Hapet tuneli i Krrabës

[Albo]

Hapet tuneli i Krrabës, Berisha: Pres Blushin në PD deputeti i PS: Më parë shkon ai në hënë

TIRANË Ashtu siç kishte paralajmëruar në faqen e tij në Facebook, kryeministri Sali Berisha inauguroi dje hapjen e tunelit të Kërrabës, segmenti më i rëndësishëm i autostradës Tiranë-Elbasan. Kjo rrugë e cilësuar si arteria kryesore e Korridorit, 8 kap një vlerë investimi prej 204 milionë dollarësh. Rruga ka një gjatësi 27 kilometra, 4 korsi, me një tunel 2.5 kilometra të gjatë, 7 mbikalime dhe 4 nënkalime. Autostrada përbëhet nga tri segmente: Segmenti I (Sauk -Tuneli i Krrabës, gjatësia 13 km) Segmenti II (Tuneli i Krrabës, gjatësia 2.5 km ), Segmenti III (Tuneli i Krrabës – Elbasan, gjatësia 11.5 km).



Tuneli i Kërrabës u realizua në një kohë rekord prej 13 muajsh. Punimet për ndërtimin e tij nisën në muajin maj të vitit 2011, dhe pas afro 9 muajsh filluan edhe dy kontratat e tjera të segmenteve rrugore para dhe pas tunelit. Fillimisht, kryeministri Berisha u prit në hyrjen e tunelit nga ana e Tiranës, nga deputetë të qarkut të Tiranës dhe kryetarë të komunave përreth, bashkë me të cilët përshkroi tunelin deri në daljen e Elbasanit, ku u prit nga deputetë të Elbasanit, punonjës të firmës AKTOR.SA, si dhe qytetarë të shumtë. Gjatë fjalës së mbajtur me këtë rast, kryeministri Berisha deklaroi se hapja e tunelit është dëshmi e fjalës së dhënë nga kjo qeveri. “Ne mbajmë fjalën tonë dhe inaugurimi i sotëm është dëshmi e një fjale të dhënë, e një fjale të mbajtur para jush, qytetarë të Elbasanit, para mbarë shqiptarëve. Në këtë ceremoni ishte i ftuar kryetari i Bashkisë së Elbasanit, pasi donim që ai të përfaqësonte qytetarët. Për arsye partiake ai nuk erdhi, por i garantoj elbasanasit të djathtë, të majtë, të paparti, se kjo është vepra e tyre, ta gëzojnë ata dhe mbarë shqiptarët”, – tha ai. Berisha i kujtoi sërish Ben Blushit deklaratën e këtij të fundit se do të merrte teserën e PD-së në rast se rruga do të bëhej. “Gjithë këto ditë kam menduar për zotimin e Ben Blushit dhe kam vendosur ta ftoj në selinë e PD dhe t’i dorëzoj dokumentin e PD-së vetëm e vetëm për t’i dhënë atij mundësinë një herë në jetë për të mbajtur fjalën e tij. Ndaj dhe e pres në seli që t’i dorëzoj atë dokument, se ne tunelin e ndërtuam”, – tha ai. Kryeministri iu drejtua edhe kryetarit të opozitës. “…Atë

e ka kapur sindromi i moshës sime. Dëgjojeni vëllezër se çfarë është ky sindrom. Duke patur vite rinie, pa rini, shoku i autobusit ka ardhur tek të 50-at me ide boshe në kokën e tij dhe tani, meqenëse nuk kap dot vizionin tonë, nuk kap dot rrugët, autostradat dhe integrimin europian, gërmon dhe gërmon në të shkuarën e tij dhe nxjerr ide të së shkuarës për t’ua servirur shqiptarëve, mashtrime, mallkime dhe gjëra tërësisht të pavlera, por kjo nuk është përgjegjësia ime. Ai u rrit zvarranik në bunkerë, ndërsa unë u rrita zog malesh dhe ja ku jam si zogjtë që fluturojnë”,- tha ai duke ftuar demokratë e socialistë që të votojnë për numrin 44, për Partinë Demokratike.

Autostrada Tiranë- Elbasan ka filluar në muajin maj të vitit 2011 me punimet në tunelin e Krrabës.

