Zgjedhjet lokale ne Maqedoni

[Akili-A]

Shkup, 24 mars – Në Maqedoni sot po mbahen votimet për zgjedhjet lokale, në të cilat rreth 1.743.403 qytetarë me të drejtë vote do të zgjedhin drejtuesit e rinj të pushtetit vendor në 80 komuna dhe Shkupin si njësi e posaçme e vetadministrimit lokal.
Zgjedhjet zhvillohen në 2.976 vendvotime, ndërsa garojnë 8.878 kandidatë, apo 350 lista për kryetar të komunave dhe 480 për këshilltarë komunal.
Në bazë të informacioneve të para të Komisionit Shtetëror të Zgjedhjeve, procesi zgjedhor ka nisur mirë dhe nuk ka raportime për ndonjë ngecje apo probleme tjera të natyrës teknike, që do të ndikonin në legjitimitetin e zgjedhjeve.
“Jehona e votuesve deri në orën dhjetë arrin 12 për qind në nivel republikan”, ka bërë të ditur zëdhënësja e KSHZ-së, Biljana Jovanovska.
Ndërkaq, edhe drejtuesi i asociacionit "MOST" që monitoron zgjedhjet me mbi 3 mijë vëzhgues në 50 për qind në tërë territorin e Maqedonisë, Darko Aleksov, ka bërë të ditur se procesi zgjedhor po zhvillohet pa probleme.
“Si asociacion qytetar 'MOST', mund të konstatojmë se në të gjitha vendvotimet ku janë përqendruar monitoruesit tanë, procesi zgjedhor realizohet pa probleme”, ka thënë Aleksov, transmeton Radio Evropa e Lirë.
Ai ka shtuar se vëzhguesit e këtij asociacioni, kanë regjistruar disa probleme të natyrës teknike në pjesën Lindore të Maqedonisë, të cilat janë eliminuar.
Edhe qytetarët e anketuar thonë se zgjedhjet realizohen në frymë demokratike pa probleme
"Po, mirë është duke shkuar procesi zgjedhor”, shprehet një qytetar, derisa tjetri thotë:
“Shpresoj të vazhdojë kështu, unë votova pa probleme, s'kishte as shumë”.
“Besoj se zgjedhjet siç janë duke kaluar tani do të realizohen në një atmosferë demokratike edhe gjatë tërë ditës, duhet të fitojë më i miri”, shprehet një qytetare nga Shkupi.
Ndryshe, një ditë më parë kanë votuar personat e sëmurë, si dhe të burgosurit. Procesi zgjedhor po monitorohet nga 410 vëzhgues ndërkombëtarë dhe 8.379 vendorë.
Zgjedhjet e sotme vijnë pas një fushate parazgjedhore 20-ditëshe, e cila është zhvilluar në atmosferë të qetë, në veçanti te blloku politik shqiptar. Garë e fortë ndërmjet partive pritet të zhvillohet për qytetet e mëdha si Shkupi, Tetova, Manastiri, Ohri dhe Kumanova.
Kësaj radhe, zgjedhjet lokale kanë marrë edhe dimensionin e garës ndëretnike për qytetet e Strugës dhe Kërçovës, ku partitë janë ndarë në baza etnike.
Në Kërçovë garojnë dy kandidatë, një shqiptarë dhe një maqedonas andaj edhe partitë janë mobilizuar si asnjëherë më parë për të marrë drejtimin e kësaj komuna, e cila, pas bashkimit me disa komuna rurale ka ndryshuar strukturën etnike dhe është më tepër e banuar me popullatë shqiptare.
Pavarësisht fushatës së tensionuar, partitë kanë bërë thirrje për zgjedhje të drejta dhe demokratike.
Qendra e votimit do të mbyllen në orën 19, ndërsa rezultatet e para KSHZ-ja do t’i publikojë në formë elektronike në faqen e saj zyrtare në internet ashtu siç arrijnë nga vendvotime.

[Albo]

Fitore në fije, shqiptarët të ndarë mundin maqedonasit në Kërçovë e Strugë

Vladimir Karaj

Shqiptarët në Shkup dhe në pjesën tjetër të Maqedonisë e kanë lënë pas festimet e 100-vjetorit, madje edhe atë fjalim entuziast të kryeministrit të download (7)Shqipërisë, Sali Berisha në kryeqytetin e FYROM, ku për herë të parë mes mijëra shqiptarëve që valëvitnin flamuj kuq e zi ai përmendi “bashkimin” si plotësim i ëndrrës së rilindësve. Dje shqiptarët e Iliridës, siç u pëlqen t’u thërrasësh, u futën në zgjedhje të ndarë, kjo sigurisht nuk është ndonjë e re, por për shumë ata ishin më të ndarë se zakonisht dhe rrezikojnë po ashtu të dalin prej tyre akoma më të ndarë.

