Violinisti Zeqir Sulkuqi

[Albo]

Violinisti Zeqir Sulkuqi vjen me një koncert recital në TOB

Tinguj ballkanikë, në një mbrëmje

420079_3208409165688_266300425_n“Do të takoj”, “Fërshëllima”, “Princesha e Cardashit”, janë vetëm disa nga pjesët e përzgjedhura nga violinisti Zeqir Sulkuqi për të interpretuar më datë 24 shkurt në koncertin e tij të parë recital, shoqëruar nga Ansambli i Këngëve dhe Valleve në Teatrin e Operës dhe Baletit. Grupi i valleve do të jetë nën drejtimin e koreografit Artan Ibërshimi, ndërsa grupi vokal nën drejtimin e Gramoz Burbës. Ky koncert është një rikthim pas 20 vitesh për artistin. Zeqir Sulkuqi ka kryer studimet për violinë më 1978 dhe një vit më vonë emërohet pedagog i violinës në shkollën artistike “Onufri”. Nga viti 1984-1991 ka punuar si pedagog i disiplinave muzikore në Institutin e Lartë Pedagogjik “Aleksandër Xhuvani” Elbasan. Në këtë vit themelohet në Elbasan ansambli “Isuf Myzyri”, ku Zeqir Sulkuqi është drejtues i parë i orkestrës. Ndërkohë, bën një jetë të dendur artistike me Orkestrën e Harqeve, Orkestrën Simfonike, Muzikë Dhome etj. Mban dy çmime kombëtare të konkurseve violinistike 1980-1982. Në vitin 1992 emigron në Greqi, ku prej 20 vitesh punon në formacione të vogla etnoxhaz, pedagogji, si dhe hulumtimin e kulturave të ndryshme ballkanike e më gjerë. Në vitin 1997, formoi grupin “Adriatika”, i cili ka një repertor të larmishëm, kryesisht me pjesë cigane. Ka dhënë koncerte në shumë shtete si Greqi, Spanjë, Rumani, Hungari, Amerikë. Ka bashkëpunuar në koncerte të ndryshme me muzikantë të njohur të muzikës etnike si Kora Mikaelian, Tigran Sarkisian, Haig Jarglisian, Lakmir Shankar, Mihalis Nikolidhis etj. Ky koncert muzikor luhet për herë të parë në Shqipëri në bashkëpunim me artistët e Ansamblit Popullor. “Koncerti është një pasazh muzikor i vendeve ballkanike dhe më gjerë, një peizazh muzikor i trevave tona popullore muzikore folklorike, të trajtuara dhe të moderuara me një frymë klasike”, thotë Sulkuqi. Artisti tregon se është përpjekur të sjellë në këtë koncert të gjitha elementët etnoxhaz të vendeve si Rumania, Bullgaria, Kosova Hungaria. “Në koncert do të jenë dhe dy kolona zanore të filmave shqiptarë, shumë të njohura, që i kam dedikime të caktuara për njerëz që dua t’i vlerësoj. Ky koncert recital sjell në skenën shqiptare, një mbrëmje cigane që trajtohet me të gjithë formacionin orkestral. Në këtë koncert do të luajnë muzikantët e shkëlqyer të Ansamblit, ku të ftuar janë firzamonçisti Sokol Seriça, pianisti Elis Llloshi, në disa nga pjesët do të kem partnerë Albana Lekën në violinë e shumë artistë tjerë”, thotë ai.

Shqip