të kryhej nga Juljan Sinanaj, Marion Mitro dhe N.GJ. Ky i fundit është dhe personi i penduar i bandës që bashkëpunoi me prokurorinë dhe zbardhi gjithë zinxhirin e vrasjeve me pagesë dhe shpërthimeve me tritol.

Juljan Sinanaj u vu në pranga nga policia në 25 janar të këtij viti. Në banesën e tij me qira te “Rruga e Kavajës” u gjet një arsenal i plotë armësh, bomba e municione, të cilat i përdorte për të kryer vrasjet me pagesë. Vetë Sinanaj ka pranuar në polici se ka kryer 27 vrasje në këmbim të shumave marramendëse të parave. Pjesën më të madhe të krimeve Sinanaj i ka kryer në shtetin grek.

(a.n/BalkanWeb)

[Albo]

Banda e tritolit, i penduari N.GJ trokiti në "GSH": Nuk po më marrin seriozisht


TIRANE-Kam frikë. Ai do më vrasë. Dua të tregoj krimet, por policia më merr për të çmendur". Tejet i shqetësuar, me një veshje që linte për të dëshiruar, një djalë rreth 30 vjeç, trokiti në dyert e "Gazetës Shqiptare", për të rrëfyer për veprimtarinë kriminale, të një bande, pjesë e së cilës ishte edhe vetë. Atë ditë nuk e dija se njeriu që ishte penduar, është i njëjti me "të penduarin" e drejtësisë shqiptare N.Gj., i cili pak ditë më parë u vu në prangat e policisë dhe rrëfeu të gjitha krimet që kishte bërë banda e tij, me në krye të dyshuarin si vrasës serial Julian Sinanaj.

N.Gj ditën që trokiti në derën tonë kishte shkuar në Policinë e Durrësit për të bërë një denoncim ndaj një personi shumë të rrezikshëm, i cili e kërcënonte prej disa kohësh se do e vriste. Por, paradoksali i kësaj historie është fakti se askush nuk e kishte marrë në konsideratë denoncimin e bërë nga i penduari N.Gj, duke e konsideruar si të çmendur. Mbase policia po ta kishte marrë seriozisht atë ditë denoncimin, mund të ishte parandaluar edhe vrasja e biznesmenit Xhemal Çela, i cili u hodh në erë në 23 janar, 6 ditë pas denoncimit që N.Gj kishte bërë në Policinë e Durrësit. Por, sipas "të penduarit", në Policinë e Durrësit askush nuk e kishte marrë seriozisht këtë person, i cili i ndodhur përballë kësaj situate vendosi që të tregojë historinë e tij në "Gazetën Shqiptare" dhe "News 24", si e vetmja mundësi për të jetuar.

Takimi me të penduarin
Ora shënon 19:55 minuta, data 17 janar, kur më thërrasin në redaksi se jashtë më kërkonte dikush. Dal në korridor dhe tek sekretaria shikoj një person që në pamje të parë të jepte përshtypjen e një njeriu pak të çuditshëm, ashtu siç ishte edhe historia e tij, të cilën do e mësoja pak më vonë. I jap dorën dhe fjala e parë që i them është "Më kërkuat? Si mund t`ju ndihmoj?" Dhe personi që kisha përballë, i cili nuk ishte më shumë se 30 vjeç më thotë: "Kam frikë për jetën time dhe të familjes sime". Pas u mundova ta qetësoj pak, ulem me të diku dhe i kërkoj të më tregojë historinë e tij.

