Te shohim para por te mos harrojme te kaluaren se perndryshe ajo do te perseritet.

[DYDRINAS]

12-12-2003

NJE VAJZE FUTI NE KURTH TE FORTET E VLORES

Kapet banda e Tatos e Borakut

Itali, prangosen kapot e trafikut të drogës


Ferdinand Dervishi


Atë që deri sot nuk e bëri qoftë ndonjë polic i përkushtuar në Vlorë, e ka bërë policia italiane fare pa dashje. Mes rezutateve të operacionit të fundit të policisë italiane të koduar me emrin "SHOFER" një "lexues" i kujdesshëm mund të zbërthejë gjithë "merimangën" e krimit në Vlorë, të paktën për vitin 2002. Aty mund të lexohen veprimet e Robert Borakut, vrasja e Elton Tatos, Ardian Muhos (Dap-Dapi), por edhe disa ekzekutime të bëra në shenjë hakmarjeje për dy të parët, ku përfshihet vrasja e Tan Malokut apo edhe e Ardian Kajmakut, ish-oficerit të policisë antikrim e Agim Hatisë nga Fieri. Dhe të gjitha këto janë shkaktuar në mënyrë të habitshme nga dëshmia e vetme e një vajze nga Fieri e rrëmbyer dhe e dhunuar nga një grup trafikantësh.

Përgjimi që shkatërroi bandën

Sipas të dhënave të policisë italiane, hetimi kishte filluar në nëntor të vitit 1999 kur në Ostuni të Brindizit policia pas një sinjali nga Shqipëria (vajza kishte mundur t'i bënte një telefonatë familjes) kishte gjetur vajzën e rrëmbyer në Fier dhe arrestuar të rinjtë që e shoqëronin. Por nuk ishte gjetur këtu filli. Ai ishte gjetur në një bllok të vogël me numra telefoni në xhepin e njërit prej tutorëve të vajzës. Pas fillimit të përgjimeve, policia italiane kishte filluar të ndërtonte merimangën e një grupi shumë të rrezikshëm shqiptaro-italian të trafikut të drogës dhe armëve.

Italianët "shërbëtorë" të shqiptarëve

Pasi kishte mundur të realizonin një numër të konsiderueshëm përgji-mesh telefonike, policia italiane kishte ardhur në përfundimin se banda ishte e një kalibri të lartë. Ajo luante në trafikun e të gjitha llojeve të drogave, në trafikun e armëve, klandestinëve (800 njerëz në ditë me skafe në Itali) etj. Në krye të saj ishte përcaktuar një i ri nga Vlora i quajtur Elton Tato. Ndërsa shqiptarët bënin ligjin, italianët përdoreshin prej tyre si shoferë për lëvizjen e drogës apo armëve. Kapo i italianevë tashmë i arrestuar ishte një i penduar i mafias për një çështje tjetër që banonte në vilën e tij të ruajtur nga policia, në Maçerata.

Sherri mes anëtarëve të bandës

Në vitin 2002 policia italiane fillon operacionet e fshehta ndaj bandës. Ajo goditej, ndërkohë që policia e maskonte këtë si të rastësishme. Kështu me kalimin e kohës ishin sekuestruar rreth 1200 kg drogë që trafikohej e shpërndahej për llogari të bandës. Një katastrofë e tillë kishte sjellë edhe përçarjen dhe futjen e shrreit mes drejtuesve të bandës. Një pjesë e të cilëve, pasi kishin humbur "mallin" në një apo më shumë raste, ishin katandisur në hallka që nuk mund të rikuperonin më kurrë. Për këtë qëllim pjesa tjetër e bandës ka vepruar duke i asgjesuar. Këtu ka nisur edhe zinxhiri i vrasjeve mafioze në Vlorë. Për këtë qëllim mendohet të jetë vrarë Elton Tatua, i njohur nga italianët si kreu i grupit e pas tij edhe Ardian Muho (Dap-Dapi). Për të dy këta është marrë hak me të njëjtën monedhë dhe mendohet se janë ekzekutuar të tjerë, filluar nga personi i njohur në Vlorë si Tan Maloku e deri te vrasja makabër e ish-policit Ardian Kajmaku dhe mikut të tij Agim Hatia.


Ekzekutimet mafioze në Vlorë reshtën pas vrasjes së Borakut

Vrasjet e tipit mafioz në Vlorë mund të konsiderohen të tilla, të palexueshme, gjatë vitin 2002 ku u shënuan të paktën 7 viktima. I pari mund të konsiderohet Luani, vëllai i Zani Çaushit, i vrarë më 22 maj. Në korrik 2002 pranë stadiumit vitet Elton Tatua, i konsideruar nga policia edhe si vrasës me pagesë dhe i akuzuar për rreth 15 ekzekutime. Pas tij ka një varg ekzekutimesh që mendohet se janë pjellë e vrasjes së Tatos. Kështu në tetor 2002 në Vlorë vritet Arben Toro dhe një muaj më pas Tan Maloku. Më 22 dhjetor 2002 vritet me bombë me telekomandë Ardian Muho, 33-vjeç, i njohur me nofkën "Dap-Dapi". Në fund të dhjetorit 2002 vriten dhe digjen të gjallë në Babicë ish-polici Ardian Kajmaku, 31-vjeç, bashkë me djalin e tezes së tij, Agim Hatia, 36-vjeç nga Fieri. Vrasjet e këtij kalibri reshtën pas ekzekutimit të Robert Borakut në Athinë më 16 qershor 2003.


Boraku protagonist në kërcënimin bërë Topallit

Robert Boraku, ish-anëtari i bandës së Kakamit (Alfred Nebiut, i quajtur shpesh si përkrahës i PD), u bë i famshëm pas kërcënimit që i bëri në vitin 1998 nënkryetares së Partisë Demokratike Jozefina Topalli, gjatë një vizite të saj në fshatin Peshkëpi të Vlorës. Ngjarja e atëhershme u përcoll me shumë zhurmë në media, por Boraku nuk u penalizua. I njëjti person, Robert Boraku ishte akuzuar më parë edhe për vrasjen e përsonit që u quajt "flamurtari" gjatë mitingut të parë të liderit të Partisë Demokratike Sali Berisha në Vlorë më 1998.

gazeta shqiptare

[DYDRINAS]

Bosi nga Durrësi urdhëroi vrasjen

Vlorë, historia e panjohur e "Dap-Dapit"

Ferdinand Dervishi

Më 19 dhjetor të vitit 2002, rreth orës 20.15 kalimtarët e bulevardit Vlorë-Skelë u bënë dëshmitarë të një skene të rrallë. Një shpërthim i fuqishëm dhe një makine e zezë e tipit Benz fluturoi për rreth 10 metra në ajër për t'u përplasur në rënie me njërën nga shtyllat e ndriçimit të bulevardit. Nga makina ishte dalluar të zvarritej një djalosh që kërkonte ndihmë, ndërsa të pranishmit, midis tyre edhe policë të rastësishëm, ngurronin të afroheshin nga frika e një shpërthimi të dytë. Më në fund dikush u afrua. Pas tri ndërhyrjeve kirurgjikale dhe pas 7 orësh luftë me vdekjen djaloshi u mund. Nga shpërthimi kishte humbur njërin sy, djegie të thella dhe një plagë të madhe në rrëzë të kofshës, hemorragjia e së cilës i shkaktoi edhe vdekjen. Ekspertët e policisë njoftuan për një atentat të tipit mafioz me minë të telekomanduar. Viktima quhej Ardian Muho, 33 vjeç, i pamartuar, i njohur mes shokëve me nofkën Dap-Dapi.

Kush ishte

Në moshën 16-vjecare Ardian Muho, i dalluar ndër shokët e tij, provon burgun e Spaçit për vjedhjen e një kali. Vitet '90 e gjejnë emigrant në Itali, ku shkon bashkë me të fejuarën e tij, vajzën e një aktori të njohur të Teatrit Kombëtar. Të dy vendosin të ndjekin studimet në Artet e Bukura te Bolonjës, por ndarja e çiftit prish planet. Muho e përjeton ndarjen në mënyrë traumatike duke u larguar për ca kohë në qytete të ndryshme të Italisë dhe Europës. Karakteri i tij, njohja e disa gjuhëve të huaja dhe fiziku i fuqishëm kishin bërë që të tjerët t'i atribuonin cilësinë e liderit mes qarqeve të dyshimta të emigracionit ndërkombëtar. Në vitin 1998 arrestohet nga policia italiane nën akuzën e vrasjes. Për dy vjet me radhë e burgoset në burgun famëkeq të Azinaros. Në rrethana të panjohura arratiset në mënyrë spektakulare. Po atë ditë komunikata e burgut deklaroi se Ardian Muho ishte vrarë nga rojat italiane bregdetare në tentativën e tij për t'u arratisur. Për dy javë rresht strehohet nëpër shkëmbinjtë e brigjeve italiane, deri sa një mik i tij nga Vlora shkon dhe e merr me gomonen e tij, pasi e kërkon 4 ditë. Në Shqipëri me paratë e mbledhura për vite jashtë shtetit bleu një anije peshkimi në Rumani, me idenë që të investojë për ndërtimin e një kombinati peshku në Vlorë. Jemi në vitet 2000 kur trafiku i klandestinëve dhe i drogës ishte burimi kryesor i fitimeve të vlonjatëve të guximshëm. Ardian Muho nuk mundi t'i bënte bisht ofertës. Me 18 shtator 2002 anija e tij bllokohet në portin e Brindizit. Pas 22 ditë kërkimesh, antidroga italiane gjeti 10,5 kg heroinë të fshehur në bazamentin e anijes. Anija sekuestrohet, i vëllai burgoset së bashku me ekipazhin dhe Dap-Dapi e sheh veten papritmas mes një sërë konfliktesh dhe situatash kërcënuese.

