Pengesat e investimeve ne Shqiperi

[ganoid]

Ministria e Ekonomisë dhe një grup i Bankës Botërore paraqesin studimin mbi investimet në Shqipëri

BB: Në 2002 u zvogëluan investimet

Shkaqet sipas raportit: Korrupsioni e pengesat në tatim-taksa, dogana, pronat e konkurrenca e paligjshme

TIRANE- Banka Botërore bëri dje publik një raport ku thuhet se gjatë vitit 2002 në Shqipëri u ul niveli i investimeve vendase dhe të huaja. Shkak, sipas ekspertëve të Bankës Botërore, është korrupsioni në administratë veçanërisht në sektorin e tatim-taksave dhe doganave. Gjithashtu pengesë tjetër është edhe moszgjidhja e problemit të kthimit dhe kompensimit të pronave. Studimi përshkruan gjithashtu se edhe se burokracia e madhe që ndeshet nëpër zyrat e pushtetit lokal është një ndër shkaqet e uljes së investimeve. Banka Botërore ka mbledhur të dhënat nga 500 firma në Shqipëri dhe ka intervistuar rreth 30 përfaqësues të administratës. Eshtë konstatuar se shumë firma kishin rritje të kostove të prodhimtarisë për shkak të abuzimeve, konkurrencës së paligjshme etj. "Ky studim paralajmëron seriozisht për gjendjen në vend, në mënyrë që politikat ekonomike, fiskale dhe doganore t’i nënshtrohen interesave të përgjithshme ekonomike në vend", -theksoi Altin Ylli, sekretar i përgjithshëm i shoqatës së investitorëve.
Ministri i Ekonomisë Arben Malaj tha se "Qeveria shqiptare do të reagojë menjëherë". "Thelbi është që të veprohet shpejt me përmirësime ligjore dhe administrative me synim shtimin e investimeve. Do të ketë një vendim qeverie dhe hapje e rrugës së qartë për implementimin e këtij studimi", -tha ministri.
Shqipëria, pa strategji zhvillimi
Së shpejti do të hartohet një program për eliminimin e pengesave administrative për investimet si një pjesë e pandashme e Strategjisë të Zhvillimit. Qëllimi i seminarit që organizoi dje Ministria e Ekonomisë në bashkëpunim me FIAS – Shërbimi Këshillimor i Investimeve të Huaja pranë IFC, grup i Bankës Botërore. Studimi është fokusuar në fushat më problematike që paraqesin barriera administrative, siç janë procedurat e Doganave, administrata e taksave, toka dhe ndërtimet, licensat në industrinë joushqimore dhe gjykata administrative e Apelit.
Gjithashtu raporti nxjerr të dhëna mbi kohën dhe vlerën e regjistrimit të bizneseve. Kështu, sipas studimit, regjistrimi në të gjitha institucionet e nevojshme në vitet 1991-1998 bëhej për mesatarisht 15.6 ditë dhe kushtonte 169.8 dollarë, ndërsa në periudhën 1999-2002 regjistrimi i subjekteve është 18 ditë dhe kushton 288.9 dollarë. Kjo kohë është më e ulëta në rajon dhe kjo vlerë është më e larta. Për sa i përket kompanive që punojnë pa licensë, Shqipëria qëndron e para 47 për qind. Po ashtu, sipas studimit, Shqipëria ka kohën më të gjatë për procedurat doganore, me 8.8 orë për veprim dhe ka një nivel eksporti ndër më të ulëtit, me 8.0%. Frekuenca më e madhe e ryshfeteve mbahet nga Drejtoria e Tatim-Taksave me 98%, e ndjekur nga Instituti i Sigurimeve Shoqërore me 87%.
Niveli i pengesave administrative paraqitet më i lartë në dogana, ndjekur nga administrata e taksave dhe në fund gjendet legjislacioni sanitar. Sugjerimet e këtij studimi, bashkë me ndryshimet e nevojshme pritet të jenë një program qeveritar për eliminimin e pengesave administrative.
Skantie
Përfaqësuesi i Bankës Botërore, Eugen Skantie, theksoi se për herë të parë në Shqipëri kemi disa të dhëna dhe sugjerime që përmirësojnë punën e institucioneve. Skantie tha se investimet private janë çelësi i strategjisë së zhvillimit kombëtar. “Investimet private në vite kanë ardhur në rritje, por kjo rritje nuk është e qëndrueshme dhe është koncentruar vetëm në një sektor, atë të ndërtimit”, -tha Skantie.
Kryetari i Unionit të Dhomave të Tregtisë dhe Industrisë, Qazim Sejdini, që përfaqësonte edhe sektorin privat, tha se investimet private kanë patur një rritje të madhe, duke filluar të investojnë edhe në sektorin e prodhimit disa miliona dollarë”. Problemet më të theksuara të biznesit privat, sipas Sejdinit, kanë të bëjnë me arbitraritetin e administratës së tatim-taksave si dhe caktimi apriori i çmimeve të referencës.
Në fjalën e saj, znj. Shen vuri në dukje se studimi është fokusuar në fushat ku paraqiten pengesat më të mëdha administrative që janë: Doganat, Administrata e Tatim-Taksave, Pronat dhe Ndërtimet, Licensimi dhe Administrata e Apelit. Në të gjithë këta sektorë, sipas znj. Shen, pengesat administrative janë mëse të dukshme dhe hapat që duhet të marrë qeveria janë të shumtë dhe rrënjësorë. Bashkim Sykja, drejtor i Drejtorisë së Nxitjes së Biznesit pranë Ministrisë së Ekonomisë, tha se investimi i sektorit privat përbën 75% të Produktit të Brendshëm Bruto dhe eliminimi i barrierave administrative është më se i nevojshëm. Sykja tha se është duke u punuar për krijimin e një ligji të veçantë që do të përmirësonte infrastrukturën ligjore për bizneset e vogla dhe të mesme. Ai theksoi se miratimi i Agjencisë së Nxitjes së Eksporteve në Parlament do të ketë një ndikim pozitiv në rregullimin e bilancit tregtar. Sykja mendon se marrrëveshjet e tregtisë së lirë mundësojnë që bizneset shqiptare të konkurrojnë jo më në një treg me 3 milionë banorë, që është Shqipëria, por në një treg me 55 milionë banorë, që është Ballkani.
Përfaqësuesi i Shoqatës së Ndërtuesve, Behar Malaj, tha se investimet e huaja janë në rritje vetëm në sektorë me risk zero dhe fitim të madh, dhe solli një shembull që, sipas tij, dëshmon Pengesë Administrative. Moslicensimi i kërkesës katërmujore të një banke me kapital shqiptar, i përbërë nga 25 aksionerë me një kapital prej 2.6 milionë dollarë, dhe licensimi i një banke kuvajtjane tregon mosbesimin dhe pengesën që shfaqin organet e tatim-taksave.

