4 qirinjte e adventit. Koha e pergatitjes per Krishtlindje-Advent

[Reschen]

Koha e përgatitjes për Krishtlindje quhet Advent. Advent (latinisht “adventus”) domethënë mbërritje. Koha e Ardhjes është kohë e pritjes dhe përgatitjes për mbërritjen, lindjen e Jezusit. Me 24 dhjetor, Natën e shenjtë, dhe me 25 dhjetor e kremtojmë festën e Mishërimit të Zotit. Në përgatitjen për këtë festë përdoren simbole të ndryshme që me porosinë që përmbajnë dëshirojnë të nxisin besimtarin të vetëdijësohet për këtë ngjarje, që ta lidhë jetën e vet me atë mister. Një simbol i tillë është edhe qiriu.

Roli i qiriut

Qirinjtë e luajnë një rol të veçantë në jetën e njerëzve. Sidomos në kohën e sotshme, në të cilën njerëzit po e jetojnë një stil turravrap, qiriu ndikon duke i bërë mirë njeriut dhe duke krijuar një atmosferë qetësuese që si pasojë ka zvogëlimin e stresit.
Qirinjtë respektivisht flaka është njëra prej metodave më të vjetra, për të krijuar dritë. Nëpërmjet ndezjes së qirinjve krijohet një gjendje e këndshme dhe e qetë. Për këtë arsye qirinjtë janë pjesë përbërëse e qëndrueshme e kohës së Adventit dhe Krishtlindjeve. Sidomos Adveti është kohë kur duhet që njeriu të qetësohet dhe të hyjë në brendësinë e tij, për t`u përgatitur për festën e madhe – Krishtlindjet. Në errësirën e brendshme të sjell dritë, për ta parë gjendjen e vet ku është, dhe në këtë mënyrë të kërkojë ndihmën e Zotit për t`ia rrafshuar rrugën Atij që po vjen.
Kemi lloje të ndryshme qirinjsh. Njeriu mund t`i dallojë ata me forma të ndryshme apo nga materiali i ndryshëm, prej të cilit prodhohet. Në këtë kuptim kemi edhe qirinjë dylli, qirinj që përdoren për vorre, qirinj për ta mbajtur çajin të ngrohtë, qiriun e bredhit të Krishtlindjes e kështu me radhë.

Prejardhja e kurorës së Adventit

Degët e pemëve kanë qenë gjithmonë të pëlqyera për zbukurime kishash dhe shtëpish. Famullitari evangjelist Johann Heinrich Wichern (1808-1881) kishte filluar t`i vendoste degët e gërshetuara duke i lidhur ato me kohën e Krishtlindjeve. Si themelues i “Rauhes Haus”, të një instituti për përkujdesjen e të rinjve të pambrojtur, filloi ta praktikonte përsiatjen/meditimin e kohës së Ardhjes - Adventit.
Gjatë këtyre meditimeve/lutjeve ndizeshin për çdo ditë njëri prej 24 qirinjve të vendosur në një kurorë druri të madhe sa një rrotë qerresh të atëhershme. Kështu çdo ditë e Adventit jepte gjithnjë e më shumë dritë. Kulmin e saj kjo dritë e arrinte në festën e lindjes së Jezu Krishtit, “Dritës së botës”.
Me kalimin e kohës kurora zbukurohej edhe me degë bredhi, ku në vend të 24 qirinjve u zgjodhën 4 qirinj për katër të dielat e Adventit. Qiriu për të dielen 3-të të Adventit është ngjyrë rozë dhe përkujton meshën shenjte të kësaj të diele, e cila qëndron nën moton “Gaudete!” – “Gëzohuni!” Çdo të diele dhezet një qiri më shumë duke paralajmëruar Dritën e Dritës.

Historia e përgatitjes për Krishtlindje

Gjurmët e para të një përgatitjeje për Krishtlindje i hasim në Spanjë dhe në Gali. Si dëshmia më e vjetër për Adventin vlenë “rregullorja e agjërimit” e ipeshkvit Perpetuus i Tur-it (+ 490). Kjo rregullore kërkonte agjërimin tri herë në javë në kohën prej festës së Shën Martinit (11 nëntor) deri në Krishtlindje. Gjurmët e para të një liturgjie të Adventit mund të vërtetohen rreth mesit të shekullit 5 në Ravenë. Pritja e Lindjes së Jezu Krishtit është në fakt tema e kësaj liturgjie.

Sot në kohën e Adventit në shumë kisha kremtohen meshët e mëngjesit, ende pa aguar dita, si përgatitje shpirtërore për Ditën që po vjen.

Pergatiti P.Shtjefen
http://www.forumikatolik.net/showthread.php?t=6845