Raporti i KE: I rekomandojmë BE pranimin e Shqipërisë në BE. BE vendos në 23 qershor

[Albo]

Fyle vjen nesër në Tiranë për të sjellë raportin mbi statusin e Shqipërisë

TIRANE- Komisioneri per zgjerim Stefan Fyle vjen nesër në Tiranë për të sjellë raportin mbi statusin e Shqipërisë, vendimi për të cilin do të merret në fund të qershorit. Sipas burimeve, pritet që Fyle të rekomandojë dhënien e statusit kandidat për Shqipërinë, por gjithcka do të mësohet zyrtarisht nesër.

Fyle do të takojë paraprakisht anëtarët e qeverisë, përfaqësuesit e opozitës, por edhe përfaqësues të shoqërisë civile. Lajmi bëhet i ditur për News 24 nga zëdhënësi i KE, Peter Stano. Stano theksoi se raporti do të shërbejë si bazë për diskutimet e vendeve anëtare në Samitin e Këshillit Europian më vonë gjatë këtij muaji, kur ata do të vendosin për statusin e vendit kandidat. Zyrtari evropian njofton ndër të tjera se nuk bëhet fjalë për një raport-progresi, por për një raport që vendet e Bashkimit Europian ia kanë kërkuar Komisionit Europian, ku të përmblidhen përpjekjet e qeverisë shqiptare, progresi i arritur në luftën kundër korrupsionit, krimit të organizuar dhe ecuria në reformën gjyqësore

(d.b/m.a/News24/BalkanWeb)

[Albo]

Raporti, Fyle nesër në Tiranë. Greqia e Italia: Pro statusit për Shqipërinë

Greqia dhe Italia mbështesin dhënien e statusit të vendit kandidat për Shqipërinë. Gjatë një takimi mes ministrave të Evropës Qendrore, i cili i zhvilloi punimet në Vjenë, Ministri i Jashtëm i Greqisë Evanxhelos Velizelos dhe Ministrja e Jashtme e Italisë, Federika Mogerini, kanë bërë thirrje se vendit tonë duhet t’i jepet statusi.

Ministri i Jashtëm i Greqisë Evangjelos Venizelos komentoi sot nga Vjena: “Dhënia e statusit kandidat për Shqipërinë është diçka shumë e rëndësishme për ne dhe shpresojmë që këtë muaj, ky status të jepet. Greqia ka qenë pozitive dhe inkurajuese që në fillim, që në dhjetorin e kaluar, për dhënien e statusit të kandidatit Shqipërisë dhe ne shpresojmë që në mbledhjen e ardhshme këtë muaj, Këshilli i Ministrave të Jashtëm të vendosë t’i japë statusin e vendit kandidat.”

Sikundër kolegu i saj, në përfundim të Konferencës së Vjenës për zgjerimin e Ballkanit Perëndimor, Ministrja Mogherini shtoi: “Një veprim i tillë do të njihte reformat që ka bërë vendi dhe angazhimin politik të qeverisë shqiptare për të ecur përpara me reforma shtesë, që do të sjellë më shumë progres”.

Statusi, Fyle vjen nesër në Tiranë për raportin

Pikërisht nesër, Komisioneri për zgjerim Stefan Fyle vjen nesër në Tiranë për të sjellë raportin mbi statusin për Shqipërinë, vendim i cili do të merret në fund të qershorit. Diplomati i lartë i BE-së, do të takohet me përfaqësues të qeverisë dhe opozitës.

Raporti i Fyles do të shërbejë si bazë për diskutimet e vendeve anëtare në mbledhjen e Këshillit të Europës në fund të këtij muaji, kur ata do të vendosin për statusin e vendit kandidat.

Sipas burimeve, mësohet se nuk bëhet fjalë për një raport-progres, por për një raport që vendet e BE-së ia kanë kërkuar Komisionit Europian, ku do të verifikohen përpjekjet e qeverisë “Rama” në luftën kundër korrupsionit, krimit të organizuar dhe reforma të ndryshme në sektorë të veçantë.

Shqip

[Albo]

Hezitimi për statusin ndaj Shqipërisë, Rama: Sëmundje e shkurtpamësisë së vendeve të BE



Tirane- Ndërsa në Bruksel po shkruhen rreshtat e fundit të progres raportit kryeministri Edi Rama nuk ka kursyer fjalite shigjetuese ndaj hezitimit të BE-së për t’i dhënë statusin e vendit kadidat Shqipërisë.
Duke e konsideruar të berë detyrën e qeverisë së tij, shefi i maxhorancës bëri një krahasim thumbues për skeptiket ndaj Shqipërisë brenda BE.
Madje shton se nëse BE do të kishte dhënë statusin e vendit kandidat Shqipërisë në dhjetor do të ishin shmangur konfliktet.
“Nëse Shqipëria do të merrte statusin në dhjetor do të kishte pasur më pak konflikt dhe shumë më tepër mundësi për të shkuar më përpara në rajon dhe mbi të gjitha, në fund të fundit nuk është se nëse nuk shkojmë në BE ne nuk jemi europianë. Ne jemi europianë sa janë gjermanët, danezët. Ata janë anëtarë të një Bashkimi ne nuk jemi anëtarë por nuk na bën më pak të drejta për të thënë atë që mendojmë për Europën. Ne duhet vetëm të presim KE që nëpërmjet raport progresit të thotë fjalën e vet nëse ne i kemi qëndruar një për një detyrimeve tona. Në momentin kur ne do të kemi një konfirmim nëse do ta kemi ne kemi bërë detyrën tonë. Në kohë të tjera më të mira Europa nuk do të diskutonte sepse KE do të thotë që e kanë bërë detyrën. Është njësoj si një komision provimesh që thotë që këta e morën provimin dhe pastaj drejtoria thotë prit një minutë se do e shohim në vjeshtë se kemi halle të tjera. Se kështu jemi katandisur në këtë Europë, ku jemi sot. Ne të marrim detyrën para komisionit pastaj të presim drejtorinë cfarë vendimi do të marrë. ” tha Rama.
Megjithë skepticizmin ndaj asaj që do të vendosë BE Rama i qëndroi ideasë se qeveria e tij e ka bërë detyrën e vet dhe mbett vetëm të presim atë që është e shkruar e zezë më të bardhë nga KE në raportin që pritet këtë javë.

