Bisedime të fshehta Meta-Topi

[ganoid]

Pas prishjes së marrëveshjes Nano-Berisha, shënohet kontakti i parë mes pozitës dhe opozitës

Bisedime të fshehta Meta-Topi

Zv/kryeministri dhe kreu i grupit të PD-së takohen në kulmin e debateve për komisionin “Rama”

TIRANE- Aleancat fluide mes opozitës dhe një pjese të deputetëve socialstë nuk janë mbyllur tek shkarkimi i ish-prokurorit Arben Rakipi. Opozita dhe një pjesë e grupit parlamentar socialist po bashkëpunojnë për çështjen e hetimit të kryebashkiakut të Tiranës, Edi Rama. Pas votimit për krijimin e komisionit të posaçëm parlamentar, ku qëndrimi dhe votat e mbështetësve të zv/kryeministrit Meta luajtën një rol shumë të rëndësishëm, vetëm para dy ditësh, ky i fundit është takuar me kryetarin e grupit parlamentar të Partisë Demokratike, Bamir Topi, në kafe-bar “Elysee”, që ndodhet përballë godinës së Parlamentit. Dëshmitarë okularë treguan dje se i pari është ngjitur në lokal zv/kryeministri Meta, ndërsa pas dhjetë minutash ka ardhur edhe Bamir Topi. Të dy janë ulur në një tavolinë pak të mënjanuar në barin që ka një pozicion ideal për takime e biseda që nuk duan të bëhen publike në media. Zëra nga maxhoranca kanë kohë që flasin për kontakt jo direkte mes zv/kryeministrit dhe selisë blu. Pas prishjes së marrëveshjes Nano-Berisha, kafja mes Metës dhe Topit është e para dhe shënohet në momentin që klima mes pozitës dhe opozitës është acaruar shumë. Mocioni i paralajmëruar i opozitës për kryeministrin Nano sipas burimeve nga selia blu mësohet se ka qenë një nga temat e bisedës. Hetimi i Ramës, bllokimi i komisionit të ngritur prej 15 ditësh kanë rikthyer në skenën politike akuzat e ashpra të PD-së dhe liderit të saj, që arritën kulmin me kërkesën e tij për mocion ndaj Kryeministrit. Bamir Topi ishte opozitari i parë ai që e lajmëroi këtë lëvizje politike, që synon rrëzimin e Nanos, ndërsa Berisha ka dy- tre ditë që po e thekson atë. Deputetët e opozitës ndërkaq kanë filluar mbledhjen e firmave për kërkesën për mocion ndaj Kryeministrit. Që mocioni të fitojë, ai duhet të votohet nga 71 deputetë, shifër kjo që arrihet vetëm me një aleancë fluide mes PD-së dhe PS-së. Nga ana tjetër, hetimi i fondeve të përdorura nga Ministria e Kulturës dhe Bashkia e Tiranës mund të ketë zënë gjithashtu vend në këtë bisedë kokë më kokë mes dy titullarëve të politikës në vend.
Aleancat fluide
Pas votimit në Kuvend për krijimin e komisionit hetimor parlamentar për Bashkinë dhe Ministrinë e Kulturës, drejtuesi i lëvizjes për një politikë të pastër, Petro Koçi, deklaroi se “Ky votim tregoi se brenda Partisë Socialiste ka individë që kërkojnë humbjen e zgjedhjeve lokale nga maxhoranca, me qëllim që të sigurojnë marrjen e lidershipit të PS-së gjatë kongresit zgjedhor”. Nga ana tjetër, gjatë gjithë debateve dyjavore për krijimin e komisionit “Rama”, asnjëherë Berisha nuk e akuzoi zv/kryeministrin Meta, ndërkohë që ai lëshoi akuza të rënda për të gjithë krerët e tjerë socialistë. Edhe Meta nga ana e vet, që prej dy muajsh nuk është deklaruar në asnjë rast për hetimin e kryebashkiakut Rama, që dikur ishte një nga aletët e tij më të fortë. Por afrimi i zgjedhjeve lokale dhe zhvillimi i kongresit zgjedhor të PS-së në nëntor, fill pas zgjedhjeve, duket se e kanë kushtëzuar zv/kryeministrin që të lëvizë politikisht kundër Kryetarit të bashkisë dhe Kryeministrit, me qëllim fitoren e kreut të PS-së në Kongres. Por varianti i përkrahjes së mocionit të opozitës për rrëzimin e Nanos, edhe pse më i rrezikshmi do ta bënte më të shpejtë realizimin e ambicjes së Metës.
A.S

..........................

ZOT!!!!!!!!!!
Mendoni sa ndryshe do te jete sikur keta te dy te jene kryetar te partive qe perfaqsojne!!!!!!!!!!!!!!!!!!!!!!!!!!!!!!!!!!!!!