Humb jetën në krye të detyrës shefi i Policisë Mat, Musa Skura

[Albo]

“Lufta” në Burrel, ja adoleshentët që plagosën shefin e Krimeve

Dashamir Biçaku

Tiranë Në kohën që shefi i Krimeve i Burrelit po lufton me vdekjen, operacioni kundër trafikimit të municioneve është në proces hetimi. Burime nga Ministria e Brendshme thanë dje se po verifikojnë planin e masave për ndërhyrjen ndaj një grupi personash që dyshohej se po trafikonin 26 arka me municion pranë fshatit Suç të Burrelit. Të pyetur nga MAPO, zyrtarë të SHKB-së thanë dje se janë duke u kryer hetime edhe për mënyrën se si është zhvilluar operacioni, gjatë të cilit u rrezikua jeta e shefit të Krimeve, Musa Skura. Gjatë ditës së djeshme është realizuar rindërtimi i skemës së operacionit pranë urës së Përroit të Keçit në këtë zonë. Mësohet se shefi i Krimeve, Skura ka qenë duke udhëtuar me një makinë civile, kur është përballur me dy persona, të cilët kishin dalë të armatosur dhe të maskuar në rrugë. Gjatë kësaj kohe, efektivët e tjerë ishin pozicionuar pranë urës së Përroit të Keçit, vetëm pak metra më tutje. “Musa Skura ka bërë thirrje që dy personat e armatosur të dorëzohen, por në këtë moment është qëlluar nga një person i tretë”, – i tha MAPO-s një burim nga policia, i cili sqaroi se autori i plagosjes ndodhej rreth 10 metra larg rrugës kryesore. Pas këtij momenti kritik për shefin e Krimeve ka nisur shkëmbimi i zjarrit mes forcave të tjera të policisë, që ndodheshin pranë vendit të ngjarjes dhe personave. Ndërkaq, gjatë ditës së djeshme efektivë të forcave speciale RENEA kanë kontrolluar dhe patrulluar në akset kombëtare Burrel- Klos, Milot- Burrel, me qëllim sigurimin e rendit. Policia e Shtetit, në një deklaratë të dhënë për mediat tha se “Nga ndërhyrja e menjëhershme e forcave të tjera pjesëmarrëse në operacion, është bërë e mundur kapja e Fitim Allës, 19 vjeç, Vilson Milkurtit, 18 vjeç, Edison Lleshit dhe një 15-vjeçari. Nga hetimet ka rezultuar se 4 shtetasit e sipërcituar kanë organizuar për t’u shitur disa shtetasve të tjerë një sasi prej 26 arkash me municion (fishekë), të cilin e kanë transportuar përmes një mjeti furgon në vendin e ngjarjes, ku do të realizohej dhe shitja e tij”. Municionet ndodheshin brenda një furgoni, ndërsa të rinjtë trafikantë po kontrollonin zonën ku edhe do të bëhej shitja e tyre. Por prania e policisë i ka nervozuar ata dhe ka sjellë reagimin e menjëhershëm me armë. Në vendin e ngjarjes është gjetur dhe sekuestruar një armë zjarri automatik, tip kallashnikov. Gjithashtu, gjatë kontrollit janë gjetur dhe sekuestruar edhe 8 kuti me municion luftarak, me 720 copë fishekë secila. Ndaj shtetasve Fitim Alla, Vilson Milkurti, Edison Lleshi dhe 15-vjeçarit është marrë masa e arrestit në flagrancë për veprat penale të “vrasjes në rrethana cilësuese, e mbetur në tentativë” dhe “shitjes së armëve dhe municioneve luftarake”. Po ashtu është bërë dhe shpallja në kërkim e Riza Barçit, drejtues i mjetit furgon, përmes të cilit është transportuar municioni luftarak.



Të arrestuar

Fitim Alla, 19 vjeç

Vilson Milkurti, 18 vjeç

Edison Lleshi

Një 15-vjeçar me inicialet A.L.