Biseda me të penduarin
Nuk ishte hera e parë që unë takoja njerëz të cilët duan të rrëfejnë në gazetë historitë e tyre me shpresën se do gjejë zgjidhje. Por, N.Gj nuk ishte si të tjerët, ai ishte njëkohësisht i frikshëm, por edhe shumë i frikësuar, madje aq shumë sa edhe emrin e tij kishte frikë ta tregonte.
-Më thuaj, pse ke kaq frikë?
N.Gj:-Kam frikë se ai njeri do më vrasë.
-Qetësohu dhe më thuaj çfarë ka ndodhur?
N.Gj:-Sot në mëngjes kam trokitur në Policinë e Durrësit për të denoncuar një person se më ka kërcënuar se do më vrasë. Por, në komisariat më morën për të çmendur dhe askush nuk e mori kallëzimin tim. Prandaj unë erdha sot këtu tek ju, sepse nuk di se ç`të bëj tjetër.
-Pa merak, po më thuaj. Kush është ky personi që do t`ju vrasë?
N.Gj:-Nuk ua them dot emrin, sepse ai më vret.
-Ju si e keni emrin?
N.Gj:-Nuk mund t`ua them se nëse e merr vesh ai, më vret.
-Pse kërkon t`ju vrasë ky person?
N.Gj:-Para një viti bashkë me atë jam përfshirë në një vrasje në Vlorë dhe unë padashje jam bërë bashkëpunëtor.
-Si jeni bërë bashkëpunëtor?
N.Gj:-Nuk mund t´u them më shumë. Por, tani ky person më kërkon që unë ta ndihmoj për vrasjen e një biznesmeni në Durrës dhe unë nuk dua. Por, ai më kërcënon dhe unë kam frikë se do më vrasë mua dhe familjen time. Unë kam një fëmijë të vogël.
-Kush është ky biznesmen?
N.Gj:-Nuk mund t`ua them emrin. Unë dua të tërhiqem nga kjo histori dhe prandaj shkova në polici që ta denoncoj, por policia nuk më mori parasysh. Unë erdha këtu tek ju që t`i tregoj policisë se nuk do lë gur pa lëvizur për të shpëtuar jetën time.
E pyeta pafund për historinë e tij, por për çdo fjali që thoshte kishte frikë dhe nuk jepte detaje. Pasi diskutuam bashkë dhe vendosëm se cilat ishin fjalët që do thoshte para kameras së 'News 24', pasi çdo fjalë duhej të peshohej mirë, operatori nisi regjistrimin. Në këtë moment, N.Gj e merr në telefon një funksionar i lartë i Policisë së Durrësit dhe kur i penduari i tregon se ku ishte dhe se çfarë po bënte, funksionari i tha, "Eja në Durrës se do e zgjidhim këtë situatë". Pas kësaj, N.Gj u largua dhe vetëm pak më vonë do arrestohej nga policia si i përfshirë në një bandë kriminale, ndërsa ai personi që do e vriste, ishte pikërisht i dyshuari si vrasës serial, Julian Sinanaj.

I penduari N.GJ.: Me Sinanajn u prishëm për hakun e një "porosie"
I penduari" N.Gj, ka pranuar ditën e djeshme para oficerëve të policisë se ai ka qenë vetëm furnizuesi dhe sekseri me lëndë eksplozive i bandës kriminale të shkatërruar dy ditë më parë, ndërsa eksperti i montimit të tyre ka qenë 31-vjeçari, Julian Sinanaj. Ka qenë konflikti mes këtyre të dyve, ai që ka sjellë edhe zbulimin e të gjithë anëtarëve të bandës së eksplozivëve. Burime policore bëjnë me dije se disa kohë para se të arrestoheshin, Julian Sinanaj i kishte premtuar N.Gj. një apartament pas një pune të mbaruar, të cilin nuk ia kishte dhënë.

Kjo ka qenë arsyeja se pse, N.Gj. i ka deklaruar 31-vjeçarit se nuk pranonte që të punonte bashkë me atë dhe pas kësaj Sinanaj e ka kërcënuar se do e vriste. Pas këtij kërcënimi, N.Gj. e ka denoncuar në polici dhe pas kësaj policia e ka vënë në pranga Julian Sinanaj, para pak ditësh në zonën "21 Dhjetori", ku me vete i është gjetur edhe një armë e mbushur, si dhe dy granata. Por, pas verifikimeve të kryera nga policia, ka rezultuar se pjesë e grupit ka qenë edhe N.Gj, i cili është arrestuar dhe pasi ka vendosur që të tregojë lidhjet e grupit, policia e ka marrë në mbrojtje. Nga ana tjetër, edhe vetë Sinanaj ka rrëfyer para grupit hetimor vrasjet që ka kryer, pasi atij i është gjetur me vete edhe një aparat fotografik, me të cilin fotografonte viktimat. Edhe i penduari tjetër, N.Gj, ka rrëfyer para grupit hetimor listën e personave që ishin në listë për t`u bërë viktima, radhën e të cilëve e kishte një biznesmen nafte nga Durrësi.

"Çudia", Berisha e dinte...
Që ish-kryeministri Berisha ka ende të besuar të tij në Policinë e Shtetit kjo merret me mend lehtë. Por, që ai di detaje të hetimit për bandën e tritolit, ngjan pak "e çuditshme". Ja çfarë tha dje Berisha në parlament: "Nga informacionet që kam dhe ju e dini që unë i kam informacionet e sakta, ky person shkoi të depononte në polici. Ka qenë në takim edhe një nga zv/drejtorët e përgjithshëm të Policisë së Shtetit. Por dëshminë e tij nuk e kanë marrë seriozisht dhe i thanë çfarë i ke këto. Ai u ka thënë se do shkoj të jap intervistë në media. Dhe në momentin që ai do fliste në media e kthyen nga rruga".

