Presidenti dekreton emerimin e Adriatik Llalla si Prokuror i Pergjithshem

[Albo]

"Kryeprokurori i ri", Adriatik Llalla dekretohet nga Presidenti: Sfidë dhe përgjegjësi

TIRANË- Adriatik Llalla, kreu i Inspektoriatit të Lartë të Deklarimit dhe Kontrollit të Pasurive, dekretohet nga Presidenti i Republikës së Shqipërisë, Bujar Nishani, për postin e Prokurorit të Përgjithshëm.



Lajmi bëhet i ditur nga zyra e Presidencës, e cila publikon dhe dekretin për emërimin e pasardhesit të Ina Ramës, i cili hyn në fuqi menjëherë.

"Në mbështetje të nenit 93 dhe nenit 149.1 të Kushtetutës, si dhe të nenit 7, pika 1, të ligjit nr. 8737 , datë 12.02.2001 “Per organizimin dhe Funksionimin e Prokurorisë në Republikën e Shqipërisë, i ndryshuar, D e k r e t oj : Zoti Adriatik Llalla, emërohet Prokuror i Përgjithshëm i Republikës së Shqipërisë. Ky dekret hyn në fuqi menjëherë. Nr. Dekretit 7840", thuhet në dekretin e Presidentit.

Ashtu siç ishte parashikuar mandatit të kryeprokurores Ina Rama po i vjen fundi, pas dekretimit të Adriatik Llallës, i cili pritet të zërë vendin e saj në krye të organit të akuzës. Ishte vetë Presidenti i Republikes, Bujar Nishani, i cili pas konsultave me partitë politike paralajmëroi se mandati i Ina Ramës përfundon më 22 nëntor, duke formalizuar edhe qëndrimin e mazhorancës për këtë çështje, ndërkohë që opozita kundërshtoi vendimin duke theksuar se mandati i kryeporkurores përfundon më 23 maj 2013-të, datë kur është dhe afati i përcaktuar në ndryshimet kushtetuese të vitit 2008, ku përcaktohet mandati pesëvjeçar i kryeprokurorit.

LLALLA: POZICIONIN E SHOH SI SFIDË DHE PËRGJEGJËSI
Kandidati për Kryeprokuror të Përgjithshëm, Adriatik Llalla e vlerëson pozicimin e ri si sfidë dhe përgjegjësi njëherësh.

Në një prononcim për mediat Llalla shprehet se do të vijojë në krye të ILDKP-së deri në momentin që dekreti i sotëm i presidentit Bujar Nishani të votohet. Llalla bën me dije se ka marrë telefonata urimi edhe nga opozita.

“Padiskutim që kam pasur telefonata urimi, familja, dashamirës edhe nga opozita, nga të gjithë. Nuk është ende momenti për të diskutuar, janë disa procese të tjera që duhen kaluar.”- deklaroi Llalla.

Më 14 tetor 2008 Adriatik Llalla mori zyrtarisht detyrën e Inspektorit të Përgjithshëm të Inspektoratit të Lartë të Deklarimit dhe Kontrollit të Pasurive, post të cilin e gëzon edhe aktualisht. Në relacionin shoqërues të dekretit, Presidenti shpjegon se ka përzgjedhur për funksionin e Prokurorit të Përgjithshëm Z. Adriatik Llalla, duke vlerësuar eksperiencën e gjatë në strukturat e Prukurorisë.

“Me Dekretin Nr. 7840, datë 3.12.2012 kam vendosur të emëroj si Prokuror të Përgjithshëm Z. Adriatik Llalla. Ndërmjet disa kandidaturave, përzgjodha për funksionin e Prokurorit të Përgjithshëm Z. Adriatik Llalla, pasi vlerësova eksperiencën e gjatë në strukturat e Prukurorisë, institucion në të cilin ka kryer funksione të ndryshme. Vlerësova gjithashtu zgjedhjen e tij konsensuale nga Kuvendi i Shqipërisë në pozicionin e Inspektorit të Përgjithshëm të ILDKP, institucion i cili nga partnerët tanë ndërkombëtarë është vlerësuar si i konsoliduar dhe i pavarur. Kam bindjen se kjo kandidaturë gjen gjithashtu vlerësimin dhe pranimin jo vetëm të faktorit politik, por edhe të opinionit publik”, thuhet në relacionin e kreut të shtetit.

