Greqi, policia po kërkon 2 shqiptarë të akuzuar për grabitje dhe përdhunime
Policia greke është vënë në kërkim të 2 shtetasve shqiptarë, të cilët akuzohen për grabitje dhe dhunë.
Policia ka shpërndarë edhe fotot e dy të rinjve, të moshës 30 dhe 27 vjeç, të cilët sipas saj kanë përhapur panik dhe tmerr me plaçkitjet dhe përdhunimin e viktimave të tyre.
Dy personat në foto, që edhe në të kaluarën kanë qenë të akuzuar për vepra të tilla si vjedhje dhe grabitje, u identifikuan nga 5 viktimat e plaçkitjeve, që kanë kryer në shtëpi në Kurlampa, dy në Alisso në Cukalika dhe në Agrira.
Policia bën të ditur se dy të kërkuarit kanë qarkulluar në qytetin e Patras me një xhip, që e vodhën në shtëpinë e një 50 vjeçari, të cilin e kishin lidhur dhe partneren e tij e kishin përdhunuar. Pas kësaj ishin larguar në qytetin e Lamias. Këtu po sipas autoriteteve, dyshohet se për të vjedhur një benzinatë kanë vrarë personin që ndodhej në të, një 45-vjeçar dhe pastaj me një tjetër automjet janë larguar Janinë, ku policia gjeti një Subaru të vjedhur, që besohet se është përdorur prej tyre.
Për shkak të këtij elementi, autoritetet vlerësojnë se ka të ngjarë që 2 personat në fjalë të kenë arritur të kalojnë kufirin dhe të kenë hyrë në Shqipëri. Policia vazhdon hetimet me fokus në Greqinë qendrore dhe veriore, megjithatë, beson se është shumë e vështirë për të identifikuar keqbërësit, ndaj edhe ka publikuar fotot e tyre, që gjithkush të mund të ndihmojë për këtë qëllim.
(an.jo/Balkanweb)
-----------------------------------------------------------------------------------------
Akademiku shqiptar kapet duke vjedhur në një qendër tregtare në SHBA
Tre shqiptarë janë arrestuar në Shtetet e Bashkuara të Amerikës teksa po vidhnin një qendër tregtare në Paolo Alto të Kalifornisë.
Policia amerikane bën të ditur edhe emrat e shqiptarëve, Kosta dhe Fatbardha Barjaba, 52 vjeç dhe Joniada Barjaba, 23 vjeç, të cilët janë dërguar në institucionin e paraburgimit në San Mateo County's Maguire Correctional Facility.
Kosta Bajraba në Shqipëri mban titullin Doktor i Shkencave në Sociologji. Mediet amerikane raportojnë se Barjaba është qytetar dhe rezident në Shqipëri dhe pas arrestimit, bashkë me dy të afërmit e tij, do të përballet me akuzën e vjedhjes së kryer në bashkëpunim.
Kush është?
Prof. Dr. Kosta Barjaba lindi në vitin 1960, në rrethin e Sarandës.Ka ndjekur studimet e larta për Shkencat Politike, në Universitetin e Tiranës. Në moshën 29-vjeçare, ai mori titullin Doktor i Shkencave në Sociologji. Pas viteve ’90, Kosta Barjaba i thelloi njohuritë e tij, duke kryer specializime të ndryshme në Greqi, Itali dhe SHBA. Në vitin 1999, ai fitoi titullin Profesor. Në vitin 2005, kryen specializimin Master në Universitetin e Harvardit. Pas gjashtë vitesh, në vitin 2011 ai zgjidhet anëtar i Akademisë së Shkencave të Shqipërisë.
Kosta Barjaba është një pjesëmarrës aktiv në jetën akademike, shkencore dhe publike të vendit. Veprimtaria e tij shkencore përqendrohet ndër të tjera, në çështjet e emigracionit, të varfërisë dhe problematikat e zhvillimit. Rezultat e kërkimeve të tij shkencore referohen si brenda vendit, ashtu edhe në rrethe akademike ndërkombëtare. Aktualisht është dekan i Fakultetit të Shkencave Politike dhe Administratës Publike në një prej universiteteve private në vend. Kosta Barjaba është i martuar dhe ka dy fëmijë.
/Shekulli Online/ E.L/
---------------------------------
Shqiptarët rrëmbejnë biznesmenin italian me pistoletë lodër
Shtypi italian shkruan sot se rrëmbimi i sipërmarrësit italian Andrea Calevo është kryer nga tre shqiptarë. Këto fakte kanë dalë nga dëshmia e një shqiptari, i cili ishte pjesë e pengmarrësve.
Ka qenë 23- vjeçari shqiptar Simon Aliaj, i cili pas bashkëpunimit me hetuesinë italiane, ka dëshmuar se në operacionin e rrëmbimit të biznesmenit 31-vjeçar natën e 16 dhjetorit. Simon Alia u arrestua një ditë më parë, më herët ishte arrestuar dhe një shqiptar tjetër Fabijan Vila,të dy punëtor ndërtimi, ndërsa emri i shqiptarit të tretë nuk bëhet i ditur, ndërsa ai është shpallur në kërkim. Sipas mediave italiane u dyshua se në krye të një grupi pengmarrësish ishte një shtetas italian i quajtur David Bandoni nipi i sipërmarrësit, por dëshmia e shqiptarit 23- vjeçar rrëzoi këtë version.
I arrestuar është ndërkohë edhe një 70-vjeçar i quajtur Pierluigi Destri. Biznesmeni i rrëmbyer në 16 dhjetor të këtij viti u lirua pak ditë më parë dhe për lirimin e tij pengmarrësit kishin kërkuar 8 milion euro. Por, policia italiane deklaroi se asnjë euro nuk iu pagua pengmarrësve. Në vendin ku mbahej peng biznesmeni në një bodrum u gjet një armë tip pistolete lodër si dhe një armë gjahu. Armët iu dërguan policisë për të zbuluar shenjat e gishtave.
/Shekulli Online/ E.L/
--------------------------------------------------------------------------------------------------------------------
Itali, prostituta shqiptare e braktis foshnjën në tualetin e fast-food-it
Një prostitutë shqiptare ka braktisur foshnjën e saj duke e lanë në lavamanin e tualetit në një fast-food në Itali. Autoritetet italiane kanë nisur hetimet, për të zbuluar identitetin gruas, e cila braktisi foshnjën e saj të porsalindur, në tualetin e McDonald’s në Romë, mbrëmjen e 28 dhjetorit.
Agjentët dyshojnë se nëna e foshnjës është një prostitutë shqiptare, por nuk kanë arritur ende ta gjejnë, pavarësisht se imazhet e saj janë fiksuar nga kamerat e sigurisë. Në pamje duket qartë se si gruaja futet në tualetin e fast-food-it me një bebe në krahë dhe del prej andej vetëm me një çantë në dorë.
Foshnja e seksit mashkull është gjetur në lavamanin e tualetit nga një klient, i cili lajmëroi menjëherë policinë. Fatmirësisht vogëlushi është mirë dhe është nën kujdesin e mjekëve, të cilët e kanë quajtur Emanuele.
Ndërkaq nëna e foshnjës rrezikon të akuzohet edhe për tentativë vrasjeje, pasi e la fëmijën e saj brenda një lavamani të mbushur me ujë. Ndërkohë hetuesit po kërkojnë edhe një burrë, i cili e ka pritur gruan jashtë fast-food-it në një makinë.
/Shekulli Online/ E.L/
Postuar më parë nga angmokio
Regullat e Postimit
Përgjigju Duke Cituar
Krijoni Kontakt