Ekspertët: Skema, ja pse viktima s’e di kush ia ka vendosur tritolin
Cili është mekanizmi i vrasjeve me pagesë? Çfarë formash paralajmërimi ndjekin vrasësit me pagesë? Ekspertët e policisë rrëfejnë se në përgjithësi për të gjetur një vrasës me pagesë kërkimet nisin nga të sapoliruarit nga burgjet, apo edhe nga vetë të burgosurit, të cilat kanë lidhjet e tyre me banda të fuqishme kriminale. “Një skemë ‘e zgjuar’ është ajo ku vrasësi me pagesë nuk kërcënon paraprakisht, por vendos bombë kërcënuese pa paralajmërim. Në këtë mënyrë, biznesmeni nuk e di kush ja vuri bombën.

Pas një jave apo 10 ditësh, autori bëhet i gjallë duke deklaruar se tritoli këtë rradhë do të jetë vdekjeprurës. Bomba pa paralajmërim vihet: 1. për të evituar denoncimin paraprak të viktimës dhe 2. për ta bindur viktimën për seriozitetin e kërcënimit”, bëjnë me dije ekspertët. Në shumë raste, vrasësit me pagesë lidhin kontakte me biznesmenët, të cilët kanë rivalë të fuqishëm në treg. Nëse ndonjëri prej tyre bëhet pengese, atëherë biznesmeni porosit vrasësit që të ekzekutojnë rivalin. Por, vrasësit me pagesë nuk paguhen vetëm për eliminimin e biznesmenëve.

Në shumë raste, të interesuarit në bazë të lidhjeve që kanë bien në kontakt me vrasësit me pagesë, duke iu premtuar shuma marramendëse parash. “Për një vrasje me pagesë çmimet nisin nga 20 mijë euro deri në 50 mijë euro, varet nga rëndësia e personit. Siç ka raste që paguhen edhe 100 mijë euro, për personat shumë të rëndësishëm”, thonë specialistët. Të njëjtën skemë ka ndjekur edhe Julian Sinanaj, i cili dyshohet se në shumë raste paguhej nga politikanë dhe njerëz me pushtet, të cilët pasi binin në kontakt me atë, e paguanin sa kërkonte 31-vjeçari. Sinanaj ka qenë në përgjim prej dy vitesh nga policia, por nuk ka pasur prova të mjaftueshme për ta prangosur.

(a.n/Gazeta Shqiptare/BalkanWeb)

[Albo]

I penduari: 10-50 mijë € për vrasjet, Sinanaj po përgatiste atentat ndaj një biznesmeni

TIRANE- I arrestuari Neritan Gjoksana ka pranuar të bashkëpunojë me Prokurorinë e Krimeve të Rënda, duke u kthyer në të penduar të drejtësisë. Ai ka rrëfyer të gjitha detajet për mënyrën se si vepronte killeri, Julian Sinanaj, ndërsa ka pohuar se e furnizonte atë me armë dhe eksploziv.

Mësohet se ka qenë pikërisht Gjoksana ai që e ka denoncuar vrasësin në polici, pasi kishte patur mosmarrëveshje me të për shitjen e armëve dhe eksplozivit. I penduari pohoi se ishte kërcënuar me jetë nga vrasësi dhe duke u nisur nga fakti që ai paraqiste rrezikshmëri të lartë kishte vendosur të kryente denoncimin në polici.

Julian Sinanaj u arrestua pesë ditë më parë, teksa po fotografonte një biznesmen nafte në Durrës, ndaj të cilit po përgatiste atentatin e radhës. Gjykata dhe policia pritet të zbardhin listën e plotë të porositësve të vrasjeve dhe viktimave të killerit, i cili sipas të dhënave paguhej nga 10 deri në 50 mijë euro për një vrasje.

Pas arrestimit Julian Sinanaj po bashkëpunon me Prokurorinë, duke zbardhur të gjitha krimet e kryera.

VRASËSI ME PAGESË SINANAJ U KAP TEKSA FOTOGRAFONTE NJË BIZNESMEN
Arrestimi i 32-vjeçarit Julian Sinanaj pesë ditë më parë, si i dyshuar për vrasje me pagesë, ka çuar Policinë dhe Prokurorinë e Krimeve të Rënda në zbulimin e bashkëpunëtorëve të tij në atentate me armë dhe shpërthime me eksploziv. Julian Sinanaj është kapur teksa po fotografonte një biznesmen, emri i të cilit nuk bëhet i ditur.