Kush e vrau Muhon

Humbja e sasisë së drogës duket i kishte kushtuar një dëm financiar të pariparueshëm rrjetit të trafikut të drogës, i cili, sipas të dhënave të policies, apo edhe miqëve të Muhos, drejtohej nga një bos i njohur në Durrës. Një fakt që është vërtetuar nga disa telefonata kërcënuese që mbërrinin nga Durrësi në adresë të Ardian Muhos. Në Vlorë thuhet se ekzekutorët për të hequr qafe Muhon u paguan pikërisht nga Durrësi. Por në dy raste ata pësuan disfatë, pasi Muho e miqtë e tij u treguan më të shpejtë. Gjithsesi, mina me telekomandë bëri punën e vet. Ardian Muho u varros më 21 dhjetor 2002 në varrezat e Babicës. Gjashtë ditë më vonë pranë varrit të tij u gjetën të vrarë dhe të djegur brenda një makine ish-oficeri i policies Ardian Kajmaku dhe fieraku Agim Hatia. Muajin e fundit para se të vritej, Dap-Dapi ishte parë të shoqërohej me Kajmakun, i njohur në Vlorë jo vetëm si një polic tepër profesionist.


Pas vrasjes, Muhos u përpoqën t'i merrnin pronën në bregdet

Pak javë pas vrasjes së Ardian Muhos, fadromat e policisë ndërtimore tentuan të prishin murin rrethues të pronës së tij të ligjshme në Jonufër, të vlerësuar rreth 1,2 milionë dollarë e të hipotekuar. Por një tentativë e tillë u ndalua nga reagimi i prindërve dhe miqëve të Muhos. Është e njëjta pronë për të cilën shpesh thashethemet në Vlorë thonë se i përkiste jo vetëm Muhos, por një politikani tepër të njohur në Shqipëri. Një histori që kishte marrë fund kur vetë Muho publikisht në një lokal të Vlorës ia kish bërë të qartë këtij politikani të fuqishëm të mos guxonte të përfliste pronën e ligjshme të tij buzë bregdetit. Më tej, sipas familjarëve, pati edhe një tentativë të dështuar për të zhdukur disa dokumente të kësaj prone në zyrat e Bashkisë së Vlorës.

gazeta shqiptare

[DYDRINAS]

24-12-2003

EDITORIALI

Krijimi i lajmeve kundër krimit dhe Igli Toska

Nga Mero Baze

Gati një vit më parë, Sali Berisha ka bërë një nga ato gabimet ku të shtyn naiviteti dhe dëshira për të besuar diçka pozitive. U ngrit në Kuvend dhe në disa televizione, dhe lavdëroi Luan Ramën për luftë kundër korrupsionit dhe krimit, kur ky i fundit sapo ishte bërë ministër. Disa muaj më vonë, u pa se lëvdata e liderit të opozitës ishte një flluskë sapuni. Luan Rama u vu sërish në qendër të akuzave dhe tashmë të argumentuara për lidhje me botën e krimit.

Pas Ramës, një ish gjyqtar i shkarkuar për mitëmarrje, i cili nuk ka arritur të mbrohet dot as në gjyq, u bë zëvendësministër Rendi. Disa zyrtarë të lartë të policisë u shkarkuan dhe thashethemnaja i lidhi ata me krimin e organizuar. “Hakmarrja për Drejtësi”, një grupim me të vërtetë kriminal, u kthye në arsyetim për të liruar të njëjtët oficerë policie që e kishin arrestuar atë bandë dhe që më vonë, nga frika e po këtij pushteti, e kishin mohuar profesionalizmin e tyre. Sipas parimit “Hip se të vrava, zbrit se të vrava”, ata tashmë u larguan, sepse pas vitit 1997 ishin detyruar të pohonin se i kishin arrestuar pa dashje ata banditë. Më tej asnjë politikan nga ata që urdhëruan shkatërrimin e hetimeve të “Hakmarrjes” nuk u përfol. Vetëm policët, ata që nuk duhet të përfliteshin. Sokol Çela një ish polic fanatik i së majtës, i sprovuar si antiopoziar, u detyrua të largohet nga Shqipëria, pasi kur u transferua për merita antiopozitare nga Korça në Tiranë, pa se Këtu, ndryshe nga në Kapshticë, ligjin nuk e bënte shefi i Komisariatit Nr.1, por banda kriminale Nr.1 në vend.

Pas “Hakmarrjes” në burg përfundon Altin Lamaj. Fillimisht i panjohur për opinionin, ai u bë publik prej lajmeve që dilnin nga zyra e Igli Toskës dhe disa prokurorëve, për të cilat bëhet kujdes të zënë vend në shtyp. Unë nuk di asgjë çfarë ka bërë larg syve të njerëzve Altin Lamaj, por e kam parë atë si një mik dhe shoqërues të kryetarit aktual të Bashkisë Edi Rama. Kam dhjetëra fotografi të tij në fushatë pas Ramës dhe e kam marrë si një mik normal të tij. Kur ua thua prokurorëve këtë, të tregojnë se janë zbardhur disa orë të tëra shirita bisedash mes tyre, por publikisht jo. Publikisht Altin Lamaj quhet kriminel, ndërsa Edi Rama kryebashkiak. Publikisht është bërë kujdes që të bëhet marketing me luftën kundër krimit, pa na treguar as vrasësit, as të vrarët. Dhe e gjithë kjo, që krimi të ndërrojë padron, dhe në krye të Rendit të quhet i merituar emërimi i një personi, i cili e ka nisur karrierën në shtet me inkriminim për mitëmarrje. Ai quhet Igli Toska dhe sot mund ta kemi dhe ministër rendi.

-------tema-----

[DYDRINAS]

27-12-2003

Prokuroria e rrethit Tiranë po heton implikimin e pronarit të “Venecia-s”, Altin Lame, në vrasjen e Alban Çelës

Hetimi, gjurmë të Lames në makinën e vrasësve të Çelës

Ened Janina

TIRANË - Prokuroria e rrethit Tiranë rifillon hetimet në lidhje me vrasjen e djalit të dekanit të Fakultetit Juridik, Alban Çelës, ngjarje kjo e ndodhur më 21 qershor të vitit 2000. Pas materialeve të dorëzuara pak ditë më parë nga policia e kryeqytetit, organi i akuzës ka rihapur dosjen e vjetër. Shkak për këtë është bërë gjetja e gjurmëve të Altin Lames, në makinën e përdorur nga vrasësit e Alban Çelës. Përveç gjurmëve, policia ka arritur të gjejë edhe lidhje të tjera ndërmjet Çelës dhe Lames. Të gjitha këto lidhje janë dokumentuar në dosjen hetimore të Prokurorisë së rrethit Tiranë. Burime të prokurorisë dhe të policisë së kryeqytetit kanë pohuar dje se ende nuk është ngritur një akuzë mbi Altin Lamen, por po punohet për një gjë të tillë. Ish-pronari i “Venecia-s”, Lame, akuzohet vetëm për vrasjen e kryer më 12 janar të vitit 2000, ngjarje kjo e ndodhur pranë shkollës “Vasil Shanto”.

Hetimi

Policia e kryeqytetit e akuzon atë për vrasjen në bashkëpunim të Alban Çelës, djalit të dekanit të Fakultetit Juridik, Kudret Çela. Fillimisht, në duart e hetuesve ranë disa materiale të grumbulluara në rrugë operative, nga ana e informatorëve të policisë. Duke u buazuar në to, inspektorët e krimeve kryen edhe disa verifikime të tjera dhe zbuluan se në makinën e krimit ndodheshin gjurmët e gishtërinjve të Lames. Ky fakt nuk konfirmohet zytarisht nga prokuroria e rrethit Tiranë. Sipas burimeve zyrtare të saj, në prokurori ndodhen disa materiale ku Altin Lame akuzohet si vrasës i Alban Çelës. Ndër këto materiale është dhe një gjurmë gishti, por ende nuk kanë përfunduar të gjitha verifikimet në lidhje me të. “Momentalisht mbi Lamen rëndon vetëm akuza e vrasjes me dashje në bashkëpunim të tre shtetasve pranë shkollës “Vasil Shanto”. Ai po hetohet edhe në lidhje me disa ngjarje të tjera, ndër të cilat edhe vrasja e Alban Çelës. Ende nuk kemi ngritur akuzë tjetër për të, po vetëm po verifikojmë provat që kemi”,- thanë dje, zyrtarët e Prokurorisë së rrethit Tiranë.

Motivi

Një ndër rrethanat që lidhin vrasjen e Çelës me Altin Lamen është njohja e tyre me të ashtuquajturin, grupi i djemve të Rrugës së Durrësit. Lame akuzohet për vrasjen e Andi Hasanit, njërit prej miqve të afërt të Genc Ferhatit. Ndërkohë edhe Çela është një i njohur i Denis Ginës. Kjo lidhje ka përforcuar edhe më shumë dyshimet e hetuesve se Lame është njëri prej vrasësve të Alban Çelës. Çela është ekzekutuar me një breshëri automatiku rreth orës 21.00 të 21 qershorit të vitit 2000. Studenti i vitit të tretë juridik dhe djali i dekanit të po atij fakulteti, Kudret Çelës, ka vdekur vetëm pak orë më pas, si pasojë e shokut hemorragjik. Ai ndodhej në një makinë tip “Benz Mercedes” së bashku me disa persona të tjerë, të cilët fatmirësisht i kanë shpëtuar atentatit. Plumbat janë derdhur në makinën ku ndodhej Çela nga një “Volksvagen Golf” me ngjyrë të bardhë. Personat që ishin në makinë me Alban Çelën dyshohet se kishin lidhje me trafikun e heroinës, që kryhej në kryeqytet. Akt-ekspertimi balistik që i është makinës me targa italiane ka treguar se intensiteti më i madh i plumbave ishte përqendruar tek vendi i shoferit të makinës.