KARRIERA
Zoti Adriatik Llalla është zgjedhur Inspektor i Përgjithshëm i Inspektoratit të Lartë të Deklarimit dhe Kontrollit të Pasurive më 09.10.2008 nga Kuvendi i Shqipërisë, me propozim të Presidentit të Republikës së Shqipërisë, dekret datë 14.07.2008. Zoti Llalla ka kryer studimet e Larta në Universitetin e Tiranës, Fakulteti Drejtësisë, Titulli Jurist. Në muajin Janar të vitit 1998 ka filluar karrierën profesionale si Oficer i Policisë Gjyqësore në Prokurorinë e Rrethit Gjyqësor Lushnje. Më pas u emërua Prokuror në këtë Prokurori detyrë në të cilën punoi nga viti 1999�]2002. Nga viti 2002�]2003 ka punuar si Prokuror në Prokurorinë e Rrethit Gjyqësor Kavajë. Në vitin 2003 është emëruar Drejtues i Prokurorisë së Rrethit Gjyqësor Fier detyrë në të cilën ka punuar deri në vitin 2005. Nga viti 2005�]2008 ka punuar si Zv.Drejtues i Prokurorisë së Rrethit Gjyqësor Tiranë. Në vitin 2006 zgjidhet anëtar i Këshillit të Prokurorisë dhe nga viti 2007�]2008 ka qënë Kryetar i Këshillit të Prokurorisë. Më datë 4 Maj të vitit 2010 zgjidhet Kryetar i Rrjetit të Ekspertëve të Integritetit, pjesë e të cilit janë institucionet përgjegjëse për parandalimin e konfliktit të interesave dhe deklarimit të pasurive për shtetet e Europës Jug�]Lindore dhe disa vende të tjera të Europës. Në vitin 2011 ka përfunduar Masterin për “Të Drejtë Penale”, në Fakultetin Juridik të Universitetit të Tiranës. Zoti Llalla ka njohuri shumë të mira në gjuhën angleze.

(e.m/BalkanWeb)

[Mike Oldfield]

A di gjo njeri, nga eshte ky Llalla?

[MaDaBeR]

Nje master ne UT, dhe njohuri shume te mira te Anglishtes (E pa mbrojtur, sepse po te qe e mbrojtur do te thuhej e ZOTERON), jane shume pak per kte post. Duhej nje njeri vizionar besoj.

[BlueBaron]

Posti i Kryeprokurorit te Republikes kerkon integritet moral dhe profesional, kurajo dhe disipline ne pune. Shpresoj qe Tiku t'i kete keto cilesi.

Persa i perket gjuheve te huaja, ka perkthyes/e me shumice ...

[POKO]

Edhe nje here, a di njeri ndonje info nga eshte ky Llalla?

Gramshiot...

[BlueBaron]

Gramshiot...

Ata nga Gramshi e quajne veten "gramshak".

[Mike Oldfield]

Gramshiot...

Po mire mer jahu, megjithe rrespektin per qytezen e Gramshit, nuk kishte ndonje qytet tjeter me ndonje QYTETAR tjeter per postin e Prokurorit te pergjithshem?! Se mos na dali ene ky si Sollaku e Ina Rama, se pastaj te shkojne ene te myten ke ura e Lanes.

[darkman]

Balkanweb: Tom Doshi "kundër" vendimit të PS-së për Prokurorin e Përgjithshëm
http://www.balkanweb.com/kryesore/1/...em-111990.html

Keto po tallin lesht me ne.. Ka 2 vjet qe Sala dhe Jozefina na e kane kane treguar mafjozin numer nje ne shqiperi, organizatorin e pucit te shtetit, kryekriminelin, qe per to s'eshte asnje tjeter pervec Tom Doshit..

Si ka mundesi qe sot po zgjedhin nje njeri qe sipas fjaleve te Doshit, qenka shume afer tij.. A duhej prokurori i ri te luftonte keto mafie dhe keta puciste, apo thjesht gjate gjithe kesaj kohe kane tallur lesht me ne??

