Qeveria e re merr votbesimin me 82 vota, Berisha bojkoton

[Albo]

Qeveria e re merr votbesimin me 82 vota, Berisha bojkoton

Edi Rama ka kaluar provën e parlamentit për ekipin e tij qeverisës duke marrë 82 vota pro, gati-gati një shumicë të cilësuar kur i duheshin vetëm një shumicë e thjeshtë prej 71 votash për të marrë votbesimin. Nga 137 deputetë të pranishëm në sallë 82 deputetë kanë votuar pro, 55 kundër.

Votimi është paraprirë nga debate dhe replika mes dy palëve, kryesisht mes ishkryeministrit Berisha dhe kryeministrit Rama. Debati ka nisur të shtunën në orën 10 për tu ndërprerë vetëm sot pasdite me votimin e qeverisë.

Ish-kryeministri Sali Berisha propozoi që diskutimet për programin qeverisës të shtyhen, pasi sipas tij, mazhoranca nuk ka një program të qartë për 100 ditët e para të qeverisjes. Por propozimi i tij u hodh poshtë nga kryetari i parlamentit Ilir Meta, i cili tha se meraku i ish-kryeministrit Berisha është që pasardhësi i tij të shkojë në Bruksel si kryeministër i dekretuar dhe i pavotuar në Kuvend.

Rama-Berisha “bashkëpronarë” të foltores së fjalës

Dy kundërshtarët politikë Rama dhe Berisha kanë qenë në fakt dhe protagonistët kryesorë të debatit dhe kanë marrë më shumë kohë fjalë në foltoren e Kuvendit.

Para votimit Kryeministri i dekretuar Edi Rama u ka bërë thirrje deputetëve të parlamentit të votojnë programin. Ftesa iu drejtua veçanërisht opozitës. Gjatë fjalës së tij, në sallë mungonte Edi Rama. “Ju ftoj të vazhdojmë bashkë me programin. Dua të vijojmë bashkë për të rilindur këtë vend, por ju ende vijoni të kërkoni për të gjetur kokën.”

Sipas Ramës, fjalimet e opozitës u ngjasojnë atyre që vazhdojnë shkolla nate, ndërsa reagoi ndaj akuzave për dhunë që janë bërë në adresë të tij.

“Jo sikur sapo kanë dalë nga një i atillë dru i popullit por ju nuk e dini ku e keni kokën. Më mirë vijoni të gërmoni të gjeni ku keni kokën. Më akuzuat se ushtroj dhunë, por nuk keni parë ende asgjë”.

Rama nuk anashkaloi dhe krahasimin që opozita i bën atij me Papandreun në Greqi duke thënë se “tjetër jam unë dhe tjetër Papandreu”, tha Rama në fjalimin e tij në përmbyllje të seancës maratonë mbi programin qeverisës të mazhorancës për vitet 2013-2017.

Duke sqaruar në lidhje me këtë argument, se krahasimi që opozita po bën mes tij dhe ish-kryeministrit grek, Jorgos Papandreu, nuk qëndron aspak. Sipas Rama, Shqipëria nuk është si Greqia, dhe se ai nuk do të bëjë atë që bëri Papandreu.

Rama krahasoi qeverisjen e djeshme Berisha me kabinetin që do të trejtojë vendin. Sipas kryeministrit të ri, dallimi kryesor është paaftësia. Ndërsa kërkesave të opozitës që ai të pranojë reformat që ka bërë qeveria e shkuar Rama iu përgjigj me një batutë: “Mirë kundërshtarët, po një popull i tërë si nuk i paska parë tërë ato suksese për të cilat ne akuzohemi si nihilistë?! Si ka mundësi që “recituesit” e sotëm kanë tetë vjet me këtë nivel që edhe në Universitetin “Vitrina” e kanë vështirë ta përkthejnë duke dhënë edhe lekë në dorë”.