Arvizu: Punoni për një qeverisje demokratike
Për ambasadorin Aleksandër Arvizu SHBA ështe e një mendimi se e ardhmja është BE dhe me rëndësi është të pasurit një qeverisje demokratike e cila respekton të drejtat e njeriut.
“Ne përpiqemi të inkurajojmë vendet që inspirojnë të jenë pjesë e BE –së dhe NATO-s në mënyrë që ato të kombinojnë të gjithë përpjekjet dhe energjitë e tyre dhe të kenë një qëllim të vetëm në mëndje. Të gjithë mund ta bejnë Shqipëri, Maqedoni, Serbi. Megjithatë është diçka shumë e rëndësishme fakti i të pasurit një qeverisje të gjatë demokratike. Një vend ku qeveria e të cilit respekton të drejtat e njeriut dhe të vazhdojë të japë inkurajim më pozitiv. Kjo është ajo që ne duam të kuptojmë. Ne besojmë tek Europa dhe e ardhmja e njerëzve në BE.

sg/oranews online/

[iktuus]

Nuk kuptoj se cfare lidhje ka opinioni i Arvizu-t me statutsin kandidat te shqiperis ne BE.
Nje ambasador qe fut hundet ne cdo ceshtje politike te vendit. I behet homazh dhe i jepet autoritet me shume se sa i takon pozicionit te tij prej dipllomati.
Se kam degjuar noiher ambasadorin amerikan ketu ne itali te jet kaq ne qender te vemendjes sa tek ne

[Qyfyre]

Komisioni Europian konfirmon rekomandimin e tij se Këshilli duhet t’i japë Shqipërisë statusin e vendit kandidat

http://in.reuters.com/article/2014/06/04/eu-albania-idINL6N0OL2M820140604

[Albo]

Rama: “PO” e KE, s'lë shteg për dyshim. Fyle: Presim përgjigje pozitive nga BE


TIRANE- Komisioni Europian i rekomandoi Këshillit të Ministrave të BE-së që t’i japë Shqipërisë statusin kandidat, me anë të një progres-raporti të detajuar, ku jepet notë pozitive mbi punën e qeverisë shqiptare në luftën ndaj krimit dhe korrupsionit dhe përcakton detyra të reja për vendin.

Dhe urimi për gjithë shqiptaret vjen në Tirane nga komisioneri për zgjerimin në Bashkimin Europian, Stefan Fyle, përkrah kryeministrit Edi Rama, pas takimit të nivelit të lartë Shqipëri- BE. Zyrtari i larte i BE vlerësoi përpjekjet në të shkuarën dhe angazhimin e sotëm të qeverisë, në përmbushjen e reformave duke përfshirë në këtë përcaktim edhe meritat e qeverisë demokrate në 8 vite.

Vendimi i KE u komentua në një konferencë të përbashkët nga kryeministri Rama dhe Komisioneri i Zgjerimit, Stefan Fyle. "U dha pa kushte e rezerva", u shpreh Fyle në nisje të fjalës. Për Ramën ai ishte një vendim i qartë që nuk linte asnjë shteg për dyshim, sic tha ai nuk ka asnjë presja pas ‘PO’. Ndërsa komisionari Fyle edhe pse konfirmoi vendimin pozitiv i rekomandoi se duhet të ndalen konfliktet politike, pasi dëmtojnë vendin. Fyle nga ana e tij përgëzoi qeverinë për punën e bërë, por kërkoi që reformat të vijojnë. Në lidhje me skeptikët e BE, Rama nuk ka dashur të komentojë sot, duke thënë se i gëzohet vendimit të tanishëm dhe mbështetjes së miqve.

KRYEMINISTRI RAMA
Në konferencën e përbashkët me komisionerin për zgjerim Stefan Fyle, kryeministri Rama u shpreh se Komisioni Europian ka rekomanduar që Shqipërisë t’i jepet statusi, një po e forte, e qartë dhe e pastër, që sipas tij, nuk lë shteg për asnjë dyshim.

“Është një moment i shënuar dhe besoj që në këtë moment gazetarët meritojnë të gjithë hapësirën dhe komoditetin për të bërë pyetjet e tyre.
Progres raporti ka konfirmuar me një ‘PO’ të fortë dhe të qartë rekomandimin për statusin kandidat për Shqipërinë bazuar në argumente konkrete për konsolidimin e një rruge të nisur, bazuar në rezultate të prekshme që në muajt e parë të qeverisjes sonë dëshmon dhe thekson punën e qeverisë si një punë që meriton të njihet dhe të vlerësohet, për vetë Shqipërinë, për dhënien e statusit kandidat për vendin tonë”, tha Rama.

Sipas Ramës, në rekomandim vlerësohet puna e qeverisë dhe nuk ka asnjë presje, pas përgjigjes “PO”.

“Ky progres raport ka një nënvizim shumë të fortë, nuk lë shteg për asnjë dyshim dhe alibi se, pse Shqipëria duhet ta marrë statusin e vendit kandidat, është një rekomandimi i pastër pa asnjë presje pas ‘PO’. Dua ta mbyll duke thanë ne sot jemi më shumë të rënduar nga pesha e përgjegjësisë, pavarësisht votimit në dhjetor nga vendet anëtare, përforcimi i që i ka bërë komisioni rekomandimit na bën të ndjehemi mirë, pasi puna ka vazhduar për një përpjekje të gjithanshme transformuese”, -tha Rama ndërsa falënderoi komisionarin Stefan Fyle për mbështetjen e tij.

Sipas kryeministrit Rama, “progres/raporti i KE-së është me shumë punë për qeverinë më shumë realizëm për opozitën”.

Duke theksuar vlerësimin që KE i bën operacioneve të policisë në fusha të ndryshme, kryeministri theksoi se politizimi i luftës kundër krimit, nuk i shërben askujt përveç krimit.

Kryeministri theksoi rëndësinë që maxhoranca dhe opozita të bëhen bashkë për axhendën kombëtare të integrimit në BE.

“Le të bëhemi bashkë për të patur një vijë të qartë ndarëse mes kampeve politike dhe kampeve në parlament dhe kampit tonë të përbashkët, të qytetarëve dhe përfaqësuesve të qytetarëve të këtij vendi dhe kampit të trafiqeve e korrupsionit. Të bëhemi bashkë për të ndarë axhendat partiake me axhendën tonë kombëtare, që pikë të parë të vetën ka Shqipërinë evropiane, Shqipërinë në BE”- deklaroi kryeministri Rama.


EUROKOMISIONERI FYLE
Eurokomisioneri për zgjerim Stefan Fyle konfirmoi në konferencën e përbashkët për shtyp se Komisioni Europian e dha pa rezerva rekomandimin për statusin e vendit kandidat për Shqipërinë. Tani pritet vendimi i 28 anëtarëve të Bashkimit Europian nëse do e mbështesin këtë propozim.

Eurokomisioneri theksoi se dhe në dialogun që patën në takimet në Selanik, u diskutua rëndësia e zgjerimit të Bashkimit Europian.
“Dhe dolëm në përfundimin që zgjerimi mbetet një nga prioritetet e Komisionit”.

“Në këtë raport pasqyrohen ecuritë dhe progresi i kohëve të fundit, lufta kundër korrupsionit dhe krimit të organizuar. Progres raporti vjen vetëm njëherë në vit dhe disa prej jush keni raportuar se ky raport u shty, por në fakt u miratua sipas procedurave dhe planeve. Ne konfirmojmë pa pikë dyshimi dhe rezerva që shtetet anëtare ti japin Shqipërisë statusin e vendit kandidat. Ne e kemi bazuar këtë në mënyrë të vazhdueshme në luftën kundër korrupsionit, reforma në drejtësi, reformat. Jam inkurajuar nga angazhimi që është treguar nga Shqipëria dhe përpjekjet për reforma dhe shoh një angazhim nga autoritetet përkatëse”.

Fyle vecoi se bashkëpunimi, dialogu dhe një klimë e qetë politike ngrejnë lart para syve të Europës imazhin e Shqipërisë. “Gjithëpërfshirja dhe bashkëpunimi janë prioritete kyce për ecjen përpara. Klima konfrontuese politike e dëmtojnë Shqipërinë. Qeveria dhe opozita duhet të kenë qasje kompromisi”.

