Ne pritje te Papes se ri

[Archon]

Zgjedhja e Papës do të nisë të martën, më 12 mars



Zgjedhjet për Papën e ri do të nisin më 12 mars.

115 kardinalët do të vendosin se kush do e zëvendësojë Papa Benediktin XVI si kreu i Kishës Katolike.

Fillimisht paraditen e së martës do jetë një meshë dhe pasdite do të nisë konklava.

Se sa do zgjasë përzgjedhja, mbetet e hapur. Nuk ka një kufizim kohor për këtë çështje. Çdo ditë mund të zhvillohen disa raunde zgjedhjesh, derisa të arrihen dy të tretat për një kandidat.

Pas numërimit, votat digjen.

Tymi i zi sinjalizon për botën se nuk është zgjedhur Papa. Kurse tymi i bardhë do të thotë se është arritur të zgjidhet Papa i ri.

[Archon]

Konklava, ja normat për zgjedhjen e Papës

U mbajt, dje paradite, në Sallën e Re të Sinodit, Kongregacioni i dhjetë e i fundit i përgjithshëm i kardinajve, në prag të Konklavës, që do të fillojë sot.

Drejtori i Sallës vatikanase të Shtypit, atë Federiko Lombardi, u takua përsëri me gazetarët. Në këtë takim të fundit u dha të gjithë serinë e informacioneve e të hollësirave për ngjarjet e ditëve të ardhshme.

Kongregacioni, që u mbajt dje paradite, ishte i dhjeti: të pranishëm, 152 kardinalë. Në fillim të këtij takimi, u hodh shorti për nëntë anëtarë të Kongregacionit të posaçëm, që do të ndërrohen çdo tri ditë; ata, që u caktuan me short sot paradite, do të vijojnë detyrën edhe gjatë Konklavës, e prej këndej, Kongregacioni i posaçëm përbëhet vetëm nga kardinalë zgjedhës. Tre të zgjedhurit, që do ta ndihmojnë Kamerlengun, janë Kardinali Naguib, për Urdhërin e Ipeshkvijve; kardinali Uilet, për atë të Presbiterve e kardinali Monterizi, për Urdhërin e Diakonëve.

Dy saktësime të vogla: tre kardinalët u caktuan me short, nuk u zgjodhën, e do të mbeten në detyrë, e përsërisim, për tri ditë; prej këndej, në se Konklava do të zgjasë më shumë, duhet hedhur shorti për tre të tjerë.

E pasur me diskutime, paraditja e sotme, sepse, duke qenë Kongregacioni i fundmë, shumë veta kërkuan t’u jepej fjala. Gjatë paradites së sotme folën 28 vetë, duke arritur, kështu, numri, në 161 diskutime gjithsejt gjatë këtyre ditëve të dhjetë Kongregacioneve. Pjesëmarrje e gjerë, ndonëse ka mundësi që ndonjëri do të kishte dëshiruar të fliste më gjatë.
U votua për përfundimin e Kongregacioneve, domethënë, për të mos e mbajtur Kongregacionin e pasdites, sepse tashmë kardinalët po përgatiten të transferohen në Shtëpinë e Shën Martës, ku do të banojnë gjatë gjithë Konklavës. Prej këndej, Kolegji Kardinalor shprehu dëshirën t’u japë fund këshillimeve, duke pasur parasysh edhe gjatësinë e diskutimeve të fundit.
Ndërmjet temave, që meritojnë të përmenden, kujtojmë gjendjen e IOR-it (Instituti për Veprat Fetare) me një relacion, mbajtur nga sekretari i Shtetit të Vatikanit, kardinali Tarçizio Bertone i cili, me cilësinë e Kryetarit të Këshillit Kardinalor të mbikqyrjes, plotësoi serinë e diskutimeve kushtuar situatës ekonomike, që u prek edhe javën e kaluar. U fol kryesisht për natyrën e Institutit, për vijimin e përfshirjes në sistemin ndërkombëtar të Kontrollit të Moneyval e për probleme të ndryshme. Më pas u prekën argumente të tjera, por, në mënyrë të posaçme, me që ishte takimi i fundit, u fol sidomos për profilin e Papës së ri si dhe për shpresat që ushqehen në këto ditë vendimtare.

