LSI në aksion!

[VisElbasani]

Pakti me PS, Tavo: LSI do të ketë 40 % të pushtetit

Kandidati i LSI-së për Gjirokastrën ka zbardhur dje një pjesë të marrëveshjes së arritur mes LSI dhe PS. Tavo ka deklaruar se LSI do marrë 14 deputetë dhe 40 për qind të pushtetit

Pasi kaluan disa ditë qetësie, PS e LSI i kanë turbulluar sërish dje ujërat politike mes tyre. Kandidati i Lëvizjes Socialiste për Integrim në qarkun e Gjirokastrës, Vangjel Tavo, gjatë një takimi elektoral ka zbardhur ndoshta pjesën më të rëndësishme të marrëveshjes që PS dhe LSI arritën gati dy muaj më parë, duke deklaruar se forca që ai përfaqëson do të marrë në qeverisjen e ardhshme plot 40 për qind të pushtetit në gjithë piramidën shtetërore. Duke folur para zgjedhësve të tij, Tavo ka bërë të ditur se jo pak, por plot 40 për qind e pushtetit të ardhshëm do të administrohet pikërisht nga njerëzit e Lëvizjes Socialiste për Integrim. Dhe ky, sipas Tavos, nuk është thjesht një pretendim i LSI-së, apo i tiji personal, por pjesë e marrëveshjes që kanë arritur Rama dhe Meta para se të nënshkruanin marrëveshjen e bashkimit në një koalicion zgjedhor dhe qeverisës. “Në marrëveshjen e qeverisjes me Partinë Socialiste pas zgjedhjeve të 23 qershorit, kemi një ndarje të përgjegjësive të administrimit të pushtetit, ku 40% e këtyre përgjegjësive i takojnë Lëvizjes Socialiste për Integrim, 40% e administratës do të administrohet nga Lëvizja Socialiste për Integrim. Të jeni të bindur se në 23 qershor nuk ka për të lëvizur asnjë votë e gjirokastritëve”, – u shpreh Vangjel Tavo në fjalën e tij në këtë takim. Ndërkohë që i kontaktuar nga gazeta MAPO, Tavo ka konfirmuar një gjë të tillë, duke theksuar se një marrëveshje e tillë është plotësisht e merituar për shkak se LSI në këto zgjedhje do të arrijë që jo të dyfishojë, por të trefishojë rezultatin e saj. “Ne në 2009-ën, me 4 deputetë arritëm të sigurojmë një marrëveshje me PD-në për të administruar 20 për qind të pushtetit. Në këto zgjedhje ne do të arrijmë të marrim të paktën 14 deputetë, ndaj administrimi i 40 për qind të pushtetit nga ana jonë do ishte krejt normale”, – tha Tavo.

Deklaratë kjo që natyrisht pritet të motivojë më shumë anëtarësinë e LSI-së në këto zgjedhje, por që do të krijojë pakënaqësi tek aleatët socialistë, të cilët deri më tani nuk janë njohur me detaje të marrëveshjes që kanë arritur dy kryetarët e partive. Ajo që është mësuar deri më tani publikisht ka qenë vetëm një deklaratë e përbashkët, e lexuar në Shkodër, ku të dyja forcat angazhoheshin që të dilnin bashkë në zgjedhje dhe të qeverisnin bashkë pas zgjedhjeve. Ndërkohë që për të shmangur ndoshta debatet mes vetë socialistëve, por edhe me aleatët e tjerë, është deklaruar në vijimësi se nuk ka një marrëveshje të shkruar me terma konkretë për ndarjen e pushtetit pas zgjedhjeve. Por deklarata e djeshme vërteton të kundërtën, çka në fakt duhet të jetë e vërtetë, po të kemi parasysh se marrëveshje për administrimin e pushtetit pas zgjedhjeve PS nënshkroi edhe me të gjithë aleatët e tjerë. Kështu vlen të kujtojmë se PS u ka premtuar aleatëve të mëdhenj, pas LSI-së, që do të kenë mundësi të jenë pjesë e kabinetit të ardhshëm qeveritar në rast se do arrijnë të marrin 25 mijë vota në të gjithë vendin. Faktikisht kjo përbën një çështje të dytë të nxehtë në marrëdhëniet mes dy forcave kryesore të koalicionit të majtë, pasi pak ditë më parë në opinionin publik u debatua gjatë deklarata e deputetit tjetër të LSI-së, Nasip Naço, i cili tha se Ilir Meta ishte kandidat për kryeministër.

Kujdes. Të gjitha të drejtat e këtij shkrimi janë të rezervuara nga Mapo dhe mapo.al.

[VisElbasani]

Nje meditim te shpejte, qe e kam krijuar dje -
nga Vis Elbasani:
Në fshatin tim erdhi LSI-ja
Të shtunën ishte ditë e bukur me diell. Mora tim bir dhe dolëm për një shëtitje të shkurtër në qendër të qytetit tim. Bash mu në qendër të qytetit, gjë që bie në sy ende edhe në këto ditë, po ngrihej një strukturë plasmasi apo gome, rrethore e në përmasa diametrike gati 30 metra – shkurt një tendë e ngjashme me atë të cirkut, në ngjyrë gri dhe e rrumbullakosur në majë, e cila mbahet në këmbë me anë të disa motorrëve fryrës, si formë kupole. Dy dyer dërrase janë improvizuar për të hyrë njerëzit edhe mjetet.
Atë ditë të bukur maji 2013, im bir nuk mundi të mos e vinte re strukturën e re që sapo po fryhej nga motorrët e po ngrihej në këmbë dhe, i habitur, më pyeti:
- Babi, ça ësht’ ajo?
- Një tendë, mbase do të jetë për cirk…, - iu përgjigja unë duke vështruar strukturën.
- Uuu, sa mirë! Do shkojmë ne te cirku nesër? – u gëzua ai.
- Po or bab, sa ta marojn’ kta xhaxhat, do shkojm’ e do shofim kafshët, akrobatët, kllounët dhe të gjithë ato që bëjn’ cirk, – ia preva unë i sigurt dhe i gëzuar që do të më jepej mundësia të çoja tim bir 4-vjeçar për herë të parë në një cirk të improvizuar.

Vazhduam rrugën dhe… ndërkohë kishin kaluar disa ditë me shi-e-diell maji 2013.
Një pasdite, teksa kaloj aty pranë, mu në qendër të qytetit, kjo tenda e pandehur cirkore na ishte rrethuar me flamuj të LSI-së. Një tjetër rrjetë kishte rrethuar tendën dhe kishte përdorur disa pemë të njoma (që nuk ka shumë që janë mbjellur) për t’u lidhur e për të mbrojtur tendën nga kuriozët e kalimtarët, pasi është ngjitur edhe me trotuarin, ngjitur me sheshin kryesor pjesë të madhe të të cilit kishte zënë. E kuptova që ishte ngritur si qendër rinore (edhe nga tabelat që u vunë më pas) për të rinjtë që aktivizohen me këtë parti, ku gati çdo natë luhet muzikë e argëtohet. Pastaj nuk më bëri fort përshtypje…
Ky bunker modern ka zënë vend në mes të qytetit ku jetoj tashmë. Por unë pata problem t’i shpjegoj pjellës sime që ajo tendë nuk ishte siç e pandehnim ne, por pjesë e një tjetër cirku. Natyrisht që i vogli ishte i gatshëm t’i shihte edhe këto kllounë e akrobatë ndryshe, por mbase e mori me mend që qentë duhet të ishin të stërmëdhenj dhe luanët të vegjël…
Po në fshatin tuaj, a ka ardhur LSI-ja?
Qershor 2013