Fyle për Grevën e Urisë
Eurokomisioneri për zgjerim, Stefan Fyle gjatë konferencës së përbashkët për shtyp me kryeministrin Edi Rama në Tiranë vuri theksin dhe tek cështja e grevës së urisë dhe thirrjes që grevistët i kanë bërë për ndihmë. Fyle u përgjigj sot duke u rekomanduar personave të Shoqatës së të Larguarve nga Puna që të mos venë jetën në rrezik sepse personalisht po e shikon me përparësi dhe cështjen e tyre.

‘Sa i përket grevës së urisë, kam njohuri, e di dhe jam njohur rreth tyre. Dhe e shoh me shqetësim, dhe u bëj thirrje grevistëve që mos të venë jetën e tyre në rrezik dhe i siguroj se ne flasim në mënyrë të rregullt me qeverinë dhe do vijojmë ta bëjmë këtë”.

PYETJET
Rekomandimi sipas asaj që lexoni ju ka qenë pa kushte. nga ndryshon raporti sot me atë të dhjetorit dhe si i lexoni ju mesazhet e skeptikëve?
RAMA: Komisioneri Fyle është njeriu më i duhur për të dhënë pikëpamjen më të qartë të dallimit mes dhjetorit dhe sot. Por, sa më takon mua, përsëris dhe sot se Shqipëria e meritonte që në dhjetor statusin, i kam thënë edhe arsyet që sollën shtyrjen e vendimit. Vlen të theksohet se argumenti pavarësisht shkaqeve ishte se pavarësisht punës mbresëlënëse na duhet më shumë kohë për të konfirmuar nëse do jetë punë e qëndrueshme, nëse do pasohet nga rezultate të qëndrueshme. Le të biem dakord që nuk është hera e parë që një qeveri e sapo zgjedhur bën disa gjëra mbresëlënëse. Në rastet e të shkuarës ka ndodhur, ka sjellë edhe hezitim që pas tre muajsh gjerat janë kthyer në pikënisje, madje edhe ka degraduar. Besoj se ne e treguam veten. Nuk ndjehem në kushtet për të folur për triumf. Nuk do dëgjoni nota triumfi nga unë e qeveria ime, pasi rruga e integrimit rrit përgjegjësinë, bëhet më e vështirë. Kalimi nga Matura Shtetërore në Universitet e bën më të vështirë punën për të marrë një kualifikim më të lartë. Për sa i përket skeptikëve, më lejoni ti gëzohem faktit që ne ia dolëm të bëjmë punën tonë. Më lejoni ti gëzohem mbështetjes së miqve. Ditët në vijim do kemi kohë edhe për skeptikët.
Raporti vjen në të tjera kushte, kanë fituar euroskeptikët. A mund të ketë kjo ndikim për statusin?
FYLE: Unë bie dakord se edhe përpara kushteve po të shikohet nga më afër do shikojmë njëfarë cilësimi, këtë herë ne ishim më të qartë për të mos bërë asnjë lloj cilësimi. Vendet donin të shihnin më shumë sa i përket korrupsionit dhe krimit të organizuar. Raporti jep pikërisht këtë panoramë, fotografim të një bilanci të përmirësuar. Ne duam t’ju japim një raport që të marrin një vendim. Ne mund të kemi numra të ndryshëm të parlamentarëve dhe deputetëve por jo politika të tjera. Unë besoj se rezultatet e zgjedhjeve në BE, do çojnë në një reflektim nga ana e të gjithëve ne, shpresoj që ky reflektim të jetë më shumë demokratik për sa i përket legjitimitetit. Unë besoj se zgjerimi nuk do ndikohet nga rezultatet e zgjedhjeve në BE. Historia e zgjerimit është një politikë e besueshme për një proces zgjerimi akoma më të fortë, do përqendrohet tek thelbësoret, forcimi i së drejtës dhe pastaj qeverisja ekonomike duke u përpjekur që më përpara të shikohet konkurueshmëria dhe shtylla e tretë për të cilën do flitet në progres raport do jetë fuqizimi demokratik. Këto janë shtyllat që përbëjnë themelet dhe që shtetet anëtare të bazohen për përgjigjet e tyre.
Zoti Fyle, kryeministri Rama, dje ka përdorur një krahasim sa i përket çështjes së integrimit, duke nënkuptuar se komisioni, mësuesi, sipas tij na vë notë të mirë, ndërsa drejtori, Këshilli i Ministrave nuk di çfarë vlerësimi do të na japë. Kaq qasje të ndryshme kanë?
RAMA: Më citoni saktësisht. Unë kam thënë, kemi detyrimin që të bëjmë atë që na takon për të marrë provimin për të cilin ka një komision, komisioni i provimeve. Pastaj a ka vend klasa që të hymë dhe ne apo duhet të presim, këtë e vendos drejtoria. Këtë kam thënë unë dhe e kam thënë kuptohet me një shaka që është gjysma e të vërtetës. Nëse insistoni që komisioneri të vijë këtu dhe të komentojë shakatë tona, mund ta bëni.
Nëse statusi do të na refuzohet nga drejtori, cila është përgjegjësia juaj në këtë rast?
RAMA: Nga drejtoria, jo nga drejtori. Jam i bindur që edhe ju si gjithë të tjerët, si televizion Klan jeni të gëzuar. Keni punuar edhe ju për statusin. Me kujton pyetjen, çfarë do bësh ti po të humbësh zgjedhjet? Ne në këtë rast e kemi bërë detyrën tonë. Vendimi për Shqipërinë shpresojmë, urojmë dhe po punojmë që të jepet bazuar në raportin e komisionit. Vendet anëtare kanë kërkuar një raport nga komisioni për të konfirmuar bilancin. Raporti ja ku është, por sigurisht vendet anëtare kanë edhe arsyet e tyre që nuk kanë lidhje me Shqipërinë. Unë nuk përgjigjem për dhimbjet e barkut që ka dikush tjetër, diku tjetër.
FYLE: Përsa i përket fushës së zgjerimit, komisioni punon ngushtë dhe në harmoni të plote me shtetet anëtare. Shtetet anëtare gjithmonë kanë vlerësuar objektivitetin e komisionit dhe faktin që ne përqëndrohemi tek faktet.
RAMA: As sot, as kur të marrin statusin nuk do ketë as fishekzjarre dhe as koncert, e as miting kundër opozitës. Do ketë vetëm një ditë për të shprehur rritjen e barrës së përgjegjësisë ndaj nesh. Nuk është e lehtë të kërcesh as vallen e shpatave me një tjetër kur tjetri nuk do, jo më të kërcesh Shtrausin kur tjetri nuk do. Ky është një kërcim shumë i sofistikuar për të shkuar bashkë drejt BE-së. Ne do bëjmë çmos që t’i ofrojmë opozitës gjithçka që të përfshihet në vallëzim, sepse vallëzimi bëhet bashkë. Jemi të vendosur që çdo reformë, çdo ligj, çdo hap ta diskutojmë me opozitën. Por ne kemi fituar zgjedhjet, opozita i ka humbur zgjedhjet, ne do dëgjojmë por do të udhëheqim, sepse nuk mund t’i justifikohemi të tjerëve, për më tepër komisionit duke i thënë që e ke ka fajin opozita. Ne do bëjmë çmos që opozita të jetë pjesë, por ne do të udhëheqim.
Çfarë mendoni se kane qenë problemet kryesore, që kanë qenë edhe pengesa për të arritur në këtë ditë, sidomos në vendimin që do të merret në fund të qershorit, që shpresojmë të jetë i bazuar tek rekomandimi?
FYLE: Kemi të bëjmë me një analizë për Shqipërinë. Çdo vend ka sfidat e veta specifikat e veta të cilat duhen marrë parasysh. Ka qenë e qartë, është dukur qartë me kohë që konsensusi më i gjerë në këtë vend mund të ishte për axhendën evropiane. Sa më i madh ky konsensus, aq më mirë do të ecnin gjërat përpara. Në Shqipëri mund të na jetë dashur të investonim pak më shumë se sa në vendet e tjera që aspirojnë të bëhen anëtare të BE-së. Që zgjidhja të gjendej për të mirën dhe në interes të qytetarëve shqiptare. Duhet të jetë diçka që gjendet në ajër në Shqipëri, se kushdo që është në opozitë, disa shqisa evropiane sikur fiken dhe bëhet tmerrësisht vështirë që të arrihet konsensusi për atë që unë gjithmonë e kam quajtur axhenda evropiane.
Duke qenë se e njihni mirë fizionominë e vende të BE nga 1 deri te 10 si mendoni se do të jetë vendimi për Shqipërinë?
FYLE:Unë nuk do i përgjigjem kësaj pyetjeje. Jo, jo, ju lutem ne jemi partnerë, komisioni dhe shtetet anëtare dhe ne nuk spekulojmë vendimet për njëri-tjetrin dhe nuk përdorim vlerësime nga 1 deri tek 10, dhe nuk do e përdor këtu këtë sot këtu.
Kërkuat sot reforma, por në vend ka nisur dhe një reformë e rëndësishme, reforma administrative. Mendoni që reformën administrative duhet që qeveria ta miratojë e vetme?
FYLE: Më lejoni t’ju them në mënyrë të qartë dhe pa pikë dyshimi që cështja është diskutuar gjatë dialogut të nivelit të lartë dhe më lejoni që t’jua bëj të qartë se unë e kam ngritur këtë cështje dhe kam thënë që është e një rëndësie tejet të madhe që cështje kaq vendimtare sa kjo që procesi të jetë gjithpërfshirës dhe kjo varet, është në dorë të qeverisë dhe opozitës kjo gjithëpërfshirje është e rëndësishme. Nuk e them këtë se kjo fjalë përdoret shpesh në Bruksel dhe është fjalë e bukur, por gjithëpërfshirja është e domosdoshme dhe duhet të ecet përpara dhe duhet të kuptoni në fillim që duhet gjthëpërfshirje dhe ky është një mesazh për të gjithë.
Pse vendoset sot z Rama për të thyer traditën sepse zakonisht shpreheni se i njihni meritat, dhe vendosët sot të mos i njhni meritë qeverisë së kaluar, nëse e marrim statusin?
RAMA: Të marrim statusin dhe pastaj ti njohim meritat dhe për të tjerët që kanë qenë para nesh, por le ta themi hapur për sa na takon në këtë periudhë nuk mendoj se kemi pasur që kemi ndihmë bujare për rezultatet që kemi arritur. Ky raport për mua, lexohet kështu, më shumë përgjegjësi dhe më shumë punë për qeverinë, më shumë realizëm dhe më shumë përgjegjshmëri për opozitën, opozita duhet të zbresë sa më shpejt në tokë sepse sic e shihni raporti i bërë nga një palë e tretë, se është njohur se punonte fakte dhe jo me thashetheme, punon me kritere objektive dhe jo me subjektivizëm flet qartë për një medalje që ka dy anë komplet të kundërta, a qoftë për luftën kundër korrupsionit, luftës kundër drogës, krimit të organizuar. Kështu që unë sot falënderova dhe Komisionin e Integrimit, kryetaren Bregu se një pjesë e meritës i takon kryetares së komisionit. Komisioni i Integrimit ka qenë një hapësirë ku është vazhduar puna normale dhe ku nuk është importuar ajo që fatkeqëshit importohet të enjteve në parlament. Të marrim statusin, dhe nuk do dëgjoni nga unë e nga ne që statusi i vendit kandidat është arritje ekskluzive e qeverisë sonë, nuk do e dëgjoni nga ne se, është arritje ekskluzive sepse janë arritje të përbashkët, një stafetë. Eurokomisioneri tha se do ketë raporte të reja, një në tetor, se statusi kështu e ka, presim raporte. Sic e ka tradita, fjala e fundit i jepet mikut dhe në tavolinën e dialogut të lartë ia lamë opozitës. (qesh)