Rruga ka një gjatësi 27 kilometra, 4 korsi, me një tunel 2.5 kilometra të gjatë, 7 mbikalime dhe 4 nënkalime. Autostrada përbëhet nga tri segmente:

Segmenti I (Sauk -Tuneli i Krrabës, gjatësia 13 km)

Segmenti II (Tuneli i Krrabës, gjatësia 2.5 km )

Segmenti III (Tuneli i Krrabës – Elbasan, gjatësia 11.5 km)


Blushi: Më kollaj shkon Berisha prapa diellit sesa unë në PD

Nga tubimi elektoral përmbyllës i mbajtur dje në qytetin e Elbasanit, deputeti socialist Ben Blushi i ka kthyer përgjigje Berishës për “ftesën” që ky i fundit i ka bërë atij për të marrë teserën e PD-së, meqë qeveria e djathtë arriti të mbajë premtimin dhe të vërë në punë brenda afateve të caktuara rrugën e re Tiranë-Elbasan. Në fjalën e mbajtur në këtë takim, Blushi ka theksuar se më lehtë mund të shkonte Berisha në hënë me not, sesa ai vetë të shkonte në PD. “Edhe 7 ditë për të arritur një Shqipëri më të jetueshme. E keni parë besoj Saliun që vjen vërdallë nëpër Elbasan. Dhe sot e patë, besoj. Kam dëshirë t’i them disa fjalë nga kjo tribunë e Elbasanit. Ka një 1 muaj që më lutet mua të shkoj në PD apo jo? E para, e dini pse më lutet? Sepse në PD nuk ka më asnjë njeri. PD-ja nuk ka më njerëz, nuk ka më listë deputetësh, nuk ka më vota, nuk ka mbështetës. Më kollaj shkon Saliu në hënë me not, sesa shkoj unë në PD. Më kollaj shkon Saliu me vrap deri në Kinë dhe kthehet, sesa shkoj unë në PD. Më kollaj bëhet Saliu eskimez, sesa unë në PD. Dhe më kollaj shkon Saliu prapa diellit në 23 qershor, sesa shkoj unë në PD”, – tha Blushi në fjalën e vet. E në fund ai është shprehur i sigurt se PD dhe kryeministri Berisha do humbasin më 23 qershor. “Padyshim që në 23 qershor Saliu do shkojë prapa diellit. Në këto 8 vite Saliu i hoqi këtij vendi shpresën”, – u shpreh Blushi.

MAPO

[Albo]

Elbasan-Tiranë pa kthesa, tuneli si rrugë dhe si pjesë e fushatës

Vladimir Karaj

Në stacionin e furgonëve të linjës Tiranë-Elbasan, pasagjerët duan të dinë nëse mikrobusi do të kalojë apo jo nga tuneli, shoferi i garanton të gjithë me një fije buzëqeshje ndërsa tenton të mbledhë sa më shumë dhe më shpejt pasagjerë. Një pjesë e mirë e kanë të vështirë edhe ta besojnë që (ai) është ndërtuar. Ideja deri para disa vitesh ka qenë në listën e “fantazive” dhe nëse dikush e përmendte seriozisht, një pjesë do të qeshnin me siguri. Kërraba deri dje dukej shumë e madhe për t’u çarë më dysh, por pasi kryeministri Sali Berisha preu shiritin, ata që udhëtuan nga Elbasani në Tiranë apo anasjelltas, patën për herë të parë shansin ta shihnin të realizuar fantazinë. Mjaft janë të emocionuar prej kësaj. Një vajzë te të 30-at filmoi me celular thuajse gjithë udhëtimin nga mikrobusi me të cilin u nisëm edhe ne, duke qëndruar gjysmë e ulur për të pasur një pamje më të mirë drejt xhamit të parë. Nuk është e vështirë të dallosh udhëtimin e djeshëm nga hera e fundit që shkuam nga Tirana në Elbasan.

Pa kthesa

Makina thuajse nuk duhet të marrë asnjë kthesë dhe kjo e bën të vështirë të besosh që po udhëton në këtë drejtim, pa u lëkundur majtas dhe djathtas, apo pa ndjerë atë bllokimin në veshë që ndodh kur je ngjitur lart në Krrabën e kthesave. Në fakt, hera e fundit që duket dhjetëra vite larg ishte të shtunën në mëngjes dhe mund të ketë qenë edhe si hera e fundit (në mos u nisshim për nostalgji) që e shihnim qytetin nga lartësitë e Krrabës dhe që bënim të njëjtën rrugë që kemi bërë prej vitesh. Mungesa përtej dritares e kodrave dhe peizazheve me rezervuare, fshatra e lloj e lloj ngjyrash, poshtë në greminën e Krrabës na bën edhe nostalgjikë. Por rruga e vjetër do jetë aty për të gjithë ata që do kenë durimin ta shohin si një prej më panoramikeve.

