Fjala e Kryeministrit Berisha në takimin javor, të grupit parlamentar të Partisë Demokratike
Zonja Kryetare e Kuvendit
Zonja deputete
Zotërinj deputetë
Së pari, ju përshëndes përzemërsisht e ju falenderoj për të gjithë punën e madhe që keni bërë dhe po bëni për angazhimin tuaj, në zgjidhjen e problemeve të zonave tuaja elektorale dhe të qytetarëve në këto zona. Ju siguroj se qeveria mbetet e vendosur në mbështetjen e projekteve, që i japin përgjigjen më të mirë problematikës së qytetarëve, kudo që ata ndodhen.
Kjo javë është një javë e veçantë dhe sado që ka qenë një çështje debati të përditshëm, sërish mendoj se sot dhe çdo ditë tjetër, nuk mund të ketë kryefjalë tjetër dhe çështje më të rëndësishme, sesa votimi i tre ligjeve nga parlamenti shqiptar, një kërkesë kjo, e qartë, e prerë, e Komisionit Europian, për të bërë raportin shtesë për vendet anëtare, në mënyrë që të votojnë më datën 3 dhjetor të statusit të vendit kandidat për Shqipërinë.
Edhe njëherë, dua të shfrytëzoj këtë rast dhe t’i adresoj zotit Rama thirrjen e ftesën time, t’i votojmë këto ligje, sepse asnjë shqiptar dhe asnjë mik i këtij vendi nuk mund të mirëkuptojë mosvotimin dhe bllokimin e tyre në parlament. Përkundrazi, mesazhi që përcjell ky bllokim është mesazhi më negativ për vendin.
Zonja Bregu ishte në Bruksel dhe një nga parlamentarët e Komisionit për Ballkanin Perëndimor kishte deklaruara se kjo që ndodh me ju, nuk ndodh me asnjë vend tjetër dhe se nuk ka ndodhur ndonjëherë me asnjë nga vendet e rajonit. Zotëria kishte folur edhe me disa nota përçmuese, por e vërteta është se kjo që ndodh me ne, nuk ka ndodhur në ndonjë vend tjetër. Sado që ta analizojmë, nuk ka pasur forcë politike që të imagjinojë të bllokojë votimin e ligjeve që kërkohen për procesin e integrimit.
Oferta, që unë kam bërë si rrugëzgjidhje për qarkun e Fierit, është oferta më dinjitoze, më kushtetuese dhe më ligjore që mund t’i ofrohet zotit Rama dhe zotit Ruçi, i cili, mesa duket, qëndron me të drejtë vetoje në këtë çështje dhe cilido tjetër. Unë, ofertën për të vënë në mocion të gjithë këshilltarët e shumicës, e bëra si një zgjidhje, si një rrugëdalje dinjitoze për këtë problem. Kundërshtimi i tij është absolutisht, dëshmi e mungesës së plotë të vullnetit për të votuar ligjet.
Zonja dhe zotërinj deputetë
Unë i propozova zotit Rama që të kalojnë në mocion të gjithë anëtarët e shumicës të Këshillit të Qarkut të Fierit, por, nëse ai do të dojë, edhe të pakicës, duke u nisur nga praktika të iniciuara nga Partia Socialiste në bashkitë dhe komunat e Fierit dhe konkretisht:
Në datën 29.06.2012, në Komunën Dermenas, në të cilën u votëbesua Kryetari i Këshillit dhe u kërkua menjëherë të futet në rendin e ditës votëbesimi i anëtarit të qarkut nga kjo komunë. Këshilltarët e mazhorancës braktisën mbledhjen dhe çështja nuk u arrit të futej në rendin e ditës. Ajo çfarë i propozoj unë zotit Rama është që këshilltarët e mazhorancës të mos braktisin mbledhjen, por të kompletohet ajo që kanë kërkuar këshilltarët e Partisë Socialiste, për të votëbesuar anëtarët e këshillit. A ka ofertë më të ndershme se kjo?! Natyrisht, unë nuk ia siguroj dot, votat, zotit Rama. Votën nuk ia diktoj njeriu. Zoti Rama, në qoftë se në datën 29.06.2012, pas votëbesimit të Kryetarit të Këshillit, kërkove të votëbesoje përfaqësuesin në Këshillin e Qarkut, atëherë çfarë ka ndodhur tani, që ne të krijojmë këtë mundësi dhe ti nuk dëshiron?