FYLE: (Qesh dhe ai) Mund ta konfirmoj këtë vërtet ashtu ndodhi. Asnjë në raportet tona nuk janë lidhur me një qeveri të caktuar por në traktat ne i referohemi shtetit. Në tryezë, unë thashë që puna pozitive nuk duhet të ndalohet me aq, nëse je me qeverinë apo në opozitë. Secili prej jush ka një rol për të luajtur për të cuar vendin përpara dhe për këtë dua ti them urime, Shqipërisë dhe për këtë raport pozitiv, dhe me vërtet që ne të kemi raundin tjetër për prioritetet kyce që do të ndodhë në muajin shtator.

(ma.ar/d.b/er.nu/BalkanWeb)

[Albo]

KE rikonfirmon: Shqipërisë t’i jepet statusi. Zbardhet progres/raporti


TIRANE- “Bazuar në gjetjet e raportit, Komisioni Europian konfirmon rekomandimin e tij se Këshilli duhet t’i japë Shqipërisë statusin e vendit kandidat”. Ky është përfundimi i raportit të ri që Komisioni Europian ka hartuar pas kërkesës së dhjetorit të shkuar nga ana e vendeve anëtare. Tani pritet fjala e 28 shteteve anëtare të Bashkimit Europiane, më 23 Qershor.

Eurokomisioneri Stefan Fyle njoftoi dhënien e rekomandimit pa asnjë hezitim që Shqipëria të marrë statusin e vendit kandidat për në BE. Në fillim të takimit të Dialogut të Nivelit të Lartë mbi Përparësitë Kyçe për Shqipërinë, komisionari Fyle vlerësoi progresin e bërë nga qeveria e mëparshme dhe qeveria aktuale në muajit e fundit.

Ndërkohë Kryeministri Rama njoftoi në rrjetin social 'Twitter' se KE ka dhënë një "PO" të forte pa rezerva për Shqipërinë.

Raporti i KE-së është i fokusuar në vlerësimin e përparimit të bërë në tre fusha kyçe: Në luftën kundër korrupsionit, krimit të organizuar dhe në reformat në sistemin gjyqësor.