Jeton Demi

[alvi]

Kur toka ti shkoje atij qe i takon, atehere do eci ai vend, deri atehere, per sa kohe toka ti jepet atij qe ka mik apo "nevoje" nuk ka per tu bere kurre ai vend.
Nuk ngrihet dot karabinaja pa themel, dhe pronesia eshte themeli.

[Estella]

Alvi pse nuk thua ti qe ne duhet te behemi te pasur po ti marrim serish gjithe tokat e blera me florinj.

Si nje investues duhet te mendohesh mire per nje investim ne ne vend si Shqiperia, duhen marre ne konsiderate te gjithe problemet qe ka shtruar artikulli me lart qe tek Administrata e deri tek dogana. Perderisa ato probleme te vazhdojne Investuesit nuk do te marrin nje insisiative per te investuar se eshte njesoj sikurse ti hedhesh ne lume te gjitha ato te ardhura qe ke fituar nje jete te tere. Pa investime private Shqiperia nuk ka per te ecur perpara por para se te investohet duhet stabilitet dhe rregull te njejte per TE GJITHE.

[ganoid]

Puna eshte se ne skemi kohe te bejem reforma perderisa jetgjatesia e cdo qeverie socialiste nuk ka qene me e gjate se 5 muaj. Perderisa deri tani jane nderruar 170 ministra brenda 6 vjetesh.
Duhet qetesi politike njehere. Pastaj ngadal ngadal reformat merren pasi do ta lind nevoja. Nuk e shikoni qe paria jone mundohet si e si te krijoje probleme!

Tani qe te dalim ne ekonomi.
Them se imediante eshte shkurtimi ne maximum i formaliteteve pasi nuk mendoj qe pagesa e 270$ per hapjen e nje investimi ka ndonje rendesi te madhe. Pra le te rrije aty ku eshte nqs duhen per buxhetin.