Shoferi Riza Barçi, në kërkim




Të afërmit e Skurës, në ankth: Si e mësuam plagosjen


Familjarët e shefit të Krimeve të Burrelit presin me ankth përmirësimin e gjendjes së tij. I biri, student inxhinierie u njoftua nga kolegët e të atit për plagosjen


Tiranë Plagosja e rëndë e shefit të Krimeve të Burrelit ka alarmuar të afërmit e tij, të cilët gjatë ditës së djeshme qëndronin gjithë ankth në Spitalin Ushtarak. Kushëriri i Musa Skurës tregoi dje për MAPO-n se kishte qenë me djalin e të plagosurit kur e kishte marrë vesh lajmin. “Unë sapo u ndava me kushëririn tim, Florianin, pasi ishim duke pirë një kafe në një lokal në Burrel. Ai e ka shtëpinë fare pranë meje dhe u ndamë normalisht. Por pak më vonë më mori i shqetësuar në telefon. Kur mbërrita aty, më tha se e kishin marrë nga policia dhe se i kishin thënë se babai ishte plagosur në operacion dhe se po e nisnin drejt Tiranës, ndërsa në atë momente ishte në spitalin e Burrelit”, – tregon ai. Ai tha që djali i shefit të Krimeve ishte marrë në telefon nga kolegët e të atit. “Nuk i kishin treguar çfarë problemi kishte, por nga sa më tregoi ai mua, kishte parandjerë se mund të kishte ndodhur diçka e keqe. Ai tregon se Floriani, student i fakultetit të Inxhinierisë Elektrike në Tiranë, menjëherë ishte nisur në drejtim të komisariatit ku i kishin treguar për atë ç’kishte ndodhur”. Kushëriri tregon se ishte një moment i vështirë, ndërsa me shpejtësi po bëheshin gati për të udhëtuar në drejtim të spitalit të Burrelit, e më pas në drejtim të Spitalit Ushtarak, ku pritej të transportohej i ati. Vetë Floriani nuk mundi të fliste asnjë fjalë për mediat dje, pasi ndodhej në gjendje të rënduar emocionale. Ndërsa Naimi, një prej nipërve të Skurës, i cili jeton dhe punon në Itali, tregoi se ishte duke lexuar lajmet e ndryshme në internet, ndërsa një shok i tij që jeton në Firence e kishte telefonuar dhe i kishte thënë se kush ishte plagosur në Burrel. “Pashë lajmet në televizion dhe në internet, nga ku mësova se ishte plagosur daja. I shkrova në facebook Florit dhe djalit tjetër të dajës, por ata nuk u përgjigjën. I mora në telefon dhe ata nuk përgjigjeshin. Nisa të mendoja se situata nuk ishte e mirë dhe menjëherë u nisa për në aeroport. Preva një biletë për në Shqipëri dhe u nisa urgjent sot në mëngjes”. Naimi tregon se nga komunikimet që kanë pasur me mjekët, por edhe me zyrtarët e policisë dhe të Ministrisë së Brendshme kishin marrë konfirmimin se i afërmi i tyre do të nisej për në Itali, ndërsa sipas tij, mjekët thonë se gjendja është e stabilizuar, por në rrezik.


Noka: Kurimi i Skurës, në Foxhia të Italisë

Ministri i Brendshëm, Flamur Noka vizitoi në Spitalin Ushtarak shefin e krimeve të Burrelit, Musa Skura, i cili ndodhet në reanimacion në gjendje kritike për jetën. Ministri Noka iu bëri të ditur të afërmve të Skurës se kishte komunikuar me autoritetet italiane dhe se me ta ishte rënë dakord që Skura të transportohej në drejtim të Foxhias në Itali me një avion sanitar. “Gjendja e shefit të Krimeve të Burrelit është e stabilizuar, por ne jemi të vendosur të bëjmë gjithçka për t’i shpëtuar jetën. Kemi kontaktuar me spitalin “San Giovani” në Foggia të Italisë, një nga spitalet më të specializuara dhe jemi në pritje të kthimit të përgjigjes dhe dërgimin e një avioni sanitar për transportimin e shefit të Krimeve”. Të njëjtin fakt e pohoi edhe drejtori i Spitalit Ushtarak, Bedri Mihaj, i cili tha se pritej gjetja e një avioni sanitar për transportimin e Skurës drejt Italisë. Më vonë në Spitalin Ushtarak mbërriti edhe Avokati i Popullit, Igli Totozani, si dhe ministra e deputetë të qarkut të Dibrës, që u interesuan për gjendjen shëndetësore të shefit të Krimeve të Burrelit, Musa Skura.