Nuk e di, kam nje dileme te madhe

[MaDaBeR]

Llalla, një kandidaturë formalisht korrekte

Roland Lami

Për shumë analistë zgjedhja e Prokurorit të Përgjithshëm pritej të ishte një test qoftë në nivel mikro por edhe në atë makro. Në nivelin e parë aludohej se akti i ndërmarrë nga Presidenti mbi përcaktimin kohor të mbarimit të mandatit të Prokurores Ina Rama, procedura që do të ndiqej për përzgjedhjen e kandidaturës do të mjaftonin për të gjykuar mbi njëanshmërinë ose jo të këtij institucioni. Njëkohësisht, hapat e mësipërm do të përcaktonin nivelin e raporteve me qeverinë aktuale dhe ajo që është më e rëndësishmja, reagimin e LSI-së ndaj këtij procesi.

Në nivel makro, opozita shpresonte që kandidatura e propozuar nga Presidenti të ishte e tillë që të atakohej lehtësisht në sy të publikut për të ulur kredibilitetin e institucionit të Presidentit, si dhe të shërbente si një arsye më shumë për të vështirësuar dhënien e konsensusit për tri ligje që sigurojnë statusin e vendit kandidat për në BE.

Përshtypja e parë që të krijohet në këtë terren supozimesh është rëndësia që i jepet një institucioni si prokuroria dhe fatet e institucioneve të tjera të lidhura me të. Sigurisht që ky institucion merr rëndësi për aktorët politikë dhe opinion publik në përgjithësi, mirëpo duke parë që edhe në raste të tjera fatet e kreut të një institucioni politik jo pa qëllim lidhen me fatet e shumicave qeverisëse, aleancat politike të së nesërmes, thellimin ose jo të tensionit politik si dhe reagimin e mundshëm të faktorëve të rëndësishëm ndërkombëtarë, del në konkluzionin që çështjeve iu jepet më shumë rëndësi seç prezantojnë në vetvete.

Sigurisht, opozitës i intereson që te çdo veprim që ndërmerr qeveria t’i lidhë qëllimisht fatet e një institucioni me institucionet e tjera të pavarura dhe demokracinë në tërësi për të legjitimuar rëndësinë e çështjes te publiku dhe faktori ndërkombëtar. Njëkohësisht edhe mazhoranca me të njëjtën taktikë detyrohet të argumentojë formalisht, moralisht, politikisht te publiku dhe faktori i interesuar ndërkombëtar të kundërtën e pretenduar nga opozita. I gjithë ky proces mundësohet dhe amplifikohet nga media.

E parë nga kjo perspektivë, vlen të analizohet si u zhvillua ky proces dhe u arrit të përmbushen pritshmëritë e ngritura nga një pjesë e analistëve pranë së majtës.

Ndalemi në momentin formal të përzgjedhjes së kandidaturës. Pavarësisht se palët politike ndaheshin për sa i përket mbarimit të afatit të Prokurores së Përgjithshme, ishte përgjegjësi e këtyre të fundit që kur bënë ndryshimet kushtetuese të parashikonin dispozitë kalimtare për rastin e mandatit të Prokurores së Përgjithshme, siç është vepruar me institucione të ngjashme më 1998. Ose opozita si palë e interesuar të kërkonte një interpretim kushtetues me kohë, që sot të kishim një qëndrim të këtij organi për çështjen në fjalë, megjithëse hapësirat që lejon Kushtetuta për të kërkuar interpretim në mungesë të një akti apo vendimi janë të kufizuara, por jo të pamundura. Për sa kohë akte të tilla nuk u ndërmorën, është shpresuar që çështja të krijonte hapësira për t’u gjykuar politikisht ose të shpresohej për ndonjë nismë nga ana e Presidentit pas zgjedhjeve të 2013-ës. Një taktikë politike që e kemi parë edhe më parë të përdoret nga opozita.

Mirëpo, ky vakum ligjor krijon hapësirë për ushtrim diskrecioni nga ana e Presidentit dhe mundësitë për ta atakuar aktin janë shumë më të mëdha.

Në këtë situatë komplekse Presidenti bën veprimin e tij shumë mirë të kalkuluar. Zhvillon një seancë formale konsultash, veprim që pavarësisht nga motivet duhet përshëndetur pasi vendoset një traditë që mungoi për shumë kohë te paraardhësi i tij. Pra, shfrytëzoi rastin për të bërë diferencën me Z. Topi. Gjithashtu, përzgjodhi një kandidaturë që formalisht i plotëson kriteret që kërkon posti në fjalë. Më konkretisht, Z. Llalla e njeh institucionin e Prokurorisë pasi ka mbuluar disa pozicione; njëkohësisht posedon aftësi drejtuese për faktin se ka drejtuar ILDKP-në.