Aq të ndarë sa mendohet se kanë rrezikuar ( deri vonë në mbrëmje Kërçova dhe Struga mbeteshin nën drejtim shqiptarë sipas rezultateve jozyrtare) mjaft dje të humbasin disa komuna me shumicë shqiptare në FYROM (Maqedoni) ndërsa rrezikojnë edhe një përfaqësim të denjë në mjaft komuna të tjera të cilin më herët e kanë pasur.

…Maqedonasit u bashkuan

Arsyeja është bashkimi etnik i dy koalicioneve të mëdha të politikës Maqedonase në Kërçovë e Strugë apo edhe në zonat të tjera me shumicë shqiptare. VMRO-DPMNE dhe LSDM përgjithësisht në luftë u bënë bashkë. Pavarësisht se janë rivalet kryesore për pushtetin dhe kanë qëndrime krejt të ndryshme politike, dy partitë u bashkuan etnikisht me shpresën se do të mundin dominacën shqiptare në Perëndim të Ish-Republikës Jugosllave apo ashtu siç deklaroi në fushatë elektorale kryeministri Nikolla Gruevski se “nuk do të lejonte që këta komuna të bëheshin Shqipëri”. Organizata për Bashkëpunim Rajonal dhe Integrime Evropiane (OBRIE) në Maqedoni vlerësoi disa ditë më parë se bashkimi i spektrit politik maqedonas për dy komunat Strugë dhe Kërçovë, por edhe në komuna të tjera, tregon për rritje të dozës së nacionalizmit dhe një mobilizim përballë shqiptarëve. “Pas konflikteve dhe fjalorit të ashpër politik midis blloqeve më të mëdha politike maqedonase, kemi një masovizim maqedonas në komunat ku shqiptarët janë konkurrentët kryesor për fitore. Kemi një unitet të arritur midis VMRO-DPMNE dhe LSDM… Por me këtë marrëveshje për Strugën dhe Kërçovën dalin në sipërfaqe tendenca të tjera me ngjyrime etnike, që nuk nënkuptojnë demokracinë dhe realitetin multietnik”, theksohet në raportin e OBRIE.

Ndarja shqiptare

Idaver Sherifi, kryeredaktor i portalit Albeu.com dhe që ofronte rezultatet live (edhe pse jo zyrtare) të zgjedhjeve në 22 komuna me shumicë apo prani të madhe të shqiptarëve thotë se koalicioni Maqedonas pothuajse ia ka dalë mbanë. “Në Strugë sipas rezultateve paraprake zgjedhjet mund të shkojnë në një rreth (raund) të dytë mes kandidatit të Partisë Demokratike Shqiptare Ziadin Sela dhe atij të koalicionit të përbashkët maqedonas Vlladimir Koçoski”, shpjegon Sherifi ndërsa thotë se deri vonë në mbrëmje rezultati në Kërçovë një komunë tjetër që rrezikonte të humbej prej shqiptarëve ishte i ngushtë edhe pse këtu shqiptarët në një marrëveshje pa marrëveshje kanë dalë vetëm me një kandidat atë të BDI (Bashkimit Demokratik për Integrim). Sherifi thotë se sido që të vejë puna shqiptarët e kanë fituar Strugën ata kanë mbi 70 për qind të votave në raundin e dytë kur detyrimisht nuk do të shkojnë më të ndarë. Fatet e Kërçovës vendoseshin në orët e mesnatës së djeshme. Ndërkohë që në komunat e tjera ku shumica shqiptare ka qenë e padiskutueshme gara është zhvilluar mes tyre. Kjo tregon edhe pse në mbrëmje pas mbylljes së votimeve PDSH akuzoi BDI e cila është në koalicionin qeverisës se kishte blerë vota dhe penguar votimin e lirë të votuesve sidomos në zonat shqiptare. Në anën tjetër as opozita dhe as pozita e krahut maqedonas nuk ka bërë deklarime të tilla, ata kanë thënë se zgjedhjet ishin mjaft të mira ashtu siç ka bërë për shqiptarët vetëm BDI.

Kim Mehmeti një nga zërat më autoritar të shqiptarëve të Maqedonisë e përshkruante kështu gjendjen disa ditë më parë. “Është koncept sllav që shqiptarët e Maqedonisë të jenë sa më të përçarë, të kenë sa më shumë parti të vogla, që qendër e tyre të mos jetë Shkupi por Tetova”, shkruan ai duke nënkuptuar njëkohësisht edhe përleshjen e ashpër të shqiptarëve për territoret lokale dhe harresën e Shkupit që siç shkruan në një libër “nuk është më i yni”.