Rama ftesë Dashamir Shehit

Kryeministri i ri i ka bërë ftesë deputetit të LZHK-së Dashamir Shehi që të bëhet pjesë e qeverisjes duke kontribuar me propozimet e tij. “I nderuar z.Shehi! Unë jam dakord me ju që reforma territoriale është jetike për vendin, qysh prej një dekade, por për arsyet e mosarsyet e PD-së, ky plan që s’u miratua dhe as u propozua, “bujrum”, z.Shehi, ne e duam këtë reformë të shtetit. Ne e dimë që kjo kërkon një shumicë kushtetuese, prandaj jeni i mirëpritur në Qeveri për diskutimin paraprak të kësaj reforme, ashtu siç janë të mirëpritur të gjithë deputetët e opozitës për këtë reformë. Doni të bashkohemi për reformën e pronave? Bujrum në tryezë t’i diskutojmë bashkë. Nuk ka pasur kurrë gjithpërfshirje të parlamentit për zgjidhjen e pronës”, tha Rama.

Mapo

[Albo]

Pas betimit, Rama hyn në zyrë me fishekzjarre dhe brohoritje

Një ceremoni ndryshe ka qenë ajo e betimit të qeverisë së re sot në Presidencë. E organizuar në momentet e fundit, kryeministri Edi Rama nuk i ka shpëtuar dot dëshirës për ta bërë sa më festive hyrjen në godinën e kryeministrisë. Ai ka zgjedhur që të ecë në këmbë së bashku me ministrat nga Presidenca në Kryeministri pasi rruga ka qënë mbushur me simpatizantë të majtë që përshëndesnin qeverinë e re. Para afro një mijë vetave, në mes të cilëve ishin dhe deputetët e majtë, Rama ka mbajtur një fjalim në shkallët e kryeministrisë për tu ngjitur më pas në zyrë, ku po mban ndërkohë mbledhjen e parë zyrtare të kabinetit. Ndërkohë ndryshimi ka nisur në funksionimin e kësja godine, ku si nisje ka ndryshuar faqja zyrtare e internetit km.al siç shihet në foto.

Kabineti i ri qeveritar

1. Edi Rama, Kryeministër

2. Niko Peleshi, zëvendëskryeministër

3. Ditmir Bushati, ministër i Punëve të Jashtme

4. Mimi Kodheli, ministre e Mbrojtjes

5. Saimir Tahiri, ministër i Punëve të Brendshme

6. Klajda Gjosha, ministre e Integrimit Evropian

7. Shkëlqim Cani, ministër i Financave

8. Edmond Haxhinasto, ministër i Transportit dhe Infrastrukturës

9. Eglantina Gjermeni, ministre e Zhvillimit Urban dhe Turizmit

10. Arben Ahmetaj, ministër i Zhvillimit Ekonomik, Tregëtisë dhe Sipërmarrjes

11. Lindita Nikolli, ministre e Arsimit dhe Sportit

12. Nasip Naço, ministër i Drejtësisë

13. Mirela Kumbaro Furxhi, ministre e Kulturës

14. Erion Veliaj, ministër i Mirëqenies Sociale dhe Rinisë

15. Damian Gjiknuri, ministër i Energjisë dhe Industrisë

16. Edmond Panariti, ministër i Bujqësisë, Zhvillimit Rural dhe Administrimit të Ujërave

17. Ilir Beqja, ministër i Shëndetësisë

18. Lefter Koka, ministër i Mjedisit

MAPO

[Albo]

Parlamenti i batutave…

Në Kuvendin e Shqipërisë më shumë se diskutime të mirëfillta ligjvënësish me karakter politik, ka batuta dhe ironi personale mes dy palëve. I përkthyer në batuta séance e stërgjatë e nisur të shtunën në mëngjes dhe e përfunduar të dielën pasdite sjell një tablo se si deputetët zgjedhin të tërheqin vëmendjen e publikut dhe të kundërshtarit me batuta ironike apo fyerje e etiketime personale….