Nga pikëpamja politike, përzgjedh një kandidaturë që është propozuar nga paraardhësi i tij, Z. Topi, që sot është kundërshtari i mazhorancës. Duke i hequr mundësinë këtij të fundit të bëjë diferencën me drejtimin e sotëm të Presidencës, njëkohësisht e çarmatos forcën që drejton ai nga atakimi i mazhorancës për uzurpim institucionesh. Figura e Z. Llalla, për shkak të mënyrës sesi e ka drejtuar institucionin – mirë me të gjithë – parapëlqehet edhe nga forca aleate të mazhorancës si LSI dhe PDIU. Ndryshe nga çfarë aludohej këto ditë, kandidatura në fjalë siguron lehtësisht shumicën e thjeshtë në parlament.

Jo vetëm kaq, por kjo kandidaturë ka kapur në befasi edhe opozitën. Fakti që kandidatura ka qenë e propozuar nga ish-presidenti Topi, dje dhe sot kundërshtari i mazhorancës, është votuar me votat e opozitës në krye të ILDKP-së, nuk ka qenë objekt sulmi gjatë këtyre viteve për shkak të motos – mirë me të gjithë – shto dhe faktin që disa raporte ndërkombëtare kanë vënë në dukje përmirësimin e këtij institucioni, e kompleksojnë opozitën të atakojë figurën e Z. Llalla, Presidentin për zgjedhjen apo mazhorancën për uzurpim institucionesh. E vetmja që mund të bëjë është ta konsiderojë antikushtetuese kohën e zëvendësimit të Prokurores dhe vetëm kaq.

E parë me këtë sy, rasti në fjalë prezanton një figurë konsensuale që lë pak hapësirë për t’u atakuar politikisht. Mirëpo, po ta gjykojmë kandidaturën nga pikëpamja e interesit publik, pritshmëria për një performancë të ndryshme nga ajo e paraardhësve të këtij institucioni duken të pakta. Pasi eksperienca 20-vjeçare ka treguar se shpesh titullarët ose zyrtarët në karrierë shpenzojnë më shumë energji për të ndërtuar dhe mbajtur ekuilibrat me aktorë të ndryshëm politikë, sesa të mbrojnë interesin e publikut në kurriz të këtyre ekuilibrave.

Për sa kohë nuk kemi ndërtuar një traditë, kulturë apo infrastrukturë që të mund të garantojë vazhdimësinë e karrierës pa nevojën e suportit politik, mundësia për t’u përballur me figura që konsiderohen konsensuale nga ana e aktorëve politikë por jo të tillë nisur nga interesat e publikut, nuk ka gjasa të mungojë. Ky kontekst mendoj se do të rëndojë edhe në performancën e Z. Llalla. Qofsha i gabuar.

Mapo

[MaDaBeR]

Votimi për Llallën Tom Doshi kundër PS për Prokurorin e ri

Kandidatura e Adriatik Llallës për kreun e organit të akuzës ka futur “përçarjen” në grupin parlamentar socialist. Ndërsa grupi ka vendosur dje votën abstenim për Llallën, deputeti socialist Tom Doshi ka vendosur që të mos e respektojë atë dhe të votojë ‘pro’ emrit të propozuar nga Presidenti. I kontaktuar dje nga gazeta MAPO, Doshi ka pohuar se do të votonte pro për arsye sepse ai kishte votuar ‘pro’ Llallës edhe kur ky u zgjodh në krye të ILDKP-së. “Unë kam vendosur që të votoj pro kandidaturës së kryeprokurorit Adriatik Llalla. Dhe arsyeja është se kam votuar me konsensus (votë pro) kur ai u zgjodh kryetar i Inspektoratit të Lartë të Deklarimit të Pasurisë para katër viteve”, – është shprehur Tom Doshi në një prononcim për MAPO-n. Sipas tij, Llalla është treguar korrekt dhe ka zbatuar ligjin me përpikëri kur ka hetuar dy herë pasurinë e deputetit të PS. Doshi ka theksuar se Llalla është njeri me integritet dhe se ai u ka bërë thirrje dhe deputetëve të tjerë të PS-së që ta votojnë kandidaturën e tij në Kuvend.