Në datën 28.08.2012, në Bashkinë Divjakë, me praninë edhe të zotit Vangjel Ndreka dhe ish kryeministri Bashkim Fino, është bërë e njëjta tentativë që ishte bërë në datën 17.02.2012, për të futur në mocion anëtarin e Këshillit të Qarkut. Përfaqësuesit e mazhorancës kanë prishur kuorumin dhe nuk është vendosur dot.
Të gjitha këto janë të regjistruara, janë me procesverbal.
Unë i them zotit Rama se në Divjakë dhe ne çdo njësi të qeverisjes vendore, mazhoranca është e gatshme të pranojë procesin e votëbesimit, jo me braktisje kuorumi, por me votim. Unë votën nuk mund t’ia siguroj.
Në datën 26.01.2012, në Komunën Bubullimë është tentuar votëbesimi i anëtarit të Këshillit të Qarkut dhe me vendimin 25 është zgjedhur Alban Mësonjësi, përfaqësues i Partisë Socialiste. Ne si forcë politike kemi pranuar mocionin dhe nuk e kemi paditur në gjykatë.
Në datën 24.08.2012, në komunën Fier-Shegan, në mbledhjen e Këshillit është kërkuar që të votëbesohet anëtari i Këshillit të Qarkut, por anëtarët e shumicës nuk kanë lejuar që të votohet, sepse nuk ka pasur kuorum.
Unë e garantoj zotin Rama se në Fier-Shegan dhe në çdo komunë nuk do këtë praktika të tilla, por do të ketë votëbesim me votë. Natyrisht, këshilltar qarku do të jetë ai, që do marrë votat dhe Qarkun do humbasë ai, që do mbetet në pakicë.
Edhe njëherë të dashur qytetar dhe qytetare,
A mund të ketë praktike më ligjore, më të drejtë, por edhe me dinjitoze se ajo që unë i ofroj zotit Rama? Unë i ofroj zotit Rama, atë praktikë, për të cilën ai ka mbledhur firmat, për ta praktikuar në Dermenas, në Bashkinë e Divjakës, e ka praktikuar në Komunën Bubullimë dhe ka dashur ta praktikojë në Komunën Fier-Shegan. Por zoti Rama nuk pranon këtë, sepse zoti Rama dhe zoti Ruçi, i cili është edhe arkitekti i kësaj situate, nuk e pranojnë, pasi e dinë se nuk fitojnë. Por ne nuk mund t’jua heqim të drejtën e votës, njerëzve. Nenin 32 dhe nenin 52 të qeverisjes vendore, ne nuk mund t’i ndryshojmë dhe nuk mund t’i shkelmojmë për këtë.
Ndaj unë i bëj thirrje zotit Rama, të pranojë propozimin që i kam bërë, duke dëshmuar se ngrihet - të themi atë që është - mbi interesat e Gramoz Ruçit. Ky njëri, i cili është përgjegjës për Fierin, nga Partia Socialiste, i di të gjitha këto. Unë nuk mund të them se përfaqësuesi im nuk i di ato që ndodhin në Fier. Si mund të gjesh vullnet dhe shpirt për të bllokuar në këtë 100 vjetor, në këtë vit jubilar të historisë tonë! Mund të gjesh precedentë të tilla, por historia është për të nxjerrë mësime. Historia është një e shkuar, më së shumti dhe më shumë se çdo gjë tjetër është për të nxjerrë mësime, për të mos përsëritur gabime të rënda. Kë mund të fajësojnë shqiptarët, kur kryetari i partisë kryesore opozitare nuk pranon të kryejë detyrimin e tij më madhor kushtetues, votimin në parlament të ligjeve, për të cilat, ne jemi të hapur për çdo amendim. Të votosh në parlament është detyrim kushtetues.