Sot pasdite u betuan të ngarkuarit me detyra në Konklavë, sipas parashikimit të Kushtetutës Apostolike, neni 48 e në vijim. Betimi u bë në Kapelën Paoline, në orën 17.30, kryesuar nga kardinali Kamerleng. Numri i atyre, që u betuan e që do t’i ndihmojnë kardinalët gjatë Konklavës, ishte 90. Ndërmjet figurave më në shenjë, sekretari i Kolegjit Kardinalor, që nuk është kardinal e asiston kardinalët gjatë Konklavit; pastaj Mjeshtri i Kremtimeve dhe ceremonierët; e akoma, rregulltarët e rregulltaret, të ngarkuar me punë në sakrestinë e Konklavit, sakresti papnore. Pastaj ishin edhe rregulltarët për rrëfime, personeli i shërbimit në mensë dhe i pastrimit në Shtëpinë e Shën Martës, i shërbimit teknik, shoferët e mikrobusëve, me të cilët kardinalët do të zhvendosen nga Shën Marta, në Pallatin Apostolik; të ngarkuarit për ruajtjen e mjedisit nga Roja Zvicerane e Xhandarmëria: një sërë figurash, pra, që do të ndihmojnë e do të bashkëpunojnë brenda Sikstinës e prej këndej, edhe duhet të betohen për ta mbajtur sekretin, siç parashikohet në Kushtetutën Apostolike.

Nuk do të ketë transmetim të drejtpërdrejt të pamjeve të betimit nga Qendra Televizive e Vatikanit, sepse konsiderohet ngjarje anësore; megjithatë, nuk përjashtohet mundësia që të ketë pamje të regjistruara të ngjarjes.
Sot, në orën 10.00, në Bazilikën e Shën Pjetrit, në Vatikan, do të kremtohet “Missa pro eligendo Romano Pontefice”.

Libreti i liturgjisë është tashmë gati, si i shtypur në kartë, ashtu edhe në internet, në kanalin , seksioni i Zyrës së Ceremonive Liturgjike. Libreti, si gjithnjë, tashmë prej kohe, ka tekstin e plotë në italisht e në anglisht, përveç origjinalit në latinisht, sepse liturgjia e nesërme do të kremtohet pikërisht në latinisht. Kremtimin do ta kryesojë kardinali dekan, Anxhelo Sodano; me të do të bashkëkremojnë të gjithë kardinajtë, jo vetëm zgjedhësit; homelia do të mbahet në gjuhën italiane e teksti do të dorëzohet, i përkthyer edhe në gjuhë të tjera, sa më shpejt që të jetë e mundur.

Në Konklavin e kaluar, Mesha “Për zgjedhjen e Papës” pati zgjatur 1 orë e 40 minuta, prej këndej, mendohet që kremtimi i nesërm nuk do të zgjasë më shumë se dy orë. Nuk ka bileta e në Meshë mund të marrin pjesë të gjithë besimtarët, që dëshirojnë të bashkohen në lutje me Kishën Universale.

Hyrja në Konklav përshkruhet hollësisht në Ordo rituum conclavis. Sot, në orën 16.30, kardinajtë do të shkojnë me procesion nga Kapela Paoline, ku do të arrijnë nga Santa Marta, në atë Sikstine.
Para procesionit do të ketë një lutje të përbashkët. Rendi i pjesëmarrjes në procesion do të jetë ky: do të prijë Kryqi me mbajtësit e qirinjve, më pas vijnë këngëtarët e Kapelës Sikstine, që do të intonojnë himne të shenjta, pastaj prelatët, sekretari i Konklavës, kardinali Grech, të cilit iu besua meditimi e pastaj, të gjithë kardinalët e tjerë. Procesionin e mbyll kardinali Re, më i vjetri i Urdhërit të Ipeshkvijve, kremtues i procesionit dhe i betimit në Kapelën Sikstine. Kardinali Re shoqërohet nga Mjeshtri i Kremtimeve Papnore, imzot Marini.

Të shoqëruar nga Litanitë e Shenjtorëve, lutje të tjera dhe kënga Veni Creator Spiritus, himn i madh i grishjes së Shpirtit të Shenjtë, kardinalët do të hyjnë në Kapelën Sikstine, ku do të zënë vendet e caktuara.
Do të fillojë, pastaj betimi, me formulën e përcaktuar nga Kushtetuta Apostolike. Formulën e gjatë latine të betimit e shqipton kardinali Re, si kremtues kryesor. Pastaj vjen meditimi i kardinalit Grech, i cili, në përfundim, së bashku me Mjeshtrin e Ceremonive, del nga Kapela.

