Arvizu: Po ushtrohet presion ndaj zgjedhësve

[Albo]

Ambasadori amerikan në Tiranë, Aleksandër Arvizu pohon se në Shqipëri po ushtrohet presion ndaj zgjedhësve për të detyruar ata që të votojnë për një subjekt të caktuar zgjedhor. Gjatë një bashkëbisedimi online nëpërmjet faqes në Facebook të ambasadës me qytetarët, ambasadori amerikan u shpreh se ka dijeni që po ushtrohet presion ndaj votuesve. Por Arvizu mendon se votuesit kanë fuqi të kapërcejnë çdo kanosje, pavarësisht kahut politik nga vjen dhe të mund të zgjedhë. “Unë nuk e vë në dyshim në asnjë moment që po ushtrohet presion ndaj votuesve dhe nuk e kam fjalën vetëm për njërën palë. Por skemat e atyre që ushtrojnë presion do të kenë sukses vetëm nëse ia dalin që të kanosin votuesit individualë. Pra ju, votuesit, keni fuqinë për të kapërcyer këtë kanosje, pavarësisht kahut nga i cili vjen. Zgjedhja është e juaja”, u shpreh Arvizu. Cilat janë pritshmëritë tuaja dhe kush mendoni se do fitojë zgjedhjet? Ishte një tjetër pyetje. “Presim që procesi zgjedhor, vetë votimi, nxjerrja e rezultateve, të jetë konsekuent me standardet e një vendi anëtar të NATO-s dhe gjithashtu të një vendi që aspiron të bëhet vend anëtar i BE-së”, – nënvizoi Arvizu. Aleksandër Arvizu u pyet edhe nëse këto zgjedhje do të prodhojnë një rotacion të pushtetit. “Nëse vota është e lirë dhe e drejtë, siç duhet të jetë, atëherë votuesit do të jenë ata që do të vendosin nëse, dhe kur duhet të ndodhë rotacioni”, – u përgjigj ai. Nga ana tjetër, ai theksoi se nuk është asnjëherë vonë që KQZ të rikonstituohet dhe të funksionojë në këto zgjedhje si e plotë. “Kemi adresuar çështjet e KQZ-së në mënyrë të vazhdueshme. Nuk është e tepërt të themi se ne besojmë fort që duhet të konstituohet plotësisht. Që kjo të ndodhë, duhet që të dyja palët të bien dakord. Nuk është asnjëherë shumë vonë”, – tha Arvizu, ndërsa theksoi se zgjedhjet duhet të jenë me standardet e kërkuara. Ai vetë të dielën do të vëzhgojë zgjedhjet në Tiranë, në krye të një grupi vëzhguesish amerikan.

MAPO

[Albo]

Fushata si spektakël, dhe mënyrat e “pista” si po fitohet vota

Vladimir Karaj

Fishekzjarrët dhe koreografitë apo kamerat që filmojnë gjithmonë në këndin e duhur për të treguar sheshe plot, kur në fakt nuk janë, është pjesë e një spektakli që për shumë njerëz pak tregon për atë që do të ndodhë vërtet më 23 qershor. Skandalet e blerjes së votës me favore të vogla dhe deri me tollona ushqimi, të publikuara tashmë në media (Fiks-Fare), përfshi këtu deri dhe akuzat e palëve që shpërthyen në ditët e fundit e deri tek ambasada e SHBA në Tiranë konfirmojnë një luftë për çdo votë, por me mjete të pandershme dhe jo demokratike.

“Ambasada amerikane ka informuar ODIHR-in për disa raportime se disa votues janë udhëzuar të fotografojnë votën, për të vërtetuar votën e tyre për një parti apo për një tjetër. Sigurisht, nëse kjo është e vërtetë, kjo është kundra të gjitha standardeve ndërkombëtare dhe çdokush që udhëzon të tjerët për ta bërë këtë është një turp për shqiptarët, kudo”, i përgjigjej ambasadori Aleksandër Arvizu pyetjes së bërë në një bashkëbisedim në Facebook mes tij dhe dhjetëra ndjekësve të faqes së ambasadës në rrjetin social. Ndërkohë dje deri ministri i Brendshëm akuzoi publikisht se pjesëtarë të LSI po blinin votën dhe tha se ata do të përgjigjeshin para ligjit. “I bëj thirrje LSI-së të ndërpresë këto tentativa kriminale, pasi ndaj çdokujt që do tentojë, do veprojë ligji dhe vetëm ligji”, deklaroi Noka, pas akuzave më herët të Lëvizjes Socialiste për Integrim se ministri kishte angazhuar forca speciale për të trembur mbështetësit e saj. Më herët LSI akuzoi se përkrahësit e tyre ishin marrë të shoqëruar në komisariate pa arsye dhe u ishte bërë presion. Socialistët që janë edhe partia më e madhe në opozitë, kishin kohë që ankoheshin kryesisht për presionin mbi punonjës që paguhen nga buxheti i shtetit dhe që sipas tyre detyrohen të votojnë për mazhorancën. Ndërkohë, dy ditët e fundit ata kanë denoncuar dhe kallëzuar në prokurori drejtorin e Spitalit në Librazhd, ndërsa bënë publike një listë oficerësh të policisë që i akuzojnë për përfshirje në fushatë.