Gjatë marrjes në pyetje, Sinanaj ka rrëfyer vetë disa prej krimeve që ka kryer, pjesa më e madhe e të cilave në Greqi. Ndërsa miku i tij, i arrestuar dy ditë më vonë, Neritan Gj., i përballur me dëshmitë që ai kishte dhënë para grupit hetimor, ka rrëfyer edhe pjesën tjetër të krimeve duke mbyllur ciklin.

Në këtë formë, sipas hetuesve, është zbuluar i gjithë grupi prej 5 personash, që dyshohet të jenë të përfshirë në vrasje dhe atentate me eksploziv me pasojë vdekjen, por edhe plagosje të mbetura në tentativë.

I arrestuari i dytë, Neritan Gj., pranoi të bashkëpunonte me Prokurorinë e Krimeve të Rënda, duke u kthyer në të penduar të drejtësisë. Arrestimi i 3 të dyshuarve është kryer në një hark kohor prej 5 ditësh dhe u mbyll dje me arrestimin e fundit dhe dy të shpallur në kërkim, duke ekzekutuar masat e sigurimit në mungesë të Gjykatës për Krime të Rënda.

Nga deklarimet e dhëna prej dy të arrestuarve, dyshohet se Julian Sinani është personi që kryente ekzekutimet dhe vendosjen e minave me celular, pasi kishte njohuri të posaçme në prodhimin dhe vendosjen e eksplozivëve të telekomanduar. Këto krime porositeshin më parë nga Marjon Mitro. Takimet kryheshin në lokalin e tij në Vlorë, me ndërmjetësimin e dy kushërinjve të shpallur në kërkim.

Panorama

[Albo]

Noka: I penduari i bandës së Tritolit sillej vërdallë, sepse policia e përzuri

TIRANË-Deputeti i PD, Flamur Noka akuzoi si gënjeshtar ministrin e Brendshëm, Sajmir Tahiri mbi deklarimet për viktima nga krimi. Sipas Nokës, ministri dhe kreu i Policisë së Shtetit tentojnë të largojnë përgjegjësinë ndaj ngjarjes kur një i penduar tentoi të ankohej në polici të denonconte banda dhe nuk merrej seriozisht. (Lajmi mbi këtë ngjarje është publikuar sot në Gazeta Shqiptare).

“Qëndrime të tilla, kërkojnë të largojnë përgjegjësinë nga situata e rënduar kriminale, dhe nga skandali më i fundit, kur i penduari vinte vërdallë në Durrës e Tiranë, për të denoncuar bandën e tritolit, sepse në komisariate e përzinin.
Arsyen pse refuzonin të penduarin, e dinë vetë ata”.

Në këtë kuadër, Noka u ndal dhe në profili e Drejtorit të Përgjithshëm të Policisë së Shtetit.
“Teksa Ministri bën si polic, Drejtori i Përgjithshëm i Policisë sillet si politikan. Numëruesi i parë i zgjedhjeve për Partinë Socialiste e tradhtoi veten me deklaratën që bëri kundër opozitës.
Drejtori i Policisë është në shërbim të qytetarëve dhe nuk mund t’i ndajë ata në pozitë dhe opozitë. Qëndrimet e tij politike, janë në kundërshtim me ligjin dhe një shkelje e rëndë e standardeve të drejtimit të Policisë së Shtetit. Didi e dëshmoi vetë dje se nuk është drejtori Policie, por drejtor partie”.

Deputeti i PD, Flamur Noka akuzoi si gënjeshtar ministrin e Brendshëm, Sajmir Tahiri mbi deklarimet për viktima nga krimi.

“Tahiri thotë se janë 34 viktima për 4 muaj, në fakt janë 51. Ministri i Brendshëm krekoset se vrasjet me ardhjen e tij në pushtet janë vetëm 34. Ndërkohë që Shqipëria është nën terrorin e maskave dhe tritolit, Ministri i Brendshëm ngrihet e krihet.
Është skandaloze kurajoja që ka ky zyrtar i lartë i vendit për të gënjyer. Nga shtatori e deri sot që flasim, janë 51 të vrarë. 51 viktima të krimit, që tregojnë jo vetëm pasigurinë në vend, por e nxjerrin Ministrin një gënjeshtar të paskrupullt.
Tahiri thotë se në Janar, ka 11 të vrarë. Në fakt janë 17 të vrarë. Të dhënat e tregojnë këtë”.