“Shqipëria ka vazhduar të zbatojë dhe të konsolidojë masat e saj përsa i përket reformave që lidhen me BE-në, veçanërisht ato që lidhen me statusin kandidat. Ka patur një vullnet të vazhdueshëm politik për të vepruar me vendosmëri në parandalimin dhe luftën kundër korrupsionit dhe reformat strukturore dëshmojnë një qasje gjithëpërfshirëse ku janë bërë pjesë një gamë e gjerë institucionesh. Reforma të rëndësishme legjislative janë ndërmarrë në luftën kundër krimit të organizuar dhe hetimet kanë dhënë rezultate pozitive në luftën kundër trafikut të lëndëve narkotike dhe fusha të tjera të krimeve të rënda dhe krimit të organizuar. Shqipëria ka dëshmuar angazhimin e vet për reformën e sistemit gjyqësor, veçanërisht duke punuar me Komisionin e Venecias për të përmirësuar pavarësinë, përgjegjshmërinë dhe profesionalizmin e sistemit”, - vlerëson raporti.

Dokumenti i Komisionit ndalet edhe në atë se çfarë Shqipëria duhet të bëjë për të ecur më tej në procesin e integrimit europian.

“Eshtë e rëndësishme që qasja sistematike ndaj reformave të vazhdojë ndërsa rezultatet e qëndrueshme do të jenë të një rëndësie kyce për integrimin e saj të mëtejshëm europian. Ky raport ka identifikuar ndërkohë një numër sfidash kyçe, thelbësore që Shqipëria të përparojë më tej me vendosmëri në rrugën e saj të integrimit europian”, -nënvizon raporti.

HYRJE
Raporti aktual është një përgjigje për përfundimet e Këshillit të datës 17 dhjetor 2013 ku thuhet: “Këshilli do të shqyrtojë bazuar në një raport të paraqitur nga Komisioni, do të ndjekë vazhdimin e zbatimit të strategjisë dhe reformave antikorrupsion dhe reformës në drejtësi, si dhe adaptimin e legjislacionit përkatës, por gjithashtu dhe hetimet proaktive dhe ndjekjet penale në fushën e krimit të organizuar. Në bazën e këtij raporti, dhe në sajë të progresit inkurajues që ka bërë Shqipëria, këshilli do të ecë përpara me vendimin e për të garantuar statusin kandidat në qershor 2014, i cili do të mbështetet nga Këshilli Europian”.

Në një linjë me kërkesën e Këshillit ky raport fokusohet kryesisht në luftën kundër korrupsionit, krimit të organizuar dhe reformës në drejtësi dhe nënvizon sfida zhvillime kyçe në këto fusha që janë të rëndësishme për integrimin e Shqipërisë në BE. Ky raport mbulon kohëzgjatjen që nga publikimi i progres-raportit më të fundit dhe bazohet në informacione të mbledhura dhe të analizuara nga Komisioni duke përfshirë të dhëna të marra nga zhvillimet në vend, vëzhgime specifike dhe kontakte të vazhdueshme me vendet anëtare të BE, si dhe organizatat ndërkombëtare.

Gjatë periudhës së hartimit të raportit, qeveria shqiptare ka treguar veprime konkrete dhe vullnet politik të vazhdueshëm për reformat që kanë të bëjnë me integrimin në BE, duke përfshirë, një gamë të gjerë çështjesh. Në nëntor qeveria dhe opozita bashkuan forcat për të miratuar rezolutën për integrimin në Bashkimin Europian. Të dy palët që prej asaj kohe kanë mbështetur vazhdimisht integrimin në BE, megjithatë krijimi i këtij konsensusi është goditur nga klima e acaruar gjithnjë e në rritje midis qeverisë dhe opozitës, që solli tërheqjen e palëve përkatëse nga disa votime të rëndësishme në komisionet parlamentare.

Në nëntor, Dialogu i Nivelit të Lartë për prioritetet kyçe filloi për t’i dhënë mbështetje procesit të integrimit të Shqipërisë në BE, duke u bazuar në reformat prioritare kyçe. Në një takim të dytë të Dialogut të Nivelit të Lartë, në fillim të marsit Shqipëria paraqiti një strategji, duke theksuar përpjekjet afatshkurtëra të Shqipërisë për arritjen e prioriteteve kyçe për hapjen e negociatave për anëtarësim. Në takim si qeveria dhe opozita treguan vullnet konstruktiv përsa i përket reformave që kanë lidhje me BE-në.

ILDKP DHE SHKARKIMET NGA ADMINISTRATA
"Zhvillimet e fundit", kështu e cilëson një kapitull mbi Shqipërinë raporti i KE, duke përmendur Ligjin për Shërbimin Civil që u miratua në 26 Shkurt të vitit 2014 dhe hyri në fuqi në 1 Prill.

Ky ishte një hap i madh me qëllim rritjen e profesionalizmit dhe meritokracisë, evidentimin dhe luftën ndaj korrupsionit në radhët e administratës. Nga muaji tetor e më pasi pati shkarkime nga largime administrata duke sjellë shkaktuar dhe tensione politike.
Përballë kësaj situatë, qeveria ngriu cdo rekrutim të ri në punë në administratë deri në muajin korrik deri në realizimin e transparencës së plotë të ligjit për Shërbimin Civil.

Ndërkohë respektimi i plotë i legjislacionit dhe të vendimeve të gjykatave mbetet celësi. Parlamenti ka marrë masa për të forcuar rolin e tij ndaj institucioneve të pavarura. Është thelbësore që legjislacioni të implementohet dhe profesionalizmi në këto institucione të zgjerohet.
Është thelbësore që procedura e zgjedhjes së krerëve të institucioneve me shumicë të thjeshtë në parlament mbetet një cështje shqetësuese, sepse rrezikon pavarësinë e këtyre institucioneve.
Ndryshe nga cështja e legjislacionit të Inspektoratit të Lartë për Deklarimin e Pasurive dhe Konfliktit të Interesit, projektligji i ri do të përfitojë nga rishikimi i ekspertëve ndërkombëtar.

Më pas, raporti thekson dhe zhvillimet në ekonomi, ku thekson ngritjen e një Këshilli Kombëtar për Ekonominë, ndërsa theksohet se stabiliteti makroekonomik vazhdon të rritet nga një politikë të shëndoshë monetare dhe qëndrime të inflacionit në nivele të ulëta.
Marrëveshja e arritur me FMN, theksohet në raport, do të ulë nivelin e borxhit të madh brenda 3 vjetësh dhe do të mundësojë reforma në taksa, pensione dhe sistemin energjetik. Tashmë reformat kanë nisur dhe po mblidhen të ardhura nga tatimet dhe doganat.

POLITIKAT ANTI-KORRUPSION
Që prej tetorit, autoritetet shqiptare kanë forcuar më tej kuadrin ligjor dhe institucional – anti korrupsion. Në muajin nëntor u emërua Koordinatori Kombëtar për Luftën Kundër Korrupsionit, e cili koordinon veprimtaritë e organizmave shtetërore dhe institucioneve të pavarura, në nivel qendror dhe në nivel lokal. Me qëllim lehtësimin e këtij procesi, është krijuar një rrjet me pikat e kontaktit anti-korrupsion në të gjithë ministritë e linjës, si dhe në institucionet e pavarura.
Në muajin prill, Koordinatori Kombëtar për Luftën Kundër Korrupsionit përfundoi Strategjinë Kombëtare Anti– korrupsion, strategji e cila u konsultua gjerësisht me përfaqësues të shoqërisë civile dhe me përfaqësues të sektorit privat. Kjo strategji pritet të miratohet. Strategjia duhet që të vijohet me plane veprimi gjithëpërfshirëse. Nëpërmjet ndryshimeve në Kodin e Procedurës Penale, të miratuara në muajin mars, kompetencat për veprat penale të korrupsionit nga zyrtarë shtetërorë të nivelit të lartë i kanë kaluar Prokurorisë për Krimet e Rënda dhe Gjykatës për Krimet e Rënda, me përjashtim të veprës penale të shpërdorimit të detyrës.