Grupi i PS

Ndërsa vetëm mesditën e djeshme deputeti Taulant Balla dhe Fatmir Xhafaj kanë deklaruar vendimin e grupit të PS-së për të abstenuar gjatë votimit të kandidaturës së Presidentit Nishani për postin e kreut të Prokurorisë së Përgjithshme. Ky qëndrim i grupit të PS-së ka ardhur vetëm për shkak të procedurës sipas tyre antikushtetuese të Presidentit të Republikës për mbarimin e mandatit të kryeprokurores Ina Rama, ndërsa për staturën e kryeprokurorit të ri, PS nuk ka asnjë kritikë, madje kërkojnë ta shohin në lartësinë e kryeprokurores në ikje, Ina Rama. “Grupi parlamentar i PS vlerëson antikushtetues vendimin e Presidentit për ndërprerjen e mandatit të Prokurores së Përgjithshme, Ina Rama. Dekretin për zëvendësimin e saj e çmon si shkarkim de facto të prokurores në detyrë deri më 23 Maj të vitit 2013”, – është shprehur Taulant Balla. Më tej Balla theksoi se “nga ana tjetër, grupi parlamentar socialist nuk e paragjykon kandidaturën e propozuar për zëvendësimin e prokurores në detyrë, duke ia lënë kohës të provojë se zoti Adriatik Llalla do të jetë në lartësinë e sfidës së hapur për vendosjen e drejtësisë në vend, duke filluar nga ndëshkimi i përgjegjësve për vrasjet e 21 Janarit e me radhë në rrugën e betejës me kulturën e pandëshkueshmërisë. Në konkluzion, duke qenë në parim kundër procedurës, por jo kundër kandidaturës, grupi parlamentar socialist vendosi të abstenojë”, – përfundoi deklarata e Taulant Ballës nga selia rozë. Kandidatura e Llallës, ndryshe nga sa e parashikon rregullorja e Kuvendit, nuk do të kalojë në seancë dëgjimore në komisionin e Ligjeve. Burime nga Kuvendi kanë bërë të ditur se ai do të kalojë për votim direkt e në seancë. Nuk dihet ende nëse kandidatura e tij do hidhet për votim në seancën e radhës, atë të ditës së premte, pasi në të është programuar që të diskutohet buxheti në parim.

Xhafaj: Mbetet për të parë si Llalla do të përballojë presionet

PS mund t’i drejtohet Gjykatës Kushtetuese për mandatin e Kryeprokurorit të Përgjithshëm. Pas shpalljes së dekretit për emrin e ri të Prokurorit të Përgjithshëm, nënkryetari i komisionit Parlamentar të Ligjeve, Fatmir Xhafaj ka hedhur idenë e ankimimit në Gjykatën Kushtetuese. “Presidenti thyen një rekord në shkelje kushtetuese dhe i jep fuqi prapavepruese normës kushtetuese. Ky është një rast i pashembullt. Mandati i Ina Ramës, më së paku mbaron në maj dhe këtu ka vend për një gjykim kushtetues, e drejtë që mund ta ushtrojë vetë Prokurorja. Këtë nuk mund ta bëjë grupi parlamentar socialist apo një grup deputetësh, pasi Gjykata Kushtetuese, siç jeni në dijeni, me vendim të saj të mëparshëm ka kufizuar të drejtën e ankimit për raste të këtij lloji”, – deklaroi Xhafaj. Në këtë vlerësim të parë të opozitës për emrin që pritet të jetë edhe Prokurori i ri i Përgjithshëm, Fatmir Xhafaj jep konsideratat për të si drejtues i ILDKP-së, por shton se mbetet për t’u parë si drejtues i institucionit të akuzës, ku presioni dhe ndërhyrjet nga politika dhe më gjerë, janë shumë më të fuqishme. “Llalla ka një vlerësim pozitiv personal për performancën dhe qasjen institucionale, duke pasur parasysh presionet e shumta që i janë bërë në këtë funksion. Mbetet të provohet nëse ai do të marrë miratimin e Kuvendit, sa do të jetë në gjendje të përballojë presionin edhe sepse kjo qeveri ka një rekord në presione dhe ndërhyrje në punën e institucioneve”, – shtoi deputeti socialist.

Mapo