Kozma Dushi: Pse u largova nga LSI dhe i jam mirënjohës PD
Këngëtari, interviste per gazeten ‘Panorama’: Do votoj për PD-në.
Në përurimin e zyrave të komunës Lumas në Berat, ku mori pjesë Kryeministri Sali Berisha, mori pjesë edhe këngëtari i njohur, Kozma Dushi.
Pasi këndoi për kreun e qeverisë, ai deklaroi për gazetën “Panorama” se i është mirënjohës Partisë Demokratike që i dha titullin “Mjeshtër i madh i punës”. Kozma Dushi, i cili katër vjet më parë ishte një nga përkrahësit e LSI-së, u shpreh se kjo parti e mbajti vetëm një muaj në punë dhe e hoqi të nesërmen e 30 ditëve.
Ju keni qenë sot në takimin e Kryeministrit Berisha në Lumas të Beratit. Përse i jeni bashkuar PD-së, ndërkohë që ju deri tani keni qenë mbështetës i LSI-së?
Patjetër që do shkoja, pasi njeriu duhet të jetë mirënjohës. Unë mora titullin “Mjeshtër i madh i punës”. Kam kënduar një jetë të tërë në skenë dhe asnjëri s’ma ka dhënë. Është tjetër gjë që e meritoja, por ama u vlerësova, dhe unë mendoj se njeriu duhet të jetë mirënjohës në jetë.
Kush jua ka akorduar titullin?
Nesër do të zhvillohet ceremonia ku do të marrë pjesë edhe Presidenti, në Pallatin e Kulturës. Do të jenë gjithashtu edhe miqtë dhe kolegët e mi. Titullin ma ka dhënë Ministria e Kulturës, siç janë rregullat dhe ligjet. U mblodhën personalitetet e vendit, kanë dërguar propozimin te Ministria e Kulturës, dhe kjo e fundit te Presidenti.
Me daljen tuaj në krah të Kryeministrit, jeni larguar përfundimisht nga Lëvizja Socialiste për Integrim?
Po çfarë LSI-je? Unë LSI-në kam shekuj që e kam lënë. Lëvizja Socialiste për Integrim mua më futi një muaj në punë dhe më hoqi të nesërmen. Ç’punë kam unë me ata?
Sot keni qenë i ftuar nga deputeti, apo jeni dërguar nga Ministria?
Jo, jo. Sot kam qenë me mikun tim, deputetin e zonës. Lefterin e kam shumë mik, jo sot, por kam 10-15 vjet.
Për aktivitetin sot jeni paguar, apo e keni bërë si përkrahës i PD-së?
Çfarë rëndësie ka? Nuk ka nevojë pagesa. Nuk është leku gjithçka, kartë është ajo. Unë e kam mik Lefterin dhe vajta për shoqëri.
Më 23 qershor do të votosh për Partinë Demokratike?
Nuk bëhet fjalë.
PANORAMA
Krijoni Kontakt