Korrupsioni aktiv dhe pasiv nga gjyqtarë, prokurorë, zyrtarë të drejtësisë, zyrtarë shtetërore të nivelit të lartë si dhe përfaqësues të zgjedhur vendorë, tashmë gjejnë zbatim në juridiksionin e Gjykatës për Krimet e Rënda, për t’i dhënë më tepër fokus korrupsionit të nivelit të lartë. Mbetet që në legjislacion të përcaktohet përkufizimi “zyrtarë të nivelit të lartë” dhe “zyrtarë të zgjedhur vendorë”.

Lidhur me bashkëpunimin ndërmjet agjencive të zbatimit të ligjit për anti-korrupsionin dhe krimin e organizuar, në dhjetor u nënshkrua një Memorandum Mirëkuptimi ndërmjet Prokurorit të Përgjithshëm, Ministrisë së Punëve të Brendshme dhe Shërbimit Informativ Shtetëror, për qëllim krijimin e një platforme të përbashkët për rritjen e hetimeve pro-aktive.

Duke e përmbledhur, bashkëpunimi ndërmjet agjencive ligj - zbatuese duhet që të rritet, duke përfshirë një sistem të sigurt për shkëmbimin e informacionit me qëllim rritjen e efikasitetit të hetimeve. Në muajin prill, numri i Prokurorëve anti - korrupsion në Prokuroritë Rajonale u rrit nga 22 në 33.

Në lidhje me arritjet, numri i rasteve për korrupsion të referuar në prokurori nga Policia e Shtetit është rritur me 16% në periudhën nga tetori 2013 deri në mars 2014, e krahasuar me të njëjtën periudhë të vitit të kaluar.

Dënimet e dhëna nga gjykatat e qarqeve janë ulur me 8% në të njëjtën periudhë, ndërsa dënimet në Gjykatat e Apelit janë rritur me 81%.

Aktualisht, janë në procedurë 5 hetime në sistemin gjyqësor dhe është dhënë një vendim në sistemin gjyqësor në apel.

Lidhur me zyrtarët shtetërore të nivelit të lartë dhe zyrtarët e zgjedhur vendor, në gjykatë janë në procedim pesë raste me 25 të pandehur dhe dy raste janë nën hetim për shpërdorim detyre,si dhe vepra të tjera të lidhura me to.

Gjithsej, numri i hetimeve dhe dënimeve mbetet i ulët, veçanërisht lidhur me rastet e korrupsionit tek zyrtarët e nivelit të lartë. Megjithëse është kryer një numër i madh hetimesh për veprat penale të korrupsionit, nuk rezulton se janë dhënë vendime të formës së prerë, duke theksuar në këtë mënyrë nevojën për të forcuar pavarësinë, efikasitetin dhe përgjegjshmërinë e gjyqësorit dhe nevojën për të forcuar kapacitetin e policisë dhe të prokurorisë.

Për të nxjerrë në pah mangësitë në efikasitetin e hetimeve dhe bashkëpunimit ndërmjet agjencive, në maj u vendos që të zhvillohen takime mujore të kryesuar nga Prokurori i Përgjithshëm dhe Drejtori i Përgjithshëm i Policisë së Shtetit.

Gjithsesi, mbeten disa pengesa, si për shembull dispozitat ligjore lidhur me përgjimet dhe survejimet, afatet kohore për hetimet, pranimi i provave në gjykatë dhe mbi të gjitha hetimet vazhdojnë që të kenë një natyre reaguese. Kapacitetet për kryerjen e hetimeve nga agjencitë ligj - zbatuese duhet që të rriten, duke përfshirë trajtimin e krimit financiar dhe atij ekonomik.

Në kuadrin ligjor të tanishëm duhet që të përfshihen dispozitat ligjore të cilat lejojnë Policinë e Shtetit që të marrë informacion për qëllime hetimi nga institucione publike dhe organizma privatë, të cilët ofrojnë shërbime për publikun, si dhe të lejojë sanksione siguruese në rast të jo-zbatueshmërisë.

Shqipëria nxitet gjithashtu që të përfshijë veprën e pasurimit të paligjshëm, si një sinjal pozitiv. Duhet që të bëhen më tepër përpjekje lidhur me mekanizmat sanksionuese në rast se nuk zbatohet Memorandumi i Mirëkuptimit ndër-institucional.

Reforma e thellë gjyqësore e parashikuar do të jetë thelbësore në luftën kundër korrupsionit..

LUFTA KUNDËR KRIMIT TË ORGANIZUAR
Që prej muajit tetor, janë parashikuar disa ndryshime organizative në Policinë e Shtetit dhe në Prokurorinë e Përgjithshme dhe legjislacioni thelbësor është përgatitur për miratim.

Ky legjislacion mbulon fushat e organizimit policor dhe trajnime dhe kontrollin e armëve të zjarrit.

Në muajin mars u lancua konkursi i hapur për rekrutimin e stafit të ri për Policinë e Shtetit. Pavarësisht situatës së vështirë buxhetore, fondet e alokuara për pagat e policëve janë rritur me 10% në vitin 2014.

39 policë u përjashtuan nga puna në muajin shtator për arsye disiplinone. Lidhur me financimin e terrorizmit nëpërmjet krimit të organizuar, në strukturat e Policisë së Shtetit është krijuar një njësi antiterrorizëm.

Policia ka kryer operacione të suksesshme, në fushën e luftës kundër lëndëve narkotike, trafikimin e qenieve njerëzore, pastrimin e parave dhe kapjen e lëndëve eksplozive në vend dhe ka marrë pjesë në operacione të ngjashme jashtë vendit.

Në fushën e bashkëpunimit policor ndërkombëtar dhe gjyqësor, në janar është ratifikuar Protokolli i Katërt Shtesë i Konventës Evropiane për Ekstradimin.

Rreth 25 komisione nga vende anëtare të Bashkimit Evropian kanë vizituar Shqipërinë nga muaji tetor 2013 deri në fund të prillit 2014. Në të njëjtën periudhë, 34 persona u ekstraduan drejt Shqipërisë nga vendet anëtare të Bashkimit Evropian, ndërsa autoritetet shqiptare kanë ekstraduar 49 persona drejt vendeve anëtare të Bashkimit Evropian.

Një protokoll operacional është nënshkruar ndërmjet Policisë së Shtetit dhe Departamentit për Sigurinë Publike të Ministrisë së Brendshme të Italisë. Shqipëria po bashkëpunon me Italinë dhe me Greqinë për të krijuar një qendër të përbashkët për bashkëpunimin policor për të kontrolluar veprimtaritë e paligjshme ndërkufitare në Sarandë.

Janë zhvilluar takime të rregullta me oficerë kontakti të vendeve partnere për shkëmbim informacioni lidhur me hetimet e pasurive kriminale.