[DYDRINAS]

07-01-2004

Para drejt së shkuarës-mbrapa drejt së ardhmes

Prof. Dr. Apollon Baçe

Kohëve të fundit media shqiptare ka sjellë një sërë ngjarjesh me interes të veçantë, por pa i shqyrtuar ato në kompleks. Këto ngjarje ngjasojnë me copërat e asaj lojës për fëmijë që quhet “puzzle”, ku figura e prerë mund të lexohet vetëm kur të tëra copërat ribashkohen me njëra- tjetrën.
Nëse copërat e ngjarjeve të prura nga media shqiptare bashkohen me njera-tjetrën, figura e turbullt që të del para është figura e frikshme e një Janusi të shpërbërë, dy fytyrat e të cilit nuk shohin njera pas, drejt së shkuarës, dhe tjetra para, drejt së ardhmes. Por e një Janusi të vëngër, njera fytyrë e të cilit sheh pas, drejt së ardhmes, dhe tjetra para, drejt së shkuarës. Back to the future - forëard to the past, si në Makinën e Kohës të Orëell-it. Pas fitores së revolucionit proletar.

Copa No 1 e “Puzzle”: Mesazhi US

Sipas komunikatës së menjëhershme të Ministrisë së Rendit “Vrasja me dt. 29.09.2003 e shoferit të Prokurorit të Përgjithshëm është bërë për motive krejtësisht banale. Ajo nuk ka të bëjë në asnjë mënyrë me postin e Prokurorit të Përgjithshëm”. Një muaj më pas, nisur nga ky rast, Ambasadori i SHBA formuloi një nga deklaratat më të athta të diplomacisë amerikane ndaj një vendi mik dhe dy ditë më tej autori i krimit u arrestua. Nisur nga përkthimi disi i lirë i deklaratës, pjesën e saj më të mbrehtë po e risjellim të përkthyer “ad litteram”: “Ne gjithaq kemi një mesazh ndaj zotërve të krimit. Ne e dimë ose do ta mësojmë shpejt se kush jini ju. Qeveria ime, partnerët tanë europianë dhe shqiptarët, ju jemi vënë pas. Ne nuk do të jemi të kënaqur përderisa ju të jeni fshirë të tërë dhe krimi të mos e kërcënojë më këtë vend dhe këtë rajon”.
E përkthyem titullin Lord me Zot, siç e përkthente Noli me Zot a Imzot, dhe jo me Baron, siç e risolli media, pasi anglishtja me Lord nënkupton krijesat supreme, përfshirë Zotin. Dhe, duke lënë mënjanë linguistikën, nuk mund të jetë Zot a Imzot një killer. E shumta ai mund të jetë një Baronet, i fundmi i shkallës së fisnikërisë. Zotër dhe Imzotër janë të tjerët.
Ambasadori amerikan tha se gjuetarë të Zotërve të Krimit janë “Qeveria ime, partnerët europianë dhe Shqiptarët” duke ju shmangur formës së pritshme “Qeveria Shqiptare dhe ajo Amerikane”. A ju shmang ai kësaj forme për shkak të opinionit të Departamentit të Shtetit se “korrupsioni shtrihet në tërë nivelet e Qeverisë Shqiptare” apo shmangia ishte thjesht një lapsus freudian, kjo nuk dihet dhe nuk ka rëndësi parësore. Rëndësi parësore ka dëndësia e përdorimit të shumësit të vetës së parë: ”Ne kemi…Ne e dimë…Ne nuk do të jemi të kënaqur”.
Është e vërtetë se krimi shqiptar e ka nisur mirë galopin drejt një Kolumbie europiane. Nëse nuk ndodh diçka e papritur këtë shirit ajo pritet ta presë rreth vitit 2015. Fitimet nga droga në 2002 përbënin së paku 4,7 % të GDP reale shqiptare dhe parashikimi për ‘2004 është 8- 10 % dhe asnjë qeveri nuk do ta kishte të lehtë të priste 10 % e më tepër të GDP-së së saj. Shembulli i fqinjës amerikane, Kolombisë, vlen edhe për të tjerët.
Sipas zv. Prokurorit të Antimafies Nacionale Italiane Francesco Mandoi: “Mafia shqiptare ka monopolin e drogës në Itali, Belgjikë, Hollandë, Francë, Gjermani... Në vitin 1994 u kap 1 kg drogë që vinte nga Shqipëria. Në vitin 2002 1 ton…Në tre muajt e fundit dhjetëfishi i kësaj sasie…” . Për matematikanin Dr. Francesco Mandoi ky është një progresion gjeometrik, por këtu ai ndalet. Shprehja “Ne nuk do të jemi të kënaqur përderisa ju të jeni fshirë të tërë dhe krimi të mos e kërcënojë më këtë vend dhe këtë rajon.” nuk i përket atij ose ndonjë ambasadori nga vendet e fshikura nga ky krim. Ajo i përket ambasadorit të një vendi tej oqeanit ku pasojat e drogës dhe krimit shqiptar janë ende të pandjeshme.

Copa No 2 e “puzzle”: AMBO (Albanian, Macedonian, Bulgarian Oil Pipeline Corporation)

Sipas një lajmi peksimet “Ministri i Industrisë dhe Energjitikës bën të ditur se përfunduan bisedimet e grupit teknik për naftësjellsin AMBO… Ndërtimi me vlerë 1.3 miliard $ do të nisë në ‘2005 dhe do të përfundojë në vitin 2008… Porti fundor do të jetë ai i Vlorës, pjesë e Korridorit 8”. Ky lajm tregon se Shqipëria u fut sërishmi në fushën e shahut gjeopolitik ndërkombëtar dhe sërishmi si kuti dhe jo si figurë.
Ata që i njohin rregullat e këtij shahu, mes tyre shahisti Shpëtim Nazarko, e dinin se dega europiane e naftësjellësi Kaspik do të përfundonte në Vlorë dhe jo në Alexandroupolos. Jo thjesht pasi Halliburton Co. e AMBO-s ka pasur president zv. presidentin e sotëm Dick Cheney, as edhe ngaqë zyrë e saja avokatore është Ëhite & Case LLT me president real ish presidentin Ëilliam J. Clinton. Por ngaqë pas AMBO-s së Halliburton Co. qëndrojnë, duke përmendur vetëm disa nga më kryesoret, Texaco, Chevron, British Petroleum, Exxon Mobil, Amoco. Firmat që bëjnë luftën a paqen.
“Kjo është lufta për sigurimin e energjisë amerikane… Harta e naftësjellësit të Kaspikut duhet të përputhet me politiken reale,” pati thënë Sekretari i Energjetikës Richardson disa muaj para se në Jugosllavi të binte bomba e parë dhe atë bazën Bondsteel në Ferizaj, për të cilën ushtarët amerikanë thonë se nga hëna me sy duket vetëm Muri i Madhe dhe Bondsteel-i, e ka ndërtuar pikërisht Halliburton-i. Dhe këtu e tëra vjen dhe inkuadrohet bukurmirë me kuadrin e asaj “American long-term energy strategy”, ku rubineti që do të shuajë ose jo etjen reale europiane për energji në vitet ’30, do rrotullohet në Vlorë. Pikërisht kjo i hapi mbi krye Shqipërisë ombrellën “stars and stripes”- viza dhe yje. Paradoksalisht fitimi më i madh shqiptar nga hija e kësaj ombrelle është çmimi që ajo duhet të paguajë për hijen e ombrellës: Shkëputja nga krimi i institucionalizuar. Kjo dhe mungesa e dorezave të bardha në inventarin e diplomacisë amerikane, shpjegon dhe formën imperative të deklaratës.
”Në vende të tjera e kemi parë krimin dhe korrupsionin të ndotë sektorin... politik... Unë nuk e drejtoj gishtin veçse tek kriminelët” vijon Jeffrey duke preferuar që macen ta zërë nga bishti. Por ai që do ngarkohet me tërheqjen e bishtit të kësaj maceje vështirë se do të tërheqë dhe tregojë më tepër se bishti. Vërtet Hakmarrja për Drejtësi i përket familjes së felinëve- maceve, por ajo nuk është një mace shtëpie, por tigër. Ajo nuk është thjesht një organizatë kriminale që ka pas vetes vetëm krimin, por një organizëm kriminal politik që ka pas vetes politikën. Krimi për të është thjesht mjeti.

Copa No 3 e puzzle: “?”