MAPO

[Mike Oldfield]

Kryeministri te SHKARKOJE Burgajn per PAAFTESI !

[Albo]

Noka: Musa Skura shpallet Dëshmor i Atdheut, nesër ceremonia

TIRANË- Ministri i Brendshëm Flamur Noka ka vizituar sot familjen e komisarit të Matit të rënë në krye të detyrës, Musa Skura. Duke premtuar ndihmë e mbështetje për familjen, Noka nënvizoi se Skura është shpallur Dëshmor i Atdheut.

“Ju shpreh ngushëllimet e kryeministrit Berisha. Shteti do të ndihmojë familjen dhe fëmijët. Musa Skura është shpallur Dëshmor i Atdheut, ndërsa homazhet për të do zhvillohen nesër te Shtëpia Qendrore e Ushtrisë në Tiranë”.

Pritet që trupi i Skurës të mbërrijë nesër nga Italia dhe pas ceremonisë në Shtëpinë Qendrore të Ushtrisë në Tiranë do të përcillet në varrezat e dëshmorëve

Musa Skura u plagos më 13 janar, ndërsa ndërroi jetë dy ditë më parë në Itali.

(ma.ar/BalkanWeb)

[Albo]

Vrasja e komisarit Skura, babai i autorit të dyshuar: Koka e trafikut të armëve s'është kapur ende


TIRANE - Babai i 18-vjeçarit Vilson Milkurti, i cili dyshohet se ka marrë pjesë në plagosjen e shefit të krimeve të Matit, Musa Skura, pretendon se i biri nuk ka qëlluar në drejtim të komisarit dhe nuk është i përfshirë në tregtinë e armëve, por ishte punësuar si punëtor ngarkim-shkarkimi nga personat që kryenin trafikun e armëve në Mat.

I ftuar në emisionin “Me zemër të hapur” në televizionin “News24”, Petrit Milkurti shpjegon versionin e tij mbi ngjarjen e rëndë, duke shfajësuar të birin. Sipas tij, trafiku i armëve në atë zonë vijon prej kohësh, ndërsa personi që e drejton trafikun nuk është vendosur ende përpara drejtësisë.

“Koka e trafikut nuk është kapur akoma. Unë nuk kam asnjë marrëdhënie me ta. Fitim Alla dhe djali i Sinan Lleshit kanë qenë të përfshirë në këtë transport armësh. Djali im ishte punësuar si punëtor për ngarkim-shkarkim dhe paguhej 20 mijë lekë të vjetra. Atë ditë që u vra miku im Musa Skura, në mëngjes djalin e lamë në shtëpi. E ëma bashkë me djalin tjetër e gjetën në shtëpi kur u kthyen. Unë isha në kafe me një shok dhe kam shkuar në shtëpi rreth 1 orë më vonë, djali kishte dalë. Gruaja më tha se kishte dalë ëpr të blerë fara luledielli. Kur kam dëgjuar që Musa Skura është plagosur isha në shtëpi. Në këtë kohë bie telefoni nga Durrësi, kunata ime më mori dhe më tha se është plagosur Musa Skura nga Fitim Alla dhe doli edhe emri i Vilsonit. Vilsonit i çova zile në telefon, i shkoi zilja dhe pas 4-5 minutash telefoni u mbyll. Policia bëri rrethimin e zonës me forcat RENEA. Kur kanë ardhur 8-9 persona të RENEA-s në shtëpi më thonë je i arrestuar, mos lëviz.”- deklaron Petrit Milkurti.