Porta mbyllet me formulën klasike “Extra omnes”-“Jashtë të gjithë!”, shqiptuar në latinisht nga Mjeshtri i Kremtimeve. Pastaj ka shumë mundësi të fillojë meditimi i kardinalëve para votimit: kështu nisi herën e fundit. Pas meditimit, votimi. Vështirë se do të ketë përfundim pozitiv, prandaj është për t’u pritur tymi i zi. Së fundi, kardinalët do të kremtojnë së bashku Lutjet mbrëmësore, çast me të cilin do të përfundojë dita e parë e Konklavit.

Nëse për një kandidat votat përfshijnë dy të tretat e votuesve, zgjedhja e papës është kanonikisht e vlefshme.
Në këtë pikë, i fundmi i Urdhërit të Kardinalëve Diakonë, thërret Mjeshtrin e Kremtimeve Liturgjike dhe Sekretarin e Kolegjit Kardinalor. Dekani, zëvendës-Dekani ose i pari kardinal i kardinalëve ipeshkvij, i drejtohet të zgjedhurit, duke i thënë: "Acceptasne electionem de te canonice factam in Summum Pontificem?" (A e pranon zgjedhjen tënde kanonike si Papë?) e, nëse merr përgjigje pohuese, vijon të pyesë "Quo nomine vis vocari?" (Si dëshiron të thirresh?), pyetje, së cilës i sapozgjedhuri i përgjigjet me emrin papnor.

Pas zgjedhjes, skedat digjen e tymi i tyre i bardhë klasik, që ngjitet drejt qiellit nga oxhaku mbi Kapelë, shikohet qartë nga Sheshi i Shën Pjetrit. Në përfundim të Konklavës, Papa i ri tërhiqet në “dhomën e lotëve”, siç quhet sakrestia e Kapelës Sikstine, ku vesh për herë të parë petkat papnore, me të cilat do të paraqitet në publik nga Lozha e Bekimeve e Bazilikës së Shën Pjetrit. Emri i kësaj dhome rrjedh nga hamendja se Papa i ri mund edhe të shpërthejë në lot nga emocioni e, sidomos, nga mendimi për barrën e rëndë të përgjegjësisë, që merr mbi supe.
Paraqitje e shkurtër e normave për zgjedhjen e Papës gjatë Konklavës, sipas Radio Vatikanit.

Kush voton?
Sipas përcaktimit të nenit 35 të Universi Dominici Gregis (UDB), konfirmuar nga Motu Proprio e fundit, shpallur nga Benedikti XVI më 25 shkurt 2013, “Asnjë kardinal zgjedhës nuk mund të përjashtohet nga zgjedhja, si ajo aktive, ashtu edhe pasive, për asnjë arsye ose pretekst”, duke ndjekur, kështu, atë që shkruhet në Kushtetutën Apostolike Universi Dominici Gregis e cila, në nenin 40, saktëson, ndërmjet tjerash, se dorëheqja e mundshme duhet pranuar nga Kolegji i Kardinalëve” e “mund të ndodhë për shkaqe shëndeti ose pengese të rëndë”.

I njëjti nen 40 i UDG vendos edhe: “ Në se, rastësisht, ndonjë kardinal, që ka të drejtë vote do të refuzonte të hynte në Qytetin e Vatikanit për të pritur punimet e zgjedhjes ose më pas, pasi të ketë nisur zgjedhja, do të refuzonte të rrinte aty, për të kryer detyrën e tij, pa paraqitur arsye sëmundjeje të vërtetuar me betim nga mjekët e nga shumica e zgjedhësve, të tjerët mund të vijojnë lirisht veprimtarinë e zgjedhjes, pa e pritur e pa e pranuar sërisht. Ndërsa, nëse ndonjë nga kardinalët zgjedhës detyrohet të dalë nga Vatikani për arsye sëmundjeje, zgjedhja mund të vijojë edhe pa kërkuar votën e tij; por në se ai dëshiron të hyjë përsëri në selinë e zgjedhjes, pas shërimit ose përpara, duhet pranuar sërisht. Përveç kësaj, nëse ndonjë kardinal zgjedhës del nga Qyteti i Vatikanit për ndonjë arsye të rëndë, të pranuar nga shumica e zgjedhësve, mund të rikthehet e të marrë pjesë në zgjedhje.

