Rama: Shqipëria jeton mbi një ‘minë me sahat’. Hetimi i kongresmenit USA? Shpifje

[Albo]

Rama: Shqipëria jeton mbi një ‘minë me sahat’. Hetimi i kongresmenit USA? Shpifje


TIRANË- Teksa pak ditë nda ndajnë nga zgjedhjet e 23 qershorit, për të folur vetë për ‘betejën personale të Edi Ramës’, i ftuar në emisionin ‘360 Gradë’ të gazetarit Artur Zheji në Tv News24, është kreu i PS-së.

Artur Zheji: Titullin e kësaj interviste e cila deri më 23 qershor besoj se do të jetë e fundit, e kam konsideruar “Beteja finale” sepse mendoj se dhe nga perceptimi i gjithë fushatës duket se keni angazhuar maksimalisht të gjitha energjitë tuaja për të konkretizuar dhe finalizuar një sipërmarrje dhe maratonë shumë të gjatë politike. Nëse po themi, trendi do të jetë pozitiv ju më 23 qershor jeni shumë afër postit kryeministror, po nëse nuk do ndodhë hapen spirale të cilat do i komentojmë. Cili është bilanci?

Edi Rama: Unë jam vendosur në një pozicion të qartë prej kohësh. Pyetjeve ‘nëqoftëse’ unë nuk iu përgjigjem sepse hy në labirinte që nuk kanë asnjë vlerë reale për njerëzit që nuk duan të dëgjojnë me siguri se çfarë ndodh, nëse nuk ndodh ajo qe nuk duam të ndodhë. Por, çfarë ndodh nëse ndodh ajo që ne duam të ndodhë, pra çfarë ndodh me njerëzit nëse ato do të na mundësojnë ne mandatin për të qeverisur, çfarë ndodh me ekonominë e tyre familjare, çfarë ndodh me ekonominë kombëtare, çfarë ndodh me papunësinë, çfarë ndodh me listat e pafundme të borxheve, me borxhin e këtij shteti. Çfarë ndodh me shërbimet, me arsimin e fëmijëve, me kujdesin shëndetësor...pra këto besoj se janë gjërat që iu interesojnë njerëzve dhe padyshim ato më interesojnë dhe mua, për të bashkëbiseduar me njerëzit.

Artur Zheji: Kjo është një sipërmarrje e gjatë, sipërmarrjesh angazhimesh dhe pretendimesh...Mendoni se kjo ‘Rilindje’, do jetë një “Rilindje pa magji”, pasi ju në takimet që keni organizuar keni thënë se nuk e keni shkopin magjik?

Edi Rama: Magjia e Rilindjes, nuk qëndron tek ndodhja e çudive, sepse besoj se çuditë, janë pjesë e një tjetër sfere të imagjinatës dhe të jetës njerëzore. Magjia e rilindjes qëndron tek bërja e mundur e gjërave që padrejtësisht njerëzve të këtij vendi u janë bërë të pamundura. U janë bërë të pamundura, siç i është bërë e pamundur Shqipërisë, e cila ndodhet aty ku ndodhet, dhe nuk janë bërë çudira të mëdha që ajo të ndodhet aty ku ndodhet, pjesë e familjes Evropiane.

Artur Zheji: Nëse gjërat nuk janë kaq të pamundura, pse nuk janë bërë deri tani dhe pse do ti bëni vetëm ju?
Edi Rama: Nuk janë bërë sepse nëse do ta thosha me një fjali: Shqipërinë nuk e kanë udhëhequr njerëzit që e duan. Që domethënë ka munguar dashuria për këtë vend në zemrën dhe aksionin e atyre që e kanë udhëhequr.

Artur Zhejii: Cila është prova që ju e doni Shqipërinë ndryshe nga ata që nuk e duan Shqipërinë? Si e provoni se ju e doni më shumë dhe ata nuk e duan fare...
Edi Rama: Prova me mua do të jetë qeverisja, ndërkohë që prova mbi të cilën unë mbështetëm për të thënë se këtë vend ata që nuk e kanë qeverisur nuk e kanë dashur është gjendja e këtij vendi. Sepse kush e do këtë vend nuk mund të lejojë që të rrënohen pasuritë e tij kështu si po rrënohen. Po marr një shembull... djepi i historisë sonë dhe ndoshta i arsyes më të madhe pse ne jemi krenarë për historinë tonë, Kruja e Skënderbeut, po rrënohet në një farë feje vetëm mungesa e dashurisë dhe cinizmi ekstrem që vjen nga tëhuajësimi i kujdestarisë që duhet të bëjë qeverisja, mund ta sjellë. Unë nuk e shpjegoj dot ndryshe. Ta duash këtë vend, ta qeverisësh këtë vend, nuk mund të lejosh që të ndodhi ajo që ndodh në Krujë, ajo që ndodh me Gjirokastrën, ajo që ndodh me Beratin, ajo që ndodh me bukuritë dhe pasuritë e trashëguara të këtij vendi...

Artur Zheji: Në Gjirokastër, kryebashkiaku është socialist.....Flamuri. Meqë e përmendët. Të gjitha fajet i ka Saliu...
Edi Rama: Kjo nuk ka lidhje me....Pushtetet lokale në Shqipëri janë fantazma, që nuk kanë mundësi të influencojnë asgjë, kur vjen puna për të ndërhyrë në mbrojtje dhe zhvillim të këtyre pasurive të mëdha. Dhe unë nuk fola në njëjës, Saliu ka pjesën më dërrmuese të fajit, po faji shtrihet në kohë më të madhe se koha që ka qeverisur Saliu.

Artur Zheji: Zoti Rama, ju thatë se pushtetet lokale janë disa fantazma, ju karrierën tuaj e keni ndërtuar si kryebashkiak i Tiranës, nëse do bëni krahasimet e bilanceve që Berisha paraqet në këto 8 vite dhe ju në kapacitetet që keni për ta qeverisur keni këtë eksperiencë, këtë provë, bilancin e qeverisjes së Tiranës si kryebashkiak. Ju nuk keni qenë një kryetar Bashkie fantazëm, keni qenë real.
Edi Rama: Historia e Bashkisë së Tiranës është e ndarë në dy pjesë. Ka pjesën e saj të parë, kur Bashkia e Tiranës u la e lirë që të bëhej mekanizmi që realizoi idetë e mija dhe projektet e mija. Dhe ka pjesën e dytë ku Bashkia e Tiranës u rrethua dhe ndalua të punojë. Dhe kur pushteti lokal rrethohet dhe ndalohet të punojë, sic është rrethuar në shumë vende të Shqipërisë atëherë termi fantazëm nuk është i pavend.

Artur Zheji: Berisha në këto zgjedhje vjen me një bilanc, ai thotë se rrogat dhe pensionet janë rritur dhe do të rriten edhe në mandatin e tij të tretë. Ka një infrastrukturë. Paratë e shqiptarëve duket se ku janë investuar, për shembull tuneli i Elbasanit që u inaugurua së fundi ishte një provë, rrugët me të gjithë defektet që mund të kenë janë aty ku janë, edhe energjia...ju thoni nuk ka dashuri...Ky ndryshim këto rroga që rriten dhe mirëqenia pavarësisht krizës, nuk ju duken një akt dashurie me saktë një akt përgjegjësie?
Edi Rama: E para punës një herë, le ti marrim me radhë. Nëse do të merremi me rrogat dhe pensionet, llogaria është më ndryshe se kaq, llogaria nuk bëhet sa u rriten rrogat dhe pensionet po sa u rrit dhe sa nuk u rrit fuqia blerëse dhe pyetja është shumë e thjeshtë. Shqiptarët blejnë më shumë apo blenë më pak? Se letra mund të ketë më shumë, por në trastën e pazarit kanë më pak ushqim dhe në tryezën e shtëpisë shtrojnë më pak se shtroheshin më parë pasi fuqia blerëse është ulur.