Sipas Nokës, këto ngjarje të rënda kur shoqërohen me gënjeshtra janë kambana alarmi për rënien e autoritetit të policisë.
“Këto janë ngjarje të rënda dhe kur shoqërohen edhe më gënjeshtrat e Ministrit të Brendshëm bëhen këmbana alarmi, për rënien e autoritetit të policisë, uljen e zbulueshmërisë dhe rritjen e krimit nën këtë qeverisje”.

Noka më tej tha se kjo nuk përmirëson situatën, por nxit kriminalitetin.
“Partia Demokratike ka denoncuar në vijimësi gënjeshtrat e Ministrit dhe fshehjen që ai u bën ngjarjeve të rënda. Ja fakti më i fundit.
Dje në orët e para të mëngjesit, në Shkodër, një grup i armatosur dhe i maskuar, ka hyrë me forcë dhe ka marrë paratë që gjendeshin në zyrat qendrore të postës. Ngjarja nuk është bërë e ditur nga policia. Të gjitha këto manipulime të Ministrit dhe Drejtorit të Policisë, jo vetëm nuk e përmirësojnë rendin dhe sigurinë, por nxisin edhe më shumë kriminalitetin dhe i bëjnë ata palë me keqbërësit”, u shpreh Noka.

(d.b/BalkanWeb)

[Albo]

Bosi i naftës që do vritej nga Sinanaj, u paralajmërua me tritol

NGA: KLODIANA LALA / AURORA KOROMANI


TIRANE - Vrasësi me pagesë, Julian Sinanaj, ka vijuar edhe dje me rrëfimet e serive të krimeve që ka kryer, duke dhënë detaje për vrasjen e bosit të naftës nga Durrësi, e cila dështoi për shkak të arrestimit të tij.

Biznesmeni, “koka” e të cilit vlente plot 120 mijë euro, është shtetasi nga Durrësi i cili administron një kompani mjaft të rëndësishme pranë Portit. Madje ai rezulton të jetë paralajmëruar verën e vitit të kaluar me një atentat me eksploziv në automjetin e tij, por që fatmirësisht rezultoi pa të plagosur.

Fuoristrada që drejtohej nga bosi i naftës shpërtheu në kohën që ai po udhëtonte në afërsi të Urës së Dajlanit, në qytetin bregdetar, bashkë me gruan dhe dy fëmijët. Asnjë prej personave që ndodheshin në makinë nuk u plagos nga ngjarja. Madje Policia tha në atë kohë se sasia e eksplozivit të telekomanduar që ishte vendosur në makinën e tij ka qenë e vogël, aq sa për ta paralajmëruar dhe jo për ta vrarë.

Julian Sinanaj ka shpjeguar me imtësi marrëveshjen që kishte për eliminimin e tij fizik, por edhe ndjekjet dhe lëvizjet për të gjetur momentin e përshtatshëm për ta vrarë.

VRASJA E PAREALIZUAR
Ndryshe nga krimet e tjera që akuzohet 32-vjeçari Julian Sinani, për të cilat ai pretendon se nuk di asnjë motiv pse janë kërkuar vrasjet, për eliminimin e biznesmenit ai ka deklaruar se i është thënë edhe motivi. Në rrëfimin e tij për grupin hetimor, Sinanaj është shprehur se edhe për vrasjen e bosit të naftës, është porositur nga ndërmjetësi Andon Mëhillaj, i cili i kishte thënë se porositësi i ofronte 120 mijë euro për eliminimin e tij.

Për këtë rast, nisur nga shuma e lartë që i ishte ofruar, Sinanaj, ndryshe nga herët e tjera, ishte bërë kureshtar për motivin e vrasjes së radhës. Mëhillaj i ka shpjeguar se kjo vrasje kryhej për motive konkurrence në biznes, por vetëm kaq. Ndërsa si datë për të kryer krimin ishte përcaktuar 25 janari, dita kur Sinanaj u arrestua në afërsi të “21 Dhjetorit”, kur ishte nisur me dy pistoleta të mbushura për të kryer ekzekutimin e biznesmenit, në afërsi të Liqenit Artificial.

Ai kishte vëzhguar me ditë lëvizjet e tij nga Tirana në Durrës dhe anasjelltas, dhe e kishte fotografuar, duke piketuar kështu edhe vendin e përshtatshëm se ku do ta vriste. Kjo ngjarje u arrit të parandalohej dhe Sinanaj pati dështimin e tij të parë si vrasës me pagesë, pasi u arrestua nga Policia e Tiranës. Ndërsa më parë ishte denoncuar nga furnitori i tij, Neritan Gj., i cili i siguronte tritolin, pasi Sinanaj e kishte kërcënuar se do ta vriste për shkak të një mosmarrëveshje për pazaret. Në këtë mënyrë është zbuluar i gjithë grupi i eksplozivit.