Në muajin dhjetor është nënshkruar marrëveshja për bashkëpunimin operacional dhe është ratifikuar nga Shqipëria në 20 mars. Shkëmbimi i informacionit është lehtësuar nga oficeri i kontaktit shqiptar i vendosur pranë Europol.

Gjatë periudhës raportuese, Shqipëria ka marrë pjesë në një operacion policor ndërkombëtar, i mbështetur nga Europol, për zbulimin e automjeteve të vjedhura dhe të trafikuara. 24 autorë janë ndjekur penalisht. Autoritetet duhet që të përdorin në mënyrë aktive të gjithë instrumentet e disponueshme mbi bashkëpunimin ndërkombëtar dhe të rrisë vendosjen e ekipeve të përbashkëta hetimore.

Kapacitetet për të përdorur teknikat speciale të hetimit duhet që të forcohen lidhur me kuadrin ligjor dhe procedural.

Lidhur me luftën kundër trafikimit të qenieve njerëzore, Zyra e Koordinatorit Kombëtar Kundër Trafikimit ka rivitalizuar mekanizmin referues, duke intensifikuar veprimtaritë në fushën e parandalimit të rritjes së ndërgjegjësimit, si dhe po finalizon strategjinë e re kombëtare dhe planin e veprimit për 2014-2016.

Në vitin 2014 Zyra e Koordinatorit Kombëtar Kundër Trafikimit ka marrë buxhetin e saj për herë të parë. Tre njësi të lëvizshme janë krijuar në Tiranë, Vlorë dhe Elbasan, që ka çuar në rritjen e identifikimeve të viktimave dhe viktimave të mundshme. Takimet e policisë rajonale me prokurorinë e krimeve të rënda zhvillohen një herë në muaj. Për të adresuar punën e detyruar dhe trafikimin e brendshëm, Inspektoriati i Punës ka filluar inspektimet e klubeve të natës në bashkëpunim me Policinë e Tiranës.

Një linjë e veçantë ndihme për viktimat e trafikimit është bërë operacionale në Mars dhe që prej Nëntorit 2013, duke mundësuar marrjen e ndihmës ligjore me 30% ulje në tarifën e avokatëve.

Amendimet e fundit të Kodit Penal mbi trafikimin e qenieve njerëzore duhet të zbatohen me një vëmendje të veçantë, strukturat përgjegjëse për zbatimin e tyre të fuqizohen dhe të intensifikohet hetimi i rasteve të trafikimit të brendshëm. Numri i dënimeve për trafikimin e qenieve njerëzore ka mbetur i ulët. Kapacitetet e vlerësimit të kërcënimit dhe riskut duhet të fuqizohen për të identifikuar viktimat e trafikimit me qëllimin për t’u përballur me këtë fenomen në mënyrë proaktive.

Për sa i përket luftës kundër pastrimit të parave, për periudhën tetor 2013 deri në mes të Prillit 2014, krahasuar me të njëjtën periudhë të vitit të kaluar, ka patur një rritje të lehtë të veprave të pastrimit të parave të referuara nga policia drejt prokurorisë me pothuaj të njëjtin numër autorësh. Gjithsesi, numri i dënimeve për pastrim parash mbetet i ulët.
Nga Tetori 2013 deri në fund të Marsit, Policia e Shtetit ka referuar në Prokurorinë e Krimeve të Rënda 45 raste për fillimin e hetimeve lidhur me asetet kriminale, një rritje e lehtë krahasuar me të njëjtën periudhë të vitit paraardhës. Hetimet financiare duhet të aplikohen sistematikisht dhe kapacitetet për t’i kryer ato në mënyrë efiçiente duhet të forcohen, gjë e cila do të sjellë më shumë asete kriminale të konfiskuara.
Për sa i përket krimit ekonomik, një operacion i madh policor u ndërmor nga Tetori në Dhjetor 2013, me objektiv lokalet e lojrave të paligjshme të fatit dhe çoi në hetimin e 720 veprave penale në fushën e krimit ekonomik dhe sekuestrimin e sasive të konsiderueshme të makinerive të lojrave të fatit me një vlerë totale prej 8.5 milion Euro. Sekuestrimet dhe konfiskimet e aseteve duhet të përdoren sistematikisht.
Kapaciteti i QNOD (Qendra Ndër-institucionale Operacionale Detare) për të monitoruar aspektet operacionale të luftës kundër krimit të organizuar është rritur përmes rinovimit të 7 radarëve bregdetarë, që mbulojnë të gjithë ujërat territorialë kombëtarë. TIMS, si një database online për shkëmbimin e informacionit ndërmjet agjencive ligj-zbatuese, funksionon plotësisht. Janë kryer trajnime të përbashkëta për aftësitë operacionale të personelit të shërbimit. Është e nevojshme një vëmendje e veçantë për sa i përket analizës së riskut për skadimin e moratoriumit të skafeve.

Për sa i përket luftës kundër drogës, Plani Kombëtar për kultivimin e drogave po zbatohet. Nga Tetori 2013 deri në fund të Marsit 2014, krahasuar me të njëjtën periudhë të vitit paraardhës, sekuestrimet e drogave kanë vazhduar, janë rritur sekuestrimet e marijuanës (18.8 ton vs. 13.6 ton) dhe kokainës (14.5 kg vs. 1.7 kg) dhe ulur sekuestrimi i heroinës (25.6 kg vs. 44.8 kg). Asgjësimet publike të drogave të sekuestruara janë kryer në Mars, Prill dhe Maj.
Në total, shtimi i operacioneve ka rritur paditë penale për trafikimin e drogave në të njëjtën periudhë. Hetimet për rastet e drogave duhet të shoqërohen sistematikisht me hetime paralele financiare. Kontrollet sistematike të intensifikuara të kufirit blu janë të nevojshme në mënyrë që të mbyllen rrugët e trafikimit të drogës. Bashkëpunimi ndërkombëtar me Italinë, Greqinë, Gjermaninë, Belgjikën, SHBA dhe Kosovën ka sjellë arrestimin e 51 të dyshuarve për trafik ndërkombëtar droge gjatë të njëjtës periudhe, krahasuar me 31 të arrestuar në të njëjtën periudhë të vitit të kaluar. Nevojitet intensifikimi i luftës kundër rrjeteve të trafikut të drogës përmes bashkëpunimit të mëtejshëm ndërkombëtar, dhe përdorimit të metodave speciale të hetimit, duke u bazuar në analizën e riskut dhe me hetime paralele financiare. Masa konkrete për të çrrënjosur plantacionet me bimë narkotike duhet të intensifikohen. Tregues të matshëm të performancës dhe rezultatet e pritshme duhet të shtohen në Planin Kombëtar kundër kultivimit të drogës.
Përgjithësisht, janë paraqitur ndryshime organizative dhe legjislacion i rëndësishëm në fushën e organizimit policor dhe trajnimeve dhe kontrollit të armëve të zjarrit është përgatitur për miratim. Bashkëpunimi policor dhe gjyqësor ndërkombëtar është intensifikuar nëpërmjet zbatimit të marrëveshjeve të ekstradimit. Mekanizmi kombëtar i referimit kundër trafikimit të qenieve njerëzore është rivitalizuar përmes rritjes së bashkëpunimit me autoritetet ligj-zbatuese.
Hetimet kanë sjellë disa rezultate pozitive në luftën kundër drogave, trafikimit të qenieve njerëzore dhe pastrimit të parave. Lufta kundër kultivimit të lëndëve narkotike duhet intensifikuar.
Për të përparuar më tej në mënyrë vendimtare drejt rrugës së integrimit në BE, Shqipëria do të duhet të zhvillojë më tej track-record-in e saj në luftën kundër krimit të organizuar përmes rritjes së bashkëpunimit ndërmjet agjencive, përmes përmirësimit të eficencës së hetimeve proaktive dhe përdorimit sistematik të hetimeve financiare, duke rritur bashkëpunimin ndërkombëtar dhe rajonal, dhe me EUROPOL-in, dhe duke intensifikuar përpjekjet për t’u përballur me të gjitha format e krimit të organizuar..