Sidoqoftë, kjo është vetëm një pjesë e asaj që denoncohet. Grisjet e flamujve, heqjet e posterave apo deri rrahje të përkrahësve të kandidatit të pavarur Dritan Prifti në Fier apo të një kandidatit të Frymës së Re Demokratike po në këtë qark, janë denoncuar si dhunë për motive politike. Zalart.al, një faqe e hapur nga shoqëria civile për të mbledhur denoncimet, numëron deri 73 denoncime për shkelje që fillojnë nga përdorimi joetik i fëmijëve në fushatë deri tek dhuna. Filmime dhe foto që tregojnë grisje dhe heqje posterash të njërës apo tjetrës palë dhe një numër të konsiderueshëm incidentesh. Aranita Brahaj thotë se një redaksi e vogël, e krijuar enkas, punon për të zbardhur denoncimet që bëhen nga qytetarë dhe do jetë funksionale edhe ditën e zgjedhjeve për të sinjalizuar raste të ngjashme.

Nga ana tjetër, megjithëse vetë palët politike ranë dakord për të bërë një kod zgjedhor të rreptë që parashikon si vepra penale që dënohen deri 8 vite burg, veprimet për të ndryshuar, blerë apo tjetërsuar votën, fenomeni duket se nuk është zhdukur. Në fakt prej kohësh një lloj burse vote duket se funksionon. Partitë politike apo kandidatët për deputetë blerës kryesisht kanë targetgrup njerëz që nuk kanë votuar në zgjedhjet e mëparshme, duke i listuar militantët e njërit krah apo tjetrit si vota të sigurta që nuk mund të ndryshohen. Persona të ndryshëm pretendojnë se u janë ofruar para apo kanë mësuar për ofrim parash në këmbim të votës me shifra që variojnë nga 150 euro për një familje deri në shuma simbolike me 5 mijë lekë të vjetra për votë në komunitetet vulnerabël si ai rom. E ndërsa për presionin përgjithësisht fajësohen pjesëtarë të mazhorancës në pushtet, sikurse denoncojnë mjaft njerëz në murin e ambasadës së SHBA, për blerjen e votës akuzat janë bërë për të gjitha palët. Kryesisht janë kandidatë për deputetë të panjohur por të kamur që akuzohen se po hedhin para në fushatë për të tjetërsuar votën. Zyrtarisht, asnjë nga partitë politike nuk ka një distancim të qartë prej këtyre formave deri në këtë javë të fundit të zgjedhjeve, kur socialistët financuan një reklamë që thekson dënimet në rast manipulimi me votën apo tentative për ta tjetërsuar atë.

SHBA dhe BE shihen nga mjaft votues mosbesues se vullneti i tyre do të numërohet dhe merret në konsideratë si kamerdarja e shpëtimit, por këto të fundit japin një tjetër zgjidhje.

Ambasadori amerikan ndërsa i përgjigjej një të riu që denonconte kërcënimin, theksoi se ai nuk e vinte në dyshim që ndaj votuesve po ushtrohej presion. “Unë nuk e vë në dyshim në asnjë moment që po ushtrohet presion ndaj votuesve, dhe nuk e kam fjalën vetëm për njërën palë. Por skemat e atyre që ushtrojnë presion do të kenë sukses vetëm nëse ia dalin që të kanosin votuesit individualë. Pra ju, votuesit, keni fuqinë për të kapërcyer këtë kanosje, pavarësisht kahut nga i cili vjen. Zgjedhja është e juaja”, thoshte Arvizu duke bërë në njëfarë mënyre thirrje për guxim dhe maturi.

MAPO

[Antiproanti]

Arvizu: Po ushtrohet presion ndaj zgjedhësve

...

Nje nder problemet me "te vogla" te zgjedhjeve ne Shqiperi...
Ne vende si Shqiperia cdo here kishte dhe do te kete presion pak a shume te ngjashem ndaj zgjedhesve.

Problemi kryesor i zgjedhjeve ne Shqiperi eshte fakti se ato nuk jane zgjedhje te nje shteti sovran, te lire dhe demokratik, por ne rastin me te mire "zgjedhje" cfare mbahen neper koloni klasike dhe shtetet nen pushtim te huaj.
Vete fakti qe SHBA dhe BE kane lejur zgjedhje te tilla, edhe pse kane mundur ti pengojne dhe ndalojne, eshte shenje e qarte se jane te interesuara qe permes zgjedhjeve pa legjitimitet te duhur, te instalojne qeveri dhe pushtete sipas interesave te tyre dhe me legjitimitet te dyshimte, ne menyre qe Shqiperine ta bashkqeverisin permes ambasadoreve dhe emisareve te tyre.

Sido qe te jete, procesi zgjedhor dhe zgjedhjet ne Shqiperi qysh tash jane ne kundershtim me kushtetuten dhe ligjet e vendit dhe si te tilla duhet patjeter te shpallen te pavlefshme, pavareisht kush do i fitonte. Gjykata Kushtetuese eshte dashur moti te merret me kete ceshtje dhe ti ndaloje keto zgjedhje. Kushtetuta dhe ligji duhet te jete mbi te gjitha. Atje ku nuk respektohet kushtetuta dhe ligji nga institucionet me te larta te shtetit, nuk mund te kete as zgjedhje legjitime.