(er.nu/panorama/BalkanWeb)

[Albo]

Lirohet vajza e Sinanajt, mbrohet familja e të penduarit

NGA: KLODIANA LALA / AURORA KOROMANI

TIRANE-Julian Sinanaj, i dyshuari si vrasës me pagesë, jo vetëm që i ka filmuar viktimat e tij, por disa prej momenteve të krimit edhe i ka regjistruar me anë të një kamere. Burime policore sqarojnë se 31-vjeçarit gjatë momentit të arrestimit i është gjetur edhe një kartë memorie me pamje filmike. Sipas policisë, Sinanaj përmes një kamere të vogël ka filmuar disa nga skenat e vrasjes së personave, për të cilat ai ishte paguar që t´i ekzekutonte. Por, burime të sigurta policie bëjnë me dije se dyshohet se pamjet filmike janë regjistruar nga 20-vjeçarja, me iniciale D.Ç, e cila ka qenë në makinën e 31-vjeçarit, natën që ai u arrestua. Edhe pse zyrtarisht prokuroria bën me dije se 20-vjeçarja nuk po hetohet nga organi i akuzës dhe nuk është paraqitur për masë sigurie, sërish policia ka hedhur dyshime me vajzën.

Sipas uniformave blu, për të mos rënë në sy, Sinanaj nuk i ndiqte vetëm viktimat, por shoqërohej nga 20-vjeçarja D.Ç. Kjo e fundit dyshohej se shërbente si kamuflazh për të dyshuarin si vrasës me pagesë, i cili kur ulej në lokal me vajzën, nxirrte aparatin për të fotografuar "të dashurën e tij", por në fakt shkrepjet ishin të tilla, që në foto dilnin viktimat për të cilët Sinanaj paguhej për t`i vrarë. Pas arrestimit, Sinanajt i janë gjetur foto të ndryshme të viktimave apo edhe të personave që ai kishte bërë plan t`i ekzekutonte. Në të njëjtën kohë, iu sekuestruan një sërë pamjesh filmike, ku ishin regjistruar skenat makabre të vrasjeve.

Atentati i radhës
I dyshuari si vrasës me pagesë, mendohet se kishte përgatitur vrasjen e një biznesmeni durrsak me banim në kryeqytet. Burime policore bëjnë me dije natën që Julian Sinanaj u arrestua në zonën e "21 Dhjetorit" në Tiranë, kishte parashikuar të vriste një tjetër biznesmen gazi të lëngshëm në kryeqytet. Lajmi konfirmohet në formë jozyrtare nga Policia e Tiranës, sipas së cilës 31-vjeçari nëse nuk do ishte vënë në pranga në kohën e duhur, do kishte qenë shumë vonë për jetën e biznesmenit, identiteti i të cilit nuk bëhet me dije. Ajo që dihet nga burimet policore është fakti se vrasja do të kryhej te kodrat e Liqenit Artificial dhe se Sinanaj ishte paguar nga Andon (erion) Mëhillaj.

Dëshmitë
I marrë në pyetje nga ekspertët e policisë dhe të prokurorisë, Julian Sinanaj ka rrëfyer me detaj disa prej vrasjeve që ai ka kryer. 31-vjeçari ka dhënë detaje edhe për atentatin ndaj Ardian Kollozit në 1 qershor të vitit të kaluar. "Unë nuk doja që ta vrisja Ardian Kollozin, doja vetëm ta paralajmëroja. Nuk e di se kush e ka porositur vrasjen e tij, por di të them që lekët m`i ka dhënë Andon (Erion) Mëhillaj", mësohet të ketë thënë gjatë dëshmisë së tij, Sinanaj.

Lidhur me atentatin ndaj prefektit Dervishi, i dyshuari si vrasës me pagesë, ka akuzuar të arrestuarin tjetër Marjon Mitro si porositës të atentatit. "Jam paguar 20 mijë euro nga Marion Mitro për t'i vënë eksploziv prefektit Dervishi. Nuk i kam njohur viktimat, thjesht merrja porositë", mësohet se ka deklaruar i penduari i dytë i drejtësisë shqiptare para grupit hetimor.