Pas arratisjes nga burgu të pjestarëve të organizatës në mars të ’97 dhe marrjes së pushtetit nga PS-ja, u duk sikur qëllimi i Hakmarrjes për Drejtësi ishte arritur dhe organizata ishte shpërbërë. Madje fushata intensive e medias krijoj në publik opinionin se i tërë procesi ishte “një flluskë sapuni” siç e cilësonte njera nga mediat e pavarura. Por shkrumbimi i Enkelejd Agajt me 9 janar ’99 për shkak të dekonspirimit të drejtuesve të organizatës dy vjet më parë; telekomandimi me saktësi predhe satelitore me 29 shtator ’03 i ekzekutorit Arapaj drejt viktimës Sinaj; sinjalizimi, paisja me dokumenta fallco dhe largimi automatik i grupit nga Shqipëria pas identifikimit të Arapajt, tregon se sistemi mbrojtës i Hakmarrjes për Drejtësi është mëse funksional.
Prej tërë krimeve të kryera prej Hakmarrjes për Drejtësi, i fundmi është dhe më i habitshmi: Pa asnjë masë mimetizimi, në mes të qytetit, jashtë çdo norme kriminale: me taksi. Si i tillë ai shtron pyetjen a ishte kjo vrasja spektakolare doreza e sfidës që ju flak Prokurorit të Përgjithshëm, dhe veçanërisht atyre pas Prokurorit të Përgjithshëm, apo arroganca e një killeri i cili ka në xhep një indulgjencë tip Richelieu: “çdo gjë që e bën bartësi i kësaj letre e bën me urdhërin tim”? Në të vërtetë pa FBI Arapaj nuk do ishte kapur kurrë.
Mekanizmi i mbulimit automatik të cepave të zbuluar të Hakmarrjes për Drejtësi, është i përsosur. Okult, kapilar, i tërë niveleve, i kudogjendshëm. Si vështrimi i Big Brother-it të George Orëell-it. ”Kërkova për ta parë dosjen e Hakmarrjes për Drejtësi” thotë Perikli Teta, ish Ministër Rendi në vitin ’98, “por nga ajo kishin mbetur vetëm kapakët”. Kjo lind një varg pyetjesh eliptike, përgjigjia e të cilave pulson mes vetë pyetjeve.

Të kujt rangu ishin zyrtarët e Ministrisë së Rendit që mund ta tërhiqnin, dekonspironin dhe manipulonin deri në nivel “kapakësh” dosjen e Hakmarrjes për Drejtësi?

Përse Ministria e Rendit përndoqi dhe përndjek oficerët që arrestojnë ekzekutorët dhe liron ekzekutorët e arrestuar të Hakmarrjes për Drejtësi?

Përse në kundërshtim me familjen, Prokuroria e Tiranës këmbënguli se: “njeriu i bërë shkrumb nuk është kurrsesi Enkelejd Agaj” duke evituar kështu hapjen automatike të procesit që pason gjetjen e kufomave të identifikuara?

Kush e caktoi Inspektor të Përgjithshëm të SHISH-it dhe më tej Këshilltar për Çështjet e Sigurimit Kombëtar pranë Kryeministrit një jo specialist të mirëfilltë, ish “Nëndrejtorin e Albturizmit” Luan Pobrati të akuzuar si drejtues i Hakmarrjes për Drejtësi?

Çfarë roli luajti në gjetjen e “SHIK-asit të penduar” që deklaroi “armët në shtëpinë e Agajt i kam futur me urdhër të Gazidedes”, shefi i tij, dajoja i Shytëve, Inspektori i Përgjithshëm i SHISH-it Pobrati? Përse Gjykata e Tiranës shpejtoi ta mbyllë procesin duke u bazuar tek kjo deklaratë dhe nuk e shqyrtoi vërtetësinë e saj ndërkohë që Hakmarrja për Drejtësi bazohet kryesisht në lidhjet e gjakut?

Kush dhe si e orkestroi fushatën marramendëse në media se procesi kundër Hakmarrjes për Drejtësi ishte një montaturë e qeverisë së PD-së?

Vargu i “pse-ve” është shumë më i madh. Por edhe këto pak “pse?” lejojnë ravijëzimin e mjegullt të një rrjeti që shtrihet nga Kryeministria, SHISH-i, gjykatat, prokuroritë, mediat e pavarura dhe deri tek zyrat periferike të pasaportave. Dëshmi për një qendër unike e cila kontrollon, drejton dhe koordinon veprimtarinë e qendrave okulte dhe gjysmë okulte.

Copa No 4 e puzzle: Copa e përgjakur

Në janar ’93- korrik ’94, Hakmarrja për Drejtësi sulmoi vetëm pika valutore për të siguruar lëvizjen e lirë dhe blerjen e armëve të sofistikuara. Më tej, brenda një harku të shkurtër një vjeçar dhjetor ’94 - shkurt ’96, ajo sulmoi vetëm firmat rentiere, Gjallicën dhe VEFA-n. Sulmi i saj i fundit me 26 shkurt ’96 në supermarketin e VEFA-s, i cili është njëkohësisht akti më gjakatar në tërë historinë e krimit shqiptar, është copa kyç e puzzle-s. Rreth kësaj cope të përskuqur nga gjaku grupohen tërë copat e tjera.
Autobomba e “Hakmarrjes për Drejtësi” vrau katër njerëz dhe plagosi shtatëmbëdhjet të tjerë, të tërë dorëjashtë nga politika. Thjesht 4 + 17. Pa asnjë moral dhe asnjë etikë. “Unë nuk njoh as moral, as etikë. Morali dhe etika ime janë revolucioni dhe për të unë përdor çdo mjet” thoshte në ’18 Lenini.
Skema e atentatit është modelare: Masa e tritolit optimale, 65 kg, vala goditëse e eksplozionit e fokusuar me kënd të ngushtë ndaj supermarketit të VEFA-s, detonimi në çastin e duhur, pasi më tepër se 4 + 17 do të qenë shumë dhe më pak se 4 + 17 do të qenë pak. Një perfeksion i tillë nuk mund të arrihej kurrsesi nga 19 vjeçarë të cilëve u plasnin pistoletat në dorë ngaqë nuk dinin t`i përdornin. “Përse ju’a ngarkoj KGB-ja atentatin me bombë në Konferencën në Paris?” e pyeti prokurori Aranit Çela të pandehurin Llambi Peçini. “Ngaqë na kishin përgatitur më mirë se të tjerët dhe kishim specialistë shumë të zotët. Kjo tregon se, si në skemën e Dantes, poshtë rrethit të vrasësve vijonte rrethi i zjarrvënësve, ai i specialistëve të Sigurimit. Por ende ky rreth nuk është i nënti.

Pikpyetja e madhe, zbërthimi i së cilës spjegon gjithçka, është kujt i shërbente vrasja dhe plagosja e 4 + 17 vetëve? Nëse vrasja e Drejtorit të Burgjeve Kaloshi edhe e pranon logjikën e egër të hakmarrjes, vrasja dhe plagosja e 21 të pafajshmëve nuk ka të bëjë fare me hakmarrjen. Kjo i përjashton nga loja vëllezërit Shyti dhe 9 të tjerët.
”Për të shkaktuar turbullira sociale” shkruan media. Por a do të derdhej mitingjeve masa pas akteve të tillë kriminalë duke kërkuar kthimin në detyrë të Hajredin Shytit, Luan Pobratit, ose familjes së Klement Kolanecit? Kjo e përjashton nga loja Shytin, Pobratin, Kolanecin, të cilët Enkelejd Agaj i ekzekutuar nga Hakmarrja për Drejtësi për dekonspirim të udhëheqjes së saj, i ka cilsuar si drejtues të Hakmarrjes për Drejtësi. Goditjet e njëpasnjëshme të VEFA-s dhe Gjallicës dhe djegia e mëtejshme në Vlorë pikërisht e Gjalicës, tregojnë se e tëra i përkiste një loje shumë më të sofistikuar: Lojës me skemat piramidale.

Copa No 5 e “puzzle”: Copa piramidale.

Për PS-në piramidat qenë lopa së cilës i pi qumështin, e therr, e ha dhe i rrjep lëkurën për t’ja bërë daulle: ”Nuk merrem me financat unë” tha në maj të ‘96 Sekretari i PS-së Ruçi kur e pyetëm “përse PS-ja nuk mban qëndrim ndaj firmave piramidale?”.

”Si thua? Do të punonja me to po të ishin piramida?” ju përgjigj në nëntor të ‘96 pyetjes me pyetje “Konsulenti Financiar” i firmave rentiere, nën Kryetari i PS-së së Vlorës Arben Malaj?”.
”Mua o vëlla nuk më paguan D.Ë. Unë bëj atë që më thonë ata që më paguajnë rrogën” na tha në tetor ‘96 Kyeredaktori i ZP-së kur e pyetëm “përse ZP-ja boton listat e shpërndarjes së kësteve?”.
Fitimi i ZP-së nga botimi i listave të shpërndarjes së kësteve nga firmat dhe fondacionet piramidale për vitin ’96 ishte 305.000 $. Afërsisht sa i Konsulentit Financiar, Ministrit socialist të Financave Malaj. Një shpërblim i tillë ireal spjegohet vetëm me besueshmërinë që fitonin firmat, veçanërisht tek lexuesi socialist, nga botimi i listave dhe punësimi në to i funksionarëve të PS-së. Por kjo është ende faza e qumështit të lopës. Faza e hanxharit nisi në shkurt ‘97 .
“Inati i trupit pa kokë” titullohej një artikull i imi për ngjarjet e Vlorës:
” Nisemi nga skela” tha rreshti i parë.
” E pse?” pyeti rreshti i katërt.

” Po ja, të djegim detin” tha sërishmi rreshti i parë, “ai ka mbetur”.
” Po Gjallica?” foli përsëri rreshti i katërt. Dhe turma u nis ullishtave dhe dogji pikën e karburantit të Gjallicës. Shkrumboi paratë e saja.
Vonë e kuptova se “trupi i inatosur” nuk ishte pa kokë. Veçse kreu i saj nuk ishte në krye por në rreshtin e katërt.

