Erina Pavle Çoku

[shigjeta]

Dënesa e heshtur e ujit

Fjalëzat e tua kacavirren
Nëpër të gjitha mendimet e mia
E nuk ikin
Lënë shijen e tyre nëpër mua
E bëhen ti,
Shija jote e pangjëruar

Më ka gërvishtur
Perceptimi yt
Më ka lënë vrajë

Nuk do
të largohet prej meje
mbështjellë rreth
Gati për të më marrë ajrin
E për të më çmendur ndajnatave
Me një angushti
Që e thith si fjollë
Gjithsaherë të ndërmend

Depërtuar nëpër pore
Me frymë
Më je hedhur në gjak
E shpërndahesh në qelizë
Pangjashëm
Me ndjesitë e pafiltruara
E të mezidurueshme
Për drynat e qenies sime

Duke tërhequr fille të afshta
Për të më avitur kah ti,
Ti m’i vesh muret e gjallimit
Me ngjyrat e tua, sikur të qenë të miat
E bëhesh ngashërim
Bëhesh heshtja ngërthyese
Peshë munduese në kraharor
Si mjegulla
Që nuk flaket tutje me duar.

Ti më ke vënë dy pragje
Më ke shtruar njëqind udhë
E ma shtrydh zemrën
Me gishtërinj të pandjeshëm
Sa herë më thërret me zërat e tu
Që kumbojnë
sa brenda, sa jashtë meje

E urat atje tej
Nuk kanë harqe

Epen në trandimin e shpirtit
Si varkëza të lidhura në kiç
E unë s’kam ku mbahem
Veç pasqyrimit tënd
Në ujë të errët dashurimi.

Do më mbysë, përkundë
a do më marrë tej rrjedha jote?



Ngasje

Ke prekur me vështrime ndonjëherë?
Më butë se duart e më lehtë se fryma
dëshirimin thelbit të qenies duke përcjellë
me drithma gërryese porsi rryma?

Je bërë mendim sëpaku njëherë
E arratisur një kurm të kesh mbërritur
E me fjalët avull, avull të nxehtë
Ndër damarë t’i kesh pëshpëritur?

Mandej mbyllur të kesh sytë
Qepallat lehtë pa i shtrënguar
E tinguj-tinguj mu në mendje
Qenia tjetër të të jetë pikëzuar?

Ke ledhatuar me ndjenja ndocaherë
Një fytyrë të vagullt që ujëvara rrjedh
e ta kesh në qerpik gjithsaherë
rrahjen e zemrës grusht ta mbledh?


Gazeta - Nacional

[EXODUS]

Kjo "te hedh ne tapet" vetem me nje prekje, biles ka mundesi te le edhe pa ndjenja!
E kam vene re, edhe vet une, kur 'bredh' keto lloj labirintesh te mendjes femerore pesoj metamorfoze gjinore! S'tallem jo!! Mendja eshte thesar i pazbuluar; Erina me duket se eshte ne gjurmet e duhura...

Shume, shume te ndjera, prekese, shigjete, thanks qe i solle!