Lajme - Njohuri - Të Reja

[drini_në_TR]

Themelohet Qendra për Zhvillime Strategjike “Ahmet Krasniqi”: Do të zhvillojmë arsimin dhe kulturën

PRISHTINE, 31 mars - Sot në Prishtinë u bë konstituimi i Qendrës për Zhvillime Strategjike “Ahmet Krasniqi”. Kjo organizatë rinore, jopolitike e joprofitabile, synon të japë kontribut për zhvillimin e arsimit dhe të kulturës dhe do të mbështesë talentët e rinj në këto fusha.
“Aktiviteti i qendrës do të orientohet në ngritjen arsimore, shkencore e kulturore të talentëve të rinj kosovarë, përmes seminareve e programeve të ndryshme”, tha Ermal Mehaj, themelues i qendrës për zhvillime strategjike “Ahmet Krasniqi”. Udhëheqësit e kësaj qendre bënë të ditur se kjo organizatë është certifikuar më 12 shkurt të këtij viti, ndërkohë që po sot u zgjodhën edhe organet drejtuese të organizate.

[drini_në_TR]

Akademia e Shkencave të Kosovës dhe ajo e Shqipërisë nënshkruajnë protokoll bashkëpunimi


PRISHTINE, 21 shkurt - Akademia e Shkencave dhe Arteve të Kosovës dhe Akademia e Shkencave e Shqipërisë nënshkruan sot në Prishtinë marrëveshjen për bashkëpunim kërkimor-shkencor dhe artistik midis dy akademive. Protokolli i bashkëpunimit u nënshkrua nga dy nënkryetarët e këtyre institucioneve, Besim Bokshi për Kosovën dhe Luan Omari, për Shqipërinë.
“Nënshkrimi i këtij protokolli do të jetë shumë i nevojshëm për bashkëpunim të ndërsjelltë mes Shqipërisë dhe Kosovës në fushën e shkencës dhe artit”, deklaroi para të pranishmëve, nënkryetari i Akademisë së Shkencave në Shqipëri, Luan Omari.
Me rastin e nënshkrimit të kësaj marrëveshje mjaft të rëndësishme mes Akademisë së Shkencës dhe Arteve të Kosovës si dhe Akademisë së Shkencës së Shqipërisë ishte i pranishëm edhe Ministri i Arsimit, Shkencës dhe Teknologjisë Rexhep Osmani.

Një akt me të vërtetë për t'u admiruar!
Shumë Nderime të gjithëve
drini.

[drini_në_TR]

Presidenti Moisiu kërkon rritjen e autonomisë së universiteteve
Lajmi i ores 7:35 PM

SHKODER (18 Prill) - Presidenti i Republikës, Alfred Moisiu, kërkoi sot gjatë një takimi me pedagogë të universitetit "Luigj Gurakuqi" të Shkodrës, rritjen e mëtejshme të autonomisë së universiteteve tona. "Ka ardhur koha, tha Presidenti Moisiu, që të gjithë së bashku e, në mënyrë të veçantë ekzekutivi, të punojnë për rritjen e pavarësisë së universiteteve tona". Ka ardhur koha, theksoi ai, të veprohet konkretisht për zgjidhjen e disa problemeve që kanë institucionet e larta arsimore të vendit. Problem kyç, sipas Presidentit Moisiu, është heqja e kufizimeve per të ndjekur shkollat e larta nga rinia jonë, një e drejtë që e garanton edhe Kushtetuta. Sigurisht që ka probleme, por mendoj se ato nuk janë të pazgjidhshme e të parealizueshme, u shpreh Presidenti. Presidenti Moisiu kërkoi më shumë angazhim nga qeveria për sistemimin në punë të studentëve shqiptarë që studiojnë jashtë vendit. "Një armatë e tërë të rinjsh shqiptarë mësojnë në universitetet e perendimit, ndaj është detyrë e ekzekutivit të mendojë për sistemimin e tyre, të mendojë me kohë, në menyrë që ata të mos mbeten rrugëve, por të integrohen sa më mirë në administratën publike. Ne kemi nevojë për njerëz të ditur, me vizione europiane, kemi nevojë për njerëz që kanë kulturë, dëshire dhe vullnet ta çojnë Shqipërinë perpara", theksoi Presidenti i Republikës në këtë takim. anjo/dxh (BalkanWeb)
--------------------

Një nisëm për t'u pëshëndetur
drini.