I penduari lutet: Mbroni familjen, është në rrezik
Familja ime është në rrezik. Jashtë Julian Sinanaj ka njerëz të tjerë, që mund të hakmerren ndaj familjes time. Duhet ta mbroni atë. Kaq kërkoj. Do flas dhe do tregoj gjithçka di...". N.Gj, i penduari i drejtësisë që zbërtheu bandën e bombave c4, duke dërguar në qeli të dyshuarin për dhjetëra vrasje, Julian Sinanajn, më shumë sesa siguria për veten, duket se e shqetëson siguria e pjesëtarëve të familjes.

Dje në Gjykatën e Krimeve të Rënda, N.Gj, u paraqit për tu njohur me masën e sigurisë, i vetmi problem që paraqiti i penduari ishte siguria e jetës dhe shëndetit të pjesë-tarëve të familjes së tij, me arsyetimin se jashtë dyerve të burgut janë porositësit e krimeve makabre, të shpërthimeve me eksploziv. Të pyetur për fatin e familjes së të penduarit, burime të "GSH" nga prokuroria bënë me dije se janë marrë në mbrojtje, për të shmangur çdo rrezik që u kanosej. N.Gj, është njeriu që shkatërroi bandën, duke rrëfyer të gjitha krimet dhe duke pranuar rolin e tij si anëtar, pasi furnizonte të dyshuarin si killer Julian Sinanaj, me tritol dhe mjete të tjera, që nevojiteshin për shpërthimet. N.Gj, dyshohet për vrasje me pagesë në bashkëpunim me Julian Sinanajn dhe sipas vendimit të gjykatës do të qëndrojë nën masën e sigurisë "arrest me burg".

Balkanweb

[Albo]

Akuzohet se porositi vrasjen e bosit të naftës në Durrës, arrestohet biznesmeni i gazit

UPDATE- Arrestohet porositësi per vrasjen e bosit te naftes ne Durres, per eleminimin e te cilit ishin paguar 120 mije euro.

Ne mesdite ai ka mberritur ne ambientet e drejtorise se policise se Tirane, ku do te merret ne pyetje lidhur me akuzen per te cilen eshte prangosur.

Nderkohe qe mesohet se biznesmeni per te cilin Ilir Karcini akuzohet se kishte paguar 120 mije euro per ta vrare eshte shtetasi Piro Bare, pronar i kompanise “Romano Port”.

Mesohet se i arrestuari eshte biznesmen gazi, aksioner i “PrimaGaz”. Arrestimi i tij vjen pas hetimeve te bera nga Krimet e Renda, nderkohe qe gjykata kishte leshuar nje mandat per arrestimin e tij.

Ky shtetas sipas te dhenave te para te policise eshte personi qe ka paguar direkt te Sinanaj per vrasjen e biznesmentit te hodrokarbureve ne Durres.

Mesohet se pasi eshte marre porosia per eleminimin e biznesmentit te naftes ne Durres, ka nisur edhe ndjekja dhe fotografimi i atij qe do te ishte viktima.

Zbulimi i planit te vrasjes u be pas denoncimit ne polici nga ai qe me pas do te behej i penduari dhe bashkepunetori i drejtesise, N.Gj.

Nderkohe qe vrasësi me pagesë, Julian Sinani, ka dhënë detaje për vrasjen e bosit të naftës nga Durrësi, e cila dështoi për shkak të arrestimit të tij.

Biznesmeni, “koka” e të cilit vlente plot 120 mijë euro, është shtetasi nga Durrësi i cili administron një kompani mjaft të rëndësishme pranë Portit.

Madje ai rezulton të jetë paralajmëruar verën e vitit të kaluar me një atentat me eksploziv në automjetin e tij, por që fatmirësisht rezultoi pa të plagosur. Fuoristrada që drejtohej nga bosi i naftës shpërtheu në kohën që ai po udhëtonte në afërsi të Urës së Dajlanit, në qytetin bregdetar, bashkë me gruan dhe dy fëmijët.

Asnjë prej personave që ndodheshin në makinë nuk u plagos nga ngjarja. Madje Policia tha në atë kohë se sasia e eksplozivit të telekomanduar që ishte vendosur në makinën e tij ka qenë e vogël, aq sa për ta paralajmëruar dhe jo për ta vrarë.

Burime nga grupi hetimor kanë dyshime se edhe kjo ngjarje mund të jetë kryer nga Julian Sinani, pavarësisht se ai ende nuk ka folur rreth kësaj ngjarjeje. Ndërsa ka shpjeguar me imtësi marrëveshjen që kishte për eliminimin e tij fizik, por edhe ndjekjet dhe lëvizjet për të gjetur momentin e përshtatshëm për ta vrarë.