Më poshtë disa nga batutat më pikante të dy ditëve debat:

Paloka për Ramën: Por si do hyjë në histori zoti Rama? Të gjithë e dinë se ai ka një kompleks inferioriteti ndaj zotit Berisha. Ëndërron të bëhet ndopak si z Berisha por sado i gjatë të jetë, Berishës nuk do i vijë dot as deri tek mesi. Nga nesër nuk fillon rrumpalla por rrampalla.

Paloka-Blushit: “Ne nuk kemi një qeveri. Kemi një njeri që i pëlqen të quhet koka se PS, i cili e ka gjetur kokën se dje ishte i shqetësuar. Njërit nga qoshja i bërtet i thotë pse qeshe, pastaj i bërtet i thotë pse nuk qeshe. Ministrat i përdor për të dërguar letrat, apo shishe uji. Ti Blush nuk pse mërzitesh që nuk u bërë ministër në këtë qeveri se nuk do ishe gati ti bëje këto detyra”.

Berisha- Blushit: “As Sali Berisha dhe asnjë prej nesh nuk është i mundur. Ne jemi të pathyeshëm dhe të pamposhtur”.

Blushi iu përgjigj: “Se kuptova pse dole këtu. Ti je njeri që lexon, por dua të të them diçka që se ke lexuar; Kur Don Kishoti fillojë të lexojë, u bë “xhentleman”, kur filloi të besonte ato që lexonte, u bë qesharak. Unë kam një këshillë për ty, mos i beso të gjitha ato që lexon, qoftë edhe nga programi i qeverisë.”

Rama ironi me Berishën: Pas fjalimit të Berishës, Rama shkon për replikë në foltore por sheh se aty janë dokumentat që kishte lënë parafolësi. Rama urdhëron ministren Harito t’i çojë ish-kryeministrit Berisha dokumentat.

“Kur ha 1 milion shuplaka mendja o të ikën o të vjen dhe pale vite duhen për t’i kapur”, thotë Rama duke dorëzuar dosjen në duart e Haritos. Ironia nuk merr fund këtu. Ndërsa një vajzë e stafit të parlamentit i ofron një shishe ujë të pijshëm, Rama shprehet. “Çoja atij, ai ka nevojë, nuk kam nevojë”, tha kryeministri i dekretuar duke vijuar më pas fjalimin.

Berisha në greqisht:”Empros Andrea e pise Edi! Pwrktheja Anastas”

Flamur Noka për Saimir Tahirin: Zoti Rama, ju i servirni shqiptarëve, si ministër të Brendshëm, një individ depresiv që ka tentuar suicid dhe që për këtë është mjekuar në spitalin San Martino në Xhenova.

Sajmir Tahiri: Parafolësi është i vetmi në këtë Parlament që ka studiuar më shumë për shëndetësinë. I ka filluar studimet në diktaturë dhe i mbaroi me anëtarësimin në NATO. 17 vjet shkollë.

Flamur Noka: Për sa i përket zbatimit të ligjit, pyet rojet e Kuvendit të tregojnë ku e ke lënë makinën dhe sa e respekton ligjin.

Eduard Halimi: Zotëria që foli para, nuk është ministër. Ishin dje ministra në Kosovë, po nuk janë ministra sot në Parlament. Ata nuk e kanë të drejtën kushtetuese të ndërhyjnë deri kur të bëjnë betimin.

Erjon Braçe: Po pusho, ore thuthuq! Edhe në opozitë ti kërkon t’i ndalosh fjalën ministrit.

Edi Paloka: Zoti Meta, ju nuk po ndiqni rregullin e diskutantëve, kanë folur tre nga PD-ja dhe asnjë nga maxhoranca. Ne kemi një raport dhe kemi llogaritur kohën dhe ju nuk mund ta bëni këtë lojë.

