Përmbledhje e raportit të dytë vjetor të Komisionit Evropian për Shqipërinë, në kuadrin e proçesit të stabilizimit dhe të asociimit në favor të Evropës së Jug-lindjes. Periudha Mars 2002 - Mars 2003.
Bruksel. "Avancimet e Shqipërisë në rrugën e saj drejt sfidave të shumta që ky vënd duhet të përballojë ngelen të kufizuara. Rekomandimet e formuluara në raportin e vitit 2002 mbi proçesin e stabilizimit dhe të asociimit janë ndjekur vetëm pjesërisht. Mund të flasim për një stabilitet politik relativ - megjithëse akoma delikat - i arritur në pranverën e vitit 2002, dhe që mundësoi që zgjedhja e presidentit të ri të zhvillohej në një kontekts të qetë, por i cili nuk ka treguar akoma realizime të dukshme për sa i përket reformave në vënd.
Në kuadrin e kësaj klime të re politike, Shqipëria ka realizuar progrese në përmbushjen e rekomandimeve të komunitetit ndërkombëtar për sa i përket përmirësimit të proçedurave zgjedhore në vënd. Në të njëjtën kohë, kjo klimë politike ka qenë e pamjaftueshme për të favorizuar respektin e kërkesave kushtetuese në lidhje me domosdoshmërinë e rikthimit të tokave personave të çpronësuar gjatë regjimit komunist, ose, në mungesë, qoftë edhe shpërblimin e këtyre të fundit nga ana e shtetit. Megjithë progreset e realizuara në fushën e zhvillimit të bashkëpunimit rajonal, ndërtimi i shtetit ligjor është gjithmonë i pamjaftueshëm. Kjo gjë, pikërisht për arsye të dobësisë të institucioneve të ngarkuara për të mundësuar respektimin e ligjit. Kësaj i shtohet një kapacitet administrativ i kufizuar si dhe prezenca e korrupsionit dhe krimit të organizuar. Liritë individuale dhe të drejtat e njeriut garantohen nga legjislacioni shqiptar, por ngelet akoma shumë për tu bërë deri në vënien në jetë në mënyrë konkrete të këtyre të fundit. Qëndrimet shqiptare ndaj minoriteteve ngelen përgjithësisht konstruktive, por puna për të arritur rezultate më të kënaqshme në këtë fushë dëshmon për një ambicie të kufizuar nga ana e Shqipërisë.
Rritja ekonomike e prodhimit të brëndshëm bruto (PBB) në Shqipëri ka qenë e qëndrueshme, dhe ka shënuar midis 4,5% dhe 5%, kundrejt 6,5% në vitin 2001. Në përgjithësi, rezultatet ekonomike të periudhës që i referohemi janë inferiore ndaj parashikimeve të mëparshme. Ky ngadalësim është shkaktuar nga elementët e mëposhtëm : problemi i përhershëm i sektorit energjitik, depresioni i përgjithshëm që karakterizon ekonominë botërore, rritja e dobët ekonomike e sektorit bujqësor dhe mungesa e efikasitetit të administratave fiskale dhe doganore.
Autoritetet shqiptare kanë arritur - pjesërisht - tu bëjnë ballë këtyre vështirësive, duke patur parasysh që objektivat në fushën e defiçitit buxhetor dhe të inflacionit janë plotësuar. Ndërkohë, proçesi i privatizimit dhe i ristrukturimit të sektorit financiar ka ecur shumë pak. Klima e përgjithshme e biznesit nuk është përmirësuar në mënyrë të dukshme, megjithë iniciativat e ndërmarra në kuadrin e mbështetjes apo promovimit të firmave private dhe inkurajimit të investimeve lokale dhe të huaja.
Sigurimi ligjor është i pamjaftueshëm dhe legjislacioni tregëtar nuk është akoma në gjëndje të inkurajojë zhvillimin e firmave të ndryshme private.
Disa masa janë marrë për të përmirësuar situatën - në përgjithësi pak të kënaqshme - e sektorëve të ndryshëm të ekonomisë shqiptare, si në fushën e transporteve, të energjisë dhe të bujqësisë. Por Shqipëria duhet ti vashdojë këto përpjekje në planin afat-mesëm, nëse ajo do të arrijë me të vërtetë rezultate të dukshme në këto fusha.
Negociatat, me perspektivë përmbylljen e një marrëveshje të stabilizimit dhe të asociimit (MSA), filluan zyrtarisht në fund të muajit janar të këtij viti, mbas disa vonesave për shkak të vështirësive të Shqipërisë për të garantuar një stabilitet politik, apo fillimin e reformave. Duke patur parasysh ritmin aktual të këtyre reformave, negociatat rezikojnë të marrin shumë kohë. Për të qenë e gatshme për ti mbyllur, Shqipëria duhet të dëshmojë fillimisht për kapacitetin e saj për vënien në jetë të kushteve të marrëveshjes së ardhshme. Përveç kësaj, ajo duhet të zgjidhë problemet prioritare të identifikuara nga Bashkimi Evropian në raportet e ndryshme të këtij të fundit, këtë, me ndërmjetësinë e instrumentave të ndryshëm të ndjekjes nga ana e këtij organizmi. Një vëmëndje e veçantë duhet ti jepet fushës së drejtësisë dhe asaj të punëve të brëndshme, nëse Shqipëria do me të vërtetë të ecë në rrugën e proçesit të stabilizimit dhe të asociimit.
Vëndi ka përmbushur disa progrese në fushën e kontrollit të migracionit klandestin me destinacion BE-në, por trafiqet ilegale të qënieve njerëzore, të drogës dhe formave të tjera të krimit të organizuar, sëbashku me korrupsionin në sektorë thelbësorë, si në sistemin juridik, doganat dhe policinë, janë akoma subjekt i një shqetësimi të thellë. Avancimet e realizuara në fushën juridike kanë qenë të kufizuara dhe ndjekjet e angazhuara kundër kriminelëve të pakta në numër, dhe kjo megjithë rritjen e numrit të të burgosurve në vënd.
Shqipëria do të arrijë të zgjidhë probleme kaq të komplikuara vetëm nëse qeveria, forcat politike në vënd si edhe organet e ngarkuara për respektimin e ligjit (si Minstria e rendit publik dhe Gjyqësori) do të angazhohen seriozisht duke dëshmuar një vendosmëri absolute për të përkthyer këtë angazhim në aksione konkrete."
Përgjigju Duke Cituar
Krijoni Kontakt