[drini_në_TR]

SHKURT Prill 18, 2003
Kushtetuesja ndryshon Procedurën Penale

Gjykata Kushtetuese shfuqizoi dje një nen të Kodit të Procedurës Penale i cili ndalonte avokatët e të dënuarve në mungesë të apelonin vendimin e një gjykate. Neni parashikonte që edhe nëse i dënuari në mungesë do të kapej nga policia, ai nuk do të kishte të drejtë të riapelonte vendimin. Pas ankesave tek Avokati i Popullit, ky nen i Kodit është gjykuar si antikushtetues sepse shkel të drejtat dhe liritë e njeriut.

[drini_në_TR]

Ambasadori Xhefri viziton ambjentet e Gjykatës së Faktit në Tiranë

Lajmi i ores 5:35 PM

TIRANE (22 Prill) - Ambasadori i Shteteve të Bashkuara të Amerikës në Tiranë, Xhejms Xhefri, zhvilloi sot një vizitë kortezie në ambjentet e Gjykatës së Faktit të Tiranës. Qëllimi i vizitës së diplomatit të lartë amerikan në Gjykatën e Shkallës së Parë, ishte njohja nga afër me gjendjen aktuale në administrimin e drejtësisë civile dhe penale në gjykatën më të madhe në Shqipëri, pas investimeve të dhëna për këtë gjykatë dhe nga Agjencia e Shteteve të Bashkuara të Amerikës për Zhvillim Ndërkombëtar (USAID). Kryetari i kësaj gjykatë, Sokol Çomo, e shoqëroi ambasadorin amerikan Xhejms Xhefri, në ambjentet e reja të gjykatës si në sallat e reja të gjyqtarëve dhe të gjyqeve, sallat e mbledhjeve, sportelet e shërbimit, ndërsa e njohu atë edhe me projektin për 'Automatizimin dhe Informatizimin e Gjykatës së Faktit'. anjo/dxh (BalkanWeb)

[drini_në_TR]

6 Qershor, Themelohet Dekorata Lidhja e Prizrenit
për të tërë artikullin lexo këtu.

Ditë shumë mallëngjyese

[drini_në_TR]

Shqiptarët e Maqedonisë tani me universitetin e tyre
SHKUP 28 Qershor, 2003

Universiteti i Tetovës është gati për tu përfshirë në sistemin e arsimit shtetëror maqedonas. Qeveria e Shkupit e konfirmoi këtë dje duke nënshkruar projektligjin që i hap rrugë legalizimit përfundimtar të këtij universiteti. Kërkesa e ministrit shqiptar të Arsimit në qeverinë e Shkupit u mor parasysh nga kjo qeveri, e cila vendosi firmën e saj në draftin për arsimin e lartë, të mesëm dhe fillor. Projektligji parashikon që komuniteteve që përbëjnë mbi 20 për qind të popullatës u lejohet arsimi në gjuhën e tyre, gjë që e zyrtarizon praktikisht Universitetin e Tetovës. Çështja që ishte zvarritur për rreth nëntë vjet që prej krijimit të këtij universiteti u përfshi në Marrëvshjen e Ohrit, të nënshkruar para dy vjetësh. Megjithatë, ende nuk ishte gjetur një zgjidhje praktike për legalizimin përfundimtar të universitetit. Ministri i Arsimit, Aziz Pollozhani, tha se me miratimin e projektligjit për Arsimin e Lartë tregohet vullneti i kësaj qeverie për të hapur rrugë dhe për të krijuar një kornize ligjore, që shqiptarëve t'u përmbushen nevojat për shkollim të lartë. Qeveria pret që Parlamenti ta miratojë paketën e ligjeve të arsimit deri më 15 korrik. Sipas ministrit Pollozhani, kjo do të krijojë hapësirat që së bashku me strukturat e Universitetit të Tetovës të ndërmerren të gjitha masat ligjore për realizimin e kësaj çështjeje. Me projektligjin e qeverisë parashikohet financimi nga buxheti shtetëror i arsimit të lartë i atyre komunitetieve që përbëjnë mbi 20 për qind të popullatës në Maqedoni. Universiteti i Tetovës, ndërkohë, ka formuar komisione për kontakte me qeverinë për të zgjidhur problemin disavjeçar. Komisionet do të gjejnë zgjidhje edhe për njohjen e diplomave të atyre, që janë diplomuar deri tani në këtë universitet dhe numri i tyre mendohet është mbi 400. Ministri Pollozhani nuk bëri të ditur nëse studentët e Universitetit të Tetovës vitin e ardhshëm akademik do ta fillonin në universitetin e njohur zyrtarisht nga shteti.