Më tej, zoti Milkurti hedh akuza të forta në drejtim të policisë së Matit, e cila sipas tij ishte në dijeni të këtij trafiku prej vitesh.
“Policia e rrethit të Matit ka qenë nxitëse e krimit dhe jo e parandalimit të krimit. Fëmijët tanë janë të inkriminuar nga dikush nga qendra. A i inkriminoj unë si baba 52 vjeç, apo babai i atij tjetrit, apo tjetrit? Djalin e kanë keqtrajtuar dhe i kanë bërë një gjilpërë në krah. Trafikimi ka kaq kohë që ndodh dhe unë e kam paralajmëruar policinë një javë përpara ngjarjes, kur 20 të rinj, mes të cilëve dhe djemtë e mi, janë ndaluar për vjedhjen e një kabine elektrike. U kam thënë policëve kapni kokën e krimit dhe jo fëmijët.”- shprehet Petrit Milkurti.

Përsa i përket marrëdhënieve me familjen e komisarit Skura, Petrit Milkurti tregon se gjatë kohës që Musa Skura ishte i plagosur, ai ka pirë kafe në shtëpinë e tij, por pas vdekjes, vizita e tij është refuzuar nga familjarët.

“Në kohën që është plagosur Musa Skura kam shkuar në familjen e tij dhe kam kërkuar të pi një kafe. Atmosfera që më pritën nuk ishte shumë e mirë. Vëllai i tij nuk më tha asnjë llaf, se ke me mua tha, këtë e ka marrë në dorë drejtësia dhe unë i besoj drejtësisë. I thashë, kam ardhur vetëm me pi kafe për plagosjen e komisarit. Pas vdekjes kam kërkuar të pij kafe dhe nuk më kanë pritur.”- u shpreh Milkurti.

NGJARJA
Komisari Musa Skura u plagos mbrëmjen e 13 janarit gjatë një operacioni për arrestimin e anëtarëve të një bande që trafikonte armë. Në aksion e sipër, disa persona kanë shkëmbyer zjarr me efektivat blu. Për pasojë u plagos me 1 plumb në gjoks dhe 2 të tjerë në trup 57-vjeçari Musa Skura. Gjithashtu, mbeti i plagosur edhe njëri prej agresorëve, Fitim Alla. Ngjarja e rëndë ndodhi në rrugën nacionale Burrel-Klos, në afërsi të fshatit Suç të rrethit të Matit.

Ndërhyrja e punonjësve të policisë ka qenë e shpejtë dhe është bërë i mundur arrestimi i Fitim Allës, 19 vjeç, banues në fshatin Rripe të Matit dhe Vilson Milkurti, 18 vjeç, banues në fshatin Suç të Matit. Ndërkohë, në afërsi të vendit të ngjarjes janë kapur edhe 2 autorët e tjerë, të cilët dyshohet se janë përfshirë në rrjetin kriminal. Të arrestuarit janë Edison Lleshi, 18 vjeç dhe i mituri me inicialet A.Ll., 15 vjeç, që të dy nga fshati Dom i Matit.

Shefi i krimeve të policisë së Matit u dërgua me helikopter në Spitalin Ushtarak të Tiranës, në gjendje të rëndë shëndetësore. Ai iu nënshtrua një operacioni që zgjati rreth 6 orë dhe më pas u transportua në spitalin e Foxhias në Itali me një avion të posaçëm. Por pavarësisht përpjekjeve të mjekëve për ta mbajtur në jetë, Skura kaloi në gjendje kome dhe nuk arriti ta fitonte betejën me vdekjen. Ai ndërroi jetë mbrëmjen e 21 janarit.

Musa Skura punonte pranë Policisë së Shtetit prej rreth 30 vjetësh. Policia e Shtetit thotë se 57-vjeçari e njihte dhe organizonte shumë mirë punën që i ishte ngarkuar. Prej gjashtë vjetësh ishte emëruar në pozicionin e shefit të krimeve. Komisar Skura ka kryer shërbime në qytete të ndryshme të Shqipërisë. Të gjithë e njihnin si një person me personalitet. Ndërkohë, ai është baba i tre djemve, ku më i vogli prej tyre është në klasën e dytë fillore.