”Koalicioni i sotëm ka ardhur në pushtet me grykën e pushkës, nëpërmjet mafies dhe bandave politike” thotë Ministri i Rendit i koalicionit socialist Perikli Teta.

E pyesim Kryetaren e PS-së së Vlorës, kandidaten për deputet të PS-së Luiza Hoxha përse parrulla e saj ishte “Po fitoj, PS-ja do të ju kthejë skafet”?

“Paratë ja grabiti Berisha me piramidat e tija, skafet ja morri Berisha me Mulosmanin e tija, punë nuk kanë se Berisha nuk çan kokën për Vlorën. Si thoni ti lëmë të vdesin?” ishte përgjigja e kryetares së PS-së të Vlorës Luiza Hoxha para miniturmës Vlonjate të irrituar nga pyetja.

”Sa për zgjedhjet” ju përgjigj me gjysmë zëri së njëjtës pyetje Paskal Milo. Për kokën e Frokut bënin be Vlonjatët në kohën e trazirave dhe Froku fitoi në Vlorë pesë herë më pak vota se Gjinushi që valviste flamurin e skafistëve.
Gjatë bisedës dy shishe verë të gjatë në Hotel Bolonja në prani të gazetarit gjerman Philip Zahn PR-ja i Komitetit të Shpëtimit Publik të Vlorës na tregon se ka dy fakultete: “juridikun dhe shkollën e lartë të ministrisë”. I themi se “i kemi marë një intervistë Zanit për stacionin Pro 7”.

”Ka akoma lëng limoni” u përgjigj ai lakonikisht.

Ngjarjet e treguan këtë përkufizim tejet të saktë: Limoni Zan u flak vërtet kur ju mbarua lëngu: Ditën kur radioja e afërt me PS-në “Koha” transmetonte “po shkon të votojë vetë Zani Çaushi. Heroi ynë. Çlirimtari i Vlorës. I veshur me një smoking të blerë posaçërisht për ditën e votimit në Itali ai duket më elegant se Presidenti Klinton”.

E pyetëm PR-në ”si i vajti në mënd Petoshatit emërtimi si Robespieri Komitet i Shpëtimit Publik?”
”Në 7 vjeçare nuk bëjnë histori revolucionesh franceze” tha ai. “Në teatrin e kukullave flet ai që i tërheq fijet, jo kukulla… E sheh atë tavolinën atje?. I.A. me shkollën e lartë të aviacionit, K.M., Z.Z.,

A.T. me shkollën e lartë të ministrisë dhe juridikun.”

Ajo që na habiti nuk ishte emërtimi robesperrian “Comité du Salut Publique”, por përsëritja e saktë e platformës robesperiane “qëllimi ynë nuk është konvertimi, por shkatërrimi i armiqve” :

Kryetari i Komitetit të Shpëtimit Publik për Sarandën ish ushtaraku i lartë Xhevat Koçiu i tha CNN-it “ populli nuk do të dorëzojë armët përderisa Berisha të largohet”.

Kryetari i Komitetit të Shpëtimit Publik për Gjirokastrën Agim Gozhita, sipas tij ish gjeneral, ripërsëriti për D.Ë. fjalët që kishte thënë për CNN-it “Para se të dorëzojmë armët duhet që të largohet Berisha”

”Në qoftë se Berisha nuk do ti përgjigjet vullnetit të popullit do të sulmohet Tirana” i tha CNN-it Kryetari i Komitetit të Shpëtimit Publik të Memaliajt, Gjolek Malaj, për të cilin na patën thanë se “është nip i vetë Gramozit”.
Kryetari i Komitetit të Shpëtimit Publik të Vlorës Luftar Petoshati na tha për D.Ë. ”Do ta dëbojmë Berishën. Edhe po fitoi me vota do marrim pushkët e do ta përzëmë me pushkë. Çdo gjë është gati në Malet e Labërisë”
Deri edhe Zani i shoqëruar nga shpura e nibelungeve lokale të PS-së, i veshur me kostum Rambo-je: me jelek antiplumb në vend të kanatieres, u shpreh për Pro 7: ”Ne dhe PS-ja e kemi situatën në dorë. Nëse Berisha nuk largohet do ta sulmoj me forcat e mija: 440 vetë të armatosur dhe 13 tanke”.
Sinkronizmi është i habitshëm nga ish gjenerali tek ish delinkuenti: Përmbysja me forcë e pushtetit edhe nëse ai fiton në votime: “O djem rrëmbeni pushkët. Ja vdekje, ja liri” i këndonte turmës Gjinushi. Për arsyen formale të krijimit të këtyre komiteteve, kthimin e parave qytetarëve, askush nuk foli ndonjë fjalë.
Një sinkronizim i tillë kaq sinkron tregonte për një burim të vetëm koordinativ. Sprova e jonë për paqyrimin në lajmet e DË-së të mbledhjeve të “komiteteve” me 23 shkurt ’97 në Sarandë dhe 27 shkurt ’97 në Gjirokastër ishte e pasuksesshme. Muri i hermeticitetit ishte profesional. E vetmja që mësuam dhe pamë rrugëve ishte se përveç kryesive të Komiteteve në këto mbledhje patën marë pjesë “Kapiten Tatoja”, Zani, “të pavarur” të tjerë dhe Gramoz Ruçi. Kjo dhe e lidh figurën. Copa e fundit me figurën e Kryetarit të fundit komunist të Sigurimit të Shtetit dhe Sekretarit të parë të Partisë Socialiste Gramoz Ruçi bashkohet me copën me figurën e pasrendësit të tij Kryetarit të parë socialist të Sigurimit të Shtetit, Hajredin Shytit.

Korniza e puzzle

Sot në Shqipëri dy personat më të fuqishëm janë sekretari i partisë në fuqi, kryetari i fundit i Sigurimit komunist të Shtetit Gramos Ruçi, dhe kryeministri i partisë në fuqi, Kryeministri i fundit i Këshillit të Ministrave komunistë Fatos Nano. Rezultati është një kreaturë hibride, një qeveri borgjezo- komuniste e cila prodhon krim dhe korrupsion, korrupsion dhe krim.
"Ruçi hipotekon moralin tek trafikantë te pushtetit dhe drogës” thotë shkurt Kryeministri Nano për sekretarin e partisë së tij Ruçi. Plotsimin e bën e përjavshmja franceze “Poen” “klani kriminal i Ruçit është i specializuar për cigare, armë dhe skrap”.
PS-ja “e ktheu Nanon nga një i burgosur ordiner në një të burgosur politik” e cilson shkurt Presidenti Socialist Mejdani Kryeministrin socialist Dmth. Thjesht një Baraba hajdut me aureolë Krishti. Padrino, kryetar i kupolës së mafias, e cilson edhe më shkurt zëvëndësi i tij socialist Meta.

“Një skenë teatri mizerabël... Një sistem i qelbur politik... Gaz i botës” e përshkruan mjeshtërisht situatën njeri nga kryeguzhinierët e situatës, Edi Rama. Kjo dhe e mbyll rrethin e maces ngjyrë rozë që kafshon bishtin e saj duke na risjellë në fillim të shkrimit.

Pyetja që lind është a do t’ja dalin dot mbanë ata specialistët e Robert Mueller-it? Apo edhe këtë herë, si në vitet ‘50, Sigurimi do të jetë më i shkathët?

tema

[DYDRINAS]

21-01-2004

Kapet i kërkuari në makinën e gardistit

I dënuari në Greqi me truprojën e ish-ministrit

fe.de

Kjo është një ngjarje që nuk u pasqyrua në komunikatat ditore të policisë së Tiranës dhe Ministrisë së Rendit dhe u mbajt e fshehtë për një kohë. Të martën në mbrëmje, te kryqëzimi i Tiranës së Re, një kontroll rutinë i postbllokut të policisë që vendoset në këtë pikë shpesh, kishte detyruar një makinë luksoze Benz fuoristradë të hapte krahun. Në timon të saj ishte pronari, një oficer policie i Gardës, K. Pagria, i cili për një periudhë kohore ka qenë truproja i një ish-ministrit të Rendit Luan Rama ndërsa në vendin e pasagjerit një person tjetër. Megjithë përgjigjet e oficerit të Gardës, policët kishin dyshuar në sjelljen e personit që ndodhej në vendin e pasagjerit. Disa fjalë të shkëmbyera mes tyre dhe policët e postbllokut vendosin të kontrollojnë documentet e "pasagjerit". Një vonesë që fillon t'i "ngrejë nervat" oficerit të Gardës. Gjithsesi, duke qenë se "pasagjeri" nuk kishte qenë i qartë në justifikimet e tij për mungesën e dokumenteve, policët të lidhur me eprorët e tyre bëjnë shoqërimin e të dyve në Drejtorinë e Policisë së Tiranës. Pas verifikimeve të hollësishme kishte rezultuar se "pasagjeri" i quajtur Shpëtim Shpërdheja ishte një person i shpallur në kërkim nga policia e Fierit dhe për më tepër i dënuar me burg përjetë nga drejtësia e shtetit grek.