Artur Zheji: Statistikat nuk thonë këtë gjë...
Edi Rama: Statistika më e mirë është statistika që mund të bëjë ëdo familje duke bërë llogarinë e vet, dhe këtu nuk ka vend për debat pasi llogarinë e bën çdo familje që bën llogaritë e vetë, a blinte më shumë bukë, vaj, miell, sheqer një mësuese, apo blen tani më shumë? Kur vjen puna tek buka e vërteta e madhe e këtij vendi është se sot borxhet në ushqimore janë më të larta që nga viti 1997. Këto borxhe tregojnë rënien e fuqisë blerëse. Dhjetëra, mijëra, nëna dhe baballarë shkojnë kokë ulur në dyqan, dhe nuk marrin dot 1 kile bukë, por feta buke...këto janë realitete shqiptare, jo në një zonë periferike por në Tiranë. Në raport me fuqinë blerëse, qeveria nuk ka asnjë bilanc pozitiv. Nëse do merremi me rrugët, megaprojekti i rrugëve është në fakt gropa e një megakorrupsioni. Janë harxhuar para për të ndërtuar rrugë pa standarde. Janë shumë të pakta segmentet rrugore që kanë standarde dhe sot Shqipëria nuk ka 1 km autostradë me standardet e Bashkimit Evropian, për ta emërtuar autostradë një rrugë-kalim makinash me asfalt. Nga ana tjetër qeveria flet për 10 mijë e 400 km rrugë që nuk i provon asnjëherë. Nuk ekziston në asnjë burim institucioni materiali që këta kanë shtruar 10 mijë e 400 km rrugë. Ekspertiza jonë nxjerr 1 mijë e 400 deri1 mijë e 600 km të shtruara...

Artur Zheji: Nuk ju duket paradoksale që qeveria të ketë shpikur rrugët për të krijuar korrupsionin. Nuk ka mënyra të tjera për të bërë korrupsion...
Edi Rama: Jo fare, janë historia të njohura këto. Nuk është historia e korrupsionit shqiptar një histori unikale dhe as Shqipëria nuk është e para në këtë fushë. Historitë të kësaj natyre janë të njohura. Mjafton pak të lexosh nga zhvillimet në botën e tretë, ato vende ku betejat elektorale të kastave të korruptuara bëhen me rrugë, rrugë , rrugë...për të parë dhe për të kuptuar se kjo është një histori banale e kudo ndodhur në vende jo demokratike dhe në vende pa transparencë dhe pa llogari dhënie për publikun. Flasim sa kushton sipas këtyre kilometri në Shqipëri dhe cfarë bëhet me këto para. Në fund të fundit shqiptarët sytë i kanë në ballë, nuk janë më ato që kanë qenë dikur, e kanë para botën dhe dinë ti bëjnë krahasimet pasi kanë parë rrugët që ka ndërtuar këto vite qeveria, madje që kanë ndërtuar kompanitë mbi bazën e projekteve të miratuara nga kjo qeveri dhe rrugëve që të zë syri sapo kalon kufirin e Shqipërisë, në veri lindje apo jug. Mmjafton të kalosh kufirin me makinë dhe kupton diferencën.

Artur Zheji: Zoti Rama mua më vjen keq, se në kohën kur keni qenë kryetar bashkie me të drejtë me cdo përmirësim infrastrukture, jepnit konferenca për shtyp, dilnit dhe përshkruanit rrugët. Tani për gjëra që janë bërë, një qeveri mund të ketë 10 defekte të tjera pse e qeverisni aty ku ka krijuar dicka, ka krijuar një avantazh? Sepse kjo krijon autogol elektoral mendoj unë, sepse ato janë të prekshme dhe të dukshme mendoj unë....
Edi Rama: Po janë shumë të dukshme dhe mua mi vrasin shumë sytë, më të thënë të drejtën, pasi më vjen turp që Shqipëria nuk ndërton dot rrugë me standarde evropiane , për shkak se këta janë të paaftë, dhe përvecse të paftë janë të kufizuar shumë në vizion dhe shije. Këto është shija e tyre, kuturu, nuk kanë cuar një punë deri në fund, nuk kanë bërë një vepër deri në fund, gjithçka gjysma-gjysma dhe jemi këtu ku jemi. Unë në këtë pikë nuk lëshoj (çedoj) sepse kjo është cështje ambiciesh dhe nuk jam kaq i varfër në aspiratash se të jem i lumtur që qeveria ka bërë këto farë rrugësh. Unë jam i mendimit se me lekët që janë harxhuar mund të bëheshin rrugë krejt ndryshe dhe në standarde krejt të tjera.

Artur Zheji: Po për stabilitetin energjetik të vendit, që deri para pak vitesh mund të themi se muzika e gjeneratorëve, ishte si gjinkallë, një shumë e tmerrshme dimër dhe verë....tani ka stabilitet dhe investime në kaskadën e Aevollit, Ashta 1 dhe 2...
Edi Rama: Shqipëria sot jeton mbi një ‘minë me sahat’, që është gropa e madhe e borxhit të akumuluar nga mungesa e stabiliteti dhe sigurisë energjitike. Është një borxh që në korkolepsen e të gjitha anëve të veta, borxhi i konsumatorit ndaj distributorit, i distributorit ndaj prodhuesit, borxhi i prodhuesit ndaj bankave, borxhi këtëj borxhi andej...janë rreth 1 miliardë borxhe, dhe është një histori që nuk mund të vijojë pafund ...Shqipëria nuk mund të vijojë të rrijë me këtë minë me sahat, që është realisht në rrezik shpërthimi dhe mund të prodhonte pasojat që nuk mund ti marrim me mend.

Artur Zheji: Nëse ‘mina’ është një realitet, ju me çfarë instrumentesh do të mund të ç’minoni këtë ‘minë’?
Edi Rama: Kjo minë është kurdisur nga keqeverisja, dhe keqqeverisja është një kombinim i mungesës së vizioni, paaftësisë, korrupsionit, i gjithë thërmimit të shtetit. Shqipëria sot nuk ka shtet. Nuk funksionon shteti, ka ngrehina që mbajnë emrin e institucioneve, që secila shkon për hesap të vet, duke filluar nga ngrehina e kryeministrisë me një kryeministër që ka hesapet e veta dhe vazhdon në rrugën e vet rrugëve dhe po kështu të gjitha institucionet e tjera. Atëherë cfarë kemi, kemi vjedhje energjie, mospagim të energjisë, arbitraritet të madh do thoja të dhunshëm mbi konsumatorin e urtë që respektonin ligjin, mungesë totale të një strategjie dhe rruge racionale në investime, qoftë në monitorimin e kontratave...

Artur Zheji: E vërteta është se ka një hop në mirëqenie dhe stabilitet, ka një hop relativ...apo asgjë....
Edi Rama: Jo. Ka një hop si hopet në filmat me kartona mbi gropë. Keni parë personazhet me kartona hop-hop dhe bien brenda. Rruga si c’minohet se ka mina pasi e tregojnë shifrat, e tregon falimentimi i plotë i privatizimit të CEZ. Mos harroni se ne jemi në kushte emergjence sepse kompania që privatizoi CEZ Shpërndarjen iku dhe ka një cështje të hapur me shtetin shqiptar, ku shteti shqiptar rrezikon të paguajë si 'frëngu pulën', të gjitha atë paaftësinë e vet, për të ndërtuar një marrëdhënie kontraktuale të qartë me kompaninë.

