Rama: Traktat miqësie me Kosovën
7
Politike e Hënë, 15 Prill, 2013 | 11:47 am
Kreu socialist prezantoi dje në Prishtinë filozofinë e tij për marrëdhëniet Shqipëri-Kosovë pas zgjedhjeve të 23 qershorit nëse PS fiton zgjedhjet. Gjatë një konference të zhvilluar në Bibliotekën e Universitetit të Prishtinë me studentë dhe gazetarë, Rama tha se do të unifikojë me Kosovën shumë nga aktivitetet politiko-ekonomike mes dy vendeve. “Ne do të punojmë qysh në ditën e parë të qeverisjes sonë bashkë me autoritetet përfaqësuese të Kosovës për të nënshkruar një orë e më parë traktatin e miqësisë, të bashkëpunimit, të fqinjësisë së mirë dhe sigurisë. Sepse ne e çmojmë këtë traktat si të nevojshëm në rrafshin diplomatik, të detyrueshëm në rrafshin kombëtar dhe të domosdoshëm në rrafshin strategjik për shqiptarët në rajon”, tha Rama. Në këtë bashkëpunim, sipas Ramës, nuk do të mungojnë dhe mbledhjet e përbashkëta mes dy qeverive. “Mbledhja e përbashkët e dy qeverive si një trupë e vetme, dy herë në vit, do të bëjë që shqiptarët këtej dhe andej kufirit të kenë përmes përfaqësuesve të tyre të zgjedhur, një trupë, e cila do të mendojë, do të diskutojë dhe do të vendosë në rrafshin strategjik: Për sigurinë energjetike të hapësirës shqiptare në këto dy shtete, por dhe për sistemin e unifikuar arsimor”, tha Rama. Sipas tij, bashkimi mes dy vendeve ka ndodhur në esencë, pavarësisht se kemi dy qeveri në dy shtete. Rama risolli idenë e bashkimit doganor mes Shqipërisë dhe Kosovës, por dhe të ofertës turistike në të gjitha viset shqiptare, që nga Brezovica e deri në Butrint. Për të bërë të mundur këtë projekt, Rama tha se “është koha maksimale që të konceptojmë një Komitet ndërshtetëror Shqipëri-Kosovë, për përfarimin e legjislacionit në dy kahe: legjislacionit tregtar mes njëri-tjetrit dhe legjislacionit me Bashkimit Europian”.
Akuzat
Në takimin e djeshëm nuk munguan dhe akuzat e kreut socialist ndaj Kryeministrit Sali Berisha në kryeqendrën e Kosovës ku ai gëzon popullaritet shumë të madh. Rama e akuzoi atë se ka sulmuar dhe nuk ka mbështetur UÇK-në, Marrëveshjen e Rambujesë dhe ka thyer embargon e Kombeve të Bashkuara ndaj Milosheviçit gjatë lutës në Bosnje. “Ka një paragjykim në Kosovë për Partinë Socialiste që lidhet me Sali Berishën, të cilin hera-herës në Kosovë, gati-gati e ngatërrojnë me Skënderbeun. Një ngatërresë që me thënë të drejtën do t’i provokonte Gjergj Kastriotit atë që Faik Konica e quan një ‘i papërmbajtur gaz’”, tha Rama. Sipas tij, kryetari i PD-së, ndryshe nga PS që e ka mbështetur, ka sulmuar UÇK-në duke i cilësuar “si narkotrafikantë, si kontrabandistë droge, si anëtarë të rrjeteve kriminale më të rrezikshme të të gjithë Europës”. Kreu socialist tha se ish- presidenti Berisha lejoi kontrabandën e naftës drejt Serbisë gjatë luftës në Bosnje, ndërsa foli dhe për Rrugën e Kombit. Edhe pse e përshëndeti përfundimin e kësaj rruge nga qeveria aktuale, si një vepër e nevojshme për shqiptarët, Rama tha se nuk ka munguar korrupsioni. “Është një rrugë e filluar konkretisht nga qeveria e Pandeli Majkos, të cilën e rimori qeveria e Sali Berishës më pas. Bëri shumë mirë që e rimori, bëri shumë mirë që e çoi përpara, bëri shumë mirë që e solli deri në kufi, por nuk bëri mirë dy gjëra: E para që rrugën e mbuloi me një njollë të rëndë korrupsion; dhe e dyta që nuk bëri mirë është diçka që mund të shihet fare mirë kur krahason rrugën andej dhe rrugën këtej kufirit. Kur sheh standardet andej dhe standardet këtej”, tha Rama.
Përgjigju Duke Cituar
Postuar më parë nga Ziti
)...o politikant e mjer, votat i merrni nga ata qe kan drejt vote n'Shqipni, e nuk jan kosovart.. atyne rrini gati...
Krijoni Kontakt