“Tuneli është monument madhështor i një modeli i cili ka vetëm një qëllim, përmirësimin e jetës suaj. Ne mbajmë fjalën tonë. Inaugurimi i sotëm është dëshmi e një fjale të dhënë, e një fjale të mbajtur para jush, qytetarë të Elbasanit, para jush, shqiptarë”, tha kryeministri Berisha dje ndërsa preu shiritin para mbështetësve të tij që kishin ardhur nga të dy krahët e tunelit për të parë inaugurimin. Ndërkohë, disa orë më vonë ndërsa bëjmë të njëjtën rrugë, bashkudhëtarët tanë duan të dinë nëse ka mbaruar e gjitha, nëse do ketë një shtresë tjetër asfalti. Shoferi sqaron se rruga në fakt nuk ishte mbaruar, duke shpjeguar edhe pse tek-tuk në ndonjë pjesë të saj lëkundeshe si të ishte me gropa. Kur shfaqet tuneli, vajza e entuziazmuar dhe nja dy fëmijë ngrihen në këmbë brenda mikrobusit për të parë më mirë përpara. Ajo thotë disa batuta dhe qesh njësoj si dikush që i jepet një dhuratë. Kur makina rrëshqet në brendësi të njërës prej hyrjeve, thuajse të gjithë po shohin para ose anash në muret monotone e gri që kalojnë ndanë xhamave.

Në tunel

Investimi në tunelin e Krrabës kap shifrën e rreth 100 milionë dollarëve, ndërsa e gjithë autostrada kushton rreth 293 milionë dollarë. Por, megjithëse ky është një investim i kushtueshëm, për kryeministrin Berisha autostrada Tiranë-Elbasan, me tunelin dhe urat e saj, që llogariten të ndërtohen në 1.2 kilometra gjatësi, ky është një investim i paçmueshëm.



Sigurisht nuk ka asgjë të atillë si loja e mjegullës me kodrat e Dumresë, por nga ana tjetër askënd nuk po e zë makina dhe as bezdisesh nga lëvizja sa në një krah në tjetrin. Pas 3 minutash (dikush e mati kohën e udhëtimit) jemi jashtë. “Vetëm kaq”, thotë vajza sikur e zhgënjyer që udhëtimi në tunel nuk do të vazhdonte edhe më gjatë. Për 20 minuta ishim mbi Bërzhitë dhe makina kalon në rrugën e vjetër. (Pak pasi kishim qenë dëshmitarë të vonuar të aksidentit të parë në rrugën e re, një makine që kishte rënë në një nga kanalet anësore. 2 të plagosur. Shpejtësia? Duhet thënë, Krraba e vjetër ishte një nga rrugët më të rrezikshme në vend me humnera të mëdha, por aksidentet andej janë të rralla, e kjo më shumë sepse shoferët nuk do guxonin t’i jepnin gazit në kthesa. Rruga e re duket si një ftesë për të bërë të kundërtën për fat të keq.) Ndërkohë që faturino mbledh paratë, shoferi (ne krijuam dyshimin se e bëri me dashje për të justifikuar faktin që çmimi i biletës nuk kishte ndryshuar) nuk u rikthye më në autostradë duke na e zgjatur edhe nja 25 minuta ekstra udhëtimin. Kur e pyetën faturinon, ai mblodhi supet duket thënë se nuk kishte rrugë tjetër edhe pse prej aty i shihnim makinat që kalonin në autostradë paralel vetëm pak metra më tutje. Ishte një mashtrim sidoqoftë ja shumë i rëndë përderisa ndërkohë Tirana ishte shumë afër.

Tuneli i Krrabës, me gjatësi 2.4 kilometra në secilin prej tubave të tij, ndodhet 13 kilometra larg Tiranës dhe rreth 10 kilometra larg Elbasanit, duke përgjysmuar pothuajse distancën mes dy qyteteve dhe duke u shndërruar në një nga nyjet nevralgjike të sistemit rrugor shqiptar.