(shkëputur nga gazeta Balkanweb)
---------------------------------------------------
Hajde pra një URRRAAAAAA të madhe që të gjithë. Më në fund gjërat po themelohen ashtu siç duhet!.

drini

[drini_në_TR]

INSTITUCIONI I PARË PRIVAT ARSIMOR
Hap dyert Universiteti Amerikan në Prishtinë


PRISHTINË - Studentët kosovarë do të ulen në auditoret e Universitetit Amerikan në Prishtinë në muajin tetor. Universiteti është përuruar dje në kryeqytetin kosovar, por do të nisë punën efektivisht me fillimin e vitit të ri shkollor. Institucioni i arsimit të lartë do të "ofrojë" studime universitare 2-vjeçare në degët biznes, ekonomi dhe elektronikë, sipas agjencisë së lajmeve Kosovapress. Në vitin e parë të tij do të pranohen deri në 120 studentë, ndërsa më pas do të shtohet edhe numri i studentëve me rinovimin e mjediseve të universitetit në periferi të Prishtinës. Hapja e këtij universiteti është mundësuar nga Fondacionit për Universitetin Amerikan të Kosovës. Drejtori ekzekutiv i fondacionit, Louis Sell, shpjegon se synimi afatgjatë është që universiteti të shndërrohet në një institucion katër-vjeçar të arsimit të lartë me një gamë të plotë programesh. Sipas tij, diploma e Universitetit Amerikan të Kosovës do të njihet si në Kosovë ashtu edhe në Shtetet e Bashkuara. "Fatura" që studentët kosovarë do të duhet të paguajnë për t'u shkolluar me metodat amerikane do të kapë shifrën e 5 500 dollarëve në vit. Por, sipas drejtorit të planifikimit akademik në këtë universitet, Andreë Gridinsky, kjo justifikohet nga programi mjaft i mirë, në gjuhën angleze dhe shanset qe universiteti do të ofrojë për më vonë. "Një universitet amerikan, tha ai, nuk ofron vetëm njohuri. Synimi ynë është të aftësojmë studentët të zhvillojnë mendimin e vërtetë kritik dhe të mësojnë të paraqiten në një mënyrë profesionale", thotë Gradinsky.

(marrë nga gazeta Balkanweb)

[nikshi]

Sipas nje njoftimi te gazetes Shekulli, te dates 16 Shtator 2003: "Qeveria maqedonase ..... miratoi propozimin e ligjit per themelimin e universitetit shteteror ne Tetove..... me kater fakultete.....per te cilin shteti do te shpenzoje rreth 2 milion euro ne vit......"
nikshi

[drini_në_TR]

Në Republikën e Shqipërisë foshnjat e lindura në 2004, me numër identifikimi

TIRANË - Qeveria miratoi dje vendimin “Për mënyrën e kodimit dhe strukturën e numrit të identitetit të shtetasve”. Ky vendim sipas saj plotëson kuadrin ligjor të shërbimit të gjendjes civile dhe krijon mundësitë praktike për fillimin e procesit të lëshimit të numrit të identitetit të shtetasve, i cili është një numër zyrtar, personal, i papërsëritshëm. Numri i identitetit është një përbërës i ri i gjendjes civile, i cili do të jetë elementi kryesor i identifikimit të shtetasve. Në vendim përcaktohet teknikisht mënyra e kodimit dhe struktura e numrit të identitetit. Procesi i lëshimit të numrit të identitetit do të realizohet fillimisht me dhënien e këtij numri për foshnjat e lindura nga data 1 janar 2004. Për personat e tjerë, ky numër do të lëshohet pas kompjuterizimit të zyrave të gjendjes civile dhe krijimit të Regjistrit Kombëtar të Gjendjes Civile. Numri i identitetit, si elementi kryesor i identifikimit, do të jetë kyçi lidhës i bankave të ndryshme të të dhënave që përdorin si të dhëna bazë ato të gjendjes civile. Dhënia e tij do t’i hapë rrugë edhe lëshimit të dokumenteve shqiptare të identitetit të standardeve europiane, si dhe do të lehtësojë punën e një sërë organesh dhe institucionesh shtetërore dhe private, si Sigurimet Shoqërore, Komisioni Qendror i Zgjedhjeve, Sigurimet Shëndetësore, organet tatimore, Shërbimi i Gjendjes Civile, organet e drejtësisë, rendit, prokurorisë, mbrojtjes, arsimit, të regjistrimit të pasurive etj.

(marrë nga Shekulli)