Me falimentimin e Sali Berishës dhe të pushtetit të tij të korruptuar, po falimentojnë edhe kompanitë që kanë monopolin e disa shërbimeve në Shqipëri, falë lidhjeve të shumëfishta, klienteliste dhe kriminale me pushtetin. Me ardhjen në pushtet të Sali Berishës, një kompani lulëzoi në tregun e fluturimeve në kurriz të qytetarëve, pasi qeveria falimentoi kompanitë e tjera, që nuk zbatonin urdhrat e saj për të mbushur zarfet.
Bëhet fjalë për kompaninë ajrore “Belle Air”, e njohur ndryshe si kompania e Lulzim Bashës, pasi ky i fundit e futi në treg kur ishte ministër Transportesh, duke nxjerr jashtë loje kompanitë e tjera si “Albatros” apo “Albania Airlines”.
Kjo kompani, e cila ka vjedhur qytetarët shqiptarë duke ngritur çmimin e biletave e favorizuar nga situata monopol, tashmë po falimenton bashkë me qeverinë e Sali Berishës. Kjo kompani tashmë po shet bileta duke mos kryer fluturime.
Lajmi konfirmohet nga gazeta Express, duke sjellë shembuj konkret.
Gazeta raporton se të dielën, një kosovar me fëmijë kishte mbetur në Aeroportin e Basel-it të Zvicrës me biletë në dorë, por pa fluturim për t’u nisur. Biletën e kishte blerë në kompaninë Belle Air, ndërsa fluturimi nuk ekzistonte fare. Kështu që ishte detyruar të blinte biletë në një kompani tjetër dhe të udhëtonte nga qyteti i Zyrihut.
Kështu i ka ndodhur edhe shumë kosovarëve me kompanitë ajrore.“Kam blerë biletën te Belle Air për të udhëtuar të dielën, ndërsa kur shkuam në aeroport, fluturimi nuk ekzistonte fare”, tregon kosovari Petrit Osmani, për Express. Ai ishte detyruar të paguaj edhe shumë para të tjera për të udhëtuar nga një qytet dhe aeroport tjetër i Zvicrës për në Kosovë.
Mësohet se kompania Belle Air, te dielën i kishte destinuar avionët e saj në shërbim të zgjedhjeve në Shqipëri, duke harruar kështu pjesën tjetër të klientëve. Drejtuesit e Partisë Socialiste në Shqipëri, kishin denoncuar kompaninë Belle Air se po jepte bileta falas për emigrantët që të shkonin në Shqipëri për të votuar Partinë Demokratike.
Kompania ajrore “Belle Air”, thuhet se ka borxhe edhe në Aeroportin e Kosovës. Në Kosovë, janë të ditura shumë raste kur udhëtarëve u shitën biletat dhe pastaj mbesin në aeroporte duke pritur. Para dy vitesh mbeten mbi 500 udhëtar në Aeroportin e Prishtinës dhe askush nuk u mor me ta.
Akuzat
Kjo kompani u akuzua nga socialistët se me ndihmën e partisë e cila ra nga pushteti në zgjedhjet e 23 qershorit, ka pasur monopolin e tregut shqiptar si kompani e afërt me njerëzit në pushtet. Deputeti i PS-së, Sajmir Tahiri, kishte deklaruar para disa ditësh se Belle Air po ofron bileta falas për emigrantët që të vijnë për të votuar Sali Berishën.
Ata kishin treguar se kjo kompani është privilegjuar nga pushteti i PD-së dhe i është falur një borxh prej 12 milionë euro nga Aeroporti i Rinasit.“Djemtë dhe vajzat, motrat dhe vëllezërit e pushtetit të Saliut, në bashkëpunim me kompaninë Belle Air, monopoli spektakolar i Lul Bashës, kanë filluar të ofrojnë bileta falas për emigrantët e studentët shqiptar, duke i detyruar të votojnë për Sali Berishën dhe ta provojnë këtë duke fotografuar votën e tyre”, pati thënë dy ditë para zgjedhjeve deputeti Tahiri.
Albanian Airlines
Kompani e fluturimeve Albanian Airlines ka mbetur e bllokuar prej disa muajsh për shkak të një vendimi arbitrar të Autoritetit të Aviacionit Civil, i cili i ka revokuar lejen e fluturimeve pa asnjë motiv të arsyetuar. Për gazetën “SOT”, përfaqësues të kompanisë Albanian Airlines, theksojnë se Aviacioni Civil vijon të mos japë asnjë arsye konkrete për bllokimin e fluturimeve.
Certifikata e kësaj kompania u zgjat disa muaj më parë, një auditi të ekspertëve ndërkombëtarë në bashkëpunim me ekspertë vendas. Gazeta “SOT” ka botuar edhe konkluzionet e këtij grupi kontrolli, i cili nuk ka konstatuar asnjë problem teknik, sikundër pretendon Aviacioni Civil i Berishës. Kompani e fluturimeve Albanian Airlines ka pohuar gjithashtu se ka marrë masa për dëmshpërblimin e të gjithë atyre që kishin prerë biletat, por që nuk udhëtuan për shkaka të revokimit të licencës.
Si u shfaq “Belle Air”
Kompania “Belle Air” u shfaq si kompani gjatë vitit 2006, pasi iu hoq licensa e operimit një kompanie mjaft të suksesshme low-cost “Albatros”, e cila asokohe kishte një “të metë” të madhe që menaxhohej nga nipërit e ish-presidentit Alfred.
“Belle Air” u shfaq menjëherë si një kompani alternative në Shqipëri në kohën kur ministër i Transporteve ishte pikërisht ministri Lulzim Basha. Shkatërrimi i kësaj kompanie nga Basha, ishte një ndër arsyet e konfliktit midis Moisiut dhe Berishës. Tashmë, në shënjestrën e Bashës dhe Berishës është kompania “Albanian Airlines”.
Linja të reja
Me eliminimin e konkurrencës në treg, “Belle Air”, përgjatë vitit të kaluar ka shtuar disa linja të reja fluturimi. Kështu, “Belle Air” filloi fluturimet nga Tirana për në Londër dhe nga Tirana në Bruksel. Po ashtu, “Belle Air” filloi fluturime nga Tirana për në Athinë, Heraklion e Rodi.
Kjo kompani, më mbështetjen e partisë në pushtet ka hapur edhe linjën e re Tiranë-Stuttgart dhe Tiranë-Barcelona. Po ashtu, kompania njofton së shpejti do të hapë edhe 10 linja të reja, nga Tirana në Lyo, Bratislav, Malmo, Geneva, Basel, Dusseldorf, Dortmund, Memmingen etj. Nga ana tjetër, kompania ajrore “Albanian Airlines” po falimenton. /Agjencia e Lajmeve Sot/sot.com.al/
http://www.zeri.info/artikulli/8724/...tron-qytetaret
Krijoni Kontakt