Artur Zheji: Po fakti që CEZ u largua nga Bullgaria e ka fajin Berisha?
Edi Rama: Nuk e njoh rastin Bullgar. Nuk i di arsyet por nuk do të çuditesha fare, se ai ‘Saliu i Bullgarisë’ të jetë po kaq përgjegjës sa Saliu këtu, për shkatërrimin e gjithë bazës së prodhimit dhe të shpërndarjes normale të energjisë.

Artur Zheji: Të falënderoj shumë se më dhe një lajm ekskluziv se paskemi dhe një Berishë në Bullgari.
Edi Rama: Pse nuk e dije...

Artur Zheji: Se mos prishni marrëdhëniet me Bullgarinë, se në pozicionin tuaj cdo deklaratë mund të krijojë një shqetësim ndërkombëtar..
Edi Rama: Nuk ka shqetësim ndërkombëtar fare, po ju them dhe një herë tjetër, se nuk e njoh rastin bullgar. Di që praktikat qeverisëse të kryeministrit bullgar janë të ngjashme me kryeministrin tonë.

Artur Zheji: Bullgaria është natar i Bashkimit Evropian...
Edi Rama: Nuk është fenomen unikal ne botë Saliu...Ç’më duhet mua kjo, a po flasim për CEZ...Nuk është Bullgaria një vend i BE-së, i vlerësuar me nota të atilla sa që një konstatim që lidhet me një situatë dramatike atje me një sektor të cilësohet blasfemi.

Artur Zheji: Mu duk se i bëre një kompliment Berishës, sepse kryeministri në Bullgari është kryeministër i një vendi anëtar në BE. Shqipëria ende nuk është....
Edi Rama: Ky është muhabet kot, nuk ka lidhje fare ...thashë ‘Saliu i Bullgarisë’, nuk thashë se janë si vëllezër. Di t’iu them kaq se rasti shqiptar me CEZ është produkt i keqqeverisjes. Kompania është kompani private me një kontratë me shtetin, për fat të mirë ne e kemi parashikuar, një privatizim i papërshtatshëm me terma të dyshimta...

Artur Zheji: Mendoni se e keni situatën elektorale nën kontroll. Në lidhje dhe me KQZ. Unë nuk e kuptova pse duhet të jepnin dorëheqjen anëtarët dhe tani kemi komisionin me 4 persona që orienton nga mazhoranca Nuk do ishte mirë që të qëndronin....
Edi Rama: Shkoni pyetini një herë , ato nuk janë anëtarë të PS-së dhe mirë do ishte madje të bënit një bisedë në studio me ta dhe ti kërkoni arsyet e dorëheqjes dhe mbase do kuptoni se kanë bërë nj akt qytetar me integritet profesional për tu admiruar nga të gjithë, ato nuk janë anëtarë të PS, Kodi Zgjedhor e përcakton që kandidatët që partitë paraqesin për KQZ nuk duhet të kenë të kaluar partiake. Partitë i përzgjedhin në radhët e botës akademike, shoqërisë civile, juristëve profesionistë. Dhe ata janë të tillë sipas Kodit pikërisht se pavarësisht se zgjedhin partitë në momentin që marrin mandatin, mandati është i tyre, nuk është i partive dhe KQZ sipas ligjit është i pavarur nga partia. Partitë nuk kanë asnjë të drejtë pasi komisioni është i formuar që të thonë këta janë të mitë, këta janë të atyre u prish balanca, hajt ta ndryshojmë, marrim Parlamentin, jemi katër bëhemi tre, jemi tre bëhemi katër.

Artur Zheji: Kam përshtypjen se ju shpesh herë keni akuzuar KQZ si një organizëm politik dhe partiak. Në momentin që e akuzoni si organizatë partiak si është e mundur që anëtarët e KQZ nuk kanë lidhje të dukshme apo të padukshme me partitë. Dhe ato anëtarë që votohen apo rekomandohen nga PS kanë lidhje, apo të tjerët që janë nga PD....Ka mospërputhje mes analistësh dhe retorikës politike.
Edi Rama: Totalisht partiak...jo nuk është retorikë... KQZ është një institucion sipas ligjit i pavarur. Nëse e lëmë ligjin mënjanë atëherë janë partiak. Sepse u la ligji dhe u mor partia me këtë punë janë organizatë partie. Nuk ishin organizatë partie kur u zgjodhën me konsensus nga parlamenti. Tani janë organizatë partie, ndaj unë them organizatë partie . Ajo u kthye në organizatë partie në momentin kur anëtari i KQZ u përjashtua nga KQZ arbitrarisht, me dhunën e kartonëve në parlament në emër të partisë. Atë moment KQZ u bë organizatë partie. Sepse u ndërhy nga partia në pavarësinë e institucionit, dhe nuk iu la institucioni të vepronte si i pavarur dhe nuk u njoh pavarësia e individëve në atë institucioni, arsye pse dhanë dorëheqjen ishte pikërisht sic e kanë shpjeguar dhe vetë. Në momentin kur një prej anëtarëve u godit politikisht ata të gjithë kuptuan se mandati i tyre nuk ishte një mandat i garantuar dhe nuk mund të punonin më si të pavarur. Në atë moment dhanë dorëheqje.

Artur Zheji: Dhanë dorëheqjen anëtarët e majtë.... është më mirë sic është apo sic ishte....
Edi Rama: Nuk ka rëndësi tani. Ajo është një organizatë partie, si 4 me 0 si 4 me 3, ajo është aty për të bërë punën e partisë, jo për të bërë punën e shtetit dhe le ta marrin gjithë përgjegjësinë përpara Kushtetutës, ose përpara popullit shqiptar le të guxojnë të sillen si ushtar partie me votën e popullit dhe të shikojmë se cfarë ndodh...

Artur Zheji: Ju mendoni se kjo nuk do të ketë asnjë lloj influencimi në procesin elektoral....
Edi Rama: Nuk ka rëndësi se cfarë mendoj unë në këtë rast, pasi ky është fakt. Ajo është organizatë partie Artur dhe si organizatë partie ajo është aty për të bërë punën e partisë dhe të një partie që ka në historinë e vet një marrëdhënie perverse me votën e lirë. Një partie që është e njohur si forcë që grabit zgjedhjet, dhe ata aty janë aty në funksion të partisë, unë uroj dhe shpresoj që ata të mos marrin guximin të zbatojnë urdhra në kundërshtim me kushtetutën dhe ligjin dhe të mos ndërmarrin një aksion të ngjashëm me atë të 8 Majit 2011. Fakti që aty ka apo nuk ka 3 të tjerë është i relevant nga momenti që ka ndërhyrë partia dhe ka rikompozuar me dhunë komisionin dhe i ka dhënë komisionit gjithë peshën e organizatës së partisë. Kjo nuk ka më rëndësi a janë apo jo 3 të tjerët aty. Është pa vlerë.

Artur Zheji: Ju ndani të njëjtin qëndrim me ata që dhanë dorëheqjen....
Edi Rama: Unë respektoj plotësisht dorëheqjen e tyre, sepse dorëheqja e tyre ishte shprehje e integriteti moral dhe profesional në raport me Kushtetutën dhe me ligjin. Do të kisha dhënë dhe unë dorëheqjen po të isha në vendin e tyre.

Artur Zheji: Ka një perceptim që fushata e kryeministrit aktual ka një trend në rritje....
Edi Rama: Kujt..si matet.... se asnjë sondazh nuk e provon këtë. Sondazhet provojnë të kundërtën.