REFORMA NË SISTEMIN GJYQËSOR
Masat e reformës gjyqësore janë shpallur që në janar, për të rritur efektivitetin e sistemit gjyqësor. Shqipëria ka kërkuar bashkëpunimin e Komisionit të Venecias dhe për pesë prioritetet kryesore, përfshirë këtu një plan për të vënë në zbatim reformimin e sistemit gjyqësor.

Ka nisur procesi i hartimit të strategjisë për periudhën 2014-2020. Në shkurt, është themeluar një grup këshillues pune për reformën e sistemit gjyqësor brenda Ministrisë së Drejtësisë. Në muajin mars, Shqipëria i kërkoi Komisionit të Venecias të vlerësojë dy grupe amendamentesh për Kodin e Procedurës Civile dhe asaj Penale. Amendamentet fuqizojnë rolin e gjyqtarëve, të cilët mund të gjobisin avokatët që mungojnë në mënyrë të përsëritur së seancat gjyqësore, si civile dhe penale. Kurse grupi I dytë I amendamenteve Kurse grupi i dytë i amendamenteve kufizon llojet e ankesave të paraqitura në Gjykatën e Lartë.

Këto amendamente synojnë reduktimin e ngarkesës së punës së gjykatave dhe rritjen e efikasitetit të tyre, si dhe asistencën graduale të Komisionit të Venecias në një gamë të gjerë subjektesh.

Në përputhje dispozitat e Kodit të Procedurës Civile, në të shumtën e rasteve civile, në Gjykatë e Lartë po shqyrtohen nga një panel prej 3 gjyqtarësh.

Është e nevojshme që të merren masa për ta bërë sa më efikas funksionimin e Gjykatës së Lartë. Të ndryshojnë procedurat e aplikuara në Gjykatën e Lartë në lidhje me përbërjen e paneleve që shqyrtojnë çështjet penale, miratimin e dispozitave që synojnë reduktimin e numrit të ankesave, riorganizimin e vazhdueshëm brenda gjykatës si dhe të plotësohen vendet e mbetura bosh në 3 gjykata.

Publikimi për herë të parë i listës së gjyqtarëve është një tregues i rritjes së transparencës së sistemit për sa i përket emërimeve të tyre, promovimit dhe transferimit të gjyqtarëve. Vlerësimi i gjyqtarëve duhet të

Vlerësimi i gjyqtarëve duhet të nisë që nga periudha 2007-2009 dhe vitet pasuese. Masa shtesë nevojiten për të siguruar që procedurat brenda Këshillit të Lartë të Drejtësisë për emërimet, avancimet dhe transferimet e gjyqtarëve të bëhen në bazë të meritave të aplikantëve dhe kritereve të tjera objektive.

Sistemi elektronik i menaxhimit ICMIS, i dobishëm për të monitoruar ngarkesën e çështejve ende nuk është aplikuar në të gjitha gjykatat.

Vendimet gjyqësore duhet të jenë në dispozicion për të gjithë praktikuesit dhe publikun e gjerë. Vendimet gjithashtu duhet të publikohen në një bazë të dhënash të kërkueshme, me arsyetimet e tyre përkatëse dhe brenda një afati të arsyeshëm, si dhe në përputhje me rekomandimet e Komisionit për Mbrojtjen e të Dhënave.

Me ndryshimet në Kodin e Procedurës Penale në lidhje me korrupsionin e zyrtarëve të lartë përcaktohen procedurat për heqjen e imunitetit të tyre. Në rastin e gjyqtarëve të zakonshëm, autorizimi dhe kufizimi i takon
Këshillit të Lartë të Drejtësisë, që con kërkesë në prokurori. Ndërsa anëtarët e Gjykatës së Lartë dhe Kushtetuese për sa i përket kundravajtjeve dhe korrupsionit mbeten nën juridiksionin e Gjykatës së Lartë.

Në lidhje me 6 raste të dyshuara të korrupsionit brenda gjyqësorit, KLD ka dërguar informacion në Prokurorinë e Përgjthshme. Sistemi disiplinor duhet të forcohet, si dhe roli i roli i ministrit të Drejtësisë për sa i përket procedurave disiplinore.

Për sa i përket efikasitetit janë ngritur që në nëntor 2013 gjykatatat Administrative, por problem mbetet plotësimi i vendeve bosh të gjyqtarëve në 5 Gjykatat Administrative jashtë Tiranës.

Në përgjithësi, Shqipëria ka dëshmuar përkushtim për reformën gjyqësore. Në mënyrë të dukshme ka bashkëvepruar me Komisionin e Venecias për të përmirësuar pavarësinë, përgjegjshmërinë dhe profesionalizmin e sistemit. Disa përpjekje janë bërë për të zvogëluar ngarkesën e gjykatave dhe ngarkesat e punës në përgjithësi, si dhe rritjen e transparencës brenda gjyqësorit. Janë marrë masa për të promovuar 'përgjegjshmërinë e gjyqtarëve dhe prokurorëve përmes miratimit të procedurave për heqjen e imunitetit të tyre.

Për të avancuar më tej me vendosmëri në rrugën e saj të integrimit në BE, Shqipëria do të duhet të ndjekë rigorozisht reformën në drejtësi, permes bashkëpunimit me Komisionin e Venecias, miratimin e dispozitave të rëndësishme shtesë për të forcuar pavarësinë dhe përgjegjshmërinë.

Balkanweb

[mesuesi_1]

Nuk kuptoj se cfare lidhje ka opinioni i Arvizu-t me statutsin kandidat te shqiperis ne BE.
Nje ambasador qe fut hundet ne cdo ceshtje politike te vendit. I behet homazh dhe i jepet autoritet me shume se sa i takon pozicionit te tij prej dipllomati.
Se kam degjuar noiher ambasadorin amerikan ketu ne itali te jet kaq ne qender te vemendjes sa tek ne

sipas vendit behet kuvendi ..... pastaj mediat e shkruara dhe elektronike perse i kane ngritur ne kembe ne Shqiperi ,,,,?! pyete nje here Berlusken, qe prej shume vitesh "ormai" vishet me te zeza, se perse ka ngritur ne kembe perandorine e tij mediatike ...?! per te qene ne qender te opinonit publik .... ja, edhe arvixua ka mesuar dicka prej tij ....

[Xinxerfilli]

Per Albon kjo nuk eshte kryeteme, ndersa shkarkimi i Zanes apo vendimi per INUK na qenkan me te rendesishem.

[Qyfyre]

lajm i zi. ishalla sna pranojne