Ilir Meta: Kjo është hera e parë që kritikohet një kryetar Kuvendi pse i jep prioritet opozitës, në vend të ankohen socialistët.

Edi Paloka: Ju e kuptoni që s’po e bëni për t’i dhënë prioritet opozitës, kërkoni që në orarin që s’ka dëgjueshmëri, të kaloni deputetët e PD-së. Kjo nuk është një lojë që mund të bëhet.

Erjon Braçe: Ju doni të shihni dhe sportin, dhe të debatoni.

Taulant Balla: Ju kanë ikur deputetët të shohin Bajernin dhe s’ua kemi ne fajin.

Ilir Meta: Unë jam i ri në këtë detyrë dhe nuk e di që ndikon orari. Do ta balancojmë, ne bashkë jemi marrë vesh në mënyrën më perfekte. (Deputeti i Partisë Socialiste i kërkon kreut të Parlamentit të heqë monitorët e kompjuterave nga tavolina)

Xhemal Qefalia: O zoti kryetar, këto kompjuterat që nuk përdoren, a mund t’i heqim fare nga tavolina? Na pengojnë.

Ilir Meta: Kjo është një çështje që do të zgjidhet në vijim (qeshin deputetët në sallë).

Liliana Elmazi: Si deputet i Vlorës do t’i kërkoja zotit Rama të bënte më shumë se zoti Berisha për këtë qytet, por nuk kam se si, sepse nuk e besoj se thjesht gjatësia trupore ta dallojë nga kryebashkiaku që ka ofruar modelin Vlora.

Voltana Ademi: Një vlerësim të përgjithshëm për palo– programin që kemi në dorë… Tek e lexon, të kujton shprehjen e baballarëve tuaj “shqiptarët nën qeverisjen tonë do të hanë me lugë floriri!”

Arta Dade: Me sa kuptova nga parafolësja, Shkodra ka votuar masivisht edhe kundër ish-prefektes.

MAPO

[Albo]

Profil, Edi Rama, kryeministri i ri i Shqipërisë


TIRANË - Edi Rama, kryeministri i ri i Shqipërisë, ka lindur në Tiranë, më 4 korrik 1964. Ai është i martuar me zonjën Linda Rama dhe kanë dy fëmijë, Gregun dhe Rean.

Edi Rama ka një karrierë të larmishme në arte, sport, mësimdhënie, publicistikë dhe politikë. Ka qenë pedagog i pikturës në Akademinë e Arteve, lojtar i ekipit kombëtar të basketbollit, autor i librave "Refleksione" në bashkëpunim me Ardian Klosin, botuar fill pas rënies së diktaturës, dhe "Kurban", botuar në vitin 2011. Po ashtu, Edi Rama ka botuar edhe dy libra arti me krijimet e tij në bashkëpunim me artistin e njohur Anri Sala, si dhe është autor e pjesëmarrës i shumë ekspozitave nëpër botë.

Përfshirja e Edi Ramës në jetën publike dhe politike zë fill me lëvizjen për demokraci që rrëzoi regjimin komunist në Shqipëri, ku ai ishte një nga zërat më të spikatur publikë, por edhe një drejtues i njohur i lëvizjes studentore në Akademinë e Arteve.

Pas një largimi disa vjeçar jashtë Shqipërie ku iu përkushtua jetës artistike, por kritik aktiv në shtyp i qeverisjes së parë post-komuniste, Edi Rama hyri në politikë si Ministër i Kulturës, Rinisë dhe Sporteve në vitin 1998. Gjatë periudhës që drejtoi këtë ministri, ai fitoi mbështetjen dhe vlerësimin e publikut shqiptar për mënyrën kreative dhe të efektshme të promovimit të artit dhe kulturës në Shqipëri.