Historia greke

Sipas burimeve të policisë së Fierit, ku u "strehua" një ditë më pas Shpëtim Shpërdheja (Çilotaj),30 vjeç nga fshati Grizë e Patosit, në adresë të tij kishte një urdhërarresti të firmosur në qershor të vitit 2003. Sipas këtij urdhri, Shpërdheja akuzohet për vrasjen e një vajze nga Patosi në në Athinë të Greqisë. Sipas të njëjtit urdhërarresti, vajza që Shpërdheja kishte vrarë në vitin 1998 quhej Nurie Hoxha. Burimet e policisë pohojnë se Shpëtim Shpër-dheja e kishte detyruar vajzën të "punonte" si prostitutë në vendin fqinj për gati një muaj. Por vajza duket kishte refuzuar t'i bindej më tej dhe vendos që të largohet. Një vendim i keqpritur nga Shpërdheja, i cili duke përdorur dhunë, i shkakton vajzës vdekjen. Për këtë Gjykata e Athinës ka pasur prova të sakta duke dhënë pas gjykimit në mungesë dënimin me "burg përjetë". Ndërsa është kujdesur që të dhënat për Shpërdhenë t'i kalonin edhe prokurorisë së Fierit. Por, sipas të njëjtave burime, Shpërdheja njihet si trafikant i lëndëve narkotike, kryesisht heroine, si dhe për shfrytëzim femrash në disa shtete të Europës.

Lirimi i gardistit

Ndërsa Shpërdheja të nësërmen do të bëhej banori më i ri i qelive të stërmbushura të policisë së Fierit, oficeri i Gardës ishte lënë i lirë pak orë pas shoqërimit. Gjithsesi policia nuk e kishte lënë të lirë pa i bërë më parë edhe kontrollin e banesës, gjatë të cilit nuk ishte gjetur asgjë e veçantë. Oficeri i Gardës, sipas burimeve të Ministrisë së Rendit, për një kohë kishte përmbushur detyrën e shoqëruesit të ish-ministrit të Rendit. Burime të policisë së Fierit pohuan se gjatë kohës që ka qenë i shpallur në kërkim, Shpërdheja ishte fshehur nëpër miq e shokë të tij në qytete të ndryshme. Një sinajl për policinë kishte qenë edhe ai i mundësisë së fshehjes së tij në Tiranë.


Pronat e Shpërdhesë u bllokuan dy herë në dy vjet

Pronat e Shpëtim Shpërdhesë në rrethin e Fierit janë sekuestruar dy herë. Burime zyrtare nga Prokuroria e Fierit, të cilat nuk duan të identifikohen kanë pohuar, se para më shumë se një viti, atij iu sekuestrua lokali "Vjosa", ku është ortak me kunatin e tij dhe 3 mijë metër katror tokë, në vendin e quajtur "Vija e Ngjalës", në Sheq, pasi kishte precedent penal në Belgjikë. Sipas të njëjtit burim, pronat e Shpërdhesë janë zhbllokuar me urdhër të prokurorit Qydret Kadia, për arsye që ende nuk dihen. Pas më shumë se një viti pronat e Shpërdhesë u sekuestruan sërisht gjatë operacionit "Rrjeta e hekurt", me urdhër të Prokurorisë së rrethit të Fierit. Sipas të njëjtave burime, dy ditë pas sekuestrimit të fundit, lokali "Vjosa" u hap sërish. Dhe, sapo është njoftuar policia, kjo e fundit ka dërguar aty grupet e gatshme, të cilat i kanë vënë asaj drynin.


Akuza: Shpërdheja kishte lidhje me policinë, ai fshihej sa herë kërkohej

Burime të policisë e të Prokurorisë së Fierit pohuan se Shpëtim Shpërdheja ishte larguar nga Fieri në dy raste të ndryshme, pikërisht në kohën kur ndaj tij ishin bërë gati prangat. Në rastin e parë ai ishte zhdukur pas mbërritjes në Fier të disa hetuesve belgë, të cilët kishin dokumentuar veprimtarinë kriminale të Shpërdhesë në Belgjikë. Sipas të njëjtave burime, Shpërdheja ishte larguar falë informatave nga lidhjet e tij me policinë apo edhe prokurorinë e Fierit. Pas ikjes së belgëve kishte patur edhe një tjetër rast kur Shpërdheja e kishte lënë me gisht në gojë policinë. Pas mbërritjes nga Greqia të dokumenteve zyrtare që vërtetonin dënimin e tij më burg përjetë në këtë shtet për vrasjen e një vajze nga Patosi, Shpqrdheja përsëri i lë pëndët drejtësisë. Gjithsesi, policia e Fierit dhe ajo e Tiranës pohuan se kohët e fundit kishin arritur të lokalizonin lëvizjet e tij në kryeqytet.

[DYDRINAS]

05-02-2004

PERMBARIMI: "SHKELJET" KUSHTOJNE 95 MILIARDE

Në prokurori Arapi e 14 komisionerë

"Shfajësuan 150 debitorë të piramidave"

Basir Çollaku

Denoncohen nga Zyra e Përmbarimit Gjyqësor Tiranë, në Prokurorinë e rrethit, Farudin Arapi dhe 14 administratorë të piramidave, sepse shkeljet e tyre kanë sjellë një dëm ekonomik prej 95 miliardë lekësh. Sipas kallëzuesve, janë liruar nga detyrimet 150 debitorë që mbajnë "peng" shumën e mësipërme.

LAJMI

Rikthehet dueli institucional mes Përmbarimit, Komisionit Mbikqyrës "Arapi" dhe prokurorisë. Denoncohen në prokurorinë e rrethit Tiranë, Farudin Arapi dhe 14 administratorë, të ish-firmave piramidale. Zyra e Përmbarimit Gjyqsor Tiranë, pohon se abuzimet me detyrën, që administratorët kanë bërë, ka sjellë një dëm ekonomik prej 95 miliardë lekësh. Po sipas burimeve të mësipërme të kallëzuarit në organin e akuzës, janë administratorë të "VEFA", "Gjallica", "M. Leka" "Kamberi", etj. Në kuadër të këtij denoncimi, zyra e Përmbaimit Gjyqsor e kryeqyetetit, ka bërë ndërkohë gati listën dhe materialet, të cilat i kanë kaluar organit të akuzës. "Kemi verifikuar të gjitha shkeljet që janë bërë dhe na rezulton se kemi të bëjmë të paktën me 150 debitorë, që janë liruar nga detyrimet financiare nga administratorët". Detar Hysi, kreu i kësaj zyre, saktëson se tani do të jetë prokuroria, ajo që do të marrë në përgjegjësi penale, personat që kanë bërë shkelje me dhjetëra dosje dhe që kanë sjellë miliarda lekë dëm. Vetëm me firmën e Farudin Arapit, kreut të Komisionit Mbikqyrës të Piramidave, pohohet nga të njëjtat burime, janë liruar nga detyrimet persona që kanë afro 5 miliarde lekë për të shlyer. Madje, ka shtuar më tej drejtuesi i institucionit përmbarimor, "jemi duke bërë gati një listë për këto pasuri, që tua kalojmë atë, drejtuesve të operacionit "Rrjeta e Hekurt". Ndoshta pas sekuestrimeve, gjithnjë mbështetur në dokumentacionin ligjor, debitorët do të kenë mundësinë të shlyejnë borxhet e vjetra që vijnë që prej shtatë viteve.

Debitorët

Janë sërish mosmarrëveshjet e shumta, që rikthehen mes Përmbarimit dhe Komisionit "Arapi". Sipas përmbaruesve janë të paktën 150 dosje, që presin ekzekutimet e juristëve të këtij institucioni, por nuk shkojnë asnjëherë deri në fund. Burime nga përmbarimi i Tiranës pohojnë se administratorët kanë liruar nga detyrimet në mënyrë të paligjshme debitorët. Ngatërresat e "pafajshme" vijnë nga emrat, mbiemrat, adresat e banimit dhe të lindjes. Në shkresën e lirimit vjen ndjesa e administratorëve dhe njoftimi zyrtar se personi debitor është një tjetër dhe jo ai të cilit në ato momente po i bllokohet pasuria. Në këtë mënyrë debitorët në "marrëveshje" me komisionerët "Arapi" ia dalin të shpëtojnë borxhet dhe të mos i kthejnë ato. Kjo ka sjellë që 95 miliardë lekë që janë borxh të mos kthehen në arkën e ish- "piramidave" për të kaluar më pas të kreditorët.


Farudin Arapi do të dëshmojë sot në prokurorinë e Tiranës

Farudin Arapi është thirrur që të dëshmojë sot në organin e prokuroisë së rrethit Tiranë. Burime nga prokuroria, pohojnë se kryeadministratori i fajdeve, është ftuar të dëshmojë para hetuesve, pas kallzimit që ka bërë Komisioni Parlamentar që hetoi veprimtarinë e komisionit "Arapi". Po sipas burimeve të mësipërme denoncimet për Arapin janë të shumta. Tre vjet më parë e kanë denoncuar kreun e këtij Komisioni Mbikqyrës, kreditorët e ish-kompanisë "Vefa Hollding". Kreditorët akuzonin Farudin Arapin se kishte abuzuar me asetet e kompanisë. Sipas tyre "Arapi" i ka shitur shumë lirë. Denoncimet janë vijuar nga Partia Demokratike Reformatore, më pas nga Komisioni Hetimor Parlamentar, dhe së fundi në mënyrë të përsëritur edhe nga Zyra e Përmbarimit Gjyqësor.

gazeta shqiptare

[DYDRINAS]

08-02-2004

ARRESTOHET PERFAQESUESI I FIRMES NE VLORE

Gjobëvënësi në shoqërinë e Klosit

Pranga kërcënuesit të Coca-Colës për 200 mijë euro

Ferdinand Dervishi

Teksa me pistoleta në duar kishin urdhëruar të dilnin nga makina tre të dyshuar, policët e antiterrorit kishin shqyer sytë nga habia. Në afërsi të ndërmarrjes Coca Cola në Tiranë, në makinë bashkë me dy personat të cilëve pak sekonda më vonë do i'u shtërngonin në kyçet e duarve prangat e ftohta, gjendej edhe ish-shefi i shërbimit sekret shqiptar Fatos Klosi. Gjithsesi, pak kohë më vonë, bashkë me Daniel Shkurtajn, drejtuesin e pikës së shpërndarjes së produkteve të Coca-Cola në Vlorë, i akuzuar si kërcënues me gjobë i drejtorit italian të Coca- Cola Luixhi Verardo, policët kishin marrë në pyetje edhe ish-shefin e shërbimit sekret Fatos Klosi dhe një person të tretë të quajtur Aristotel Guri, i cili ishte drejtuesi shpërndarjes së produkteve të kësaj shoqërie në Tiranë.