Artur Zheji: Cilat sondazhe?
Edi Rama: Sondazhet e publikuara që nuk janë tonat dhe sondazhet tona po ashtu...

Artur Zheji: Ka dhe sondazhet që thonë krejt të kundërtën...
Edi Rama: Cilat përshembull...

Artur Zheji: Ajo e publikuar nga Euro Media Reserch...
Edi Rama: Nuk e kam parë, nuk e njoh...

Artur Zheji: Unë klikova dhe e gjeta, ky është një institucion. Është mjaft i kuotuar në Itali ka bërë shumë sondazhe. Sipas këtij sondazhi në Tiranë për 2 mijë kampione rezultati ndahet 17 me 15 në favor të koalicionit të djathtë. PD 45.6 % dhe PS 40.1%.
Edi Rama: Ju jeni i lirë ta besoni atë, unë kam pikëpamje ndryshme, nuk ekziston për mua dhe nuk kam si ta komentoj.

Artur Zheji: Është publikuar tek gazeta Panorama...që ka tirashin më të lartë
Edi Rama: Ku tek gazeta e Bashkisë... nuk e di nëse ka tirazh të lartë, por gazeta e Bashkisë normale se do nxirrte kështu sondazhi. Refuzoj ta komentoj sondazhin se nuk e njoh.

Artur Zheji: Koalicioni i PS me LSI. Njëri aspekt është se zoti Meta ka qenë eksplicit që është më afër dhe me një koalicion pro taksës së sheshtë, kësaj takse që në këtë sistem funksionon. Ju jeni për taksën progresive. Si do i bashkërendisni këto dy doktrina ekonomike në një qeverisje të vetme.
Edi Rama: Besoj që nuk ka asnjë dyzim dhe problem. Ne jemi për të mos thënë në të njëjtën faqe, në të njëtin dyfaqësh. Ne do të aplikojmë progresivitetin e plotë në të ardhurave personale dhe do ruajmë vetëm dy nivele tek biznesi. Një nivel për biznesin e vogël, kur nuk mund ta pranojmë kurrë taksën e sheshtë 10%, dhe niveli tjetër për kompanitë që do të qëndrojmë tek 10 %.

Artur Zheji: Po termin kush fiton më shumë paguan më shumë, mund ta shpjegoni pak....
Edi Rama: Domethënë tek të ardhurat personale, nëse unë jam nesër kryeministri i vendit, duhet të paguaj më pak se polici nëse marr më shumë?! Nuk kemi folur kurrë për taksë progresive për kompanitë. Më vendoset një insert nga kreu i LSI për të ndërtuar debatin me një kontradiksion, por nuk kemi kontradiksion, jemi në një qasje, duhet krijuar një ekonomi prodhuese. Duhet të jemi të qartë se problemi jonë nuk është pasuria por varfëria. Ne nuk kemi luftë me të pasurit, por me të varfërit. Ne duhet të nxisim rritjen e pasurisë në funksion të luftës me varfërinë. Nuk është gjë e vogël që polici të kursejë më shumë se një rrogë në vit nga taksimi i ndershëm. Kalojmë tek biznesi. Kemi padrejtësi të madhe se furra e bukës paguan më shumë se 15-katëshi. Ne do kalojmë në dy nivele, do e zhbëjmë taksën e sheshtë për biznesin e vogël dhe do përgjysmojmë 10 % do e bëjmë 5 % . Tek kompanitë do qëndrojmë në fazën e parë në këtë qasje. Taksa sot është 10% me ligj, pagesa reale e kompanive shkon mesatarisht në 22%. Ka kompania që kanë paguar 300% nga arbitrariteti i taksës së sheshtë. 10% është tatimi mbi i fitimit . kompania në pikëpamje të tatimit mbi fitimin paguan 10%, mirëpo për kompaninë pak rëndësi ka për kë i paguan, por në fund të vitit ka rëndësi sa ka njerrë për shtetin. Dhe ne këtë analizojmë. Kjo është keqqeverisja , sa ka nxjerrë kompania për shtetin. Nëse i keni ndjekur deklaratat e shoqatave, Dhomës së Tregtisë..etj, e keni parë se ato nuk e thonë kot se 10% është mit, pse e thotë, e thonë se n ë fund të vitit nxjerrim m ë shumë para për shtetin në formë gjobash dhe arbitrariteti. Mesatarja që ka arkëtuar Ministria e Financave nga xhepat e kompanive mesatarja është 22 %.

Artur Zheji: Ju nuk do vini gjoba...
Edi Rama: Cfarë do bëjmë ne. Në këtë mekanizëm pervers të administrimit të të ardhurave cdo rritje e taksës mbi fitimin do ishte e papërballueshme për kompanitë ne nuk do e rrisim taksën 10% pa ristrukturuar mekanizmin dhe pa ju dhënë kompanive mundësinë që të kenë një shtet partner dhe ta vlerësojnë bashkëpunimin me shtetin si një detyrim që nuk i mbyt por i lehtëson. Në fazën e parë ne do të taksojmë vetëm të ardhurat personale dhe dividentin, pjesa tjetër do jetë sic është 10%. Më pas në bashkëpunim të drejtëpërdrejtë me biznesit do shohim si do funksionojmë. Ne do të koncesionojmë shërbimin në doganë, do ja besojmë një agjencie ndërkombëtare dhe kështu përshembull do ulim gjithë këtë abuzim, do heqim referencat dhe do vendosim një marrëdhënie të qartë dhe transparente me gjithë mallin që kalon në doganë. Këto janë eksperienca botërore, dhe përderisa kanë pasur atje sukses nuk ka pse të mos ketë dhe këtu sukses. Unë do ja provoj shqiptarëve që të kurthet dicka e thjeshte nuk janë njerëzit që korruptojnë sistemin, është sistemi që korrupton doganierët. Këtu nuk bëhet as për presione as për ndryshime por për një qasje racionale, ne nuk jemi e majta takso dhe shpenzoi por jemi e majta e rrugës së tretë. Këtë e kemi thënë me kohë e me vak. Edhe kreu i LSI e përmendi në një moment tha se kjo është qasje bleriste. Dhe është kështu së paku që kur kam ardhur unë në krye të PS. Unë në krye të PS më ka sjellë frymëzimi i marrë nga Toni Bler, nuk më ka sjellë një frymëzim social demokrat i shekullit të kaluar,. Unë jam aty ku kam qenë. Ne nuk kemi folur asnjëherë për tatim progresiv mbi kompanitë ...

Artur Zheji: Sistemi fiskal i Tony Bler është më progresist se i juaji...
Edi Rama: Kjo që bëni ju këtu është spektakolare. Unë ju admiroj për zellin që luftoni programin tonë këtu, por këto janë të pavërteta. Këto janë broçkulla dhe provokacione që unë nuk i marr fare parasysh në konsideratë për faktin se unë për flas për një vlerë progresiviteti që bën në hapin e parë bën ndarjen e niveleve biznesi i vogël është tjetër i madhi është tjetër,. Biznesi i madh sot është në krizë, nuk ka lidhje me cfarë thotë Saliu. Kush janë ata që nuk kthejnë kreditë, është biznesi i madh. E pra ne do jemi në krah të biznesit të madh për ta nxjerr nga dara e kris. Për pjesën tjetër ka pjesë tjetër programi, që ka të bëjë me ata që gëzojnë privilegje në rrugë të paligjshme mbi pasuritë kombëtarë që gëzojë licenca dhe koncesione jo si rezultati i garës, por i priviligjimit etj etje.. dhe ka një pjesë tjetër të programit mbi vendosjen e kontrollit të shtetit mbi pasuritë e mëdha të këtij vendi që sot grabiten u thoni ku do i gjeni paratë, e dini ju se ka 400 e 55 milionë euro që humbasin cdo vit vetëm nga keqqeverisja e naftës. E dini ju ca ndodh me grabitjen që i bëhet mineraleve në shoqërisë. E dini ca ndodh me evazionin dhe krokodilët që nuk paguajnë.