(er.nu/BalkanWeb)

[Albo]

Zbardhet vrasja e komisarit, dosja i shkon gjyqit


Prokuroria e Krimeve të Rënda akuzon Fitim Allën për vrasjen e komisarit Musa Skuraj. Sipas akuzës, Alla dhe dy persona të tjerë po tentonin të shisnin një sasi municionesh

Tiranë Prokuroria për Krime të Rënda ka dërguar dje për gjykim të pandehurin Fitim Alla, i cili akuzohet për vrasjen e komisarit Musa Skuraj, ngjarje e ndodhur në janar të këtij viti. Sipas prokurorisë, Fitim Alla në bashkëpunim me dy persona të tjerë do të shisnin një sasi të konsiderueshme municionesh dhe për këtë arsye shefi i komisariatit të Laçit, së bashku me punonjësit e policisë është vënë në ndjekje të tyre. Ai është përleshur me Fitim Allën, i cili ka qëlluar një herë me automatik në drejtim të komisarit duke e plagosur rëndë. I ndjeri Skura ndërroi jetë disa ditë më pas jashtë vendit ku ishte dërguar për mjekim të specializuar. Në dosjen e prokurorisë thuhet se të pandehurit e pranojnë faktin se ndodheshin në vendin e ngjarjes, ku do të kryenin shitjen e një sasie të konsiderueshme municioni luftarak, të cilin e kishin siguruar në bashkëpunim me njëri-tjetrin. Lidhur me momentin e vrasjes së komisarit, organi i akuzës thotë se ai është qëlluar një herë të vetme nga një distancë e afërt nga i pandehuri Alla, i cili ishte i vetmi që dispononte një armë zjarri tip automatik. “Të pandehurit Fitim Alla dhe Vilson Milkurti, pasi kanë kuptuar praninë e forcave të policisë kanë tentuar të largohen dhe në këtë moment efektivi i policisë Musa Skuraj pasi ka thirrur disa herë ‘Nal Policia’’, është vënë në ndjekje të tyre. Në ndjekje e sipër, pasi ka arritur të kapë të pandehurin Fitim Alla, ky i fundit duke qenë i pajisur me armën tip automatik ‘model 56’ ka realizuar qitje drejt efektivit të policisë”- thuhet në dosjen e prokurorisë. Sipas akuzës, i pandehuri Fitim Alla është përleshur me efektivin e policisë Musa Skuraj, duke gjuajtur dhe me armë luftarake në drejtim të tij. “I pandehuri Fitim Alla së bashku me të pandehurit Vilson Milkurtaj dhe Edison Lleshi në bashkëpunim me njëri-tjetrin kanë marrë masat për të gjetur, mbajtur, siguruar një sasi të konsiderueshme municioni me qëllimin për ta shitur atë”,- thotë prokuroria. Referuar municionit të sekuestruar në vendin e ngjarjes, sipas akt-ekspertimit rezulton se janë fishekë të rregullt teknikisht dhe të përshtatshëm për të realizuar qitje. Ky fakt është pranuar edhe nga të pandehurit, të cilët kanë deklaruar se kanë qenë të pranishëm në vendngjarje dhe janë ndjekur nga efektivët e policisë, të cilët kishin organizuar shërbime për arrestimin e të dyshuarve për shitjen e municioneve luftarake. L.Bakillari



Të pandehur:

Fitim Alla, akuzuar për vrasje në rrethana të tjera cilësuese të komisarit Musa Skuraj, si dhe prodhim e mbajtje pa leje të armëve luftarake dhe municionit

Edison Lleshi, akuzuar për prodhim dhe mbajtje pa leje të armëve luftarake dhe municionit

Vilson Milkurti, akuzuar për prodhim dhe mbajtje pa leje të armëve luftarake dhe municionit


MAPO