Si u zbuluan
Kërcënimi me gjobën 200 mijë euro mbërriti në zyrën e drejtorit të Coca-Cola paraditen e datës 30 janar. Një zë i panjohur, nga një numër i panjohur , e kërcënonte duke i kërkuar 200 mijë euro në formën e gjobës. Drejtori Verardo menjëherë pas kësaj kishte komunikuar më policinë duke bërë denoncimin përkatës. Pas publikimit të ngjarjes nga Gazeta Shqiptare, policia deklaroi fillimin e hetimit dhe mori masa shtesë për ruajtjen fizike të Luixhi Verardos. Hetimet si zakonisht nuk u bënë publike në asnjë çast, por policia kishte arritur të binte në gjurmë të autorit që duket kishte bërë një gabim fatal në llogaritë e tij. Sipas policisë, autori i kërcënimit ishte pikërisht drejtuesi i pikës së shpërndarjes së produkteve të Coca-Cola në Vlorë, Daniel Shkurtaj, ndërsa konflikti kishte lindur për një çështje biznesi. Nuk dihen veprimet e tjera të policisë, por prangosja e Shkurtajt është organizuar të kryhet në afërsi të kompleksit Coca-Cola në Tiranë, menjëherë pasi ai kishte lënë zyrën e Verardos.

Enigma "Klosi"
Në brëndësi ta ambienteve të Coca Cola policia nuk ka pritur të dëgjojë shumë sqarime dhe ka prangosur të akuzuarin Shkurtaj e të dyshuarin Guri duke marrë në pyetje njëkohësisht edhe ish-shefin e shërbimeve sekrete Fatos Klosi. Sipas policisë Klosi dyshohej se kishte lidhje biznesi me të prangosurin Shkurtaj. Pas marrjes në pyetje, sipas një burimi zyrtar të policisë, kishte rezultuar se ish-shefi i shërbimeve sekrete nuk kishte lidhje me ngjarjen. Si një argument tjetër që policia përcjell për të shfajësuar pozicionin e ish-shefit të shërbimit sekret në këtë ngjarje, është llogaritur edhe fakti se një ish-shef i shërbimeve sekrete edhe nëse do të ishte përzier në një aferë të tillë, kurrë nuk do të kishte bërë hapa të gabuara të ngjashme me ato të të prangosurit nga Vlora, Daniel Shkurtaj. Kështu policia pas sqarimeve të rastit ka lënë të lirë ish-shefin e shërbimit sekret Fatos Klosi. Po kështu ishte verifikuar edhe i shoqëruari tjetër Aristotel Guri. Sipas një burimi policor, Guri ishte përjashtuar nga dyshimet pasi ishte mësuar se ai nuk dinte të fliste gjuhën italiane.


Klosi: Isha te Coca-Cola për probleme private

Gjatë një kontakti telefonik me Gazetën, ish-shefi i shërbimit sekret shqiptar, Fatos Klosi, pohoi se mbrëmjen e djeshme kishte qenë në stabilimentin e Coca Cola në Tiranë. Klosi pohoi se aty gjendej për probleme private të tijat dhe i pashoqëruar nga ndonjë tjetër person. "Pashë që aty u fut policia dhe filloi të bënte disa veprime, por nuk di më tepër. Ju po më thoni se ky person qenka arrestuar", tha Klosi, i cili shtoi se në këtë ngjarje ai kishte qenë njeriu i gabuar në vendin e kohën e gabuar. Gjatë kontaktit telefonik ish-kreu i shrëbimit sekret Fatos Klosi insistoi në faktin se nuk kishte lidhje me të prangosurin, madje nuk e njihte fare atë. Sipas Klosit, ai vetë nuk ishte shoqëruar nga policia për asnjë çast në lidhje me këtë ngjarje.

gazeta shqiptare

[DYDRINAS]

10-03-2005

Gjermanët: Spiuni ynë i lidhur me mafian shqiptare

Si një agjent të dyfishtë, i lidhur me mafian dhe i vrarë prej saj, e kanë portretizuar gazetat dhe revistat gjermane dje, agjentin e nga-rkuar me mision në Tiranë, Vili Vajcel.

Shtypi i Berlinit, i është rikthyer hetimit për aferën e vizave në Ambasadën e Gjermanisë në Tiranë, pas një zbulimi të hetimit të Prokurorisë së Berlinit. Revista e përjavshme gjermane “Focus”, nuk e përjashton mundësinë që punonjësi i Shërbimit Sekret Ëilly Ë., i cili në maj të vitit 2004 u gjet i vdekur në rezidencën e vet në Tiranë, të ketë rënë pre e një akti dhune ndaj tij. Më 3 maj të vitit 2004, Villi Vajcel, agjent i Shërbimit të Fshehtë gjerman (BND), i stacionuar në Shqipëri që nga vera e vitit 2002, ndryshe nga herët e tjera, nuk u shfaq në ambasadë, ku kishte zyrën e punës. Disa orë më vonë, trupi i 49- vjeçarit u gjet i pajetë në banesë. Mjeku shqiptar, i alarmuar, e kontrolloi kufomën dhe konstatoi se kishte vdekur natyrshëm, informon revista e përjavshme gjermane, FOCUS, duke iu referuar burimeve zyrtare të Shërbimit Sekret gjerman, BND.

Lidhjet me mafian

Sipas revistës, departamenti i sigurisë së BND-së, ka marrë në tetor të vitit 2004, informacione të besueshme, sipas të cilave agjenti gjerman ka pasur lidhje me mafian. Flitet, se atë e kishin kurruptuar qarqet kriminale të Tiranës, por mbasi Vajcel nuk i ishte përmbajtur marrëveshjes, e kishin vrarë. Përveç parave, atij i ishin vënë në dispozicion edhe dy prostituta, raporton më tej e përjavshmja gjermane “FOCUS”. Organet e shtypit, thonë se nuk ka ende një dëshmi serioze për lidhjen e kësaj historie me aferën e vizave në ambasadën gjermane në Tiranë. Për këtë skandal, hetimet në Prokurorinë e Berlinit kundër dy diplomatëve gjermanë dhe një ish-punonjësi shqiptar të ambasadës gjermane në Tiranë, vazhdojnë. Zyrtarisht mendohet se janë bërë abuzime me vizat në të paktën 350 raste. Se sa i besueshëm është informacioni që ka marrë BND-ja në tetor të vitit 2004, për lidhje të mundshme të agjentit gjerman me krimin e organizuar, kësaj nuk i dihet. Burimi është shqiptar dhe shumë i turbullt, thuhet mes të tjerash në një tjetër gazetë, atë të përditshme gjermane “Süddeutsche Zeitung”.

Djegia misterioze e trupit

Sipas mediave të Berlinit, është fakt, që autoritetet gjermane nuk kanë bërë dot autopsinë e trupit të agjentit, pasi ai ishte djegur. Një drejtues gjykate nga Berlini, i ka thënë revistës “FOCUS”, se BND-ja nuk ka dhënë informacione për vdekjen e bashkëpuntorit. Prandaj edhe nuk ka pasur hetime për këtë çështje. Sipas gazetës së përditshme “Süddeutsche Zeitung”, shefi i BND-së, August Hanning, i cili gjatë vitit të kaluar është ankuar vazhdimisht për krimin e organizuar shqiptar, madje duke e quajtur atë edhe më të rrezikshmin në Evropë, nuk ka qenë dakord për dërgimin e agjentit Villy Vajcel, me shërbim në Tiranë. Ekspertët e konsiderojnë punën e BND-së në Tiranë, si shumë të vështirë.