Artur Zheji: Insinuata është akt inteligjent, po të dish ta bësh, se ka shumë që tentojnë dhe ngelen në tentativë. Unë po të pyes për perceptimin, që do të thotë, meqë unë kam një rrogë të madhe dhe juve keni rrogë të madhe besoj, me progresivitetin e diferencës së pagës time dhe të njerëzve që marrin rroga të deklaruara të mëdha do mbushet fatura e shpenzimeve të Rilindjes. Ndërkohë që ai që ka 2 shtëpi, 5 vila, 5 makina nuk paguan taksën e luksit.
Edi Rama: Ky nuk është perceptim por manipulim i qëllimshëm i së vërtetës, i juaji dhe gjithë atyre që e ndërtojnë kështu këtë të ashtuquajturën perceptim, sepse më pyete për taksimin, nëse më pyet për shtëpinë e dytë të përgjigjen edhe për të, nëse më pyet për makinën e luksit të kthej përgjigje për të. Vlerën e progresivitetit do ta kemi në çdo gjë, në të gjitha aspektet dhe të gjitha fushat.

Artur Zheji: Unë mendoj që pak temperaturë bën mirë...
Edi Rama: Unë e di shumë mirë ku jam, nuk ka problem, unë e di shumë mirë ku kam ardhur dhe kë kam përballë.

Artur Zheji: Ku je? Ma hiq këtë kuriozitet. Ke 4 muaj që flet për gjithë shqiptarët, fol edhe për mua një fjalë...
Edi Rama: Jam përballë një gazetari që ka një set pikëpamjesh që nuk përputhen me të miat, e di unë këtë gjë.

Artur Zheji: Po unë deri tani këto momente kriticizmi t’i bëra nga e majta, nuk t’i bëra nga e djathta... Taksa progresive mendohej më mirëfilli e majtë, na doli më centrist.

Edi Rama: Për ta përfunduar kuadrin, ashtu sikurse e di që jam përballë një gazetari që përveçse nuk ka pikëpamjet e mia ka dhe inteligjencën e nevojshme që kundërshtinë e pikëpamjeve ta bëjë duke e bërë sikur e bën nga ana ime. Kjo është vlerësim për inteligjencën tuaj por nuk e ndryshon thelbin.

Artur Zheji: A është me dozën e duhur të sinqeritetit koalicioni juaj me zotin Ilir Meta?
Edi Rama: Është me gjithë dozën e domosdoshme të përgjegjësisë karshi njerëzve dhe vendit, kjo nuk diskutohet.

Artur Zheji: A do të ketë pas 23 qershorit një krizë konceptuale për kryeministrin e ardhshëm?
Edi Rama: Nuk mendoj, nuk shoh asnjë arsye.

Artur Zheji: Si e shpjegoni faktin që zoti Meta asnjëherë nuk ka thënë se cili do jetë kryeministër, ka thënë vetëm që do jenë votat e shqiptarëve që do e vendosin atë?
Edi Rama: Do habitesha po të thoshte të kundërtën. Është në fushatë elektorale dhe ka detyrimin që të mobilizojë maksimalisht të gjitha forcat dhe të marrë maksimumin e votave.

Artur Zheji: Po sipas perceptimit të përgjithshëm publik duket sikur po garojnë tre kandidatë për kryeministër, zoti Berisha, zoti Rama dhe zoti Meta. Ju e ndani të njëjtin perceptim?
Edi Rama: Janë dy forca dhe është një fuqi në krahun tonë, është normale që edhe forca tjetër LSI të zhvillojë fushatën që po zhvillon. Unë habitem me ata që habiten.

Artur Zheji: Si e shpjegoni denoncimin e kandidatit për deputet të LSI-së në Gjirokastër, zotit Tavo, i cili thotë se ka një marrëveshje mes PD dhe PS për të ‘kafshuar’ votat e LSI në Gjirokastër? Berisha tha para disa ditësh që i tërhoqa veshin Genc Rulit për këtë gjë, juve keni bërë të njëjtën gjë?
Edi Rama: Pse edhe ai tërheqka vesh? Nuk e dija...

Artur Zheji: Nuk besoj se tërheqjen e veshit e keni shpikur juve...
Edi Rama: Po pse ia tërhoqi veshin Genc Rulit?

Artur Zheji: Po pra në kuptimin që i tërhoqa vërejtjen për denoncimin e Tavos. Pyetja qendron në faktin se në terren ka sinjale që të mëdhenjtë të ndajnë me njëri- tjetrin, ta lënë të tretin të ngelet sa më i vogël. Gjë që është parë shumë e ashpër në 2009.
Edi Rama: Kjo nuk diskutohet fare. Në 2009 ka qenë në kontekst tjetër, LSI garonte kundër nesh, sot është aleatja jonë. Ne kemi një vullnet të palëkundur për të ndërtuar një aleancë gjithnjë e më solide në funksion të një qëllimi strategjik dhe sigurisht që nuk është fushë me lule, ka edhe kërcitje rrugës, por jam i bindur që janë fenomene kalimtare. Të mos harrojmë që edhe PS dhe LSI kanë përfaqësuesit e tyre në të gjitha instancat e administrimit zgjedhor kështu që as nuk bëhet fjalë fare për të pasur asnjë lloj lëvizjeje që i bie ndesh lëvizjes së madhe për fitore. Ne kemi marrë përsipër të jemi garant për çdo votë, jo vetëm të PS por të gjitha forcave politike pa asnjë përjashtim.

Artur Zheji: Po si shpjegohet rasti i atij mesazhit që kishte dalë nga celulari juaj, ku jepte prognozën për rezultatin në Tiranë dhe për LSI nuk kishte asnjë deputet?
Edi Rama: Kush e tha këtë?

Artur Zheji: Gazeta më e madhe në Shqipëri. Nuk e keni përgënjeshtruar...

Edi Rama: Gazeta e Bashkisë, nuk merrem me përgënjeshtrimin e gazetës së bashkisë që botojnë çdo ditë shpifje, deformime e sajesa.

Artur Zheji: Është një mesazh që ka dalë nga celulari juaj zoti Rama drejtuar aktivistëve të PS. Thoshte që fitojmë 17 me 15, që Bamir Topi merr 1 dhe PS 16...
Edi Rama: Është komplet manipulim... Ka shumë teknika për të shpikur mesazhe dhe për t’ua vënë të tjerëve në gojë, shkruhen edhe nëpërmjet kompjuterit. Kur them fitojmë kam parasysh aleancën për Shqipërinë Europiane, nuk merrem fare me këto. Unë kur flas për 77 deri në 80 mandate, i them si Aleancë për Shqipërinë Europiane, për mua mandatet tona janë të Aleancës për Shqipërinë Europiane. Ne do qeverisim si Aleancë. PS-LSI do jetë boshti strategjik i kësaj aleance. Prandaj të gjitha këto janë diversione, historira njerëzish të dëshpëruarish.