Në vitin 2000, Edi Rama kandidoi për Bashkinë e Tiranës me mbështetjen e Partisë Socialiste, duke shënuar një fitore të thellë ndaj rivalit të tij. Pas fitores, ai ndërmori një fushatë transformimi dhe rigjenerimi të kryeqytetit duke rikthyer hapësirat publike të pastruara nga ndërtimet pa leje, duke shtuar hapësirat e gjelbra dhe përgjithësisht duke sjellë një vizion dhe frymë të re administrimi të punëve të kryeqytetit. Nën lidershipin e Edi Ramës, Bashkia e Tiranës u kthye në një institucion modern evropian. Projektet e tij për futjen e ngjyrës në hapësirën publike përmes fasadave të rrënuara të banesave popullore të periudhës komuniste, rehabilitimi i shtratit të Lumit Lana, shtimi i parqeve dhe hapësirave të gjelbra në kryeqytet dhe rindërtimi me standarde të reja projektimi i rrjetit rrugor të Tiranës janë vlerësuar me një sërë çmimesh ndërkombëtare, ku mund të përmenden, World Mayor Award (2004) dhe European Hero Aëard i revistës Time. Edi Rama u rizgjodh sërish Kryetar i Bashkisë Tiranë në vitin 2003 dhe 2007 dhe për 11 vjet drejtoi kryeqytetin e Shqipërisë.
Në vitin 2005, Edi Rama u zgjodh Kryetar i Partisë Socialiste të Shqipërisë, të cilën e udhëhoqi gjatë viteve të vështira në opozitë dhe në fitoren plebishitare të 23 qershorit 2013.

(d.b/BalkanWeb)

[Albo]

Basha: Qeveria e Ramës mbeti në klasë

Kryetari i PD-së Lulzim Basha ka reaguar pas votimit të qeverisë duke deklaruar se ajo nuk e kaloi provën e opozitës. Në një aludimpër krahasimin që Rama i bëri opozitës si “shkollë nate” Basha tha se “qeveria mbeti në klasë”.

“Qeveria e Ramës kaloi sot në Kuvend të ashtuquajturin program të saj me numrat që ka në Kuvend. Por mbeti në klasë në provën e gjykimit të shëndoshë dhe profesional të opozitës”, u shpreh sot kreu i Partisë Demokratike, Lulzim Basha, në faqen e tij në “Facebook”.

“Për dy ditë me radhë deputetët e Partisë Demokratike dhe partive aleate demostruan me fakte të pakundërshtueshme se qeveria Rama nuk ka program. Kjo është e para qeveri në historinë e demokracisë së re shqiptare që starton pa program pune, pa program zhvillimi, pa objektiva të mbështeur në burime konkrete, pa kalkulime konkrete, pa afate. Starton, si të mos ishte qeveri e një vendi të NATO-së, e që pason dhjetë qeveri demokratike në këtë vend, që kanë lënë secila shenjën e vet në përparimin e Shqipërisë, por si të ishte një qeveri që, “zbret nga mali”, shkruan Basha.

Sipas tij, “për dy ditë me radhë deputetët tanë hodhën dritë me fakte konkrete se manifesti që qeveria e konsideron program përfaqëson një listë të gjatë tërheqjesh e modifikimesh të premtimeve elektorale që Rama e të tijët kanë bërë në fushatë”.

“Kjo është e para qeveri që tërhiqet pa filluar punë akoma nga një numër i madh premtimesh të votuara, duke vendour që tani me qytetarët dhe me dinjetetin e tyre raportin e gënjeshtrës dhe mashtrimit pa dridhje qerpiku”, vijon Basha.

“Unë besoj se në përballjen e parë të këtyre përmasave në aulën e Kuvendit midis të ashtuquajtures rilindje të zotit Rama dhe opozitës, qeveria mbeti në klasë edhe në provën e gjykimit të shëndoshë të bashkëqytetarëve. Mbeti në klasë pikërisht se nuk ka program, pikërisht se ka mashtruar pa kufi për të marrë vota”, shkruan ai.

MAPO