Edhe njëherë i bej thirrje, pasi ditën e enjte është afati i fundit. Ligjet janë gati. Le të ulen sëbashku, përfaqësuesit e grupeve të komisioneve dhe në prag të këtij përvjetori të madh, por edhe në prag të një vendimi që pritet, në datën 20, nga Komisioni Europian, të përmbushim detyrimin tonë ndaj vendit. Nuk ka asgjë më të pa kuptimtë! Unë e kuptoj se zoti Rama personalizon gjërat dhe bën shumë gabim, sepse personalizimi nuk i shërben aspak. Ai beson se Shqipëria nuk duhet ta marrë statusin, sepse në këtë mënyrë fiton shumë, kryeministri dhe qeveria. Por shqiptarët, kur shohin se votojmë sëbashku, dinë ta dallojnë. Kreditet, ata ia japin të gjitha forcave politike, kapital politik fiton Shqipëria. Natyrisht fitojnë edhe ata që bëjnë detyrën e tyre. Nuk krijohet kurrë kapital politik, duke dëmtuar interesin jetik kombëtar. Nuk mund ta errësosh me asnjë lloj zhurme, dëmin e pallogaritshëm që i bën vendit, duke mos votuar tre ligjet. Le të urojme dhe shpresojmë në më të mirën.
E theksoj se oferta për Fierin është identike dhe pa asnjë ndryshim me ato iniciativa që ju, zoti Rama, keni ndërmarrë në Komunën Dermenas, Komunën Divjakë, Komunën Bubullimë, Komunën Fier-Shegan. Nëse ka ndryshuar mazhoranca në Këshill, kjo është një ndodhi e zakontë, në një sistem të lirë demokratik.
Pak kohë më parë, isha në një vizitë në Rumani. Në të njëjtën kohë ishte edhe zoti Rama, në Kongresin e partisë në pushtet, atje. Por zoti Ponta është në pushtet, sepse një pjesë e mirë e deputetëve të shumicës i kishin hequr votëbesimin qeverisë së tyre. Ata i kishin hequr votëbesimin qeverisë së zotit Emin Boc, i cili ishte i qendrës së djathtë, pasi nuk ishin dakord me shkurtimin e rrogave, pensioneve dhe masave të tjera dhe pa shkuar në zgjedhje, Rumania u bë me një kryeministër të ri që i përkiste të majtës rumune. Ky është rregulli i demokracisë. Shumica zgjedh, përcakton.
Për këtë çështje, janë shumë vendime gjykatash, por Gjykata e Lartë ka përcaktuar se deri sa të trajtohet çështja në themel, të gjitha aktet ligjore të Kryetarit të Qarkut janë të vlefshme, ligjore dhe të dobishme. Ky vendim vjen pas padisë që ka bërë pretendenti i zotit Rama, për Kryetar Qarku. Por ka edhe një rrugë të shkurtër, plotësisht ligjore, plotësisht politike, plotësisht kushtetuese: rruga e mocionit, të cilin zoti Rama e ka tentuar pesë herë. Ndaj e ftoj të bëjmë mocione në të gjitha komunat dhe bashkitë dhe jo të mbajmë vendin peng. Le të urojmë që e enjtja të shndërrohet në një ditë, ku mbarë shqiptarët të marrin mesazhin e rëndësishëm të përmbushjes së detyrimeve tona, të kërkuara nga Komisioni Europian, në mënyrë që Shqipëria të marrë statusin e vendit kandidat. Nuk dua të polemizoj, por unë mendoj se është në detyrimin tonë më madhor. Si do të mund ta shohim veten, në këtë 100 vjetor, kur një palë nuk pranon të votohen tre ligje dhe kjo, jo se po i mohohen amendamentet që ka paraqitur, por sepse beson se duke bllokuar, fiton më shumë kapital politik.
Falenderoj mediat që e ndoqën me kaq interes këtë takim. Nuk do të ndalem në çështje të tjera, pasi nuk ka asgjë më të rëndësishme, se votimi ditën e enjte, i këtyre tre ligjeve. Ndërkohë axhenda e kremtimeve të 100 vjetorit të pavarësisë së Shqipërisë po ecën sipas parashikimeve. Sot u festua dita e themelimit të Akademisë së Shkencave, por sot pasdite ka një ngjarje e madhe. Pas shekujsh vjen tek shqiptarët, libri i parë në gjuhën e tyre, formula e pagëzimit në Mesharin e Gjon Buzukut. Kjo është një ngjarje shumë e madhe për qytetarët e këtij vendi. Meshari vjen në kuadër të 100 vjetorit, nga biblioteka e Vatikanit, ku mbahet në ruajtje prej shekujsh, ky dokument themelor i gjuhës sonë. Faleminderit!”
12/11/2012
http://www.km.gov.al/?fq=brenda&m=news&lid=17310
Përgjigju Duke Cituar
Postuar më parë nga pLuS_mInuS
Krijoni Kontakt