Artur Zheji: Çfarë qëllimi kanë këta të dëshpëruarit?
Edi Rama: Janë të lidhur me pushtetin dhe duan të mbajnë zonat e tyre të influencës që sigurisht i shohin të rrezikuara

Artur Zheji: Sipas të gjitha sondazheve Ilir Meta është gjithmonë King Maker, ka atë numër deputetësh që përcakton mazhorancën. Zoti Meta King Maker i të tjerëve, po King Maker i vetvetes për të marrë përgjegjësi qeverisëse nuk ka të drejtë? Këtë kurorën e kryeministrit do ta vërë zoti Meta të gjithën në kokë, po vetes së vetë nuk do ia vërë ndonjëherë? Ka treguar që ka qeverisur mire.
Edi Rama: Besoj se ka qenë i qartë në prononcimet e tij dhe është shumë koherent me kulturën demokratike perëndimore të formimit të qeverisë dhe kur i referohet edhe Kushtetutës ka parasysh ekzaktësisht këtë gjë. Besoj që është përputhje interesash të të dyja forcave në funksion të një qëllimi strategjik, bazuar edhe në një eksperiencë që ka pjesët e veta shumë pozitive dhe negative për të dyja palët, që na shërben shumë për të mos përsëritur gabimet e së shkuarës.

Artur Zheji: Pse me kaq vonesë ky refleksion midis jush? I keni shkaktuar shumë plagë politike njëri-tjetrit.
Edi Rama: Besoj që gjërat kanë shkuar ashtu siç kanë shkuar për arsye që s’ka as nevojë dhe as nge për ti analizuar. E rëndësishëm është që kjo eksperiencë të kthehet në një thesar për të pasur një referencë që të mos përsëriten të njëjtat gabime.

Artur Zheji: Pra pranoni që ka pasur gabime?
Edi Rama: Sigurisht që po.

Artur Zheji: Pse sot kemi këtë situatë, Kastriot Islami, Arben Malaj, Kadeli Dogjani, Agron Duka, 5 subjekte tek të cilët e majta ka investuar, ata kanë investuar tek e majta sot gjenden jashtë orbitës së të majtës?
Edi Rama: Sepse karrigia e tyre për ta është më e rëndësishme se sa investimi i të majtës mbi ta.

Artur Zheji: Nuk mendoni që në këtë rast keni edhe ju ndonjë gabim?
Edi Rama: Mendoj që dalja e tyre në krah të Saliut vërteton katërciprisht drejtësinë e vendimit tim për të mos i përfshirë në skuadrën kombëtare.

Artur Zheji: Po Agron Duka është jashtë dyshimit që të flirtojë me Saliun apo jo?
Edi Rama: Po pse më kë është? Nuk është në Aleancën për Punësim DHE Mirëqënie? Të jesh me oficerin e Gërdecit...

Artur Zheji: Nuk janë të gjithë si Musa Ulqini, kanë personalitet të ndryshme. Janë shumë u bënë 5 që si keni kandiduar.
Edi Rama: Me veprimet e tyre më kanë lehtësuar shumë sepse më kanë dhënë provën më kuptimplotë dhe kokëfortë, fakti që kam pasur të drejtë që si kam përfshirë në skuadrën kombëtare. Njerëz të gatshëm për ta tradhtuar një kauzë dhe një familje të tërë politike vetëm për vendin ku vendosin të ndenjurat e tyre. Po flasim për Musa Ulqinin, kam shumë respekt por ka një listë shumë të gjatë, si Arben Isaraj që është ende krah për krah me mua edhe pse nuk u kandidua. Ata që janë lojtarë që besojnë tek fanella nuk e hedhin atë në tokë dhe tqë bashkohen me kundërshtarin. Doni të vazhdojmë me Bizhgën, Dedën, Rukën, ka plot. Këta janë ende në fushën e betejës, kçta janë shembulli për mua, kjo është PS.

Artur Zheji: Po thua sa mirë që këta duan stolin?
Edi Rama: Keni respekt për inteligjencën e njëri-tjetrit dhe atë të publikut. Unë ju dhashë shembuj që janë dëshmia e integritetit moral, politik dhe qytetar si pjesë e PS, nuk e tradhtuan atë.

Artur Zheji: Ata ju akuzojnë për tirani në drejtimin e PS, për mungesë demokracie.
Edi Rama: Jam shumë i qetë, ju siguroj që me kuturisjen e tyre në krah të Saliut më kanë dhënë provën që kam qenë në ushtrim të të drejtës së PS për të mos i përfshirë në skuadrën kombëtare. Për karrige trashtojnë qindra mijëra mbështetës, votues.

Artur Zheji: I futët të gjithë në një kallëp, Arben Malaj nuk është një nga ta, apo jo?
Edi Rama: Ka dalë kundër PS.

Artur Zheji: Pse ka dalë kundër? Ka dalë kandidat i pavarur dhe ka thënë se vota ime do jetë gjithnjë përkrah së majtës.
Edi Rama: Ai kërkon votë jashtë Aleancës për Shqipërinë Europiane ajo shkon për Saliun, kjo dihet.

Artur Zheji: Me gjithë respektin, po Koco Kokëdhima ka më shumë vlera dhe asete se Malaj në PS dhe Vlorë.
Edi Rama: Secili ka të vetat, por Arben Malaj nuk e meritonte të ishte pjesë e skuadrës sonë kombëtare dhe nuk u bë. Tani kërkon votat e socialistëve që dalin jashtë koalicionit dhe i shërbejnë Saliut. Kjo është të shkosh dhe të dalësh kundër. Arben Malaj është tradhtar dhe kaq, të tjerat janë çështje të tjera.

Artur Zheji: Uroj të mos pendoheni për këto terma kaq të ashpra
Edi Rama: Për çfarë? Për termin tradhtar? Artur termi tradhtar se nuk ka tjetër

Artur Zheji: E ke thçnë 4 vjet për Ilir Metën dhe the që ishte gabim...
Edi Rama: Të mos bëjmë sallatë fjalësh këtu se fyejmë inteligjencën e njëri-tjetrit. Doja të thosha diçka lidhur me nocionin tradhtar, që të mos duket çudi nocioni tradhtar përdoret në çdo vend demokratik e përdorte edhe Theceri për tradhtarët e partisë së vetë, e përdorin normalisht sepse kështu është, ka shkallë edhe tradhtia, ndaj atdheut, partisë skuadrës por tradhtar quhesh. Edhe lojtarët kur ikin nga një skuadër futbolli i quajnë tradhtar. Nëse unë ne3sër do ikja nga PS dhe do bëja këtë që bëjnë këta do isha një tradhtar, sigurisht që kanë arsyet e tyre.

Artur Zheji: Retorika kundërshtuese ndaj jush e zotit Berisha, keni ndonjë koment?
Edi Rama: Plasi tubi i ujërave të zeza këtu në studio pupupup...

Artur Zheji: A funksionojnë epitetet që përdorni edhe ju kundër Berishës, katragjyshi me antiplumb a funksionon elektoralisht?
Edi Rama: Është personifikimi i kryeministrit nuk është ofendues as denigrues. Është fakt që ai mban antiplumb.

Artur Zheji: Nga se ka frikë zoti Berisha që mban antiplumb sipas jush?
Edi Rama: Po pyeteni ju?

Artur Zheji: Unë mendoj që nuk ka antiplumb. Nuk e shoh antiplumbin...
Edi Rama: Flet shumë ai për Spiro Kolekën, thotë daja,daja. Nuk ka qënë daja im në fakt ka qënë vëllai i gjyshit tim. Gjyshi një personazh i jashtëzakonshëm nacionalist, antikomunist, e coi të vëllanë Spiron për të bërë studimet jashtë dhe Spiro u kthye komunist. Asnjëherë nuk u morën vesh, derisa u ndanë shumë keq për arsye ideologjike, por kur Spiro Shkonte në shtëpinë e fëmijërisë së gjyshit me shumë roje, gjyshi i thoshte Spiro pse të ruajnë kaq shumë nga se ke frikë? Pyeteni dhe Saliun, pse rri me antiplumb, pse me kaq shumë roje, veturë të blinduar, qen antiminë, snajpera mbi pallate.