Përjashtohen nga votimi aktiv dy kardinalëve, që kanë numrin më të madh të votave. Motu Proprio e fundit e Benediktit XVI e ripohon këtë normë, që përmbahet në nenin 75 të UDG.

Detyrat e zgjedhësve (dhe të personelit, që kryen detyra të ndryshme në rendin e votimit)

Kushtetuta Apostolike e Gjon Palit II, ngul këmbë mbi nevojën e sigurimit të sekretit të plotë të ngjarjeve të Konklavit, që lidhen drejtpërdrejt ose tërthorazi, me zgjedhjen e Papës; në dokument mund të lexohet lista e të gjitha masave paraprake, që duhen marrë, për të ruajtur fshehtësinë e për të shmangur ndërhyrjet nga jashtë (Neni 51-61 i UDG)
Kardinalët nuk kanë të drejtë t’i japin askujt informacione për Konklavën (neni 60 i UDG: graviter onerata ipsorum conscientia)

Sipas Motu Proprio “Normas Nonnullas” të Benediktit XVI, shkishërimi i menjëhershëm ‘latae sententiae’, për kë shkel sekretin, ka të bëjë me personat, për të cilët flitet në nenin 46 të UDG (prej këndej, nuk ka të bëjë me kardinalët).
Ndërsa shkishërimi parashikohet edhe për kardinajtë:
në rast simonie, apo shitblerjeje të votës, ndonëse vota e kardinalit të shkishëruar mbetet e vlefshme e, në këtë kuptim, rezultati i votës nuk mund të kundërshtohet (neni 78 UDG).
Në rast ndërhyrjesh të jashtme (neni 80 i UDG).
Në rast marrëveshjesh/ kompromisesh (neni 81 UDG).

Detyra e marrjes së masave të nevojshme për sigurimin e këtij sekreti si dhe të rregullit gjatë zgjedhjeve, i takon Kolegjit Kardinalor, që vepron nën autoritetin dhe përgjegjësinë e Kamerlengut edhe me ndihmën e Zëvendësit të Sekretarisë së Shtetit (neni 55 UDG). Këtij të fundit Motu Proprio e Benediktit XVI e 22 shkurtit 2013, i shton edhe Zëvendës-Kamerlengun.

Dokumenti i ri modifikon edhe formulën e betimit, parashikuar në nenin 48 të UDG, duke parashikuar shkishërimin “latae sententiae” që i takon Selisë Apostolike. Formula e mëparshme në UDG ishte më e përgjithshme (“Me këtë betim deklaroj se jam i vetëdijshëm që, po ta thej, kjo do të ketë si pasojë ato masa ndeshkimore shpirtërore e kanonike, që do t’i shikojë të arsyeshme t’i marrë Papa i ardhshëm (cfr. Can, 1399 të C.I.C.).

Fazat e votimit:

Pas Meshës “Pro eligendo Pontefice” të paradites, nis procesioni solemn drejt Kapelës Sikstine dhe “extra omnes”. Pastaj edhe votimi, në këtë mënyrë:

Faza e parë e votimit (paravotimi) përfshin përgatitjen e skedave, të atyre që do t’i numrojnë, që do të shkojnë t’i marrin nga kardinalët, të cilët nuk mund të lëvizin si dhe rishikuesve.

Faza e dytë është ajo e votimit: hedhja e skedave në kutinë e votimit, numërimi i skedave, numërimi i votave (përsa i përket skedës, ka formë drejtkëndore. Në pjesën e sipërme, mundësisht me shtyp, duken fjalët: “Eligo in Summum Pontificem”. Në gjysmën e poshtme kardinali shkruan emrin e të zgjedhurit. Plotësimi i skedës duhet bërë fshehurazi nga secili kardinal zgjedhës, i cili shkruan qartë, me shkrim sa më shumë të jetë e mundur, të panjohshëm, emrin e atij, që zgjedh).

Faza e tretë është ajo e pas votimit. Përfshin: 1. numërimin e votave; 2. kontrollin e tyre. 3. djegien e skedave. Nëse vijohet menjëherë me një votim të dytë, skedat e të parit digjen, së bashku me ato të të dytit.

Duhen arritur gjithnjë dy të tretat e votave. Në se arrihet në ballotazh, duhen gjithnjë dy të tretat e kardinalëve të pranishëm e votues, sepse dy kardinalët në ballotazh nuk votojnë. Kardinalët zgjedhës të pranishëm në Konklav duhet të ishin 117; por do të jenë 115 (Kardinal Darmaatmadja mungon për arsye sëmundjeje, Kardinali O’ Brien, mungon pas dhënies së dorëheqjes, më 25 shkurt). Prej këndej, shumica e kërkuar do të jetë 77 vota.