Fushata me tunel

“Mbaj anën e djathtë”, shkruhet në tabelat që të drejtojnë për të hyrë në tunel. Janë thjeshtë shenja rrugore, por në pak ditë para datës së zgjedhjeve, duket sikur edhe ato janë të qëllimshme ashtu si posterat dhe flamujt e PD që ndryshe nga rrugët e tjera të vendit këtu nuk përzihen me asnjë ngjyrë tjetër. Në Elbasanin që lamë pas njerëzit flasin për tunelin, por jo për veprën, por nëse ajo do i detyronte ata të votonin apo jo kryeministrin Berisha. Nëse tuneli ishte i mjaftueshëm apo nëse pas kësaj nuk kishin ç’të kërkonin më. Të majtët duke edhe më të inatosur ( si të zënë ngushtë) me Berishën pas kësaj, ndërsa të djathtët sigurisht shpresojnë se kjo do të ndryshojë situatën në qarkun që edhe pse nuk jep asnjëherë mbështetje absolute ka votuar gjithmonë majtas. Berisha vetë ashtu si 4 vjet më parë (edhe pse atëherë mitingu ishte më i madh dhe në të ishte i pranishëm edhe kryeministri Turk Erdogan) në Kukës i vë shenjën fushatës së tij me inaugurimin e një tuneli dhe të një rruge që siç thotë edhe vetë ishte një ëndërr. Ai dje i ftoi shqiptarët të bashkohen me Partinë Demokratike, dhe nuk përjashtoi as deputetin socialist Ben Blushi, të cilin e ftoi të marrë teserën e demokratëve, sipas premtimit të bërë ende pa nisur ndërtimi i autostradës: “Për t’i dhënë atij mundësinë një herë në jetë të mbajë fjalën e tij, ndaj dhe e pres në seli kur të dojë t’ia dorëzoj teserën sepse ne tunelin e ndërtuam,” tha Berisha. Socialistët u përgjigjën në mbrëmje, kur në një miting “madhështor” sipas kreut të tyre, Ben Blushi iu përgjigj ironikisht Berishës se “më shpejt do të notonte ai (kryeministri) nga toka në hënë se sa ai (Blushi) t’i afrohej PD”. Blushi ndërkohë nuk e përmendi tunelin edhe pse dukej sikur e kishte në majë të gjuhës. Edi Rama përkundrazi. “Shfaqje të shëmtuar të tunelit dha në mes të fushatës, Sali Berisha. Saliu u shfaq sot në një tunel duke pasur shpresën se do tërheqë popullin në atë tunel. E vërteta është se rruga bëhet me paratë e popullit dhe varfëria luftohet me politika, papunësia luftohet me politika, arsimi e shëndetësia luftohet me politika”, tha Rama duke sulmuar kryeministrin. Duket se tuneli do të jetë ndërkohë edhe motivi i fushatës që do të bëhet në Elbasan në ditët e mbetura, edhe pse ende askush nuk mund të thotë sa do të ndikojë ai në rezultat.

MAPO

[Albo]

Rama: Berisha të përgjigjet për tunelin e korrupsionit

“Shfaqje të shëmtuar të tunelit dha në mes të fushatës Sali Berisha. Nuk mund t’i thotë Elbasanit shikoni sa i bukur është tuneli që u ndërtua me paratë e popullit, por të përgjigjet për tunelin më të gjatë të papunësisë që ka hapur për këtë qark. Për tunelin e varfërisë, për tunelin më të gjatë të korrupsionit. Më 23 qershor Saliu do ndëshkohet masivisht. Më 23 qershor do dalim nga tuneli i braktisur i Saliut. Kujtoi katragjyshi se duke hapur tunelin, shqiptarët do harronin gjithë këto tunele të tjera që Saliu i mban peng”. Kjo ishte përgjigja e kreut të PS-së dje në mitingun përmbyllës të fushatës në Elbasan, në të njëjtën ditë që u inaugurua dhe tuneli i autostradës Tiranë-Elbasan dhe që shihet nga demokratët si një mundësi për të shtuar votat në 23 qershor.
Sipas kreut të PS, Berisha në kuptim figurativ ndërtoi dhjetëra tunele ku ka futur shqiptarët. “Saliu u shfaq sot në një tunel, duke pasur shpresën se do tërheqë popullin në atë tunel. E vërteta është se rruga bëhet me paratë e popullit dhe varfëria luftohet me politika, papunësia luftohet me politika, për arsimin e shëndetësinë luftohet me politika.
Saliu ka shpenzuar aq shumë para për të shtruar këto rrugë që kanë mbetur rrugëve dhe për të hapur këtë tunel, sa do kishin mjaftuar, siç thoshte Sami Frashëri, për t’i shtruar të gjitha rrugët me flori. Dhe arsyeja pse shqiptarët do e ndëshkojnë Saliun është pikërisht se paratë e tyre i humbën rrugëve, ndërkohë që shqiptarët sot kanë më pak para për të blerë ushqimin e tyre, më pak para për të arsimuar bijtë e tyre”.

MAPO

[Albo]

Hapja e tunelit të rrugësTirane – Elbasan. 11 mijë automjete kalojnë vetëm në 24 orë

24 ore nga inagurimi, ne tunelin e Krrabes kane kaluar te pakten 11 mije automjete.
“Kjo eshte sallla e kontrollit te tunelit te Krrabes ku pervec, funksioneve baze te monitorimit te tunelit regjistron dhe numrin e automjeteve.
Nepermjet nje sistemi te posacem regjsitrohet numri i mjeteve qe kalojne ne tunel si dhe lloji iI automjetit qe kalon sipas madhesise. Kjo tregon se ne tunelin nga Elbasani drejt Tiranes kane levizur afro 5500 mjete ndersa nga Tirana ne Elbasan afro 5 mije mjete. 500 mjete me shume kane ardhur ne Tirane.
Qarkullimi i mjeteve ne tunel nuk pushom ne asnje sekonde.
Te shumte jane dhe ata qe ndalojne per te bere foto
Monitorimi i tunelit kryhet nepermjet nje teknologjie te larte e njejte ne vendet e BE.

TV Klan

[pranvera bica]

Ta gezojme gjithe shqiptaret brenda dhe jashte vendit!