Halimi: Anulimi i koncesioneve antikushtetues, Rama shkel të drejtat e biznesit

[Albo]

Halimi: Anulimi i koncesioneve antikushtetues, Rama shkel të drejtat e biznesit

TIRANE - Ish-ministri i Drejtësisë, Eduard Halimi akuzon qeverinë “Rama” për shkeljen e të drejtave të bizneseve me vendimet për anulimin e koncesioneve.

“Vreri dhe hakmarrja politike, kanë verbuar Edi Ramën, i cili po shkel çdo ditë Kushtetutën e vendit dhe të drejtat kushtetuese të qytetarëve shqiptare.

Ashtu siç deklaroi dhe sot dhe po vepron prej 2 javësh, Edi Rama çdo ditë po anulon koncesionet e biznesit duke kërcënuar drejtpërdrejt, Kushtetutën e vendit, themelet e shtetit ligjor, ekonominë e vendit, biznesin dhe gjithë qytetarët shqiptarë”.

“Biznesi shqiptar, nëpërmjet koncesioneve të miratuara nga qeveria, ka fituar një të drejtë ligjore dhe kushtetuese që përbën garantimin e sigurisë juridike në një vend demokratik dhe shtet ligjor. Këto të drejta të fituara, nuk mund të injorohen, të mohohen apo shkelen, sepse në të kundërt, dhunohet drejpërdrejtë parimi kushtetues i sigurisë juridike”.

Sipas Halimit, vendimi për anulimin e koncesioneve është kryekëput një veprim i kryer në kundërshtim flagrant me Kushtetutën.
“Anulimi i koncesioneve që po bëhet nga verbëria e hakmarrjes primitive të Edi Ramës, është tërësisht, kryekëput një veprim i kryer në kundërshtim flagrant me Kushtetutën e vendit, dhe të paktën 5 vendime të Gjykatës Kushtetuese, 20/2006, 9/2007, 36/2007, 10/2008, 27/2010, pa përmendur këtu me dhjetra vendime të GJEDNJ-së, vendime këto që mbrojnë Kushtetutën, shtetin ligjor, sigurinë juridike, sistemin ekonomik të vendit, mbrojnë biznesin dhe qytetarët nga arbitrariteti i verbër i një politike hakmarrëse dhe dhunuese të biznesit. Vendime këto që kanë fuqi detyruese dhe kanë një qëllim të vetëm: Garantimin e dinjitetit njerëzor, drejtësisë dhe sigurisë juridike te qytëtareve shqiptare”.

Sipas Halimit, ky dëm do të paguhet me vendime të tjera gjykate, me dëme financiare në buxhet, dhe se Rama me shkeljet ë bën do të përgjigjet sipas Kushtetutës.
“Ky dëm antikushtetues dhe antiligjor që po i shkaktohet biznesit dhe ekonomisë së vendit, padyshim që do të paguhet siç parashikojnë me dhjetra vendime të GJEDNJ-së, të Gjykatës së Arbitrazhit Ndërkombëtar dhe të paktën 5 vendime të Gjykatës Kushtetuese të vendit, që kanë fuqinë e ligjit.

Por për këtë dëm financiar të jashtëzakonshëm, antikushtetues dhe antiligjor, që po shkakton Edi Rama me arbitraritetin e vetë, do të paguajë buxheti i shtetit dhe jo buxheti i Ramës. Do të paguajnë qytetarët shqiptarë me taksat e tyre, me paratë e tyre, nga xhepat e tyre dhe jo xhepi i Ramës apo ministrave të tij, që po dhunojnë Kushtetutën dhe ligjin.

Ligji dhe Kushtetuta janë të barabartë për të gjithë. Kush shkel ligjin dhe Kushtetutën duhet të përgjigjet”.

(d.b/BalkanWeb)