Artur Zheji: Unë mendoj që edhe ju nesër mund të përdorni një makinë të blinduar. Ka edhe armiq Shqipëria, nuk ka vetëm miq.
Edi Rama: Dhëntë zoti të mos kem nevojë për makinë të blinduar.

Artur Zheji: Mendoni që fushata negativiste është me rendiment sot në Shqipëri.
Edi Rama: Ne s’po bëjmë asnjë fushatë negativiste. Unë nuk e di ku e shihni ju. Sigurisht që çdo fushatë ka një bosht për të bërë diferencën mes teje dhe kundërshtarit dhe ne këtë po bëjmë.

Artur Zheji: Po kur thua kryeministri i kërrusur?
Edi Rama: Unë fus dhe veten time, them që nuk është zgjedhje mes një kryeministri si pikëpyetje dhe një tjetri si pikëçuditëse, i dyti jam unë. Se kjo është e vërteta ai është si pikëpyetje unë jam si pikëçuditëse.

Artur Zheji: Komenti juaj në lidhje me fotografinë e famshme me Obamen? Ka një denoncim konkret të një kongresmeni lidhur me këtë...
Edi Rama: Paguhen shumë para të shqiptarëve për të lobuar në Amerikë dhe gjithë ky lobim është kthyer kundër opozitës me paratë e taksapaguesve shqiptarë. ky është krimi i vërtetë.

Artur Zheji: Keni prova për këtë?
Edi Rama: Për çfarë të kem prova?

Artur Zheji: Që janë paguar para që kongresmeni amerikan t’ju kërkojë llogari...
Edi Rama: Unë them në përgjigjësui nuk e di fare kongresmenin amerikan se çfarë bën dhe as më intereson fare, se kjo e gjitha është pjesë e baltës së fushatës, sepse ka një fakt shumë të thjeshtë dhe që e di e gjithë bota që nuk mund të ndodhë që presidenti amerikan të shtrëngojë dorën dhe të fotografohet me dikë që nuk kalon nuk e di në sa filtra dhe për më tepër pastaj që fotografia e bërë nga stafi i presidentit të të vijë ty. Kjo nuk ndodh. Refuzoj të merrem me këtë është banalitet.

Artur Zheji: Ky kongresmen, Dana Rohrabacher është i paguar?
Edi Rama: Nuk e njoh fare kongresmenin, as më intereson fare, e gjitha kjo është shpifje. Kaq. Këto janë para që i paguan qeveria është një denoncim publik e bërë nga ne edhe nga LSI janë para lotimi që shteti shqiptar i paguan, në vend të përdoren për imazhin e Shqipërisë përdoren për të rënduar imazhin e opozitës. Unë di të them vetëm kaq, që jam shumë i lumtur që kam pasur mundësi ta takoj presidentin e SHBA dhe është një nga takimet më të bukura dhe më i paharrueshëm i imi personalisht për admirimin që kam për atë si person dhe si figurë që transformoi njëherë e përgjithmonë mënyrën e të bërit fushatë mbi këtë tokë.

Artur Zheji: Ndoshta ekspozimi i tepërt i asaj fotoje me Obamën ka ngjallur edhe këtë gjë?
Edi Rama: Po çmë duhet mua, as më intereson fare. Këta janë të dëshpëruar dhe njerëz të dëshpëruar bëjnë gjëra të dëshpëruarua. Këto janë shpifje e montime, nga kjo e fotografisë tek ajo që Edi Rama nuk paguan taksa tek shtëpia 57 metra e gjatë, tek Edi Rama martohet për zgjedhje, të gjitha këto janë dëshpërim dhe vetëm dëshpërim.

Artur Zheji: Më kanë ardhur shumë mesazhe në lidhje me historinë e shtëpisë së bashkëshortes suaj.
Edi Rama: Kush është shtëpia e bashkëshortes, kot për kuriozitet ju pyes?

Artur Zheji: Unë nuk di shumë mbi këtë...Di që është dhënë një leje për një pallat në një shesh...
Edi Rama: E kuptoni si funksionon bota e shpifjes? Funksionon në mënyrë shumë perverse, e thotë Saliu, e marrin dhe e përpunojnë të tjerët, futen edhe organet e shtetit në këtë punë, krijojnë pseudo fakte e marrin mediat e rrotullojnë, përsëritet përsëri dhe pa pritur e pa kujtuar kthehet në një të vërtetë. Tipike metodika e propagandës hitleriane dhe enveriane dhe në fund fare vjen njeriu përballë dhe duhet ti përgjigjet pyetjes si është puna e atij pallatit të bashkëshortes? Ndërkohë që s’ka pallat, s’ka asnjë lidhje me gruan time, ndërkohë që s’ka absolutisht asnjë të vërtetë dhe gjithë këtë montaturë që niset nga një fakt, i cili rrrugës deformohet dhe kthehet në një fakt tjetër. Ja kjo është e vërteta e thjeshtë.

Artur Zheji: Në këtë botë kemi zgjedhur të jetojmë...
Edi Rama: Një shpifje tjetër që dëgjoj është se Edi Rama nuk ka shkuar 275 ditë në zyrë. Cfarë është kjo? Një shpifje që rrotullohet.

Artur Zheji: Pse i ke kaq shumë pasion këto pyetje unë nuk ka bëra?
Edi Rama: Flasim për botën e ndryrë të shpifjeve, jo për botën ku jetojmë.

Artur Zheji: Akte ligjore për të përgënjeshturar këtë gjë, P.Sh nëse ky denoncim fjala vjen për ndërtimin pa leje të shtëpisë së zonjës suaj, bëhet një denoncim. Kjo është pjesa e akuzës. Si pastrohet kjo? Me anë të një denoncimi? Me proces gjyqësor?
Edi Rama: Janë të gjitha inekzistente. Jo nuk pastrohet me këto e di pse? Unë jam njeriu që kam hapur, kam bërë nja 30 padi dhe nja 30 kallëzime për të gjitha këto dhe asnjë gjyq nuk është zhvilluar deri më tani për të thënë është apo jo e vërtetë. Ndërkohë që gjyqet e kalamajve të Saliut, që janë të përfshirë d.p.d në historita dhe që janë gjyqe të krijuara nga ata duke akuzuar për shpifje Erjon Brace ne Sajmir Tahirin, Taulant Ballën që bazohen mbi fakte e dokumenta zyrtare i bëjnë me shpejtësi, nuk pranojnë dëshmitarë as prova vetëm dënojnë opozitartët. Kjo është bota që mbahet mbi të shkuarën me forcën shtypëse të gjithë sistemit nga një kryeministër.

Artur Zheji: Ju ndërtoni një panoramë sikur duket që Berisha ka gjithçka në dorën e vetë, sikur është një oktapod që kontrollon gjykatat, këtë atë...
Edi Rama: Pse nuk është? Po si ka mundësi që unë fitoj zgjedhjet për kryetar bashkie të Tiranës dhe me gjykatë zgjedhjet vidhen...

Artur Zheji: U numërua cdo votë. Ai është një interpretim i gjykatës...
Edi Rama: Në gjyqin ndaj Tahirit gjykata nuk ka pranuar as provat...