Panorama

[BlooD_VenoM]

[BlooD_VenoM]

Biznesmeni i arrestuar Karçini, mik i ngushtë i ish-kryeprokurorit Sollaku (FOTO)



Sollaku duke pritur para Drejtorisë së Policisë mbërritjen e biznesmenit

Tiranë- Ish-prokurori i Përgjithshëm Theodhori Sollaku ka qëndruar pranë hyrjes së Drejtorisë së Policisë së Tiranës, ndërsa makinat e policisë pritej të sillnin biznesmenin e arrestuar Ilir Karcini.

Prania e zotit Sollaku aty nuk ishte e vështirë të justifikohej, pasi ai njihet publikisht si mik i ngushtë i Karcinit dhe mund të jetë edhe mbrojtësi ligjor i tij tashmë, si avokat.

Lidhjet Sollakut me Karcinin kanë qenë edhe një argument që është përdorur nga ish-mazhoranca e djathtë gjatë një debati në Komisionin e Ligjeve kur diskutohej për shkarkimin e Sollakut.

Mediat e kohës shkruanin për një lidhje të Sollakut me një biznesmenë të inkriminuar, në fushën e hidrokarbureve, që ishte pikërisht Ilir Karcini.

Sipas medias së kohës, Karcini ishte pjesë e një mashtrimi dhe grabitjeje në dëm të një biznesmeni grek, të shoqërisë “Viakel Gaz” SHA, nga pronari i ligjshëm grek Georgios Vourvachis tek Ilir Karcini, bërë me një mënyrë gjyqësore nga gjykatësja Zegjine Sollaku, gruaja e Theodhori Sollakut.

Shoqëria “Viakel Gaz” SHA është krijuar me Vendimin Nr 16003 të datës 2.10.1996, dhe ndryshuar me Vendimet nr 16003/1 dt 23.12.1998 dhe Nr 16003/2 dt 03.04.2001, me selinë e saj ligjore në Portes- Fier. Kjo shoqëri është krijuar si shoqëri anonime, me një kapital themeltar prej 60 milion lëkësh të reja. Në kohën e themelimit të saj, ka pasur si aksionerë: 1) Shoqerinë Greke Viakel Central Gas S.A, në vlerën prej 50 % të aksioneve; 2) Shtetasin Georgios Vourvachis në vlerën prej 20% të aksioneve; 3) Shtetasit Ilir Karcini dhe Skënder Amoniku në vleren prej 30 %. Drejtor dhe përfaqësues i bordit te shoqërisë ka qene i caktuar shtetasi grek Georgios Vourvachis.

Gazeta Idea

[Albo]

Sa pune te mira ben kjo Policia e Rilindjes!

Vete krimineli ne polici u thote:

- Jam gati t'iu tregoj se kush i ve bombat nen makina! Jam gati t'iu tregoj qe eshte duke bere gati bomben per nje biznesmen ne Durres!

- Policia i thote: ik tutje ore mashtrues ordiner!

- Krimineli ia ve bomben biznesmenit ne mes te Durresit dhe e hedh ne ere.

- Policia e Tahirit qe ishte prezente, nuk lejon qytetaret qe ta nxjerrin viktimen e gjalle nga makina, por e lene te digjet nga flaket. Kete urdher kishin marre.

- I penduhari i tmerruar sa nga frika e ortakut te tij ne krim qe e ka kercenuar per vdekje, ca nga policet qe nuk duan ta mbrojne e ndalojne ortakun e tij, shkon ne zyrat e News 24 ne Tirane.

- Gazetare: Une e di kush i ve bombat! Vajta ne Polici po ata nuk ma vune veshin fare! Me ndihmoni, kam frike per jeten e familjes sime!

- Gazetaret e marrin ne interviste e behen gati ta nxjerrin ne TV e faqet e gazetave, xerrr zilja e ceularit te te pandehurit.

- Policet: Mos dil ne televizor po hajde urgjent ne Polici! Tani do te te degjojme!

- Prokuroria fillon hetimet, interviston te penduarin, priten fletet e arrestit.

- Ministri yne i rilindur Tahiri del ne televizor dhe dekonspiron hetimet e prokurorise, qe t'iu japi sinjalin atyre qe porositen krimet: Ikni nje ore e me pare nga vendi! Krimenelet qe paguat po flasin! Dhe krekoset Tahiri ne televizor dhe facebook me "aksionin" e policeve te Rilindjes.

Shtet policor Shqiperia?

Jo, c'eshte ajo fjale! Shqiperia eshte shteti i Rilindjes!

Albo