…Fitore për një fije

“Të verbëruar nga të qenurit në pushtet pa pasur shtet, partitë shqiptare nuk e shohin se ka ardhur koha kur duhet mbajtur ‘Kongresi i Shkupit’, ku do marrin pjesë të gjitha partitë shqiptare, e ku do merren vesh si të dalin nga pozita vasale, ku do e definojnë edhe projektin e Maqedonisë shqiptare. ‘Kongres’ ku do e konstatojnë se Marrëveshja e Ohrit qëmoti është dokument që duhet vendosur në Muzeun e Lirisë në Shkup dhe atë duhet zëvendësuar me një marrëveshje të re që qartë do e përcaktojë rolin e barabartë në çdo gjë të dy shtyllave etnike që bartin këtë shtet!”, shkruan Mehmeti duke tentuar të nxisë një bashkim të shqiptarëve që sidoqoftë nuk ndodhi as në zgjedhjet lokale, prej nga pritet që forcat të dalin edhe më të ndara. Këtë herë sidoqoftë, megjithë bashkimin më një anë të dy partive maqedonase dhe përçarjes së shqiptarëve dëmi nuk duket se ka qenë aq i madh. Vonë në mbrëmje mediat maqedonase dhe ato shqiptare pranuan humbjen e maqedonasve të bashkuar në Kërçovë, pikërisht aty ku kryeministri Gruevski u investua personalisht duke “kërcënuar” se nuk do të lejonte që ajo të bëhej Shqipëri, ndërsa Struga do të votohet në një raund të dytë, por kandidati i PDSH duket se ka garantuar fitoren pasi nga skena të largohen rivalët e tij dhe shqiptarët të bashkojnë votat. Dje sidoqoftë fitorja u arrit vetëm për një fije…


BDI fiton komunat shqiptare

Rezultatet jozyrtare në komunat shqiptare në Maqedoni flasin për një fitore dhe thuajse dominim të BDI e cila ka shpallur vonë në mbrëmje fitoren në Tetovë, Gostivar, Çair, Saraj dhe Kërçovë e cila më parë drejtohej nga maqedonasit. Nga ana e saj PDSH kryeson në Strugë, Likovë dhe 2 komuna të tjera ndërsa për një pjesë të komunave nuk kishte informacion dhe mjaft prej tyre përjashto Kërçovën ku kishte vetëm dy kandidatë kalojnë në një raund të dytë votimesh…


VMRO-DPMNE ka shpallur fitore në një pjesë të madhe të komunave të Maqedonisë, partia në pushtet e Gruevskit duket se ka fituar thellë sërish kundër socialdemokratëve të LSDM-s që sipas të dhënave kryesojnë vetëm në pak komuna. Sipas kësaj VMRO-DPMNE konfirmohet mazhorancë në Maqedoni

Ali Ahmeti ka deklaruar në një konferencë për shtyp se ka fituar shumicën e komunave shqiptare përfshirë, Kërçovën, Tetovën, Çairin, Dibrën, Zhelinë, Bogovinën, Likovën ndërsa ka epërsi edhe në Gostivar dhe disa komuna tjera. Por, Z. Ahmeti ka pranuar humbjen në Strugë dhe ka ofruar mbështetjen për kandidatin e PDSH-së në Strugë, Ziadin Sela. (Albeu.com)

Menduh Thaçi lideri i BDI ka theksuar se PDSH kryeson në Strugë, Studeniçan, Vrapçisht dhe Likovë. Ai ka theksuar se kandidati i tyre në Tetovë, do të kompensojë diferencën prej rreth 3000 votash në rrethin e dytë të votimeve, Teuta Arifi e BDI kryeson 39 për qind në Tetovë. (Albeu.com)

MAPO

[RiGerta]

Urime Kerçoves. Eshte nje atmosfere festive me emocione te njejta sikur u shpall Kosova Republike. Ky qytet edhe pse i banuar me mbi 50% shqiptare kan qeverisur sllavet per 7 dekada. Tani Ishte radha jone. Falenderimi i takon mergates shqiptare qe e mbeshteten kete beteje.

[Akili-A]

Kryeministri i Maqedonisë, Nikolla Gruevski, është pritur me indinjatë në Kërçovë ditën e sotme, teksa një turmë maqedonasish e revoltuar ishin mbledhur përpara selisë lokale.
Turma maqedonase brohoriste e inatosur, “shpirtra të shitur” ndërkohë që në shoqërinë e Gruevskit ishin edhe deputetët e zonës të VMRO-DPMNE-së dhe ish-kryetari i Kërçovës, Despotovski.
Ky i fundit humbi zgjedhjet lokale në Kërçovë, të cilat u fituan nga shqiptarët, ndaj edhe maqedonasit ishin të irrituar sot.
Për momentin Gruevski gjendet brenda selisë lokale të VMRO-DPMNE-së ku edhe po mbahet një mbledhje, ndërsa turma vazhdon të qëndrojë përpara në pritje të daljes së kryeministrit. /Shekulli Online