Artur Zheji: Se ke bërë ndonjëherë publike këtë që s’janë pranuar as provat...
Edi Rama: E ka dhënë tv juaj me zë dhe me figurë Sajmir Tahirin që ka thënë s’u pranuan as provat.

Artur Zheji: Nuk iu duket sikur fabrikohet gradualisht tek ju por edhe tek lidershipi politik shqiptar në përgjithësi kulti i një individi me ngjyrë rozë ose soft jo si ai monumental i së kaluarës. E ndjeni veten të kërcënuar nga këto? Nuk ju përkëdhelet pak si shumë sedra nga gjithë këto spote, sa miliona herë qarkullon fytyra juaj, personazhi juaj...po i kundërshtarit tuaj...
Edi Rama: Kjo ndodh në të gjitha fushatat. Ka një rol të rëndësishëm figura e liderit në fushatë, jo vetëm këtu tek ne po kudo. Njerëzit janë shumë të prirur të përcaktojë zgjedhjen e tyre duke u nisur nga personaliteti i liderëve dhe për këtë arsye është një zgjedhje e imponuar dhe jo një zgjedhje e lirë. Është e pashmangshme.

Artur Zheji: Keni ndonjë tip vaksinimi për të mos u sëmurur nga dashuria me vetveten, nga kulti i individit, nga adhurimi i vetvetes...
Edi Rama: Besoj që me kohë njeriu fiton imunitetin e nevojshëm, kur nuk e merr veten aq seriozisht sa ti duket sikur ka në dorë fatet e botës. Nuk i ndodh të gjithëve dhe unë shpresoj të jem tek pjesa që nuk më ndodh. Por duke folur për mediat në këtë fushatë besoj që një nga aspektet pozitive edhe pse pak si anormale për botën e sotme, është pasja në dispozicion e shumë hapësirave live dhe besoj nga kjo anë fushata e kësaj radhe ka qenë komplet ndryshe nga gjithçka ka pasur më përpara. Është anrmale për botën e sotme nuk e gjen në ndonjë vend tjetër. Shqiptarët konsumojnë shumë politikë, përderisa mediat këtë produkt e tregtojnë me shumicë do të thotë se ka audiencë, njerëzit i ndjekin

Artur Zheji: Ndoshta nuk e bëjnë nga qejfi por nga frika...Se nuk është mirë të prishesh me kryetarin e PS dhe PD. Pse nuk dhe mitingun tim, pse e dhe për të shkurtër, kanë ndodhur shumë incidente gjatë kësaj fushate...Telefonata, tensione...
Edi Rama: Unë flas për pjesën e zgjerimit të madh të hapësirës së live, këtu nuk është punë frike.

Artur Zheji: Në konferencat tuaja për shtyp ka ndodhur një çudi, Ka ca kohë që ju nuk thoni më ‘të fala Sandit’ kur vijnë mikrofonat e Klanit, si shpjegohet kjo?
Edi Rama: Ka shumë kohë që nuk e përmend sepse cdo gjë ka masën e vetë. Unë jam njeri që jetoj me kreativitet, nuk mund të mbaj pafund një batutë sado e bukur të jetë.

Artur Zheji: Po pse se keni zëvendësuar me një batutë tjetër?
Edi Rama: Nuk ka asgjë pas kësaj, mos u shqetëso fare për këtë.

Artur Zheji: Jo unë gëzohem, sepse është mirë që një botues që ndjehej i kërcënuar....është mirë.
Edi Rama: Dihet botërisht që unë kam bërë një zgjedhje shumë të qartë dhe e kam thënë edhe publikisht prej kohësh që do të jem i pranishëm në çdo lloj audience...

Artur Zheji: Është pjesë e kësaj zgjedhje që psh. Ditën e enjte që është e enjtja e fundit, që i bie nesër ju do të gjendeni tek Fevziu ndërsa zoti Berisha do të gjendet tek Sokol Balla. Duket një lloj rokade, gjithnjë ka ndodhur e kundërta...që doktori ka qënë tek Klani dhe ju tek TOP-i...
Edi Rama: Nuk ka lidhje, të premten unë jam me Sokol Ballën në ditën e fundit, natën e fundit.

Artur Zheji: Nuk mendon që do krijohen xhelozia mediatike në televizione...
Edi Rama: Unë nuk kam qenë të mërkurën e kaluar këtu, nesër atje, pasnesër atje...është kalendari dhe ju e dini shumë mirë që kalendarin nuk e bëj as unë përveç të tjerash, e bën Endri Fuga.

Artur Zheji: Këto janë të pabërat e Fugës?
Edi Rama: Jo të pabërat, është organizimi i punës që ka bërë Fuga është normale.

Artur Zheji: Një pyetje të fundit para se të ndahemi. Cila do të ishte gjëja e parë si kryeministër, puna e parë nëse fitoni zgjedhjet e 23 qershorit?
Edi Rama: Për mediat apo për Shqipërinë?

Artur Zheji: Po dhe mediat pjesë e Shqipërisë janë...
Edi Rama: Si e doni juve? Për të gjitha?

Artur Zheji: Po çfarë do bëjë ditën e parë në zyrë? Do lyeje zyrën do ndërroje skrivaninë? Do ndërroje dosjet?
Edi Rama: Si kam menduar, këto janë gjëra të parëndësishme.

Artur Zheji: Nuk e keni menduar fitoren?
Edi Rama: Unë kam menduar se çfarë do bëjmë bnë 100 ditët e para, po se çdo bëj unë ditën e parë kjo s’ka pikë rëndësie. Çfarë do bëjmë në 100 ditët e para e kam menduar.

Artur Zheji: Po nëse Berisha do të fitonte zgjedhjet më 23 qershor, çfarë do bënte të parën e dini?

Artur Zheji: Nëqoftëse nuk i përgjigjeni pyetjeve me ‘nëqoftëse’, nëqoftëse gjërat shkojnë për mbarë ju fitoni zgjedhjet...unë ju uroj cdo të mirë. Faleminderit që ishit me mua.

Edi Rama: Nuk i përgjigjem pyetjeve me ‘nëqoftëse’ asnjëherë...

(Përgatiti: Matilda Arapi/ Elda Menga/BalkanWeb)

[Albo]

Edi Rama tek Tonight me Ilva Tare

[Qyfyre]

Pak veshtire te jete shpifje, se e ka botuar ne faqe zyrtare kongresmeni. Mund ta akuzoje qe eshte paguar po jo qee shte shpifje hetimi.

[Llapi]

Plagoset me armë komisioneri i PS-së


Publikuar më 22.06.2013 | 22:44



LAPRAKË- Vetëm disa orë na ndajnë nga zgjedhjet dhe incidentet vijojë të shpeshtohen. Në orët e mesnatës është plagosur me armë një shtetas në Laprak. Mësohet se i plagosuri është Arjan Rrahmani, 32 vjeç, komisioner i Partisë Socialiste. Ngjarja ka ndodhur afër zyrës së Partisë Demokratike, ndërkohë i plagosuri është transportuar në Spitalin Ushtarak i Tiranës.

Menjëherë në vendngjarje kanë mbërritur uniformat blu, ndërsa nuk dihen ende shkaqet e ngjarjes. Policia deri tani ka ndaluar 8 shtetas, në kërkim të autorit të plagosjes.

Mësohet se të plagosurit janë 3, dhe se disa persona kanë qëlluar me armë në një lokal pranë shtabit elektoral në Laprakë.

[loni-loni]

Lapraka asht e mbushun me arme,,,,,,,,,ndoshta prej aty do filloi "protesta popullore"