Zgjedhja bëhet vetëm me votim të fshehtë (norma konfirmohet nga Motu Proprio e fundit e Benediktit XVI, e 22 shkurtit 2013).

Numri i votave
Pas tri ditësh pa rezultat (12 votime ose 13, nëse votimi i parë bëhet në ditën e hapjes së Konklavit), votimet ndërpriten së paku për një ditë, për një pushim lutjeje dhe bisedimi të lirë ndërmjet votuesve dhe për një nxitje shpirtërore, nga ana e Kardinalit të parë të Urdhërit të Diakonëve.

Më pas, edhe shtatë votime. Nëse edhe këtë herë nuk do të arrihet rezultati, do të ketë një pushim tjetër e një seri tjetër votimesh, ndjekur nga shtatë votime të tjera, në rast se nuk arrihet tek zgjedhja. Nëse ndodh përsëri kështu, vjen pushimi i tretë për një nxitje shpirtërore, nga ana e Kardinalit të parë të Urdhërit të Presbiterëve; pastaj, shtatë votime të tjera.

Në se arrihet në votimin e 33-të ose të 34-t pa rezultat, vijohet me ballotazhin ndërmjet dy kardinalëve, që kanë fituar numrin më të madh të votave. Edhe në këto votime të fundme, sipas asaj, që ka vendosur Benedikti XVI në dy Motu Proprio-t e 2007-tës dhe të 25 shkurtit 2013, kërkohet shumica e kualifikuar e së paku dy të tretave të votave të kardinajve të pranishëm e votues (shih sipër).

“Habemus Papam

Detyra për të kumtuar zgjedhjen e Papës së ri, i përket kardinalit protodiakon, i cili shqipton shprehjen e mirënjohur: “Habemus Papam”; veç kësaj, i vë palion Papës së ri, gjatë Meshës për fillimin e papnisë, Metropolitëve, ose ua dorëzon përfaqësuesve të tyre, në emër të Papës së Romës (29 qershor). Palio, endur me leshin qengjave e të deleve, është e stolisur me pesë kryqe, që simbolizojnë pesë plagët e Zotit, dhe me tri gjilpëra, simbol i tri gozhdave të Kryqëzimit.
Kardinali i sotëm protodiakon, nga 21 shkurti, është kardinali Jean-Louis Pierre Taoran, Kryetar i Këshillit Papnor për Dialogun Ndërfetar. Protodiakon është titull, që i përket kardinalit të parë të urdhërit diakonal, domethënë kardinalit diakon të emëruar para të tjerëve (siç dihet, në Kolegjin kardinalor dallohen tre Urdhëra: ai ipeshkvnor, me Kardinajtë, të cilëve Papa u cakton një titull në një nga kishat suburbikare, si dhe Patrikët e Lindjes, që numërohen në Kolegjin e Kardinalëve; urdhri presbiterial e urdhëri diakonal).

Shekulli

[Le dévoué]

Shume sekrete e rituale qe sikur t'ishte Krishti gjall, do t'ishte befasuar me ithtaret e tij ! Kokërr transparence nga kisha,

[toni77_toni]

sikur t'ishte Krishti gjall, ,

Krishti eshte i GJALLË në Kishen e Tij, keshtu qe mos e ke merak se Krishti ishte - eshte dhe do te jet ne Kieshne e Tij deri ne fund te botes. Ai eshte besnik....

[Le dévoué]

Krishti eshte i GJALLË në Kishen e Tij, keshtu qe mos e ke merak se Krishti ishte - eshte dhe do te jet ne Kieshne e Tij deri ne fund te botes. Ai eshte besnik....

Ok, ok, dakord !

[Xhuxhumaku]

dje, doli tim i zi, nga kapela sistine.

te presin sot ne darke.

kane shance kardinalet nga usa,

NY, Boston.

[Archon]

Doli edhe tymi i bardhe.HABEMUS PAPAM

[Gentian_gr]

Tym i bardhe.

Ne krye te kishes u zgjodh papa i ri!

[Xhuxhumaku]

per disa min jeper emri i papes se ri.

Mendohet qe eshte scola.

[Xhuxhumaku]

san pietro plot me njerez.