Qyteti me reklama të politikanëve !!!
Zyrat qendrore të Partisë Demokratike të Kosovës.
Gati të gjithë kryetarët e partive politike në Kosovë, kohë pas kohë pohojnë se në partinë që ata drejtojnë, funksionon demokracia dhe se nuk është parti e vetëm një personi, apo ‘lideri’ siç është fjala më e shpeshtë e përdorur në diskursin politik.
Pavarësisht deklarimeve që secili anëtar i partisë ka hisen e vet në organizim dhe pjesëmarrje të partisë, që organet dhe strukturat janë ato që vendosin dhe jo shefi i partisë, është në fakt vetëm ky i fundit që shfaqet si imazh.
Në zyrat e partive, PDK-së, LDK-së, AAK-së, AKR-së, nuk mund të shihen logot e mëdha të partive përkatëse, por në hapësirë rreth dy metërshe, janë ato të kryetarin të secilës.
Kryeministri qëndron i buzëqeshur në formën e tij më të madhe, në dy fotografi, vendosur në dy anët e hyrjes në objektin ku është e vendosur PDK-ja, megjithëse në atë objekt ka edhe zyra të institucioneve të tjera.
Të njëjtën reklamë e praktikon edhe kryetari i AAK-së Ramush Haradinaj. Fotoja e tij, mund të ndërrohet siç edhe ka ndodhur por nuk është ndryshuar protagonisti i pozimit para aparatit.
Zyrat qendrore të Aleancës për Ardhmërinë e Kosovës
Ndërkaq, LDK-ja i ka ndryshuar fotot por duke e ruajtur sërish pozitën e kryetarit. Fotografia gjigante e ish kryetarit të kësaj partie, Fatmir Sejdiut është zëvendësuar me atë të Isa Mustafës. Krahas ka edhe logon e partisë me po aq hapësirë sa zë kryetari i LDK-së.
Zyrat e Lidhjes Demokratike të Kosovës
Përjashtimi i pesë partive më të mëdha, është Lëvizja Vetëvendosje!, e ekspozimin më të madh ua bën dymbëdhjetë shkronjave të emërimin të lëvizjes së tyre, “Vetëvendosje”. Sipas praktikës së partive të tjera, mungon fotoja e drejtuesit të kësaj lëvizjeje, Albin Kurtit.
Zyrat qendrore të Lëvizjes Vetëvendosje!
Ndërkaq, brenda zyrave të këtij subjekti, në selinë qendrore të saj, mund të shihen fotografi të shumë aktivistëve gjatë aksioneve.
Kurse kryetari i Aleancës Kosova e Re, Behgjet Pacolli, nuk ka vendosur foton e tij, jashtë ndërtesës por me të hyrë në zyrat e kësaj partie është një foto e madhe e bërë me kocka që formojnë një mozaik me figurën e Pacollit.
Ilustrim nga fushata zgjedhore 2009
Indeksonline nuk ka mundur të fotografojë brenda zyrave të AKR-së meqë aty ndërkohë ka pasur renovime./Indeksonline/
http://www.indeksonline.net/?FaqeID=2&LajmID=54557
Krijoni Kontakt