Detyrat e agjentit

Villi Vajcel, ndryshe i njohur edhe me emrin Villi Liesmann, në qarqet e brendshme të BND-së konsiderohej si i dobësuar. Vite më parë ai ishte bërë i famshëm, me rolin kryesor që luajti në një nga inskenimet më spektakolare të Shërbimit Sekret gjerman. Ai ka qenë aplikuesi i vërtetë i tërheqjes në drejtim të Gjermanisë, të trafikantëve të lëndëve nukleare. Kjo ka ndodhur në vitin 1994. Pas misionit të agjentit sekret, trafikantët e armëve nukleare të shkatërrimit në masë, ishin kapur. Institucionet gjermane kanë kryer hetime ndaj tyre, duke dhënë edhe dënimet përkatëse. Por nëse kishte arritur majat në detyrën e tij të fshehtë, Vili do ta shihte veten shumë poshtë, tre vjet më vonë. Ai u detyrua të paguante një gjobë prej 9 mijë DM për dëshmi të rreme në sallën e gjyqit. t.s

Vili Vel u gjet i vdekur në banesën e tij në Tiranë

Kush ishte “agjenti i dyfishtë”

“Në trup kishte të veshura pizhamat dhe çorapet. Ishte ulur tek televizori. Dukej sikur kishte vdekur duke parë televizor”, ky është njëri prej përshkrimeve të dëshmitarëve të vdekjes së gjermanit. Kishte tre ditë që nuk ishte paraqitur në ambasadë, po aq që nuk përgjigjej në telefon, ndërsa banorët e bulevardit “Zhan D`Ark” në Tiranë, në fund të kësaj kohe, kishin ndjerë erën e rëndë që vinte nga banesa e tij. Kur u nda nga jeta, në katin e nëntë të një pallati përballë Gjykatës së Tiranës, në ora 15.30 të 3 majit 2004, Vili Vajcel, kishte një vit e gjysmë, mision diplomatik në Shqipëri. Ishte 49 vjeç, i divorcuar dhe jetonte i vetëm. U gjet nga banorët e pallatit, i vdekur në kuzhinën e banesës së tij, të cilën e kishte marrë me qera në Tiranë. Misioni sekret, me të cilin 49-vjeçari kishte mbërritur në Tiranë, ishte pikërsht hetimi i aferave të përfolura të vizave që jepeshin nga ambasada gjermane në Tiranë. Vajcel, kishte ardhur në Shqipëri, pas një karriere që kishte njohur edhe majat por edhe humnerat, në strukturat e Shërbimit Sekret në Gjermani. Kreu i këtij institucioni e kishte parë me dyshim, dërgimin e Vajcel me mision në Tiranë. Strukturat e shërbimeve sekrete gjermane, mendojnë se detyrat e agjentëve në këtë vend, janë të vështira.

I njohur si Vili Vel, por me emrin e vërtetë Vili Vajcel, 49-vjeçari, agjent i Shërbimit Sekret Gjerman (BND), është gjetur i vdekur në mënyrë misterioze në datën 3 maj të vitit 2004, brenda në një banese përballë Gjykatës së Tiranës. Mediat gjermane kanë patur dje aludime të forta për lidhjet e agjentit me “mafian shqiptare” apo “grupet kriminale të Tiranës”. Njëra prej këtyre strukturave, sipas raportimeve gjermane mund të ketë kryer vrasjen e agjentit 49-vjeçar, pasi nuk ka përmbushur detyrimet e tij. Por përvoja e institucioneve shqiptare, duket se nuk lë shumë për të besuar tek një version i tillë, burimi të cilit i referohet Shërbimi Sekret gjerman në akuzat ndaj bashkëpunëtorit të tij të vdekur, është shqiptar. Burimi shqiptar ka thënë se Vili Vajcel ishte i lidhur me mafian apo grupet kriminale të Tiranës. Por të paktën një herë, gjermani ka shërbyer në një bashkëpunim shumë konfidencial, të frytshëm dhe institucional me Prokurorinë e Përgjithshme të Shqipërisë në Tiranë.

Zbulimi i gjermanit

Në njërën prej ditëve të vitit 2003, kur ende ishte i ngarkuar me mision në Tiranë, gjermani u duk në dyert Prokurorisë së Përgjithshme, pranë “9-katësheve” në kryeqytet. Në duar mbante një dosje e cila nuk ngjallte kuriozitetin minimal. Por brenda dosjes së zakonshme, ndodhej një tjetër e tillë. Në kapakun e saj në gjuhën e tij, agjenti gjerman kishte shkruajtur “shumë e rëndësishme për hetimin”. Pasi u takua me njërin prej zyrtarëve të lartë të organit shqiptar të hetimeve, agjenti doli me përpjekjen maksimale për të mos rënë në sy dhe u largua drejt punës së tij. Në zyrat e Prokurorisë së Përgjithshme, kishte lënë të gjithë materialin e mbledhur prej tij. Një dokumentacion që provonte për herë të parë, faktin se tre të akuzuar nga drejtësia shqiptare, kishin marrë viza gjermane me identitete të rreme pasi kishin falsifikuar identitetin.

Dosja sekrete e agjentit

Në materialet e dërguara në Prokurori prej punonjësit të shërbimit sekret gjerman, thuhej se Orik Shyti, Kreshnik Spahiu dhe Gentian Caka, tre të akuzuar nga Prokuroria si anëtarë të “Hakmarrjes për drejtësi”, kishin marrë viza shengen dhe leje- hyrje për në Gjermani. Sipas agjentit të Shërbimit Sekret gjerman, vizat ishin marrë në ambasadën e këtij vendi, në Tiranë. Gjermani e dinte se të tre personat, ishin shpallur në kërkim nga drejtësia shqiptare. Vili Vajcel, kishte informacione se vizat në ambasadën e tij, ishin marrë nga tre të kërkuarit, pasi ata kishin kryer disa falsifikime certifikatash dhe pasaportash, me anë të të cilave kishin ndryshuar identitetin e tyre të vërtetë. Këto duket se kanë qenë arësye të mjaftueshme për hapat e shpejtë të agjentit gjerman, me të cilat u paraqit në Prokurorinë e Përgjithshme kur dorëzoi dosjen e tij.

Vizat

Sipas materialit të dorëzuar nga agjenti Vili Vajcel, Orik Shyti e kishte marrë vizën e tij në ambasadën gjermane në Tiranë. Dy vizat ishin Shengen, me nr. 23318439 dhe tjetra nr. 23970962. Në dosjen e gjermanit, thuhet se Kreshnik Spahiu është pajisuar me viza në ambasadën gjermane në Tiranë. Dy vizat janë nr. 23318440 dhe nr. 23970960. Gentian Caka, një tjetër i akuzuar nga Prokuroria si anëtar i “Hakmarrjes për drejtësi”, sipas agjentit gjerman, kishte marrë dy viza gjermane të tjera, me nr. 23972612 dhe nr. 24439774. Të dhënat e dorëzuara nga agjenti gjerman Vili Vajcel, u hulumtuan më tej nga Prokuroria shqiptare, e cila i vërtetoi informacionet e 49-vjeçarit. Të gjitha të dhënat e dorëzuara prej tij në zyrat e Prokurorisë, ndodhen në dosjen penale që Prokuroria shqiptare ka dorëzuar në gjykatë, për procesin ndaj të akuzuarve të “Hakmarrjes për drejtësi”.

Si e mënjanuan gjermanët Prokurorinë shqiptare

Një ditë, pas 3 majit 2004, kur njeriu i Shërbimit Sekret gjerman në ambasadën e Tiranës, u gjet i vdekur, trupi i tij gjendej në morgun e ftohtë të Tiranës. Vili Vajcel, ishte gjetur i vdekur në një mënyrë misterioze. Gjithçka ishte zbuluar nga era e keqe që kishin ndjerë banorët e pallatit, përballë Gjykatë s së Tiranës. Policia dhe Prokuroria shqiptare, në bashkëpunim me personelin diplomatik, filluan hetimet e para për ngjarjen, duke hapur dosjen penale. Në fletët e para të dosjes, bëhej fjalë për një vdekje natyrale si pasojë e sasisë së madhe të alkoolit që kishte konsumuar agjenti 49-vjeçar. Verifikimet mjekësore, zbuluan se ai kishte një kartelë në Spitalin Ushtarak të Tiranës. Aty thuhej se gjermani kishte probleme të theksuara të zemrës, tensionit dhe mëlçisë për të cilat kishte marrë kura disa herë. Një shishe me pije alkoolike, u gjet e përgjysmuar në dhomën ku agjenti kishte dy ditë që dergjej. Kjo i bëri hetuesit të mendonin për një vdekje natyrale, të pashkaktuar nga persona të jashtëm.

Pengesa për autopsinë

Kur ekspertët e Mjekësisë Ligjore, po fillonin veprimet për autopsinë e kufomës, një komunikim me ambasadën gjermane në Tiranë, ka bllokuar në vend gjithçka. 49-vjeçari për të cilin po hetohej një vrasje e mundshme, ishte punonjës i ambasadës dhe si i tillë kishte imunitet diplomatik. Pak kohë më pas, ambasada gjermane bëri tërheqjen e trupit të agjentit, i cili u nis direkt për në Gjermani. Pala gjermane, deklaroi se autopsia e vdekjes, do të kryhej në Gjermani dhe se Prokuroria dhe organet tjera shqiptare të hetimit, do të njiheshin me rezultatin. Dosja penale për vdekjen e agjentit, mbeti pa shkuar më tej, veç kqyrjes së vendit të ngjarjes, pyetjes së rojës së pallatit ku banonte i vdekuri dhe marrjes së deklarimeve të dëshmitarëve të tjerë. Pa patur një përfundim shkencor për shkaqet e vdekjes, Prokuroria shqiptare nuk mund të bënte asnjë veprim me dosjen e hapur për vdekjen e mistershme të 49-vjeçarit.

Shmangia e hetimit

Ndërsa bëhej kohë që trupi i pajetë i punonjësit të Shërbimit Sekret gjerman ishte nisur për në Gjermani, rezultati i autopsisë së vdekjes po vononte. Prokuroria e Përgjithshme në Tiranë, gjatë kësaj kohe, dërgoi në Gjermani, një kopje të dosjes së grupit hetimor shqiptar, për vdekjen e gjermanit, thëniet e dëshmitarëve dhe provat e gjetura në vendin e ngjarjes. Përgjigja e autopsisë vonoi të mbërrinte të paktën tre muaj, ndërsa ende nuk ka një konfirmim zyrtar për mbërritjen e saj. Në këto kushte, sipas procedurës ligjore, dosja penale për vdekjen e agjentit gjerman u pezullua duke iu rikthyer policisë. Media gjermane ka publikuar informacione, sipas të cilave në rrethana të errëta, trupi i agjentit-diplomat, është djegur duke mos krijuar kështu mundësinë e zhvillimit të autopsisë.

panorama