KMSH: Mbi 70% e shqiptarëve janë myslimanë, nuk u numërua as Selim Muça
Jonida Tashi
Në kulmin e debatit që prodhuan rezultatet e Censusit 2011 për besimin fetar të shqiptarëve, komunitetet rrëzojnë shifrat e INSTAT-it, duke sjellë fakte për persona që nuk janë regjistruar. Madje, “gabimi” i regjistruesve të popullsisë duket se ka qenë më i rëndë me komunitetin më të madh fetar në vend, atë Mysliman, kryesia e të cilit, duke filluar që nga kryetari i KMSH-së, Selim Muça, nuk janë përfshirë në proces, jo se nuk kanë dashur të jenë pjesë e tij, por se askush nuk u ka trokitur në derë. Duke besuar tek të dhënat e tyre, se numri i besimtarëve myslimanë në vend është mbi 70%, dhe jo 56.70% sa tregoi Censusi i fundit, burime zyrtare nga Komuniteti Mysliman bëjnë të ditur se “më shumë se gjysma e anëtarëve të kryesisë së Komunitetit Mysliman, duke filluar nga kryetari Haxhi Selim Muça, së bashku me familjet e tyre (të gjithë shqiptarë dhe banorë të Tiranës) nuk janë përfshirë në këtë regjistrim”.Në qëndrimin zyrtar për rezultatet e Censusit, Komuniteti Mysliman deklaron se futja e garës së shifrave artificiale mes besimeve fetare në vend nuk do t’i shërbejë askujt, pasi në këtë “lojë” nuk do të ketë fitimtar, por vetëm humbës. “Çështja më e rëndësishme që preokupon KMSH është që ata që e quajnë veten myslimanë të jetojnë në përputhje me besimin e tyre, në paqe me veten, me njerëzit, me botën. Ne si Komunitet Mysliman i Shqipërisë nuk kemi bërë dhe s’kemi pse të bëjmë përpjekje që ta tregojmë sa më të lartë numrin e myslimanëve dhe mendojmë se futja në një garë shifrash mes besimeve fetare apo pakicave etike e kulturore nuk do t’i shërbejë askujt, dhe në një garë të tillë me fryrje e shfryrje shifrash artificialisht askush nuk do të dalë i fituar, por të gjithë mund të humbasin diçka. Sipas kalkulimeve tona, bazuar edhe në sondazhe të ndryshme të organizuara nga institucione ndërkombëtare, numri i besimtarëve myslimanë në vend është mbi 70%. Gjithsesi, thelbësore për ne është që njerëzit të njohin Zotin, Profetin, t’i besojnë gjykimit në botën tjetër dhe të jetojnë të qetë e të sigurt në këtë jetë, e të lumtur në tjetrën”, – thuhet në qëndrimin zyrtar të KMSH. Megjithëse pyetjes për besimin fetar kanë refuzuar t’i përgjigjen 14% e të pyeturve, apo thënë ndryshe rreth 400 mijë persona, sipas INSTAT, mbi 1 milion e gjysmë shqiptarë kanë deklaruar se janë myslimanë, 280 mijë katolikë, 188 mijë ortodoksë, ndërsa pjesa e mbetur i përket besimeve të tjera fetare. Instituti i Statistikave publikoi të enjten rezultatet përfundimtare të Censsuit 2011, ku janë numëruar 2 800 138 banorë, 21 839 kanë refuzuar procesin. Ndërkohë që pyetjeve për përkatësinë etnike dhe fetare në proces kanë refuzuar t’i përgjigjen 14 për qind e totalit të popullsisë për secilën.
MAPO
Përgjigju Duke Cituar
Postuar më parë nga BlueBaron
Krijoni Kontakt